⚫❗⚫

ll ଶ୍ରୀମନ୍ଦିର ରେ ଆଜି ଘୋଡ ଅଧିବାସ ll

ଆଜି ମାର୍ଗଶିର ଶୁକ୍ଳ ପଞ୍ଚମୀ ମହାପ୍ରଭୁ ଙ୍କ ଘୋଡ଼ ଅଧିବାସ ନୀତି ଅନୁଷ୍ଠିତ ହେବ । ଆଜି ମହାପ୍ରଭୁ ଙ୍କ ବଡ଼ ସିଂହାର ଭୋଗ ବଢି ସାରିଲା ପରେ ପୂଜା ପଣ୍ଡା ଙ୍କ ଦ୍ଵାରା ଭୋଗ ମଣ୍ଡପ ଘରେ ମହାପ୍ରଭୁ ମାନଙ୍କ ପାଇଁ ଘୋଡ ବସ୍ତ୍ର ଅଧିବାସ କରାଯିବ ତତ୍ପରେ ଶ୍ରୀ ବିଗ୍ରହ ମାନଙ୍କ ମଇଲମ ହୋଇ ମହାସ୍ନାନ ନୀତି ହୋଇ ଝିନ ପତନି ଲାଗି ହୋଇ ବେଶ ଅନୁଷ୍ଠିତ ହେବ। ଆଜି ରାତି ସାରା ମହାପ୍ରଭୁ ଶୀତ ଋତୁ ସହ ଯୁଦ୍ଧ କରି ଶୀତ ଋତୁ ର ମାନ ରଖିବା ପାଇଁ ମହାପ୍ରଭୁ ନିଜେ ପରାଜୟ ସ୍ଵୀକାର କରି ଶୀତ ବସ୍ତ୍ର ପରିଧାନ କରିବେ ଦୀର୍ଘ ଦୁଇ ମାସ ଧରି ମାନେ ମାର୍ଗଶିର ଶୁକ୍ଳ ଷଷ୍ଠୀ ଠାରୁ ମାଘ ଶୁକ୍ଳ ପଞ୍ଚମୀ ଯାଏଁ ମହାପ୍ରଭୁ ଘୋଡ ଲାଗି ବେଶ ହେବେ । ଧନ୍ୟ ମହାପ୍ରଭୁ ଧନ୍ୟ ଆପଣଙ୍କ ଲୀଳା।

ଋତୁଚକ୍ରର ଆବର୍ତ୍ତନ କ୍ରମେ ଶୀତ ଋତୁର ପ୍ରବେଶ ହୋଇଛି। ଦିବସର ଦୈର୍ଘ୍ୟ କ୍ଷୀଣ ହେବା ସହ ରାତ୍ରି ପ୍ରଶସ୍ତ ହେଉଛି।କିନ୍ତୁ ରତ୍ନସିଂହାସନାରୂଢ ମହାପ୍ରଭୁଙ୍କ ଆଗରେ ଶୀତର କର୍ତ୍ତୁତ୍ଵ ବା କେତେ! ଶୀତକୁ ଭ୍ରୁକ୍ଷେପ ନକରି ଆଜି ମହାପ୍ରଭୁ ବଡ଼ସିଂହାର ବେଶରେ ଖଣ୍ଡୁଆ ପାଟ ପରିବର୍ତ୍ତେ ପତଳା ପତନି ବା ଝୀନବସ୍ତ୍ର ଲାଗି ହୁଅନ୍ତି।ଏହା ଦେଖି ଶୀତ ଋତୁ ଶ୍ରୀରଙ୍ଗା ଚରଣ ତଳେ ଗୁହାରି କରେ" ହେ ମହାପ୍ରଭୁ! ହେ ମୋର ସ୍ରଷ୍ଟା ଯଦି ଆପଣ ମୋର ଅସ୍ତିତ୍ୱକୁ ଅସ୍ବୀକାର କରନ୍ତି, ତେବେ ପୃଥ୍ବୀ ବାସୀ ମୋତେ କାହିଁକି ବା ଗ୍ରହଣ କରିବେ! ମୋର ବିଶେଷତ୍ଵ ବା କଣ ରହିବ!" ଏହା ଶୁଣି ମହାପ୍ରଭୁ ଶୀତକୁ ଆଶ୍ୱାସନା ଦିଅନ୍ତି ଏବଂ ଶୀତ ଦାଉରୁ ନିଜକୁ ରକ୍ଷା କରିବା ନିମନ୍ତେ ଘୋଡ଼ଲାଗି ଅଧିବାସ ପାଇଁ ଆଜ୍ଞା ଦିଅନ୍ତି।

