✡️🌻✡️ *ଶ୍ରୀକୃଷ୍ଣାଷ୍ଟୋତ୍ତର ଶତନାମସ୍ତୋତ୍ରଂ🔯🌹🔯*

ଶ୍ରୀଗୋପାଲକୃଷ୍ଣାୟ ନମଃ ॥

ଶ୍ରୀଶେଷ ଉଵାଚ ॥

ଓଂ ଅସ୍ୟ ଶ୍ରୀକୃଷ୍ଣାଷ୍ଟୋତ୍ତରଶତନାମସ୍ତୋତ୍ରସ୍ୟ।

ଶ୍ରୀଶେଷ ଋଷିଃ ॥ ଅନୁଷ୍ଟୁପ୍ ଛଂଦଃ ॥ ଶ୍ରୀକୃଷ୍ଣୋଦେଵତା ॥

ଶ୍ରୀକୃଷ୍ଣାଷ୍ଟୋତ୍ତରଶତନାମଜପେ ଵିନିୟୋଗଃ ॥

ଓଂ ଶ୍ରୀକୃଷ୍ଣଃ କମଲାନାଥୋ ଵାସୁଦେଵଃ ସନାତନଃ ।

ଵସୁଦେଵାତ୍ମଜଃ ପୁଣ୍ୟୋ ଲୀଲାମାନୁଷଵିଗ୍ରହଃ ॥ 1 ॥

ଶ୍ରୀଵତ୍ସକୌସ୍ତୁଭଧରୋ ୟଶୋଦାଵତ୍ସଲୋ ହରିଃ ।

ଚତୁର୍ଭୁଜାତ୍ତଚକ୍ରାସିଗଦା ଶଂଖାଦ୍ୟୁଦାୟୁଧଃ ॥ 2 ॥

ଦେଵକୀନଂଦନଃ ଶ୍ରୀଶୋ ନଂଦଗୋପପ୍ରିୟାତ୍ମଜଃ ।

ୟମୁନାଵେଗସଂହାରୀ ବଲଭଦ୍ରପ୍ରିୟାନୁଜଃ ॥ 3 ॥

ପୂତନାଜୀଵିତହରଃ ଶକଟାସୁରଭଂଜନଃ ।

ନଂଦଵ୍ରଜଜନାନଂଦୀ ସଚ୍ଚିଦାନଂଦଵିଗ୍ରହଃ ॥ 4 ॥

ନଵନୀତଵିଲିପ୍ତାଂଗୋ ନଵନୀତନଟୋଽନଘଃ ।

ନଵନୀତନଵାହାରୋ ମୁଚୁକୁଂଦପ୍ରସାଦକଃ ॥ 5 ॥

ଷୋଡଶସ୍ତ୍ରୀ ସହସ୍ରେଶ ସ୍ରିଭଂଗି ମଧୁରାକୃତିଃ ।

ଶୁକଵାଗମୃତାବ୍ଧୀଂଦୁର୍ଗୋଵିଂଦୋ ଗୋଵିଦାଂପତିଃ ॥ 6 ॥

ଵତ୍ସଵାଟଚରୋଽନଂତୋ ଧେନୁକାସୁରଭଂଜନଃ ।

ତୃଣୀକୃତତୃଣାଵର୍ତୋ ୟମଳାର୍ଜୁନଭଂଜନଃ ॥ 7 ॥

ଉତ୍ତାନତାଲଭେତ୍ତା ଚ ତମାଲଶ୍ୟାମଲାକୃତିଃ ।

ଗୋପଗୋପୀଶ୍ଵରୋ ୟୋଗୀ ସୂର୍ୟକୋଟିସମପ୍ରଭଃ ॥ 8 ॥

ଇଲାପତିଃ ପରଂଜ୍ୟୋତିର୍ୟାଦଵେଂଦ୍ରୋ ୟଦୂଦ୍ଵହଃ ।

ଵନମାଲୀ ପୀତଵାସାଃ ପାରିଜାତାପହାରକଃ ॥ 9 ॥

ଗୋଵର୍ଧନାଚଲୋଦ୍ଧର୍ତା ଗୋପାଲଃ ସର୍ଵପାଲକଃ ।

ଅଜୋ ନିରଂଜନଃ କାମଜନକଃ କଂଜଲୋଚନଃ ॥ 10 ॥

ମଧୁହା ମଥୁରାନାଥୋ ଦ୍ଵାରକାନାୟକୋ ବଲୀ ।

