ସୁନ୍ଦର ଜୀବନର ମାପକାଠି ସୁନ୍ଦର ସ୍ୱାସ୍ଥ୍ୟ ଏବଂ ସେଇ ସୁନ୍ଦର ସ୍ୱାସ୍ଥ୍ୟ ପାଇଁ କ୍ରୀଡା ଅତ୍ୟନ୍ତ ଆବଶ୍ୟକ। କ୍ରୀଡା କେବଳ ସ୍ୱାସ୍ଥ୍ୟ ଗଢିବାରେ ସହାୟକ ତାହା ନୁହଁ, ଏହା ମନକୁ ଉଲ୍ଲାସରେ ଭରିଦେବାର ଏକ ମାଧ୍ୟମ ମଧ୍ୟ।

ଓଡିଶା, ମୋ ରାଜ୍ୟ, ଜହିଁ ପବନ ଗୀତ ଗାଏ, ତାର ଶସ୍ୟ ଶ୍ୟାମଳ ଖେତ କଥା କୁହେ, ସେଇ ରାଜ୍ୟ ରେ ଭରି ରହିଛି ଅନେକ ଅପୂର୍ବ ପ୍ରତିଭା।

କ୍ରୀଡା ତ ମାତ୍ର ଏକ ଅଂଶ ଯେଉଁ କ୍ଷେତ୍ରରେ ଓଡିଶା ଆଣିଛି ଅନେକ ଗୌରବ। ଓଡିଶା ର ଉନ୍ନତି ରେ ସେଇ ସବୁ କ୍ରୀଡାବିତ୍ ପ୍ରତିଭା ମାନଙ୍କର ଅବଦାନ ନିଶ୍ଚୟ ଏକ ପ୍ରମୁଖ ଭୂମିକା ଗ୍ରହଣ କରେ।

କ୍ରୀଡା ଶୁଣିଲେ ମନରେ ଶାରୀରିକ ଶକ୍ତି ର ଏକ ଛବି ଆଙ୍କି ହୋଇଯାଏ, ମନେ ହୁଏ କେବଳ ପୁରୁଷ ହିଁ କ୍ରୀଡା କ୍ଷେତ୍ରରେ କୌଶଳ ହାସିଲ କରିପାରନ୍ତି, କିନ୍ତୁ ଏହା ଯେ ସମ୍ପୂର୍ଣ୍ଣ ମନର ଭ୍ରମ ତାହା ପ୍ରମାଣ କରି ଦେଖେଇଛନ୍ତି ନାରୀ ଶକ୍ତି ମାନେ।

ନାରୀ ଯେ ସବୁ କ୍ଷେତ୍ରରେ ପୁରୁଷ ଙ୍କ ସହ ସମାନ ତାହା ସେମାନେ କ୍ରୀଡା ଜଗତରେ କୀର୍ତ୍ତିମାନ ସ୍ଥାପନ କରି ନିଜକୁ ଅନ୍ୟ ଆଗରେ ପ୍ରମାଣିତ କରିପାରିଛନ୍ତି।

ଓଡ଼ିଶା ର ସେଇ ମୁଖ୍ୟ କିଛି ନାରୀ(ମହିଳା) କ୍ରୀଡାବିତ୍:-

(୧) ଦୂତୀ ଚାନ୍ଦ:

