ବିଶ୍ୱଜିତ୍ ଆଉ ସ୍ୱର୍ଣ୍ଣଲତା ଦୁଇ ଜଣ ଭାରତୀୟ ପ୍ରଶାସନିକ ସେବା ଅଧିକାରୀ।LBSNAA ,ମସୌରୀରେ ପ୍ରଶିକ୍ଷଣ ବେଳେ ଦୁହିଁଙ୍କ ଦେଖାସାକ୍ଷାତ ଓ ପରେ ପ୍ରେମ ତଥା ବିବାହ ମଧ୍ୟ ହୋଇଥିଲା ।ପ୍ରଶିକ୍ଷଣ ପରେ ଦୁହିଁଙ୍କ ନିଯୁକ୍ତି ଭିନ୍ନଭିନ୍ନ ରାଜ୍ୟରେ ହୋଇଥାଏ । ଦୁହେଁ ସବୁବେଳେ ରାତିରେ ଭିଡିଓ କଲ୍ କରି କଥା ହୁଅନ୍ତି ,ନିଜ ଅଫିସ୍ କାମ ସାରିବାପରେ ।

ସେଦିନ ଦିଲ୍ଲୀରେ କୌଣସି ସମ୍ମିଳନୀ ପାଇଁ ଉଭୟ ନିଜନିଜ ରାଜ୍ୟରୁ ପ୍ରତିନିଧି ହୋଇ ଆସିଥିଲେ । ସମ୍ମିଳନୀ ସରୁସରୁ ସନ୍ଧ୍ୟା ୭ ହେଲାଣି ।ପରଦିନ ରାଜ୍ୟରେ ,ରାଜ୍ୟପାଳଙ୍କ ସଭା ଯୋଗୁଁ ସେଦିନ ସ୍ଵର୍ଣ୍ଣଲତାକୁ ରାତିରେ ବିମାନ ଯୋଗେ ଫେରିବାର ଥିଲା । ସ୍ଵର୍ଣ୍ଣଲତା ଆଉ ବିଶ୍ୱଜିତ୍ ପାଖରେ ଦେଖା ହେବା ପାଇଁ ଥିଲା ମାତ୍ର ୧୫ ରୁ ୨୦ ମିନିଟ ସମୟ । ତା ପରେ ସ୍ୱର୍ଣ୍ଣଲତାକୁ ବିମାନରେ ଉଡାଣ ପୂର୍ବର ସୁରକ୍ଷାଯାଞ୍ଚ ପ୍ରକ୍ରିୟା ପାଇଁ ବାହାରିବାକୁ ପଡିବ ।

ଇନ୍ଦିରାଗାନ୍ଧୀ ଆନ୍ତର୍ଜାତୀୟ ବିମାନବନ୍ଦରରେ ଦୁହେଁ ଦେଖା ହେବାକୁ ଆସିବା ବେଳେ ସ୍ୱର୍ଣ୍ଣ ଦୌଡ଼ିଦୌଡ଼ି ଆସି ବିଶ୍ଵ ସାମ୍ନାରେ ରହିଗଲା ।ଆଉ କହିଲା ,"କଣ ଏମିତି ଦେଖା ଯାଉଛ , କଳା ଦିଶୁଛ ,କାମ କରିକରି ଖିଆପିଆ ଭୁଲିଗଲଣି ବୋଧେ ..."

