🙏🏻🌸ଜୟ ଶ୍ରୀ ଜଗନ୍ନାଥ ମହାପ୍ରଭୁ 🌸🙏🏻

🪷🪷🪷🪷🪷🌼🪷🪷🪷🪷

⭕‼️⭕ଶରଣ ଶ୍ରୀକ୍ଷେତ୍ର ⭕‼️⭕

ଗଜପତି ୨ୟ ରାମଚନ୍ଦ୍ର ଦେବଙ୍କ ଶାସନ କାଳ। ଦେଶରେ ମୋଗଲ ଶାସନ ଚାଲିଥାଏ। ଗଜପତିଙ୍କ ୮ମ ଅଙ୍କରେ ତକି ଖାଁର ନଜର ପଡେ ଶ୍ରୀକ୍ଷେତ୍ର ଉପରେ। ପ୍ରଥମ କରି ମୋଗଲ ସୁବେଦାର ତକି ଖାଁ ଖୋର୍ଦ୍ଧା ଉପରେ ଆକ୍ରମଣ କରେ। ଯୁଦ୍ଧ ଏଡାଇବାକୁ ରାମଚନ୍ଦ୍ର ଦେବ ସନ୍ଧି କରନ୍ତି। ହିନ୍ଦୁ ବିଦ୍ବେଶୀ ତକି ଖାଁ ସନ୍ଧି ଭଙ୍ଗ କରେ।

ଗଜପତିଙ୍କ ପୁତ୍ରମାନେ ଗଞ୍ଜାମ ଆଠଗଡ଼ ରାଜା ଜଗନ୍ନାଥ ହରିଚନ୍ଦନଙ୍କ ପାଖକୁ ଚାଲି ଯାଆନ୍ତି। କିନ୍ତୁ ପୁତ୍ରମାନଙ୍କ ମଧ୍ୟରୁ ବିଚକ୍ଷଣ ଥିବା ଭାଗିରଥୀ ଆଠଗଡ ସୈନ୍ୟଙ୍କ ସହାୟତା ନିଅନ୍ତି। ପୁରୀ ଆଉ ଖୋର୍ଦ୍ଧାରୁ ଯବନମାନଙ୍କୁ ତଡି ନିଜକୁ ଗଜପତି ଘୋଷଣା କରନ୍ତି ଭାଗିରଥୀ। ଖବର ପାଇବା ପରେ ଉତ୍ୟକ୍ତ ହୋଇପଡେ ତକି। ଆକ୍ରମଣ କରେ ଖୋର୍ଦ୍ଧା ଉପରେ । ଭାଗିରଥୀଙ୍କୁ ପରାସ୍ତ କରି ଦୁର୍ଗ ଦଖଲ କରେ।

ତକି ଖାଁ ହିନ୍ଦୁମାନଙ୍କୁ ଘୃଣା କରୁଥିଲା। ଏଣୁ ଜଗନ୍ନାଥ ମନ୍ଦିର ଉପରେ ଆକ୍ରମଣ କରିବାକୁ ସେ ନିଷ୍ପତ୍ତି ନେଲା। ଖବର ଗଜପତିଙ୍କ ପାଖରେ ପହଞ୍ଚିବାରୁ ମହାପ୍ରଭୁଙ୍କୁ ସୁରକ୍ଷିତ ସ୍ଥାନାନ୍ତର ପାଇଁ ଚିନ୍ତା କରାଗଲା। ଦୋବନ୍ଧ ଘାଟରେ ଦିଅଁଙ୍କୁ ଚାପରେ ବିଜେ କରାଇ ବାଣପୁର ନଇରୀ ଗ୍ରାମର ହରିଶ୍ବର ମଣ୍ଡପ ଓ ପରେ ଖଲ୍ଲିକୋଟର ଚିକିଲି ନେଇ ରଖାଗଲା।

ଠାକୁର ସ୍ଥାନାନ୍ତର ହୋଇଥିବା କଥା ତକି ଖାଁ ଜାଣି ପୁଣି ଥରେ ଖୋର୍ଦ୍ଧା ଆକ୍ରମଣ କଲା। ଗଜପତି ପରାସ୍ତ ହେଲେ। ନିର୍ଦ୍ଦେଶ ଦେଇଗଲେ ମହାପ୍ରଭୁଙ୍କୁ ନେଇଆସ। ସେବକମାନେ ସେଇଆ କଲେ। ଚିଲିକାର କୂଳେ କୂଳେ ପ୍ରଥମେ ବାଣପୁର ତା ପରେ ଆଠଗଡ଼କୁ ନିଆଗଲା ବଡ଼ ଠାକୁରଙ୍କୁ।