୧୯୯୬ ମସିହା ଫ୍ରେବୁଆରି ମାସ ୩ ତାରିଖରେ ଓଡିଶା ରାଜ୍ୟର ଯାଜପୁର ଜିଲ୍ଲା ସ୍ଥିତ ଗୋପାଳପୁର ଗ୍ରାମର ଚକ୍ରଧର ଚାନ୍ଦ ଏବଂ ଅଖୁଜି ଚାନ୍ଦ ଙ୍କ କୋଳରେ ଜନ୍ମ ଗ୍ରହଣ କରିଥିଲେ ଓଡିଶାର ଜଣାଶୁଣା କ୍ରୀଡାବିତ୍ ଦୂତୀ ଚାନ୍ଦ। ଗରିବ ତନ୍ତୀ ପରିବାର ରେ ଜନ୍ମ ହେଇ ମଧ୍ୟ ଓଡିଶା କୁ ଗର୍ବ ଏବଂ ଗୌରବ ଆଣି ଦେଇଛନ୍ତି ଚାନ୍ଦ। ସେ ହେଉଛନ୍ତି ଭାରତର ପ୍ରଥମ ସ୍ପ୍ରିଂଣ୍ଟର ଯିଏ କି ୨୦୧୯ ମସିହାରେ ସ୍ଵର୍ଣ୍ଣ ପଦକ ହାସଲ କରିଥିଲେ ୧୦୦ ମିଟର ଦୌଡରେ, ମାତ୍ର ୧୧.୩୨ ସେକଣ୍ଡ ରେ ସେ ଦିଆଯାଇଥିବା ଆହ୍ଵାନ କୁ ସମ୍ପୂର୍ଣ୍ଣ କରିଥିଲେ। ସେ କେବଳ ସ୍ଵର୍ଣ୍ଣ ପଦକ ଅର୍ଜନ କରିଥିଲେ ତାହା ନୁହେଁ, ସେ ଓଡ଼ିଶା ତଥା ଭାରତ ପାଇଁ ଅନେକ ରୌପ୍ୟ ଏବଂ କଂସା ପଦକ ମଧ୍ୟ ହାସଲ କରିଛନ୍ତି। କ୍ରୀଡା ପ୍ରତି ତାଙ୍କ ସମର୍ପଣ ନିଶ୍ଚିତ ଭାବରେ ଓଡିଶାକୁ ସୁନାମ ପ୍ରଦାନ କରିଛି।

(୨) ସସ୍ମିତା ମଲ୍ଲିକ୍:

ଓଡିଶା ରାଜ୍ୟ ସ୍ଥିତ କେନ୍ଦ୍ରପଡା ଜିଲ୍ଲା ଆଳି ଗ୍ରାମରେ ୧୯୮୯ ମସିହାର ଏପ୍ରିଲ ୧୦ ତାରିଖରେ ଜନ୍ମ ଗ୍ରହଣ କରିଥିଲେ ସସ୍ମିତା ମଲ୍ଲିକ୍। ସେ ପ୍ରଥମ ଥର ପାଇଁ ଭାରତ ପକ୍ଷରୁ ୨୦୦୭ ମସିହାରେ ଆନ୍ତର୍ଜାତିକ ଫୁଟବଲ ଟୁର୍ଣ୍ଣାମେଣ୍ଟ ଖେଳିଥିଲେ। ସେ ଅନେକ ଥର ମଧ୍ୟ ଭାରତର ମହିଳା ଫୁଟବଲ ଦଳ କୁ ପ୍ରତିନିଧିତ୍ଵ କରିଛନ୍ତି। ସେ ଭାରତୀୟ ମହିଳା ଫୁଟବଲ ଦଳର ବାମପନ୍ଥୀ ଖେଳାଳି ଭାବରେ ଖେଳି ଅନେକ ସୁନାମ ଅର୍ଜନ କରିଛନ୍ତି। ୩୮ ମ୍ଯାଚ ରେ ୪୦ ଟି ଗୋଲ ସ୍କୋର କରି ସେ ଭାରତର ଦ୍ଵିତୀୟ ସର୍ବୋତ୍ତମ ଗୋଲ ସ୍କୋରର୍ ଭାବରେ ବିଖ୍ୟାତ ହୋଇପାରିଛନ୍ତି। ଲକ୍ଷ୍ୟ ସାଧନ ର ଇଚ୍ଛା ଏବଂ ଅର୍ଜୁନ ପରି ଲକ୍ଷ୍ୟ ନେଇ ଭାରତରେ ସେ ଅନେକ କିର୍ତ୍ତୀମାନ ହାସଲ କରିଛନ୍ତି।

(୩) ଶ୍ରୀୟଙ୍କା ଷଡ଼ଙ୍ଗୀ:

