।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 1

*ଶ୍ରୀ ପତିତପାବନ ମହାପ୍ରଭୁ* *Part 1*

👉 ସ୍ଵୟଂ ଶ୍ରୀଜଗନ୍ନାଥ ମହାପ୍ରଭୁ ହେଉଛନ୍ତି ଶ୍ରୀ ଶ୍ରୀ ପତିତପାବନ ମହାପ୍ରଭୁ ।

👉 ଶ୍ରୀ ପତିତପାବନ ମହାପ୍ରଭୁ ହେଉଛନ୍ତି ଶ୍ରୀ ଜଗନ୍ନାଥଙ୍କର ଅବିକଳ ନକଲ ଓ ଏକକ ବିଗ୍ରହ । ଶ୍ରୀଜଗନ୍ନାଥଙ୍କ ବିଗ୍ରହର ପ୍ରତିରୂପ ଭାବେ ଶ୍ରୀ ପତିତପାବନ ମହାପ୍ରଭୁଙ୍କୁ ଅର୍ଜନା କରାଯାଏ ।

👉 ଶ୍ରୀମନ୍ଦିର ପ୍ରବେଶ ପଥରେ ଅବସ୍ଥିତ ମନ୍ଦିରାକୃତି ଦ୍ଵାରକକ୍ଷ ପତିତପାବନ ଗୁମୁଟ ଆବେଗ, ଭାବନା ଓ ଭାବପ୍ରବଣତାର ଏନ୍ତୁଡ଼ିଶାଳ l

👉 ସିଂହଦ୍ଵାର ଗୁମୁଟ ଭିତରେ ଉତ୍ତର ପିଣ୍ଡା ଉପରେ ପୂର୍ବାଭିମୁଖ ହୋଇ ଶ୍ରୀ ପତିତପାବନ ମହାପ୍ରଭୁ ବିରାଜମାନ କରିଛନ୍ତି ।

👉 ଅରୁଣସ୍ତମ୍ଭ ସମ୍ମୁଖରେ ସିଂହଦ୍ଵାର ଭିତରେ ପ୍ରବଶେ କଲେ ପ୍ରଥମେ ଡାହାଣ ପାର୍ଶ୍ବରେ ଶ୍ରୀ ପତିତପାବନ ମହାପ୍ରଭୁ ଦୃଶ୍ୟମାନ ହୁଅନ୍ତି ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 2

*ଉଦ୍ଧାରକର୍ତ୍ତା ସ୍ୱୟଂ ଶ୍ରୀ ପତିତପାବନ ମହାପ୍ରଭୁ* *Part 1*

👉 ଶ୍ରୀ ଶ୍ରୀ ପତିତପାବନ ମହାପ୍ରଭୁ ପତିତଜନଙ୍କୁ ଉଦ୍ଧାର କରିବା ନିମନ୍ତେ ସିଂହଦ୍ଵାର ଗୁମୁଟରେ ଦେଉଛନ୍ତି।

👉 ରୋଗୀ, ମୁମୂର୍ଷୁ, ବୃଦ୍ଧବୃଦ୍ଧା, ଛୁତିକିଆ, ମୁତିକିଆ ଇତ୍ୟାଦିରେ ଅଶୌଚ ବ୍ୟକ୍ତି ଓ ଅଣହିନ୍ଦୁମାନେ ଯେଉଁମାନେ ଭିତରକୁ ପ୍ରବେଶ କରିପାରନ୍ତି ନାହିଁ, ସେମାନେ ପତିତପାବନଙ୍କୁ ଦର୍ଶନ କରନ୍ତି |

👉 ପାପୀ, ତାପୀ, ଅହଙ୍କାରୀ ବ୍ୟକ୍ତି, ଦୁରାରୋଗରେ ପୀଡିତ ପ୍ରଭୃତିଙ୍କୁ ପତିତ କୁହାଯାଏ ।

👉 ସୁତରାଂ ଏହି ପତିତଜନମାନେ ଗୁମୁଟ ଭିତରୁ ଶ୍ରୀ ଶ୍ରୀ ପତିତପାବନ ମହାପ୍ରଭୁଙ୍କୁ ଦର୍ଶନ କରି ନିଜକୁ ଅହୋଭାଗ୍ୟ ମନେ କରିଥା’ନ୍ତି ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 3

