ଅବ୍ୟାଦ୍ୱୋ ବାମନୋ ଯସ୍ୟ କୌସ୍ତୁଭପ୍ରତିବିମ୍ବିତା ।

କୌତୁକାଲୋକିନୀ ଜାତା ଜାଠରୀବ ଜଗତ୍ତ୍ରୟୀ ॥ ୧॥

ଅଙ୍ଘ୍ରିଦଣ୍ଡୋ ହରେରୂର୍ଧ୍ୱମୁତ୍କ୍ଷପ୍ତୋ ବଲିନିଗ୍ରହେ ।

ବିଧିବିଷ୍ଟରପଦ୍ମସ୍ୟ ନାଲଦଣ୍ଡୋ ମୁଦେଽସ୍ତୁ ନଃ ॥ ୨॥

ଖର୍ୱଗ୍ରନ୍ଥିବିମୁକ୍ତସନ୍ଧିବିଲସଦ୍ୱକ୍ଷଃସ୍ଫୁରତ୍କୌସ୍ତୁଭଂ

ନିର୍ୟନ୍ନାଭିସରୋଜକୁଡ୍ମଲପୁଟୀଗମ୍ଭୀରସାମଧ୍ୱନି ।

ପାତ୍ରାବାପ୍ତିସମୁତ୍ସୁକେନ ବଲିନା ସାନନ୍ଦମାଲୋକିତଂ

ପାୟାଦ୍ୱଃ କ୍ରମବର୍ଧମାନମହିମାଶ୍ଚର୍ୟଂ ମୁରାରେର୍ୱପୁଃ ॥ ୩॥

ହସ୍ତେ ଶସ୍ତ୍ରକିଣାଙ୍କିତୋଽରୁଣବିଭାକିର୍ମୀରିତୋରଃସ୍ଥଲୋ

ନାଭିପ୍ରେଙ୍ଖଦଲିର୍ୱିଲୋଚନୟୁଗପ୍ରୋଦ୍ଭୂତଶୀତାତପଃ ।

ବାହୂର୍ମିଶ୍ରିତବହ୍ନିରେଷ ତଦିତି ବ୍ୟାକ୍ଷିପ୍ୟବାକ୍ୟଂ କବେଃ

ତାରୈରଧ୍ୟଯନୈର୍ହରନ୍ବଲିମନଃ ପାୟାଜ୍ଜଗଦ୍ୱାମନଃ ॥ ୪॥

ସ୍ୱସ୍ତି ସ୍ୱାଗତମର୍ଥ୍ୟହଂ ବଦ ବିଭୋ କିଂ ଦୀୟତାଂ ମେଦିନୀ

କା ମାତ୍ରା ମମ ବିକ୍ରମତ୍ରୟପଦଂ ଦତ୍ତଂ ଜଲଂ ଦୀୟତାମ୍ ।

ମା ଦେହୀତ୍ୟୁଶନାବ୍ରବୀଦ୍ଧରିରୟଂ ପାତ୍ରଂ କିମସ୍ମାତ୍ପରଂ

ଚେତ୍ୟେବଂ ବଲିନାର୍ଚିତୋ ମଖମୁଖେ ପାୟାତ୍ସ ବୋ ବାମନଃ ॥ ୫॥

ସ୍ୱାମୀ ସନ୍ଭୁବନତ୍ରୟସ୍ୟ ବିକୃତିଂ ନୀତୋଽସି କିଂ ଯାଚ୍ଞୟା

ଯଦ୍ୱା ବିଶ୍ୱସୃଜା ତ୍ୱୟୈବ ନ କୃତଂ ତଦ୍ଦୀୟତାଂ ତେ କୁତଃ ।

ଦାନଂ ଶ୍ରେଷ୍ଠତମାୟ ତୁଭ୍ୟମତୁଲଂ ବନ୍ଧାୟ ନୋ ମୁକ୍ତୟେ

ବିଜ୍ଞପ୍ତୋ ବଲିନା ନିରୁତ୍ତରତୟା ହ୍ରୀତୋ ହରିଃ ପାତୁ ବଃ ॥ ୬॥

ବ୍ରହ୍ମାଣ୍ଡଚ୍ଛତ୍ରଦଣ୍ଡଃ ଶତଧୃତିଭବନାମ୍ଭୋରୁହୋ ନାଲଦଣ୍ଡଃ

କ୍ଷୋଣୀନୌକୂପଦଣ୍ଡଃ କ୍ଷରଦମରସରିତ୍ପଟ୍ଟିକାକେତୁଦଣ୍ଡଃ ।

ଜ୍ୟୋତିଶ୍ଚକ୍ରାକ୍ଷଦଣ୍ଡସ୍ତ୍ରିଭୁବନବିଜୟସ୍ତମ୍ଭଦଣ୍ଡୋଽଙ୍ଘ୍ରିଦଣ୍ଡଃ

ଶ୍ରେୟସ୍ତ୍ରୈବିକ୍ରମସ୍ତେ ବିତରତୁ ବିବୁଧଦ୍ୱେଷିଣାଂ କାଲଦଣ୍ଡଃ ॥ ୭॥

ଯସ୍ମାଦାକ୍ରାମତୋ ଦ୍ୟାଂ ଗରୁଡମଣିଶିଲାକେତୁଦଣ୍ଡାୟମାନାତ୍

ଆଶ୍ଚ୍ୟୋତନ୍ତ୍ୟାବଭାସେ ସୁରସରିଦମଲା ବୈଜୟନ୍ତୀବ କାନ୍ତା ।

ଭୂମିଷ୍ଠୋ ଯସ୍ତଥାନ୍ୟୋ ଭୁବନଗୃହମହାସ୍ତମ୍ଭଶୋଭାଂ ଦଧାନଃ

ପାତାମେତୌ ପୟୋଜୋଦରଲଲିତତଲୌ ପଙ୍କଜାକ୍ଷସ୍ୟ ପାଦୌ ॥ ୮॥

କସ୍ତ୍ୱଂ ବ୍ରହ୍ମନ୍ନପୂର୍ୱଃ କ୍ୱ ଚ ତବ ବସତିର୍ୟାଖିଲା ବ୍ରହ୍ମସୃଷ୍ଟିଃ

କସ୍ତେ ନାଥୋ ହ୍ୟନାଥଃ କ୍ୱ ସ ତବ ଜନକୋ ନୈବ ତାତଂ ସ୍ମରାମି ।

କିଂ ତେଽଭୀଷ୍ଟଂ ଦଦାମି ତ୍ରିପଦପରିମିତା ଭୂମିରଲ୍ପଂ କିମେତତ୍

ତ୍ରୈଲୋକ୍ୟଂ ଭାବଗର୍ଭଂ ବଲିମିଦମବଦଦ୍ୱାମନୋ ବଃ ସ ପାୟାତ୍ ॥ ୯॥

ଇତି ବାମନସ୍ତୁତିଃ ସମାପ୍ତା ।

ବାମନ ଜନ୍ମରେ ବାମନ ସ୍ତୁତିଃ