ପିତା ସୀତାଂଶୁ ଷଡଙ୍ଗୀ ଏବଂ ମାତା ସୁଧା ଷଡଙ୍ଗୀଙ୍କ ଓଡ଼ିଶାର ସମ୍ବଲପୁର ସ୍ଥିତ ଘରେ ୧୯୯୫ ମସିହା ଜାନୁଆରୀ ୧୦ ତାରିଖରେ ଜନ୍ମ ଗ୍ରହଣ କରିଥିଲେ ଶ୍ରୀୟଙ୍କା ଷଡ଼ଙ୍ଗୀ। ବନ୍ଧୁକ ଚାଳନାରେ ସିଦ୍ଧହସ୍ତ କରିଥିବା ଏଇ ପ୍ରତିଭା ଓଡିଶା ତଥା ଭାରତ କୁ ଆଣିଦେଇଛନ୍ତି ଅନେକ ସମ୍ମାନ। ସେ ଭାରତ ପାଇଁ ତିନୋଟି ସ୍ଵର୍ଣ୍ଣ ପଦକ, ଛଅଟି ରୌପ୍ୟ ପଦକ ଏବଂ ତିନୋଟି କଂସା ପଦକ ହାସଲ କରି ଗର୍ବ ଏବଂ ଗୌରବ ସାଜିଛନ୍ତି। ସେ ମଧ୍ୟ ୨୦୧୪ ମସିହାରେ ପରିଚିତ ହେଇଥିଲେ ଓଡିଶା ସରକାରଙ୍କ ଦ୍ଵାରା କ୍ରୀଡା ଜଗତର ଏକ ସମ୍ମାନନୀୟ ପୁରସ୍କାର ଗ୍ରହଣ କରି ଯାହା ଏକଲବ୍ୟ ପୁରସ୍କାର ରୂପରେ ନାମିତ। ତାଙ୍କ ସହନଶୀଳତା ଏବଂ ଧର୍ଯ୍ୟ ଶକ୍ତି ପାଇଁ ସେ ଆଜି ଏତେ ଉପରକୁ ଆସି ପାରିଛନ୍ତି ଯାହା ଓଡ଼ିଶା ପାଇଁ ଗର୍ବର ବିଷୟ।

(୪) ସୁମିତ୍ରା ନାୟକ:

ନାୟକ ବଂଶର କୂଳପ୍ରଦୀପ ହୋଇ ୨୦୦୦ ମସିହାର ମାର୍ଚ ମାସ ୮ ତାରିଖରେ ଓଡିଶା ର ଯାଜପୁର ସ୍ଥିତ ଡ଼ୁବୁରୀ ଗ୍ରାମରେ ଜନ୍ମ ଗ୍ରହଣ କରିଥିଲେ ସୁମିତ୍ରା ନାୟକ। ଜନ୍ମ ହେବାପରେ ପାରିବାରିକ କଳହ ଏବଂ କିଛି ପ୍ରତିକୂଳ ପରିସ୍ଥିତି ପାଇଁ ସେ ଚାଲିଆସିଥିଲେ ରାଜଧାନୀ ଭୁବନେଶ୍ଵର। ଭୁବନେଶ୍ବର ସ୍ଥିତ କିସ୍ ବିଶ୍ୱବିଦ୍ୟାଳୟ ଦେଇଥିଲା ତାଙ୍କ ଉଡିବାର ଇଚ୍ଛାକୁ ପର। ଅନେକ ବର୍ଷର ପ୍ରଶିକ୍ଷଣ ପରେ ସେ ପ୍ରଥମ ଥର ପାଇଁ ୨୦୦୮ ମସିହାରେ କିସ୍ ରେ ରଗବୀ ଖେଳିଥିଲେ। ସେ ୨୦୧୪ ରେ ୧୩ ବର୍ଷ ରୁ କମ୍ ମହିଳା ରଗବୀ ବିଶ୍ୱକପ୍ ପାଇଁ ଖେଳିଥିଲେ। ସେ ମଧ୍ୟ ୨୦୧୬ ଏବଂ ୨୦୧୯ ଏସିଆ ମହିଳା ରଗବୀ ଚାମ୍ପିଅନସିପ ରେ କଂସା ପଦକ ହାସଲ କରି ଭାରତ ପାଇଁ ଗର୍ବ ଏବଂ ଗୌରବ ଆଣିଦେଇଥିଲେ। ସେ ମଧ୍ୟ ଏସିଆ ସାତ ଜଣିଆ ରଗବୀ ଦଳ ର ଅଂଶ ଥିଲେ ଯାହାକି ୨୦୧୯ ମସିହାରେ ରୌପ୍ୟ ପଦକ ହାସଲ କରିଥିଲା। ତାଙ୍କ ମନର ସାହାସ ଏବଂ ପରିସ୍ଥିତି କୁ ସାମ୍ନା କରିବାର ଇଚ୍ଛା ତାଙ୍କୁ ଏବଂ ଓଡିଶା କୁ ସୁନାମ ଆଣିଦେଇଛି।

