ଲିଭ୍ ଇନ୍

ଆଉ ମାତ୍ର ପାଞ୍ଚଦିନ ପରେ ରିତେଶ ଆଉ ସୋନାଲିର ବାହାଘର। ଛ ବର୍ଷର ପ୍ରେମ ଶେଷରେ ବିବାହରେ ପରିଣତ ହେଉଛି। ଦୁଇ ପରିବାରଙ୍କ ଖୁସି କହିଲେ ନ ସରେ। ଘରେ ସବୁ ବନ୍ଧୁ ବାନ୍ଧବ ଆସିସାରିଛନ୍ତି। ରିତେଶ ମାତ୍ର ଦଶ ଦିନ ଛୁଟି ନେଇ ଆସିବ। ତା କଥା ଅନୁଯାୟୀ ନିର୍ବନ୍ଧ ର ଗୋଟେ ଦିନ ପରେ ବାହାଘର। ନିର୍ବନ୍ଧ ପୂର୍ବ ଦିନ ରିତେଶ ଆସି ପହଞ୍ଚି ଥାନ୍ତା। ହେଲେ ସବୁ ଖୁସି ଆସିବା ଆଗରୁ ଯେମିତି କେହି ନଜର ପକାଇଦେଲା। ବାