🌲॥ ଭଗଵଦ୍ଗୀତା ମାହାତ୍ମ୍ୟଂ ଅଥଵାଧ୍ୟାନମନ୍ତ୍ରଞ୍ଚ ॥🌲

॥ ଶ୍ରୀ ପରମାତ୍ମନେ ନମଃ ॥

॥ ଅଥ ଶ୍ରୀଗୀତାମାହାତ୍ମ୍ୟପ୍ରାରମ୍ଭଃ ॥

ଶ୍ରୀ ଗଣେଶାୟ ନମଃ ॥ ଶ୍ରୀରାଧାରମଣାୟ ନମଃ ॥

ଧରୋଵାଚ ।

ଭଗଵନ୍ପରେମେଶାନ ଭକ୍ତିରଵ୍ୟଭିଚାରିଣୀ ।

ପ୍ରାରବ୍ଧଂ ଭୁଜ୍ୟମାନସ୍ୟ କଥଂ ଭଵତି ହେ ପ୍ରଭୋ ॥ ୧॥

ଶ୍ରୀ ଵିଷ୍ଣୁରୁଵାଚ ।

ପ୍ରାରବ୍ଧଂ ଭୁଜ୍ୟମାନୋ ହି ଗୀତାଭ୍ୟାସରତଃ ସଦା ।

ସ ମୁକ୍ତଃ ସ ସୁଖୀ ଲୋକେ କର୍ମଣା ନୋପଲିପ୍ୟତେ ॥ ୨॥

ମହାପାପାଦିପାପାନି ଗୀତାଧ୍ୟାନଂ କରୋତି ଚେତ୍ ।

କ୍ଵଚିତ୍ସ୍ପର୍ଶଂ ନ କୁର୍ଵନ୍ତି ନଲିନୀଦଲମମ୍ବୁଵତ୍ ॥ ୩॥

ଗୀତାୟାଃ ପୁସ୍ତକଂ ୟତ୍ର ୟତ୍ର ପାଠଃ ପ୍ରଵର୍ତତେ ।

ତତ୍ର ସର୍ଵାଣି ତୀର୍ଥାଣି ପ୍ରୟାଗାଦୀନି ତତ୍ର ଵୈ ॥ ୪॥

ସର୍ଵେ ଦେଵାଶ୍ଚ ଋଷୟୋ ୟୋଗିନଃ ପନ୍ନଗାଶ୍ଚ ୟେ ।

ଗୋପାଲା ଗୋପିକା ଵାପି ନାରଦୋଦ୍ଧଵପାର୍ଷଦୈଃ ॥

ସହାୟୋ ଜାୟତେ ଶୀଘ୍ରଂ ୟତ୍ର ଗୀତା ପ୍ରଵର୍ତତେ ୫॥

ୟତ୍ର ଗୀତାଵିଚାରଶ୍ଚ ପଠନଂ ପାଠନଂ ଶୃତମ୍ ।

ତତ୍ରାହଂ ନିଶ୍ଚିତଂ ପୃଥ୍ଵି ନିଵସାମି ସଦୈଵ ହି ॥ ୬॥

ଗୀତାଶ୍ରୟେଽହଂ ତିଷ୍ଠାମି ଗୀତା ମେ ଚୋତ୍ତମଂ ଗୃହମ୍ ।

ଗୀତାଜ୍ଞାନମୁପାଶ୍ରିତ୍ୟ ତ୍ରୀଂଲୋକାନ୍ପାଲୟାମ୍ୟହମ୍ ॥ ୭॥

ଗୀତା ମେ ପରମା ଵିଦ୍ୟା ବ୍ରହ୍ମରୂପା ନ ସଂଶୟଃ ।

ଅର୍ଧମାତ୍ରାକ୍ଷରା ନିତ୍ୟା ସ୍ଵାନିର୍ଵାଚ୍ୟପଦାତ୍ମିକା ॥ ୮॥