*ଉଦ୍ଧାରକର୍ତ୍ତା ସ୍ୱୟଂ ଶ୍ରୀ ପତିତପାବନ ମହାପ୍ରଭୁ* *Part 2*

ସ୍ଵୟଂ ଗଜପତି ମହାରାଜ ପୁରୁଷୋତ୍ତମ ଦେବ ତାଙ୍କର ‘ମୁକ୍ତି ଚିନ୍ତାମଣି’ ଗ୍ରନ୍ଥରେ ପତିତପାବନଙ୍କ ଉଦ୍ଦେଶ୍ୟରେ ବିନମ୍ର ଭକ୍ତି ଜଣାଇଛନ୍ତି।

ପତିତାନାଂ ପତିତୋହଂ ତ୍ୱମେବ ପାପହାରକଃ

ପାବନପୁରୁଷ ! ଦେହି ନିଶ୍ଚଳାଂ ଭକ୍ତିଂ ମେ ବିଭୋ।

ଅର୍ଥାତ୍ ହେ ପତିତପାବନ ! ମୁଁ ପତିତମାନଙ୍କ ମଧ୍ୟରେ ପତିତ । ତୁମେ ପତିତ ଲୋକମାନଙ୍କର ପାତକହାରୀ। ହେ ପ୍ରଭୁ ! ମୋ ହୃଦୟରେ ନିଶ୍ଚଳ ଭକ୍ତି ଦେଇ ତୁମ ଠାରେ ଶରଣ ଯିବା ପାଇଁ ବାଟବତାଅ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 3

*ଶ୍ରୀ ପତିତପାବନ ମହାପ୍ରଭୁଙ୍କର ଅବସ୍ଥାନ* *Part 1*

ସିଂହଦ୍ଵାର ଗୁମୁଟସ୍ଥିତ ପତିତପାବନ ମୂର୍ତ୍ତି ଯେ ସର୍ବ ପ୍ରଥମ । ପ୍ରାଚୀନ ମୌଳିକ ବିଗ୍ରହ– ଏଥରେ ଦ୍ବିମତ ନାହିଁ, କାରଣ ଏହା ମାଦଳାପାଞ୍ଜି ବିବରଣ।

ଇତିହାସ ମତାନୁସାରେ ଖୋର୍ଦ୍ଧା ଭୋଇବଂଶର ୨ୟ ରାମଚନ୍ଦ୍ରଦେବ ନବାବ ସୁଜାଖାଁଙ୍କ କନ୍ୟା ବିବି ରେଜିୟାଙ୍କୁ ବିବାହ କରି ଇସଲାମ ଧର୍ମରେ ଧର୍ମାନ୍ତରିତ ହୋଇଥିଲେ। ସେ ନିଜକୁ ହାଫିଜକାଦର ବେଗ୍ ନାମରେ ପରିଚିତ କରିଥିଲେ। ତାଙ୍କୁ ମନ୍ଦିର ପ୍ରବେଶ ନିଷିଦ୍ଧ ଥିଲା। ସେ ଜଗନ୍ନାଥଙ୍କର ସେବା ଓ ଦର୍ଶନ ପାଇଁ ସିଂହଦ୍ଵାର ଗୁମୁଟ ପତିତପାବନ ମୂର୍ତ୍ତି ସ୍ଥାପନ କରି ଦର୍ଶନ କରିଥିଲେ। ପୁରୀ ରାଜବଂଶର ରାଣୀ ସୂର୍ଯ୍ୟମଣି ପାଟ୍ଟମହାଦେଈ ରାଜା ମୁକୁନ୍ଦ ଦେବଙ୍କୁ ସ୍ବୀକୃତି ଦେବା ସଂପର୍କରେ ଯେଉଁ ଆବେଦନ କରିଥିଲେ ସେଥ‌ିରେ ମଧ୍ୟ ହାଫିଜକାଦର ବେଗଙ୍କ ସଂପର୍କରେ ଉଲ୍ଲେଖ ଥିଲା।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 4

