ଲରରା ପୋ ଗଣେଶବାବାର ପୂଜା ପରବ ସରଲାନ

ବଛର୍ ଯାକର୍ ଉସଦ ଆନନ୍ଦ ନୂଆଖାଇ ତିହାର୍ ଆଏଲାନ ।

ରଝୋ-ରଝୋ ପାଏନ୍‌ ବରଷା ଯିବାର ଲାଗି ବାହାରଲାନ

ଟୁପୁର୍-ଟାପୁର୍ କୁଁଡ଼ାଧୂଆନେ ଖେତେ ବାହାଲେ କାଏଁଶଫୁଲ

ବଗବଗାତେଲ ଫୁଟି କରି ମୁଲୁର୍ ମୁଲୁର୍ ହସଲାନ ।

ବରଷାପାଏନ୍‌ ଖଲଖଲାଲା ବାଗିର ଦୂରୁ ଦିଶଲାନ

ବଛର୍ ଯାକର ଉସଦ ଆନନ୍ଦ ନୂଆଖାଇ ତିହାର ଆଏଲାନ ।

କଲା ମେଘର ଅଁଧାର ରାଏତ୍‌ ଆକାଶୁ ହଟିଗଲାନ

ସରଗପୁରେ ବାଦଲ ରଜା ପରଛା ପରଛା ଦିଶଲାନ

ରାନୀ ମା’ ଆମର ସମଲେଇ ଦେବୀ

ଲାଲ୍ ମନ୍ଦାରେ ସଜେଇ ହେଇ

କେଡ଼େ ସୁନ୍ଦର୍ ଦିଶଲାନ ,

ପାଟ ଶାଢ଼ୀର କାନି ପନତେ କେତେ ଦରବ ଆନଲାନ ।

ମା’ର୍ ପନତୁ ଖୁଜିନୁରି

ଝାଁକର ବୁଢ଼ା ଗୁରସ ଢୁକା ନୂଆ ଧାନ୍ ଖେଡ଼‌ ଆନଲାନ ।

ଖରସି ଲିପା ଖୁଲିର ପିଁଡ଼ାନେ ଘର୍-ଘର୍ କରି ବାଠିଲାନ,

ଗାଡ଼ସାରୁ ଭି ମିଲ୍‌ଲାନ ।

ବଛର୍ ଯାକର୍ ଉସଦ୍‌ ଆନନ୍ଦ ନୂଆଖାଇ ତିହାର ଆଏଲାନ ।

ଆସ ଆସ ହୋ! ଦୂରିଆର୍ ଲୁକେ,

ଛୁଆପୁତାକୁ ମାଟି ମା’ ତୁମର୍ ଡାକଲାନ ।

ଚିକନ୍‌-ଚାକନ୍‌ ଗାଁ ତୁମକୁ ନୁରଲାନ,

ସାରୁଶାଗ-ମାଖନ୍‌ ପତର, ନୂଆ ମାଖନ୍ କେ

ଜହ୍ନି ବତର୍ ହେଁଡ଼ୁଆ ପରଝା ଠୁକ୍-ଠୁକା ତୁନ୍‌

କରଡ଼ି ଦିଆ ଆମ୍ବିଲା ଘନା ହାଁଡ଼ି ର ମୁଗଦାଏଲ

କେ କାକର୍, ମଡ଼ା , ଖିରିପିଠା,

ସପୁର୍ ଚାଉଲର୍ ଅରୁଆ ଭାତ୍‌

ଖଲି ଚକନି-କଦଲୀ ପତରେ ବଢ଼ା ହେବାର୍ ଲାଗି ଟାକଲାନ

ଆମର ବଛର ଯାକର ଉସଦ୍‌ ଆନନ୍ଦ

ନୂଆଖାଇ ତିହାର୍ ଆଏଲାନ ।

ସୁଖର୍ ଦୁଃଖର୍ ପାହା ଥାପି ନରଦି-ନରଦି

ସମିଆର୍ ଧାର୍ ଲେହେଟି କରି ଆଏଲାନ ।

ସବୁବେଲେ ନରଦି-କୁଦି କେଭେ ହେଲେ କାଏଁ ଥକଲାନ ?

ଆସବାର୍-ଯିବାର୍ ଦୁନିଆର୍ ଖେଲ୍

କାନେ-କାନେ ଫେର୍ କହେଲାନ ।

ଜୁନ୍‌ହା ଦୁଃଖକେ ପାସ ରି ଦିଅ,

ନୂଆ ସୁଖକେ ଆଦରି ନିଅ ।

ପୁଛି ଦିଅ ମନୁ ପଛର୍ କଥା,

ନୂଆ ଖାଇ ଦିନର୍ ନୂଆ ଭାବ୍ ।

ହାତ ଧରି ଆସି ଗାଁ ଖୁଲିକେ,

ଭେଟ୍-ଘାଟ୍ ପରଵ ମନାମା ନ ।

ପୁରଖା ଲୁକକୁ ମୁଡ଼ିଆ ମାରି ,

ତାକର୍ ଆଶୀର୍ବାଦ୍ ଛିନ୍‌ମା ନ ।

ବଛର୍ ଯାକର୍ ଉସଦ୍ ଆନନ୍ଦ,

ନୂଆଖାଇ ତିହାର୍ ଆଏଲା ନ ।

ଆମର୍ ପଶ୍ଚିମ୍ ଉଡ଼ିଶାର୍ ଇ ମଧୁର ପରବ୍

ସମକୁ ଆଜରି ଆନଲା ନ,

ସବକୁ ସାଉଁଟି ଆନଲାନ ।

ଆସ ଆସ ହୋ ପୁରଥି ଯାକର୍ ଭାଏବହନେ,

ନୂଆ ଖାଇର୍ ଭେଟ୍-ଘାଟ୍ ନେ

ସମକୁ ଜୁହାର୍ କରଲୁଁ ନ …..।

ମୋଦିପଡ଼ା,ସମ୍ବଲପୁର

ଦୂରାଭାଷ- ୭୯୭୮୮୬୪୬୧୨

ନୂଆଖାଇତିହାର୍

ଶ୍ରୀମତୀ ଡକ୍ଟର ସଙ୍ଗୀତା ନାଏକ ପୁରୋହିତ