ତାର ଅବିରତ କହିଚାଲୁଥିବା ଓଠରେ ନିଜ ଆଙ୍ଗୁଠି ଦେଇ ,ତାକୁ ଦୁଇ ହାତରେ ଧରି ବିଶ୍ଵ ନିଜ ଆଡକୁ ଟାଣି ଆଣି , ଆଲିଙ୍ଗନ କରିବାକୁ ଲାଗିଲା ଓ କହିଲା ," କିଛି କୁହନି ,ଏହି ସମୟ ଆଉ ଆସିବନି ,ମତେ ତମ ଭିତରେ ହଜିବାକୁ ଦିଅ ,କେବେଠୁ ତମକୁ ଟିକେ ନିଜ ଅତି ପାଖରେ ପାଇନି ।କଥା ଆମେ ଫୋନ୍‌ରେ ହୋଇଯିବା ।"

ସ୍ୱର୍ଣ୍ଣ ମଧ୍ୟ ନିଜକୁ ବିଶ୍ଵର ବକ୍ଷରେ ସମର୍ପି ଦେଇ ତାକୁ ଅତି ଜୋର୍‌ରେ ଧରି ଆଲିଙ୍ଗନକୁ ଦୃଢ଼ କରିଥିଲା ।ସେହି ଭଳି ଅବସ୍ଥାରେ କିଛି ସମୟ ବିତି ଯାଇଥାଏ ଓ ସେହି ଭିତରେ ବାରମ୍ବାର ସ୍ଵର୍ଣ୍ଣର ଫୋନ୍ ବାଜିବା ଶୁଣି ବିଶ୍ଵ ତାକୁ ଉଠେଇବାକୁ କହିଲା ।ସ୍ଵର୍ଣ୍ଣ କିନ୍ତୁ ନା ବୋଲି କହି,ବିଶ୍ଵର ବାହୁରେ ନିଜକୁ ହଜାଇ ଦେଇଥାଏ ।

ସେହି ସମୟରେ ସ୍ୱର୍ଣ୍ଣର ଅଧସ୍ତନକର୍ମୀ ଆସିବାର ଦେଖି ,ଦୁଇଜଣ ଆଲିଙ୍ଗନ ଛାଡ଼ି , ହାତରେ ହାତ ଧରି ଠିଆ ହେଲେ । ଅଧସ୍ତନକର୍ମୀ କହିଲା ," ମେଡ଼ମ୍ ,ଆପଣ କଲ୍ ଉଠାଉନାହାନ୍ତି ,କାଲି ରାଜ୍ୟପାଳଙ୍କ ଅସୁସ୍ଥତା ଯୋଗଁ ସଭା ରଦ୍ଦ ହୋଇଛି ବୋଲି ଜଣେଇବାକୁ ଆସିଥିଲି ,ମୁଁ ସେପଟେ ଟିକେ ଯାଉଛି " ଏତକ କହି ସେ ଚାଲିଗଲା ।

ବିଶ୍ଵ : ତେବେ ଆଜି ତୁମର ଯିବା ବି ବନ୍ଦ ।

ସ୍ୱର୍ଣ୍ଣ : (ହସିହସି ) ହଁ , ମୁଁ ତ ଚାହେଁ ସବୁବେଳେ ତୁମ ବାହୁ ବନ୍ଧନରେ ରହିବି ,କେବେ ବି ତୁମଠାରୁ ଦୂରକୁ ଯିବିନାହିଁ।

ଦୁହେଁ ପୁଣି ଆଲିଙ୍ଗନ କରି ସମୟକୁ ଉପଭୋଗ କରୁଥିଲେ ।ସେମାନଙ୍କ ମାସମାସର ବିରହ ପରେ ପ୍ରେମଭରା ଆଲିଙ୍ଗନର ଉଷ୍ମତା ଆଗରେ ଦିଲ୍ଲୀର ଶୀତ ହାର୍ ମାନିବାରେ ଲାଗିଥିଲା ।

✍🏻 ଅଂଶୁମାନ ମହାନ୍ତି

ତା ୧୨ ଫେବୃଆରୀ ୨୦୨୪ ରିଖ

ଆଲିଙ୍ଗନ ଦିବସ

ମାସମାସର ବିରହ ପରେ ପ୍ରେମଭରା ଆଲିଙ୍ଗନର ଉଷ୍ମତା ଆଗରେ ଶୀତ ବି ହାର୍ ମାନିବାରେ ଲାଗିଥିଲା