*ଶ୍ରୀ ପତିତପାବନ ମହାପ୍ରଭୁଙ୍କର ଅବସ୍ଥାନ* *Part 2*

ଅନ୍ୟ ଐତିହାସିକମାନଙ୍କ ମତରେ ଖ୍ରୀ୧୭୩୮ରେ ୨ୟ ରାମଚନ୍ଦ୍ର ଦେବ ମୁର୍ଶିଦକୁଲି ଖାଁଙ୍କ କନ୍ୟା ବିବି ରେଜିୟାଙ୍କ ସହିତ ଅବୈଧ ପ୍ରଣୟ ସୂତ୍ରରେ ଆବଦ୍ଧ ହୋଇ ପାଣିଗ୍ରହଣ କରିଥିଲେ ଓ କଟକର ବାରବାଟୀ ଦୁର୍ଗରେ କିଛିକାଳ ଅତିବାହିତ କରିଥିଲେ । ଏହି ସମୟରେ ସେ ନିଜର ଦୁଷ୍କର୍ମ ପାଇଁ ଅନୁତାପ ଅନଳରେ ଦଗ୍ଧୀଭୁତ ହୋଇ ଶ୍ରୀଜଗନ୍ନାଥଙ୍କ ପଦାରବିନ୍ଦରେ କ୍ଷମାପ୍ରାର୍ଥୀ ହେଲେ ସେ ଯେତେବେଳେ ତାଙ୍କର ପତ୍ନୀଙ୍କ ସହ ଶ୍ରୀମନ୍ଦିର ପ୍ରବେଶ କରିବା ପାଇଁ ଯାଇଥିଲେ, ସେତେବେଳେ ଏହି ପତିତ ରାଜାଙ୍କୁ ମନ୍ଦିର ପ୍ରବେଶ ଅଧିକାର ମିଳିନଥିଲା। ଫଳତଃ ଶ୍ରୀଜଗନ୍ନାଥ ଦର୍ଶନାଭିଳାଷୀ ରାଜା ରାମଚନ୍ଦ୍ର ଦେବ ଦୁଃଖ ଓ ନୈରାଶ୍ୟରେ ଭାଙ୍ଗି ପଡ଼ିଥିଲେ। ଶ୍ରୀଜଗନ୍ନାଥଙ୍କ ପ୍ରତିନିଧ୍ଵ ସ୍ଵରୂପ ଶ୍ରୀପତିତପାବନଙ୍କୁ ସିଂହଦ୍ଵାର ଗୁମୁଟରେ ପ୍ରତିଷ୍ଠିତ କରାଇ ତାଙ୍କର ଦର୍ଶନ ସେବା କରିଥିଲେ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 5

*ଶ୍ରୀ ପତିତପାବନ ମହାପ୍ରଭୁଙ୍କର ଅବସ୍ଥାନ* *Part 3*

ଦାର୍ଢ୍ୟତା ଭକ୍ତି ପୁରାଣ ବର୍ଣ୍ଣନାନୁସାରେ ଭକ୍ତ ସାଲବେଗ ଜାତିରେ ଯବନ ଥିବାରୁ ତାଙ୍କୁ ମନ୍ଦିର ପ୍ରବେଶ ଅଧିକାର ମିଳିନଥିଲା । ସେ ଶ୍ରୀଜଗନ୍ନାଥଙ୍କ ଦର୍ଶନ ଲାଭରୁ ବଞ୍ଚିତ ହୋଇ ସିଂହଦ୍ଵାର ସମ୍ମୁଖରେ ତାଙ୍କର ଭକ୍ତିପୂର୍ଣ୍ଣ ଆକୁଳ ନିବେଦନ ମହାପ୍ରଭୁ ଙ୍କୁ ଜଣାଇଥିଲେ। ଏଥିରେ ସ୍ଵୟଂ ଜଗନ୍ନାଥ ରସିଂହାସନରୁ ଓହ୍ଲାଇ ଆସି ସିଂହଦ୍ଵାର ସମ୍ମୁଖରେ ତାଙ୍କୁ ଦର୍ଶନ ଦେଇଥିଲେ । ଏଥିରୁ ଅନୁମାନ ହୁଏ ଯେ ସାଲବେଗଙ୍କ ପରି ଅଗଣିତ ପତିତ ଭକ୍ତମାନଙ୍କର ଦର୍ଶନ ଅଭିଳାଷ ଚରିତାର୍ଥ କରିବା ପାଇଁ ଏଠାରେ ପତିତପାବନ ବିଗ୍ରହ ଧାରଣ କରିଛନ୍ତି। ଭକ୍ତ ସାଲବେଗ ପ୍ରତିତମାନଙ୍କ ଉଦ୍ଦେଶ୍ୟରେ ‘ପତିତପାବନ ଅଷ୍ଟକମ୍’ ଜଣାଣ ରଚନା କରି ଶ୍ରୀଜଗନ୍ନାଥଙ୍କୁ ପତିତପାବନର ମହାନ୍ ଦ୍ୟୋତକ ଭାବରେ ପ୍ରତିପାଦନ କରିଛନ୍ତି।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 6

