ନାରୀ କାର୍ଯ୍ୟେଶୁ ମନ୍ତ୍ରୀ କର୍ମେଶୁ ଦାସୀ

ଶୟନେଶୁ ରମ୍ଭା କ୍ଷମାୟା ଧରିତ୍ରୀ ।

ଭାରତୀୟ ସଂସ୍କୃତି ତଥା ସନାତନ ସଂସ୍କୃତି ରେ ନାରୀ ର ଭୂମିକା ସବୁଠୁ ଉଚ୍ଚ ରେ। ସେଥିପାଇଁ ତ କୁହାଯାଏ ଯତ୍ର ନାର୍ଯ୍ୟେଶୁ ପୂଜ୍ୟନ୍ତେ ରମନ୍ତେ ତତ୍ର ଦେବତା। ନାରୀ ସୃଷ୍ଟି ର ସର୍ଜନା କାରିଣୀ ହୋଇ ଏହି ସୃଷ୍ଟି ରଚନା କରେ ତ ପୁଣି ପ୍ରଳୟ କାରିଣୀ ହୋଇ ଏହାର ସନ୍ତୁଳନ ରକ୍ଷା କରେ। ଭାରତ ର ପୁରାଣ ଠାରୁ ଆରମ୍ଭ କରି ଇତିହାସ ପର୍ଯ୍ୟନ୍ତ ନାରୀ ସର୍ବତ୍ର ପୂଜନୀୟା ଓ ଭାରତୀୟ ସଂସ୍କୃତି ସଦା ସର୍ବଦା ଏହା ଉପରେ ଗୁରୁତ୍ବ ପ୍ରଦାନ କରିଛି।

ଭାରତୀୟ ପୁରାଣ ରେ ଦେବଙ୍କ ନାମ ଆଗରୁ ଦେବୀ ଙ୍କ ନାମ କୁ ସ୍ଥାନ ମିଳିଥାଏ। ଆଉ ପୁରାଣ ରେ ବର୍ଣ୍ଣିତ ଅଛି ଯେ ସମଗ୍ର ସୃଷ୍ଟି ର ଆଧାର ହେଉଛନ୍ତି ମା ଆଦିଶକ୍ତି । ସେ କେତେବଳେ ଐଶର୍ଯ୍ୟମୟୀ ମା ଲକ୍ଷ୍ମୀ ହୋଇ ଶ୍ରୀ ବିଷ୍ଣୁ ଙ୍କୁ ସଂପୂର୍ଣ୍ଣ କରୁଛନ୍ତି ତ କେତେବେଳେ ମହାକାଳ ଙ୍କ ର ମହାକାଳୀ ହୋଇ ସନ୍ତୁଳନ ରକ୍ଷା କରୁଛନ୍ତି ତ ପୁଣି ବ୍ରହ୍ମାଣି ହୋଇ ସର୍ଜନା କରୁଛନ୍ତି। ସଂପୂର୍ଣ୍ଣ ଭାରତୀୟ ସଂସ୍କୃତି ର ଆଧାର ହିଁ ଏକ ନାରୀ ର ବ୍ୟକ୍ତିତ୍ଵ ଉପରେ ପର୍ଯ୍ୟବେସିତ।

ମାତା ଅନସୁୟା ଙ୍କ ମହାନତା ଗାଥା ତ ଆପଣ ପୁରାଣ ରୁ ଜାଣିଥିବେ ଯେଉଁ ସତୀ ଶିରୋମଣି ଙ୍କ ସତୀତ୍ୱ ଆଗରେ ସ୍ଵୟଂ ବ୍ରହ୍ମା ବିଷ୍ଣୁ ମହେଶ୍ୱର ବି ହାରି ଯାଇଥିଲେ। ମାତା ବୃନ୍ଦାବତୀଙ୍କ ସତୀତ୍ୱ ର ତେଜ ବଳରେ ପାଳନ କର୍ତ୍ତା ନାରାୟଣ ବି ଶାଳଗ୍ରାମ ରେ ପରିଣତ ହୋଇଯାଇଥିଲେ। ତେଣୁ ଭାରତୀୟ ସଂସ୍କୃତି ର ପ୍ରତ୍ୟେକ ଫର୍ଦ୍ଦ ରେ ଆପଣ ଆଦର୍ଶ ନାରୀ ମାନଂକ ର ବନ୍ଦନା ଦେଖିବାକୁ ପାଇବେ।