ଵୃଂଦାଵନାଂତସଂଚାରୀ ତୁଲସୀଦାମଭୂଷଣଃ ॥ 11 ॥

ଶ୍ୟମଂତକମଣେର୍ହର୍ତା ନରନାରାୟଣାତ୍ମକଃ ।

କୁବ୍ଜାକୃଷ୍ଣାଂବରଧରୋ ମାୟୀ ପରମପୂରୁଷଃ ॥ 12 ॥

ମୁଷ୍ଟିକାସୁରଚାଣୂରମହାୟୁଦ୍ଧଵିଶାରଦଃ ।

ସଂସାରଵୈରୀ କଂସାରିର୍ମୁରାରିର୍ନରକାଂତକଃ ॥ 13 ॥

ଅନାଦିବ୍ରହ୍ମଚାରୀ ଚ କୃଷ୍ଣାଵ୍ୟସନକର୍ଷକଃ ।

ଶିଶୁପାଲଶିରଶ୍ଛେତ୍ତା ଦୁର୍ୟୋଧନକୁଲାଂତକଃ ॥ 14 ॥

ଵିଦୁରାକ୍ରୂରଵରଦୋ ଵିଶ୍ଵରୂପପ୍ରଦର୍ଶକଃ ।

ସତ୍ୟଵାକ୍ ସତ୍ୟସଂକଲ୍ପଃ ସତ୍ୟଭାମାରତୋ ଜୟୀ ॥ 15 ॥

ସୁଭଦ୍ରାପୂର୍ଵଜୋ ଵିଷ୍ଣୁର୍ଭୀଷ୍ମମୁକ୍ତିପ୍ରଦାୟକଃ ।

ଜଗଦ୍ଗୁରୁର୍ଜଗନ୍ନାଥୋ ଵେଣୁନାଦଵିଶାରଦଃ ॥ 16 ॥

ଵୃଷଭାସୁରଵିଧ୍ଵଂସୀ ବାଣାସୁରବଲାଂତକଃ ।

ୟୁଧିଷ୍ଠିରପ୍ରତିଷ୍ଠାତା ବର୍ହିବର୍ହାଵତଂସକଃ ॥ 17 ॥

ପାର୍ଥସାରଥିରଵ୍ୟକ୍ତୋ ଗୀତାମୃତମହୋଦଧିଃ ।

କାଲୀୟଫଣିମାଣିକ୍ୟରଂଜିତଶ୍ରୀପଦାଂବୁଜଃ ॥ 18 ॥

ଦାମୋଦରୋ ୟଜ୍ଞଭୋକ୍ତା ଦାନଵେଂଦ୍ରଵିନାଶକଃ ।

ନାରାୟଣଃ ପରଂବ୍ରହ୍ମ ପନ୍ନଗାଶନଵାହନଃ ॥ 19 ॥

ଜଲକ୍ରୀଡାସମାସକ୍ତ ଗୋପୀଵସ୍ତ୍ରାପହାରକଃ ।

ପୁଣ୍ୟଶ୍ଲୋକସ୍ତୀର୍ଥପାଦୋ ଵେଦଵେଦ୍ୟୋ ଦୟାନିଧିଃ ॥ 20 ॥

ସର୍ଵତୀର୍ଥାତ୍ମକଃ ସର୍ଵଗ୍ରହରୁପୀ ପରାତ୍ପରଃ ।

ଏଵଂ ଶ୍ରୀକୃଷ୍ଣଦେଵସ୍ୟ ନାମ୍ନାମଷ୍ଟୋତ୍ତରଂ ଶତମ୍ ॥ 21 ॥

କୃଷ୍ଣନାମାମୃତଂ ନାମ ପରମାନଂଦକାରକମ୍ ।

ଅତ୍ୟୁପଦ୍ରଵଦୋଷଘ୍ନଂ ପରମାୟୁଷ୍ୟଵର୍ଧନମ୍ ॥ 22 ॥

॥ ଇତି ଶ୍ରୀନାରଦପଂଚରାତ୍ରେ ଜ୍ଞାନାମୃତସାରେ ଚତୁର୍ଥରାତ୍ରେ ଉମାମହେଶ୍ଵରସଂଵାଦେ

ଧରଣୀଶେଷସଂଵାଦେ ଶ୍ରୀକୃଷ୍ଣାଷ୍ଟୋତ୍ତରଶତନାମସ୍ତୋତ୍ରଂ ସଂପୂର୍ଣମ୍ ॥