*ଶ୍ରୀ ପତିତପାବନ ମହାପ୍ରଭୁଙ୍କର ଅବସ୍ଥାନ* *Part 4*

ଗୌଡ଼ିୟ ବୈଷ୍ଣବ ଶ୍ରୀଚୈତନ୍ୟ ମନ୍ଦିର ପ୍ରବେଶ କାଳରେ ଶ୍ରୀପତିତପାବନ ବିଗ୍ରହଙ୍କ ଦର୍ଶନ ଲାଭକରି ପ୍ରଥମରୁ ହିଁ ଭାବବିହ୍ଵଳିତ ହୋଇଥିଲେ।

ଶ୍ରୀଚୈତନ୍ୟ ଚରିତାମୃତରେ ଶ୍ରୀଜଗନ୍ନାଥଙ୍କ ସଂପର୍କରେ ବର୍ଣ୍ଣନା ଖୁବ୍‌ ହୃଦୟସ୍ପର୍ଶୀ । ପରବର୍ତ୍ତୀ କାଳରେ ପୁରାଣ ଓ ଭକ୍ତି ସଂଗୀତରେ ପତିତପାବନଙ୍କ ମାହାତ୍ମ୍ୟ ବହୁଳ ଭାବରେ ପ୍ରଚାରିତ ହୋଇଛି। ସେସବୁ କବିଙ୍କର ପତିତପାବନଙ୍କ ନିକଟରେ ଜଗନ୍ନାଥତ୍ତ୍ୱ ଆରୋପ କରି ତାଙ୍କର ମହିମା ଗାନ କରିଛନ୍ତି । ଏଣୁ ଯେ ଜଗନ୍ନାଥ, ସେ ପତିତପାବନ– ଏହି ଭାବରେ ଭକ୍ତର ହୃଦୟ ସିଂହାସନରେ ଅଧିରୂଢ଼ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 7

*ଶ୍ରୀ ପତିତପାବନ ମହାପ୍ରଭୁଙ୍କର କିପରି ଅବସ୍ଥାନ କରିଛନ୍ତି*

ଶ୍ରୀମନ୍ଦିର ରତ୍ନସିଂହାସନରେ ପ୍ରଭୁ ଶ୍ରୀଜଗନ୍ନାଥ, ଜ୍ୟେଷ୍ଠଭ୍ରାତା ଶ୍ରୀବଳଦେବ, ଭଗିନୀ ଦେବୀ ସୁଭଦ୍ରା ସହ ଅବସ୍ଥାନ କରୁଥିବାସ୍ଥଳେ, ଗୁମୁଟସ୍ଥିତ ସିଂହାସନରେ ତାଙ୍କର ଅବିକଳ ଏକକ ଚିତ୍ରପ୍ରତିମା ପୂଜା ପାଉଛନ୍ତି ।

👉 ଏହି ଗୁମୁଟର ଡାହାଣପଟ ବା ଉତ୍ତର ଦିଗରେ ୩ ଫୁଟ ଉଚ୍ଚତା ବିଶିଷ୍ଟ ବାରଣ୍ଡା ଉପରେ ୪ ଫୁଟ ଲମ୍ବ ଓ ୪ ଫୁଟ ପ୍ରସ୍ଥର ଏକ କ୍ଷୁଦ୍ର ମନ୍ଦିରାକୃତି ସ୍ଥାନ ଭିତରେ ପ୍ରାୟ ଅଢ଼େଇ ଫୁଟ ଉଚ୍ଚତା ବିଶିଷ୍ଟ ଏକ ପ୍ରସ୍ତର ନିର୍ମିତ ସିଂହାସନ ରହିଛି ।