ଆସନ୍ତୁ ଦେଖିବା ରାମାୟଣ ରେ ନାରୀ ର ଗୁରୁତ୍ଵ। ପ୍ରଥମତଃ ସ୍ଵୟଂ ଭଗବାନ ଶ୍ରୀ ରାମ ବି ପିତୃ ସତ୍ୟ ପାଳନ ନିମିତ୍ତ ଚଉଦ ବର୍ଷ ବନବାସ ଚାଲିଗଲେ କିନ୍ତୁ ମାତା କୈକେୟୀ ଙ୍କ ବିରୋଧରେ ଶବ୍ଦ ଟିଏ ମଧ୍ୟ କହିଲେନି କାରଣ ଭାରତୀୟ ସଂସ୍କୃତି ମାତା ଯିଏକି ଗୋଟିଏ ନାରୀ ର ସର୍ବ ଶ୍ରେଷ୍ଠ ପରିଚୟ କୁ ସମ୍ମାନ ଦେଇ ଶିଖେ। ଆଉ କୈକେୟୀ ଓ ମନ୍ଥରା ଙ୍କର ଗାଥା ଏହା ଦର୍ଶାଇ ଥାଏ ଯେ ଯେବେ ନାରୀ ବିପରୀତ ଗତି ଦେଖାଇ ଥାଏ ତେବେ ସଂପୂର୍ଣ୍ଣ ବଂଶ ଧ୍ଵଂସ ହୋଇଯାଏ। ରାମାୟଣ ରେ ଜଗଜ୍ଜନନୀ ସୀତା ମାତା ଙ୍କୁ କଣ ଆଉ ବର୍ଣ୍ଣନା କରିବି ସେ ତ ଭାରତୀୟ ଆଦର୍ଶ ନାରୀ ର ସର୍ବଶ୍ରେଷ୍ଠ ଉଦାହରଣ ଯିଏକି ନିଜର ମର୍ଯ୍ୟାଦା ର ଅଳଙ୍କାର ପିନ୍ଧି ଯୁଗ ଯୁଗ ପାଇଁ ନାରୀ ପୁରୁଷ ଜାତି କୁ ଦିଗଦର୍ଶନ ଦେଉଛନ୍ତି ସେଥିପାଇଁ ସେ ସର୍ବଦା ପୂଜନୀୟା ଓ ରାମାୟଣ ରେ ସୀତାରାମ ନାରୀ ଜାତି ର ମହତ୍ତ୍ଵ କୁ ବର୍ଣ୍ଣନା କରିଛନ୍ତି। ରାମାୟଣ ରେ ମା ଶବରୀ , ପ୍ରବଳ ପାପୀ ଲଙ୍କେଶ ରାବଣ ଙ୍କ ସ୍ତ୍ରୀ ମନ୍ଦୋଦରୀ ଓ ବାଳି ଙ୍କ ସ୍ତ୍ରୀ ତାରା ଭଳି ଅନେକ ମହିୟସୀ ନାରୀ ମାନଙ୍କୁ ସ୍ଵତନ୍ତ୍ର ସ୍ଥାନ ମିଳିଛି। ରାମାୟଣ ଏହା ଦର୍ଶାଇ ଦେଉଛି ଯେବେ ଯେବେ ନାରୀ ର ଆଖିରୁ ଲୁହ ବୁନ୍ଦା ବୋହିବ ସେବେ ତାର ସୁନାର ରାଜ୍ୟ ହୋଇ ନଥାଉ କାହିଁକି ସବୁ ଧ୍ଵଂସ ହୋଇଯିବ।

ଦ୍ଵାପର ଯୁଗରେ ଶ୍ରୀ କୃଷ୍ଣ ଙ୍କ ର ଲୀଳା କଣ ରାଧା ରାଣୀ ଙ୍କ ବିନା ପୁରା ହୋଇ ପାରେ। ମାତା ଯଶୋଦା ଓ ମାତା ଦେବକୀ ଙ୍କ ର ଆଦର୍ଶ ବିନା କଣ ଅଝଟିଆ କୃଷ୍ଣ ଯୁଗ ର ସର୍ବଶ୍ରେଷ୍ଠ ସମ୍ଭବ। ସେ ରାଧା ଦେବୀ ହୁଅନ୍ତୁ ବା ମାତା ରୁକ୍ମିଣୀ ବା ଅନ୍ୟ ପାଟବଂଶୀ ଙ୍କୁ ବି କୃଷ୍ଣ ଲୀଳା ରେ ସମ୍ମାନ ଭାରତୀୟ ସଂସ୍କୃତି ରେ ନାରୀ ର ସ୍ଥାନ କୁ ଦର୍ଶାଇ ଥାଏ। ଅନ୍ୟ ପଟେ ମହାଭାରତ ରେ ଗୋଟିଏ ନାରୀ ଦ୍ରୌପଦୀ ଙ୍କ ର ଅପମାନ ରେ କେମିତି ସଂପୂର୍ଣ୍ଣ କୁରୁ ବଂଶ ଧ୍ଵଂସ ହୋଇଗଲା ତାହା ଲୋକଙ୍କୁ ସଚେତନ କରାଇଥାଏ।