ଚିଦାନନ୍ଦେନ କୃଷ୍ଣେନ ପ୍ରୋକ୍ତା ସ୍ଵମୁଖତୋଽର୍ଜୁନମ୍ ।

ଵେଦତ୍ରୟୀ ପରାନନ୍ଦା ତତ୍ତ୍ଵାର୍ଥଜ୍ଞାନସଂୟୁତା ॥ ୯॥

ୟୋଽଷ୍ଟାଦଶଜପୋ ନିତ୍ୟଂ ନରୋ ନିଶ୍ଚଲମାନସଃ ।

ଜ୍ଞାନସିଦ୍ଧିଂ ସ ଲଭତେ ତତୋ ୟାତି ପରଂ ପଦମ୍ ॥ ୧୦॥

ପାଠେଽସମର୍ଥଃ ସମ୍ପୂର୍ଣେ ତତୋଽର୍ଧଂ ପାଠମାଚରେତ୍ ।

ତଦା ଗୋଦାନଜଂ ପୁଣ୍ୟଂ ଲଭତେ ନାତ୍ର ସଂଶୟଃ ॥ ୧୧॥

ତ୍ରିଭାଗଂ ପଠମାନସ୍ତୁ ଗଙ୍ଗାସ୍ନାନଫଲଂ ଲଭେତ୍ ।

ଷଡଂଶଂ ଜପମାନସ୍ତୁ ସୋମୟାଗଫଲଂ ଲଭେତ୍ ॥ ୧୨॥

ଏକାଧ୍ୟାୟଂ ତୁ ୟୋ ନିତ୍ୟଂ ପଠତେ ଭକ୍ତିସଂୟୁତଃ ।

ରୁଦ୍ରଲୋକମଵାପ୍ନୋତି ଗଣୋ ଭୂତ୍ଵା ଵସେଚ୍ଚିରମ୍ ॥ ୧୩॥

ଅଧ୍ୟାୟଂ ଶ୍ଲୋକପାଦଂ ଵା ନିତ୍ୟଂ ୟଃ ପଠତେ ନରଃ ।

ସ ୟାତି ନରତାଂ ୟାଵନ୍ମନ୍ଵନ୍ତରଂ ଵସୁନ୍ଧରେ ॥ ୧୪॥

ଗୀତାୟାଃ ଶ୍ଲୋକଦଶକଂ ସପ୍ତ ପଞ୍ଚ ଚତୁଷ୍ଟୟମ୍ ।

ଦ୍ଵୌ ତ୍ରୀନେକଂ ତଦର୍ଧଂ ଵା ଶ୍ଲୋକାନାଂ ୟଃ ପଠେନ୍ନରଃ ॥ ୧୫॥

ଚନ୍ଦ୍ରଲୋକମଵାପ୍ନୋତି ଵର୍ଷାଣାମୟୁତଂ ଧ୍ରୁଵମ୍ ।

ଗୀତାପାଠସମାୟୁକ୍ତୋ ମୃତୋ ମାନୁଷତାଂ ଵ୍ରଜେତ୍ ॥ ୧୬॥

ଗୀତାଭ୍ୟାସଂ ପୁନଃ କୃତ୍ଵା ଲଭତେ ମୁକ୍ତିମୁତ୍ତମାମ୍ ।

ଗୀତେତ୍ୟୁଚ୍ଚାରସଂୟୁକ୍ତୋ ମ୍ରିୟମାଣୋ ଗତିଂ ଲଭେତ୍ ॥ ୧୭॥

ଗୀତାର୍ଥଶ୍ରଵଣାସକ୍ତୋ ମହାପାପୟୁତୋଽପି ଵା ।

ଵୈକୁଣ୍ଠଂ ସମଵାପ୍ନୋତି ଵିଷ୍ଣୁନା ସହ ମୋଦତେ ॥ ୧୮॥