👉 ସିଂହାସନ ସମ୍ମୁଖରେ ନମସ୍କାର ମୁଦ୍ରାରେ ଦଣ୍ଡାୟମାନ ତିନିଜଣ ସାଧୁ ନାବ ଓ ନାବିକ ସହିତ ବୃକ୍ଷ ଇତ୍ୟାଦି ଭାସ୍କର୍ଯ୍ୟ ଖୋଦିତ ହୋଇଛି।

👉 ସିଂହାସନ ଉପରେ ପ୍ରାୟ ୩ ଫୁଟ ଉଚ୍ଚତା ବିଶିଷ୍ଟ ପୂର୍ବାଭିମୁଖୀ ପତିତପାବନ ମୂର୍ତ୍ତି ବିରାଜମାନ କରିଛନ୍ତି। ରସିଂହାସନରେ ଶ୍ରୀଜୀଉ ଦାରବ ବିଗ୍ରହ ହୋଇଥିବା ସ୍ଥଳେ ଗୁମୁଟରେ ତାହା ଅତ୍ୟନ୍ତ ଗୁପ୍ତ ଭାବେ ନିର୍ମିତ ହୋଇ ବିରାଜମାନ କରିଛନ୍ତି।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 8

*ଶ୍ରୀ ପତିତପାବନ ମହାପ୍ରଭୁଙ୍କର ଦୈନନ୍ଦିନ ନୀତି*

👉 ଶ୍ରୀ ପତିତପାବନ ମହାପ୍ରଭୁଙ୍କର ନିକଟରେ ଦୈନନ୍ଦିନ

ମଙ୍ଗଳ ଆଳତି, ଅବକାଶ,ସନ୍ଧ୍ୟା ଆଳତି, ବଡ଼ ସିଂହାର ଅନୁଷ୍ଠିତ ହୁଏ।

👉 ଶ୍ରୀ ପତିତପାବନ ମହାପ୍ରଭୁଙ୍କର ଭୋଗ ନିମନ୍ତେ ବାହାର ଦେଉଳ ରୋଷରୁ କାକରା ୧, ମହନ ଭୋଗ ୧ ଓଳି, ବଲ୍ଲଭ ୧ ଓଳି, ଦୈନନ୍ଦିନ ନୀତିରେ ଖଞ୍ଜା ଅଛି।

👉 ଏହାକୁ ପୂଜାପଣ୍ଡା ନିଯୋଗର ତତ୍ତ୍ଵାବଧାନରେ ସେବା ପୂଜା ଓ ପରିଚାଳନା କରାଯାଇଥାଏ।

👉 ପ୍ରତିବର୍ଷ ଶ୍ରୀ ପତିତପାବନ ମହାପ୍ରଭୁଙ୍କ ସେବା ପୂଜାପାଇଁ ନିଯୋଗ ପକ୍ଷରୁ ବାର୍ଷିକ ନିଲାମ କରାଯାଇ ଜଣେ ପୂଜାପଣ୍ଡା ସେବକ ଦାୟିତ୍ଵରେ ରୁହନ୍ତି |

👉 ଗତ କିଛି ବର୍ଷ ଶ୍ରୀ ପତିତପାବନ ମହାପ୍ରଭୁଙ୍କ ନିକଟରେ ଶ୍ରୀଜୀଉଙ୍କର କିଛି ବିଶେଷ ନୀତି ଅନୁଷ୍ଠିତ ହେଉଛି, ଯେପରି ସୁନା ବେଶ, ଗଜ ଉଦ୍ଧାରଣ ବେଶ, ପଦ୍ମ ବେଶ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 9

*ଶ୍ରୀ ପତିତପାବନ ମହାପ୍ରଭୁଙ୍କର ଅଣସର ବିଧି*

👉ଶ୍ରୀ ପତିତପାବନ ମହାପ୍ରଭୁ ଶ୍ରୀଜଗନ୍ନାଥ ଗୁମୁଟସ୍ଥିତ ସିଂହାସନରେ ଅଧିଷ୍ଠିତ ହୋଇଥିଲେ ମଧ୍ୟ ଶ୍ରୀମନ୍ଦିର ଗର୍ଭଗୃହସ୍ଥିତ ଶ୍ରୀଜୀଉଙ୍କ ଭଳି ତାଙ୍କର ଅଣସର ବିଧି ଯଥାରୀତି ପାଳିତ ହୋଇଥାଏ।