ନିଜ ଅଞ୍ଚଳକୁ ମହାପ୍ରଭୁ ଆସୁଥିବା କଥା ଶୁଣି ଯେତିକି ଆନନ୍ଦିତ ହେଉଥାନ୍ତି, ସେତିକି ମର୍ମାହତ ଥାଆନ୍ତି, ଆଠଗଡ଼ ରାଜା ଜଗନ୍ନାଥ ହରିଚନ୍ଦନ। ତଥାପି ମହାପ୍ରଭୁଙ୍କୁ ସୁରକ୍ଷା ଦେବାକୁ ପଡିବ। ତେଣୁ ହାତୀବାରି ପର୍ବତ ପାଖରେ ବୃକ୍ଷପୂର୍ଣ୍ଣ ଜଙ୍ଗଲ ଭିତରେ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହୁଏ। ମାତ୍ର ୪୫ ଦିନ ମଧ୍ୟରେ ଠିଆହୁଏ ମାରଦା ମନ୍ଦିର। ସ୍ଥାନୀୟ ମଥୁରା ଗ୍ରାମର ଶିଳ୍ପୀମାନେ କୁନ୍ଦା ପଥରରେ ଠିଆ କରନ୍ତି ବଡ଼ ଠାକୁରଙ୍କ ପାଇଁ ଛୋଟିଆ ବଡ଼ ଦେଉଳ।

ସୁରକ୍ଷା ଦୃଷ୍ଟିରୁ ଏହା ଥିଲା ଅତି ଉତ୍ତମ ସ୍ଥାନ। ହାତିବାରୀ, ଅସୁରେଇ ଓ କୁକୁଡିଆ ପାହାଡ ଘେରି ରହିଥାଏ ଏହି ମନ୍ଦିରକୁ। ଘଞ୍ଚ ଜଙ୍ଗଲ ଭିତରେ ମାରଦା ବା ବାଡିଆ ଆଟୁ ଶୈଳୀର ମନ୍ଦିରକୁ ବାହାର ଶତ୍ରୁ ଚିହ୍ନଟ କରିବା ସମ୍ଭବ ନୁହେଁ। ଏଣୁ ସେଇଆ କରନ୍ତି ରାଜା ଜଗନ୍ନାଥ ହରିଚନ୍ଦନ।

ମଥୁରା ଗ୍ରାମର ଶିଳ୍ପୀମାନେ ଦୁଇମାସ କାଳ ଅହୋରାତ୍ର ପରିଶ୍ରମ କରି ଦେଉଳ ତୋଳିଥାନ୍ତି। ସ୍ବତନ୍ତ୍ର ଧରଣର କୁନ୍ଦା ପଥରରେ ଦେଉଳ ନିର୍ମାଣ ହୋଇଥାଏ। ମନ୍ଦିରର ବିମାନ ଓ ଜଗମୋହନ ଦୁଇ ଭାଗରେ ନିର୍ମିତ ହୋଇଛି। ବିମାନ ଜଗମୋହନର ଦୈଘ୍ୟ ୩୫ ଫୁଟରେ ୪୫ ଫୁଟ ଓ ପ୍ରସ୍ତ ୨୨ଫୁଟରେ ୨୪ ଫୁଟ।

ମନ୍ଦିର ଏକ ସ୍ବତନ୍ତ୍ର ଚଉତରା ବା ପଦ୍ମପୀଢ ଉପରେ ନିର୍ମିତ ହୋଇଛି। ମନ୍ଦିର କାନ୍ଥର ଚଉଡା ୪ଫୁଟରୁ ଅଧିକ। ମନ୍ଦିରର ଉପରଭାଗ, ଅଁଳାବେଢା, ଖପୁରୀ, କଳସ ଆଉ ନିଳଚକ୍ର ଦ୍ବାରା ବିମଣ୍ଡିତ।

ଏବେ ଏଠି ଦିଅଁ ନାହାନ୍ତି। ମନ୍ଦିର ମଧ୍ୟରେ ଏବେ କେବଳ ସେ ସ୍ମୃତିର ଅବଗାହନ ଲାଗି ତିନୋଟି ପଥର ପିଣ୍ଡି ବା ଚକା ବଇଠି ରହିଛି। ଯାହାକୁ ପଥରା ଗ୍ରାମର ପୂଜକ ପୂଜା କରୁଛନ୍ତି।