ଭାରତୀୟ ଇତିହାସ ରେ ଗାର୍ଗୀ, ଲୋପାମୁଦ୍ରା ଙ୍କ ଭଳି ଅନେକ ଙ୍କ ଆଦର୍ଶ ପ୍ରସ୍ପୁଟିତ ହୋଇ ଅଛି। ଭାରତ ର ସର୍ବଶ୍ରେଷ୍ଠ ଶାସକ ମଧ୍ୟରୁ ଅନ୍ୟତମ ଛତ୍ରପତି ଶିବାଜି ମହାରାଜ ଙ୍କ ର ଜୀବନ ଓ ବିରତ୍ୱ ରେ ଯଦି ଜଣେ କିଏ ମୁଖ୍ୟ ଭୂମିକା ନିଭାଇଥିଲେ ସେ ହେଉଛନ୍ତି ତାଙ୍କ ମାତା ଜିଯାବାଇ ଭୋନସ୍ଲେ । ସେ ହେଉଛନ୍ତି ତାଙ୍କର ପ୍ରଥମ ଗୁରୁ ଓ ଜୀବନ ଶିକ୍ଷା ତାଙ୍କ ପାଖରୁ ହିଁ ପ୍ରାପ୍ତ କରିଥିଲେ। ସେ ଆନନ୍ଦୀ ବାଇ ଯୋଶୀ ହୁଅନ୍ତୁ ବା ସାବିତ୍ରୀ ବାଇ ଫୁଲେ ସମସ୍ତେ ଭାରତୀୟ ଇତିହାସ ରେ ସମ୍ମାନ ସ୍ପଦ ପାଇଛନ୍ତି।

ଭାରତୀୟ ସଂସ୍କୃତି ରେ ସବୁବେଳେ ନାରୀ କୁ ସ୍ଵାଧୀନତା ମିଳିଥିଲା । ନିଜର ପୋଷାକ ଠୁ ବରପାତ୍ର ଚୟନ ଯାଏଁ ସେମାନଙ୍କୁ ସବୁଠି ଉପଯୁକ୍ତ ସ୍ଥାନ ମିଳିଥିଲା। ହେଲେ ବିଧ୍ୱଂସି ବିଦେଶୀ ଶାସକ ମାନଙ୍କ ଆକ୍ରମଣ ପରେ ସବୁକିଛି ବଦଳି ଗଲା। ବାଲ୍ୟ ବିବାହ ଠୁ ସତୀ ପ୍ରଥା ଯାଏଁ ଅନେକ କୁପ୍ରଥା ସଂସ୍କୃତି ରେ ଯୋଡ଼ି ହୋଇ ମଧ୍ୟଯୁଗୀୟ ଇତିହାସ କୁ କଳୁଷିତ କରିଦେଲା ଓ ସମସ୍ତଙ୍କ ଆଗରେ ଭାରତୀୟ ସଂସ୍କୃତି କୁ ନାରୀ ବିରୋଧୀ ବନାଇଦେଲା।

ନାରୀ ର ତ୍ୟାଗ ବଳିଦାନ କୁ ଆମ ସଂସ୍କୃତି ସବୁବେଳେ ସମ୍ମାନ ଦେଇଛି। ସେ ମାତା , ଭଗିନୀ, ଜାୟା , ପୁତ୍ରି କେତେବେଳେ ପ୍ରେମିକା ତ କେତେବେଳେ ଦେବୀ ରୂପରେ ସମ୍ମାନିତା।

ନାରୀ ତୁଲୋ ଦୀପ ଶିଖା

ଜଳୁଥାଉ ନୀରବରେ

ଜଳି ଜଳି ଏ ଜୀବନ

ଭରିଦେଉ ଆଲୋକ ରେ

କଟିଗଲା ତୋର ନିରୀହ ଜୀବନ

ସାରା ଦୀପତଳ ଅନ୍ଧାର ରେ

(କବି- ଦୀପିକା ପ୍ରିୟଦର୍ଶନୀ ନାୟକ)

ଆଜି ସମୟ ର ପରିବର୍ତ୍ତନ ହୋଇଛି। ନାରୀ ଆଜି ସବୁ କ୍ଷେତ୍ର ରେ ସ୍ବାଧିନ। କାନ୍ଧ ରେ କାନ୍ଧ ମିଶାଇ ପୁରୁଷ ସହ ସେ ସାମାଜିକ , ବୌଦ୍ଧିକ ଓ ଅର୍ଥନୈତିକ ପ୍ରଗତି କରିବା ସହ ସବାଙ୍ଗୀନ ପ୍ରଗତି କରୁଛି। ରୋଷେଇ ଘର ଠାରୁ , ଡାକ୍ତରଖାନା , ଥାନା , ମନୋରଞ୍ଜନ , ମହାକାଶ ଠୁ କ୍ରୀଡ଼ା କ୍ଷେତ୍ର ଯାଏଁ ସବୁଠି ପାରଦର୍ଶିତା ଲାଭ କରିଛନ୍ତି।

ସୃଜନୀ ର ପାଠକ ମାନଙ୍କୁ ଆନ୍ତର୍ଜାତିକ ନାରୀ ଦିବସ ର ଅନେକ ଅନେକ ଶୁଭେଚ୍ଛା ଓ ଶୁଭକାମନା। ମୋର ଲେଖା ଟି ପଢିଥିବାପାଇଁ ଧନ୍ୟବାଦ।

କୈବଲ୍ୟ ନାୟକ।

Kaibalya Nayak.