👉 ଅଣସର ସମୟରେ ଶ୍ରୀ ପତିତପାବନ ମହାପ୍ରଭୁଙ୍କର କ୍ଷୁଦ୍ରମନ୍ଦିର ଦ୍ୱାର ସମ୍ମୁଖରେ ବାଉଁଶ ତାଟି ରଖାଯାଇ ତା’ ଉପରେ ନାରାୟଣଙ୍କର ଏକ କ୍ଷୁଦ୍ର ଚିତ୍ର ପ୍ରତିମା ଅଙ୍କିତ ହୋଇ ଲଗାଯାଇ ପୂଜିତ ହୋଇଥାଏ। ଏହି ସମୟରେ ସେଠାରେ ପଣାଭୋଗ ଲାଗି ହୋଇଥାଏ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ପତିତପାବନ ମହାପ୍ରଭୁ।। part 10

*ଶ୍ରୀମନ୍ଦିରରେ ବିଭିନ୍ନ ସ୍ଥାନରେ ଶ୍ରୀ ପତିତପାବନ ମହାପ୍ରଭୁଙ୍କର ଅବସ୍ଥାନ*

ଶ୍ରୀମନ୍ଦିରର ରନ୍‌ସିଂହାସନଠାରେ ଚତୁର୍ଦ୍ଧାମୂର୍ତ୍ତି ଶ୍ରୀଜଗନ୍ନାଥ, ଶ୍ରୀବଳଭଦ୍ର, ଶ୍ରୀ ସୁଭଦ୍ରା ଓ ଶ୍ରୀ ସୁଦର୍ଶନ, ମାଧବ, ଭୂ ଦେବୀ, ତଥା ଶ୍ରୀ ଦେବୀ ପୂଜା ପାଉଥିଲେ ହେଁ ଶ୍ରୀମନ୍ଦିରର ପରିସର ମଧ୍ୟରେ ଆଉ ପାଞ୍ଚଟି ସ୍ଥାନରେ ଶ୍ରୀଜଗନ୍ନାଥଙ୍କର ଏକକ ମୂର୍ତ୍ତି ପୂଜାପାଉଛନ୍ତି | ଯଥା:

👉ଭିତର ବେଢ଼ା ପରିସରସ୍ଥ ବଟ ଗଣେଶ ମନ୍ଦିର ସମ୍ମୁଖରେ ବଟ ଜଗନ୍ନାଥ ବା ବଟ ପତିତପାବନ ସ୍ଵତନ୍ତ୍ର ଭାବେ ଏକ ମନ୍ଦିରରେ ପୂଜିତ ।

👉 ନାଟ ମଣ୍ଡପ ସଂଲଗ୍ନ ପୁରାଣ ପଣ୍ଡା ଘର ମଧ୍ୟରେ ପତିତପାବନ(ଜଗନ୍ନାଥ) ପୂଜିତ ହେଉଛନ୍ତି ।

👉 ଶ୍ରୀନୀଳମାଧବ ମନ୍ଦିରରେ ପତିତପାବନ ( ଶ୍ରୀଜଗନ୍ନାଥ) ବିଗ୍ରହ ପ୍ରତିଷ୍ଠିତ ।

👉 ଭୋଗମଣ୍ଡପ ଗୃହ ସମ୍ମୁଖସ୍ଥ ତ୍ରେତୟାଦେବ ସରଘର ମଧ୍ୟରେ ଜଗନ୍ନାଥ, ବଳଭଦ୍ର ଓ ସୁଭଦ୍ରା ପୂଜିତ ।

👉 ପଶ୍ଚିମ ଦ୍ବାର ବାହାର ବେଢ଼ାରେ ଅଧ୍ୟଷ୍ଠିତ ଚାରିଧାମ ମନ୍ଦିରରେ ଜଗନ୍ନାଥ( ପତିତପାବନ) ମୂର୍ତ୍ତି ଅବସ୍ଥିତ ।