(୫) ପଦ୍ମିନୀ ରାଉତ:

ଡଃ. ଅଶୋକ କୁମାର ରାଉତ ଙ୍କ ଔରସରୁ ଓଡିଶା ର ବଡ଼ମ୍ବା ଗ୍ରାମରେ ୧୯୯୪ ମସିହା ଜାନୁଆରୀ ୫ ତାରିଖରେ ଜନ୍ମଗ୍ରହଣ କରିଥିଲେ ପଦ୍ମିନୀ ରାଉତ। ବାପାଙ୍କର ଚଲାପଥ କୁ ଅନୁସରଣ କରି ୯ ବର୍ଷ ବୟସରୁ ଆରମ୍ଭ କରିଥଲେ ଚେସ୍। ଅତି କମ୍ ବୟସରେ ଦକ୍ଷତା ହାସଲ କରି ପାଲଟିଲେ "ଚେସ୍ ତାରକା ପଦ୍ମିନୀ ରାଉତ" । ସେ ଭାରତରେ ମହିଳା ଚେସ୍ ଗ୍ରାଣ୍ଡମାଷ୍ଟର ଏବଂ ସାରା ବିଶ୍ୱରେ ବିଶ୍ଵ ଚେସ୍ ମାଷ୍ଟର ଭାବରେ ପ୍ରସିଦ୍ଧ ଲାଭ କରିଛନ୍ତି। ସେ କ୍ରମଶଃ ୫ ଥର ଜାତୀୟ ମହିଳା ପ୍ରିମିୟର ଚେସ୍ ଚାମ୍ପିୟନସିପ୍ ଜିତି ଭାରତ ତଥା ଓଡିଶା ର ନାଁ ବିଶ୍ଵରେ ପରିଚିତ କରେଇ ପାରିଛନ୍ତି। ସେ ଅନେକ ସ୍ଵର୍ଣପଦକ, ରୌପ୍ୟ ପଦକ ଏବଂ କଂସା ପଦକ ର ଅଧିକାରୀ ହୋଇପାରିଛନ୍ତି। ସେ ଓଡ଼ିଶାରେ କ୍ରୀଡା କ୍ଷେତ୍ରରେ ଏକଲବ୍ୟ ପୁରସ୍କାର ରେ ମଧ୍ୟ ସମ୍ମାନୀତ ହେଇଛନ୍ତି। ମାନସିକ ଶାନ୍ତି ଏବଂ ଦକ୍ଷତା ଯେ ଜୀବନ ସଫଳତା ର ଚାବିକାଠି ହେଇପାରେ ତାହା ସେ ବିଶ୍ଵ ଆଗରେ ପ୍ରମାଣିତ କରିପାରିଛନ୍ତି।

ଓଡିଶା ପାଇଁ ଏଇ ସମସ୍ତଙ୍କର ଅବଦାନ ନିଶ୍ଚୟ ରୂପ ରେ ପ୍ରଂଶସା ଯୋଗ୍ୟ। ପରନ୍ତୁ କେବଳ ପ୍ରସଂଶା କି ସମ୍ମାନ ତାଙ୍କ ଅବଦାନ ପାଇଁ ଯଥେଷ୍ଟ ତାହା ସମ୍ପୂର୍ଣ୍ଣ ରୂପେ ଭୁଲ୍। ତାଙ୍କ ଉତ୍ସର୍ଗୀକୃତ ଏବଂ ପ୍ରତିବଦ୍ଧତା ଭାବ କୁ ଅନୁସରଣ କରିବା ଏବଂ ତାଙ୍କ ପରି ହୋଇ ଗଢି ଉଠିବା ହିଁ ବୋଧ୍ ହୁଏ ତାଙ୍କୁ ସମ୍ମାନିତ କରିବାର ଏକ ଛୋଟ ପ୍ରୟାସ ହୋଇପାରିବ।

©ସତ୍ୟବ୍ରତ ସେନାପତି

ଓଡ଼ିଶାର ୫ ମୁଖ୍ୟ କ୍ରୀଡାବିତ୍

କ୍ରୀଡ଼ା କ୍ଷେତ୍ରରେ ନାରୀର ଅବଦାନ... ଆପଣଙ୍କ ମତାମତ ଅପେକ୍ଷାରେ...