ଗୀତାର୍ଥଂ ଧ୍ୟାୟତେ ନିତ୍ୟଂ କୃତ୍ଵା କର୍ମାଣି ଭୂରିଶଃ ।

ଜୀଵନ୍ମୁକ୍ତଃ ସ ଵିଜ୍ଞେୟୋ ଦେହାନ୍ତେ ପରମଂ ପଦମ୍ ॥ ୧୯॥

ଗୀତାମାଶ୍ରିତ୍ୟ ବହଵୋ ଭୂଭୁଜୋ ଜନକାଦୟଃ ।

ନିର୍ଧୂତକଲ୍ମଷା ଲୋକେ ଗୀତାୟାତାଃ ପରଂ ପଦମ୍ ॥ ୨୦॥

ଗୀତାୟାଃ ପଠନଂ କୃତ୍ଵା ମାହାତ୍ମ୍ୟଂ ନୈଵ ୟଃ ପଠେତ୍ ।

ଵୃଥା ପାଠୋ ଭଵେତ୍ତସ୍ୟ ଶ୍ରମ ଏଵ ହ୍ୟୁଦାହୃତଃ ॥ ୨୧॥

ଏତନ୍ମାହାତ୍ମ୍ୟସଂୟୁକ୍ତଂ ଗୀତାଭ୍ୟାସଂ କରୋତି ୟଃ ।

ସ ତତ୍ଫଲମଵାପ୍ନୋତି ଦୁର୍ଲଭାଂ ଗତିମାପ୍ନୁୟାତ୍ ॥ ୨୨॥

ସୂତ ଉଵାଚ ।

ମାହାତ୍ମ୍ୟମେତଦ୍ଗୀତାୟା ମୟା ପ୍ରୋକ୍ତ ସତାତନମ୍ ।

ଗୀତାନ୍ତେ ଚ ପଠେଦ୍ୟସ୍ତୁ ୟଦୁକ୍ତଂ ତତ୍ଫଲଂ ଲଭେତ୍ ॥ ୨୩॥

॥ ଇତି ଶ୍ରୀଵାରାହପୁରାଣେ ଶ୍ରୀଗୀତାମାହାତ୍ମ୍ୟଂ ସମ୍ପୂର୍ଣମ୍ ॥

॥ ଅଥ ଶ୍ରୀମଦ୍ଭଗଵଦ୍ଗୀତାଧ୍ୟାନାଦି ॥

ଶ୍ରୀ ଗଣେଶାୟ ନମଃ ॥ ଶ୍ରୀଗୋପାଲକୃଷ୍ଣାୟ ନମଃ ॥

ଅଥ ଧ୍ୟାନମ୍ ।

ଅଥ କରନ୍ୟାସଃ।

ଓଂ ଅସ୍ୟ ଶ୍ରୀମଦ୍ଭଗଵଦ୍ଗୀତାମାଲାମନ୍ତ୍ରସ୍ୟ

ଭଗଵାନ୍ଵେଦଵ୍ୟାସ ଋଷିଃ ॥ ଅନୁଷ୍ଟୁପ୍ ଛନ୍ଦଃ ॥

ଶ୍ରୀକୃଷ୍ଣ ପରମାତ୍ମା ଦେଵତା ॥

ଅଶୋଚ୍ୟାନନ୍ଵଶୋଚସ୍ତ୍ଵଂ ପ୍ରଜ୍ଞାଵାଦାଂଶ୍ଚ ଭାଷସେ ଇତି ବୀଜମ୍ ॥

ସର୍ଵଧର୍ମାନ୍ ପରିତ୍ୟଜ୍ୟ ମାମେକଂ ଶରଣଂ ଵ୍ରଜ ଇତି ଶକ୍ତିଃ ॥

ଅହଂ ତ୍ଵା ସର୍ଵପାପେଭ୍ୟୋ ମୋକ୍ଷୟିଷ୍ୟାମି ମା ଶୁଚ ଇତି କୀଲକମ୍ ॥