ଶୁକ୍ଳାୟାମଥ ପଞ୍ଚମ୍ୟାଂ ଚତୁର୍ଥ୍ୟର୍ଚ୍ଚାବସାନତଃ।

ଚତୁର୍ବିଂଶତିଭିର୍ଦେବମୁପଚାରୈସ୍ତୁ ପୂଜୟେତ୍।।

"ଶୀତକୁ କହିଲେ ନାଥ ଶୁଣ ମୋ ବଚନ

ତପୀ, ଦୁଃଖୀ , ରଙ୍କି , ନିଆଶ୍ରୟୀ ଯେତେ ଜନ

ନ ପୀଡିବୁ ତେବେ ଘୋଡ଼ ମୁଁ ପିନ୍ଧିବି

ସବୁ କାଳ ତୋଠାରେ ପରାଜୟ ମୁଁ ମାନିବି।"

ଶ୍ରୀ ଜଗନ୍ନାଥ ସଂସ୍କୃତିରେ ଅଧିବାସର ବିଶେଷ ମହତ୍ତ୍ଵ ରହିଛି।ଦ୍ଵାଦଶ ଯାତ୍ରାରେ ଯେତେବେଳେ ମହାପ୍ରଭୁଙ୍କୁ କୌଣସି ବିଶେଷ ବସ୍ତ୍ର କିମ୍ବା ଅଭିଷେକ ଉଦ୍ଦେଶ୍ୟରେ ଜଳ ଅଥବା ଚନ୍ଦନ ଲାଗି କରାଯାଏ,ତାହାକୁ ଅଭିମନ୍ତ୍ରିତ କରାଯାଇ ସଂସ୍କାର ପୂର୍ବକ ଏହାର ଶୁଦ୍ଧତାକୁ ବହୁଗୁଣିତ କରାଯାଏ।ଏହା କୌଣସି ବିଶେଷ ଉତ୍ସବର ପ୍ରାକ୍ ଆୟୋଜନର ପ୍ରତୀକ ଭାବେ ମହାପ୍ରଭୁଙ୍କ ଶ୍ରୀଛାମୁରେ ଜଣାଇ ଦିଆଯାଏ।

ଆଜି ପଞ୍ଚମୀ ତିଥିରେ ଶ୍ରୀଜୀଉଙ୍କର ରାତ୍ର ଚନ୍ଦନ ଲାଗି ନୀତି ବଢିବା ପରେ ଆଗରୁ ଧୋ ପଖାଳ ହୋଇ ଚାନ୍ଦୁଆ ଟଣା ଯାଇଥିବା ଭୋଗମଣ୍ଡପ ଘରେ ପୂଜାପଣ୍ଡା ୩ ଗୋଟି ମଣ୍ଡଳ କାଟିଥାନ୍ତି ଏବଂ ଭଣ୍ଡାର ମେକାପ ଏହାଉପରେ ଶ୍ରୀଜୀଉଙ୍କ ଘୋଡ଼ ଅଧିବାସ ନିମନ୍ତେ ରଖିଥାନ୍ତି । ଏହାପରେ ପୂଜାପଣ୍ଡା ଅଧିବାସ ନୀତି କରିବା ପରେ ଦୁଆର ମୁଦ ଦିଆ ଯାଇଥାଏ।ମୋଟ ୧୨ଟି ଘୋଡ଼ ( ଚତୁର୍ଦ୍ଧା ବିଗ୍ରହଙ୍କର) ସମେତ ବିମଳା , ଲକ୍ଷ୍ମୀ , ମଦନମୋହନ , ଶ୍ରୀଦେବୀ , ଭୂଦେବୀ ଙ୍କ ଘୋଡ଼ ଅଧିବାସ ହୋଇଥାଏ। ତତ୍ପରେ ଭୋଗମଣ୍ଡପ ଘର ଦ୍ୱାରମାନ ବନ୍ଦ କରାଯାଇ ମୁଦ ଦିଆଯାଇଥାଏ।

ଆଜି ଦୁଇଥର ମହାପ୍ରଭୁ ବଡସିଂହର ବେଶ ହୁଅନ୍ତି ବଡ଼ସିଂହାର ବେଶ ବଢ଼ିଲା ପରେ ତିନି ବାଡ଼ରେ ମଇଲମ ହୋଇ ଝିନ ପତନୀ ଲାଗି ହୋଇଥିଲା । ଏହାପରେ ଘଟୁଆରୀ ଘରୁ ପୂଜାପଣ୍ଡା , ପତିମହାପାତ୍ର , ମୁଦିରସ୍ତ , ଘଣ୍ଟ , ଛତା , କାହାଳୀ ପଟୁଆରରେ ଚନ୍ଦନ ବିଜେ କରାଇ ସର୍ବାଙ୍ଗ ଚନ୍ଦନ ଲାଗି କରିଥାନ୍ତି। ଏହାପରେ ବିଡ଼ିଆ ମଣୋହି ହୋଇ ପହୁଡ଼ ନୀତି ହୋଇଥାଏ।