ସେ ସମୟରେ ଗଜପତି ରାମଚନ୍ଦ୍ରଙ୍କୁ ମଧ୍ୟ ଶରଣ ଦେଇଥିଲେ ଆଠଗଡ ରାଜା। ଭୁଇଁ ତଳେ ନଅର ତୋଳାଇ ରଖିଥିଲେ ବୋଲି କେହି କେହି କୁହନ୍ତି। ମାରଦା ବା ବାଡିଆ ଆଟୁ ଶୈଳୀର ମନ୍ଦିର ତୋଳା ଯାଇଥିବାରୁ ସ୍ଥାନର ନାଁ ହୁଏ ମାରଦା। ଆଉ ଏଇଠି ଦୀର୍ଘ ୨ ବର୍ଷ ୪ ମାସ କାଳ ଏଠାରେ ଠାକୁର ଅବସ୍ଥାନ କରନ୍ତି।

ସମୟ କ୍ରମେ, ମୃତ୍ୟୁ ଘଟେ ତକି ଖାଁର। ତକିର ମୃତ୍ୟୁ ପରେ ମଧ୍ୟ ମହାପ୍ରଭୁଙ୍କୁ ଶ୍ରୀକ୍ଷେତ୍ରରେ ଅବସ୍ଥାନ କରାଇବା ସମ୍ଭବପର ହୁଏନି। ଏପଟେ ଓଡ଼ିଶାର ସୁବେଦାର ହୁଏ ମୁର୍ସିଦ୍ କୁଲି ଖାଁ। ଏପଟେ ଶ୍ରୀମନ୍ଦିର ଶୂନ୍ୟ ପଡିଥିବାରୁ, ପୁରୀରୁ ମିଳୁଥିବା ରାଜକୋଷ ଅହେତୁକ ଭାବେ କମିଯାଏ। ତିର୍ଥଯାତ୍ରୀ କର ବାବଦକୁ ୯ ଲକ୍ଷ ଟଙ୍କାର ଘାଟା ଖାଏ ମୋଗଲ ସଲତନତ୍। ଏଣୁ ସେମାନେ ଚିନ୍ତା କରନ୍ତି ମହାପ୍ରଭୁଙ୍କୁ ଶ୍ରୀକ୍ଷେତ୍ରରେ ପୁନଃ ସ୍ଥାପନ କରିବେ। ପ୍ରତିନିଧି ମିର ହବିବଙ୍କୁ ପଠାଇ, ଦିଆଁଙ୍କୁ ଆଠଗଡରୁ ଶ୍ରୀକ୍ଷେତ୍ରରେ ଆଣି ସ୍ଥାପନ କରାଯାଏ।

ମହାପ୍ରଭୁ ଓ ଗଜପତିଙ୍କୁ ଶରଣ ଦେଇଥିବାରୁ ଏହାକୁ କୁହାଯାଏ ଶରଣ ଶ୍ରୀକ୍ଷେତ୍ର। ଖାଲି ସେତିକି ନୁହେଁ ଗଜପତି ମଧ୍ୟ ଏଠାକାର ରାଜାଙ୍କୁ ସମୁଚିତ ସମ୍ମାନ ଦେଇଛନ୍ତି। ଯାହାର ସ୍ମାରକୀ ସ୍ବରୂପ ଆଜି ବି ବଡ଼ ଦେଉଳ ଚୁଡାକୁ ମହାଦୀପ ଉଠିଲେ ଆଠଗଡ ରାଜାଙ୍କ ନାଁ ପଡେ। ତାଙ୍କୁ ମିଳିଥିଲା ଜଗଦ୍ଦେବ ଓ ଶରଣ ପର ଉପାଧି।

ଯେଉଁଥିପାଇଁ ବଡ଼ ଏକାଦଶୀରେ ମହାଦୀପ ଉଠିଲା ବେଳେ କୁହାଯାଏ, ‘ଶରଣ ପର ମାନ ଉଦ୍ଧାରଣ ବୀରବର ଭାଇ ଜଗଦ୍ଦେବଙ୍କୁ ଶଙ୍ଖେ ପୂରାଇ ଚକ୍ରେ ଆଢୁଆଳ କରିବା ହେଉ ହେ ମଣିମା…।

ସଂଗୃହିତ 🙏🏻

ଜୟ ଜଗନ୍ନାଥ ଜୟ ଜୟ ଜଗନ୍ନାଥ 🙏🏻