ନୈନଂ ଛିନ୍ଦନ୍ତି ଶସ୍ତ୍ରାଣି ନୈନଂ ଦହତି

ପାଵକ ଇତ୍ୟଙ୍ଗୁଷ୍ଠାଭ୍ୟାଂ ନମଃ ॥

ନ ଚୈନଂ କ୍ଲେଦୟନ୍ତ୍ୟାପୋ ନ ଶୋଷୟତି ମାରୁତ ଇତି ତର୍ଜନୀଭ୍ୟାଂ ନମଃ ॥

ଅଚ୍ଛେଦ୍ୟୋଽୟମଦାହ୍ୟୋଽୟମକ୍ଲେଦ୍ୟୋଽଶୋଷ୍ୟ

ଏଵ ଚ ଇତି ମଧ୍ୟମାଭ୍ୟାଂ ନମଃ ॥

ନିତ୍ୟଃ ସର୍ଵଗତଃ ସ୍ଥାଣୁରଚଲୋଽୟଂ ସନାତନ ଇତ୍ୟନାମିକାଭ୍ୟାଂ ନମଃ ॥

ପଶ୍ୟ ମେ ପାର୍ଥ୍ ରୂପାଣି ଶତଶୋଽଥ

ସହସ୍ରଶ ଇତି କନିଷ୍ଠିକାଭ୍ୟାଂ ନମଃ ॥

ନାନାଵିଧାନି ଦିଵ୍ୟାନି ନାନାଵର୍ଣାକୃତୀନି

ଚ ଇତି କରତଲକରପୃଷ୍ଠାଭ୍ୟାଂ ନମଃ ॥

ଇତି କରନ୍ୟାସଃ ॥

ଅଥ ହୃଦୟାଦିନ୍ୟାସଃ ॥

ନୈନଂ ଛିନ୍ଦନ୍ତି ଶସ୍ତ୍ରାଣି ନୈନଂ ଦହତି

ପାଵକ ଇତି ହୃଦୟାୟ ନମଃ ॥

ନ ଚୈନଂ କ୍ଲେଦୟନ୍ତ୍ୟାପୋ ନ ଶୋଷୟତି ମାରୁତ ଇତି ଶିରସେ ସ୍ଵାହା ॥

ଅଚ୍ଛେଦ୍ୟୋଽୟମଦାହ୍ୟୋଽୟମକ୍ଲେଦ୍ୟୋଽଶୋଷ୍ୟ

ଏଵ ଚେତି ଶିଖାୟୈ ଵଷଟ୍ ॥

ନିତ୍ୟଃ ସର୍ଵଗତଃ ସ୍ଥାଣୁରଚଲୋଽୟଂ ସନାତନ ଇତି କଵଚାୟ ହୁମ୍ ॥

ପଶ୍ୟ ମେ ପାର୍ଥ୍ ରୂପାଣି ଶତଶୋଽଥ

ସହସ୍ରଶ ଇତି ନେତ୍ରତ୍ରୟାୟ ଵୌଷଟ୍ ॥

ନାନାଵିଧାନି ଦିଵ୍ୟାନି ନାନାଵର୍ଣାକୃତୀନି

ଚେତି ଅସ୍ତ୍ରାୟ ଫଟ୍ ॥

ଶ୍ରୀକୃଷ୍ଣପ୍ରୀତ୍ୟର୍ଥେ ପାଠେ ଵିନିୟୋଗଃ ॥

ଓଂ ପାର୍ଥାୟ ପ୍ରତିବୋଧିତାଂ ଭଗଵତା ନାରାୟଣେନ ସ୍ଵୟଂ

ଵ୍ୟାସେନ ଗ୍ରଥିତାଂ ପୁରାଣମୁନିନା ମଧ୍ୟେ ମହାଭାରତମ୍ ।

ଅଦ୍ଵୈତାମୃତଵର୍ଷିଣୀଂ ଭଗଵତୀମଷ୍ଟାଦଶାଧ୍ୟାୟିନୀଂ

ଅମ୍ବ ତ୍ଵାମନୁସନ୍ଦଧାମି ଭଗଵଦ୍ଗୀତେ ଭଵେଦ୍ଵେଷିଣୀମ୍ ॥ ୧॥

ନମୋଽସ୍ତୁ ତେ ଵ୍ୟାସ ଵିଶାଲବୁଦ୍ଧେ ଫୁଲ୍ଲାରଵିନ୍ଦାୟତପତ୍ରନେତ୍ର ।

ୟେନ ତ୍ଵୟା ଭାରତତୈଲପୂର୍ଣଃ ପ୍ରଜ୍ଵାଲିତୋ ଜ୍ଞାନମୟଃ ପ୍ରଦୀପଃ ॥ ୨॥

ପ୍ରପନ୍ନପାରିଜାତାୟତୋତ୍ରଵେତ୍ରୈକପାଣୟେ ।

ଜ୍ଞାନମୁଦ୍ରାୟ କୃଷ୍ଣାୟ ଗୀତାମୃତଦୁହେ ନମଃ ॥ ୩॥

ଵସୁଦେଵସୁତଂ ଦେଵଂ କଂସଚାଣୂରମର୍ଦନମ୍ ।

ଦେଵକୀପରମାନନ୍ଦଂ କୃଷ୍ଣଂ ଵନ୍ଦେ ଜଗଦ୍ଗୁରୁମ୍ ॥ ୪॥

ଭୀଷ୍ମଦ୍ରୋଣତଟା ଜୟଦ୍ରଥଜଲା ଗାନ୍ଧାରନୀଲୋତ୍ପଲା

ଶଲ୍ୟଗ୍ରାହଵତୀ କୃପେଣ ଵହନୀ କର୍ଣେନ ଵେଲାକୁଲା ।

ଅଶ୍ଵତ୍ଥାମଵିକର୍ଣଘୋରମକରା ଦୁର୍ୟୋଧନାଵର୍ତିନୀ

ସୋତ୍ତୀର୍ଣା ଖଲୁ ପାଣ୍ଡଵୈ ରଣନଦୀ କୈଵର୍ତକଃ କେଶଵଃ ॥ ୫॥

ପାରାଶର୍ୟଵଚଃ ସରୋଜମମଲଂ ଗୀତାର୍ଥଗନ୍ଧୋତ୍କଟଂ

ନାନାଖ୍ୟାନକକେସରଂ ହରିକଥାସମ୍ବୋଧନାବୋଧିତମ୍ ।

ଲୋକେ ସଜ୍ଜନଷଟ୍ପଦୈରହରହଃ ପେପୀୟମାନଂ ମୁଦା

ଭୂୟାଦ୍ଭାରତପଙ୍କଜଂ କଲିମଲପ୍ରଧ୍ଵଂସି ନଃ ଶ୍ରେୟସେ ॥ ୬॥

ମୂକଂ କରୋତି ଵାଚାଲଂ ପଙ୍ଗୁଂ ଲଙ୍ଘୟତେ ଗିରିମ୍ ।

ୟତ୍କୃପା ତମହଂ ଵନ୍ଦେ ପରମାନନ୍ଦମାଧଵମ୍ ॥ ୭॥

ଅଥ ଗୀତାମାହାତ୍ମ୍ୟମ୍ ।

ଗୀତାଶାସ୍ତ୍ରମିଦଂ ପୁଣ୍ୟଂ ୟଃ ପଠେତ୍ପ୍ରୟତଃ ପୁମାନ୍ ।

ଵିଷ୍ଣୋଃ ପଦମଵାପ୍ନୋତି ଭୟଶୋକାଦିଵର୍ଜିତଃ ॥ ୧॥

ଗୀତାଧ୍ୟୟନଶୀଲସ୍ୟ ପ୍ରାଣାୟାମପରସ୍ୟ ଚ ।

ନୈଵ ସନ୍ତି ହି ପାପାନି ପୂର୍ଵଜନ୍ମକୃତାନି ଚ ॥ ୨॥

ମଲନିର୍ମୋଚନଂ ପୁଂସାଂ ଜଲସ୍ନାନଂ ଦିନେ ଦିନେ ।

ସକୃଦ୍ଗୀତାମ୍ଭସି ସ୍ନାନଂ ସଂସାରମଲନାଶନମ୍ ॥ ୩॥

ଗୀତା ସୁଗୀତା କର୍ତଵ୍ୟା କିମନ୍ୟୈଃ ଶାସ୍ତ୍ରଵିସ୍ତରୈଃ ।

ୟା ସ୍ଵୟଂ ପଦ୍ମନାଭସ୍ୟ ମୁଖପଦ୍ମାଦ୍ଵିନିଃସୃତା ॥ ୪॥

ଭାରତାମୃତସର୍ଵସ୍ଵଂ ଵିଷ୍ଣୋର୍ଵକ୍ତ୍ରାଦ୍ଵିନିଃସୃତମ୍ ।

ଗୀତାଗଙ୍ଗୋଦକଂ ପୀତ୍ଵା ପୁନର୍ଜନ୍ମ ନ ଵିଦ୍ୟତେ ॥ ୫॥

ସର୍ଵୋପନିଷଦୋ ଗାଵୋ ଦୋଗ୍ଧା ଗୋପାଲ ନନ୍ଦନଃ ।

ପାର୍ଥୋ ଵତ୍ସଃ ସୁଧୀର୍ଭୋକ୍ତା ଦୁଗ୍ଧଂ ଗୀତାମୃତଂ ମହତ୍ ॥ ୬॥

ଏକଂ ଶାସ୍ତ୍ରଂ ଦେଵକୀପୁତ୍ରଗୀତମେକୋ

ଦେଵୋ ଦେଵକୀପୁତ୍ର ଏଵ ।

ଏକୋ ମନ୍ତ୍ରସ୍ତସ୍ୟ ନାମାନି ୟାନି

କର୍ମାପ୍ୟେକଂ ତସ୍ୟ ଦେଵସ୍ୟ ସେଵା ॥ ୭॥

ଶାନ୍ତାକାରଂ ଭୁଜଗଶୟନଂ ପଦ୍ମନାଭଂ ସୁରେଶଂ

ଵିଶ୍ଵାଧାରଂ ଗଗନସଦୃଶଂ ମେଘଵର୍ଣଂ ଶୁଭାଙ୍ଗମ୍ ।

ଲକ୍ଷ୍ମୀକାନ୍ତଂ କମଲନୟନଂ ୟୋଗିଭିର୍ଧ୍ୟାନଗମ୍ୟଂ

ଵନ୍ଦେ ଵିଷ୍ଣୁଂ ଭଵଭୟହରଂ ସର୍ଵଲୋକୈକନାଥମ୍ ॥

ୟଂ ବ୍ରହ୍ମା ଵରୁଣେନ୍ଦ୍ରରୁଦ୍ରମରୁତଃ ସ୍ତୁନ୍ଵନ୍ତି ଦିଵ୍ୟୈଃ ସ୍ତଵୈଃ

ଵେଦୈଃ ସାଙ୍ଗପଦକ୍ରମୋପନିଷଦୈର୍ଗାୟନ୍ତି ୟଂ ସାମଗାଃ ।

ଧ୍ୟାନାଵସ୍ଥିତତଦ୍ଗତେନ ମନସା ପଶ୍ୟନ୍ତି ୟଂ ୟୋଗିନୋ

ୟସ୍ୟାନ୍ତଂ ନ ଵିଦୁଃ ସୁରାସୁରଗଣା ଦେଵାୟ ତସ୍ମୈ ନମଃ ॥ ୮॥

॥ ଇତି ଧ୍ୟାନମ୍ ॥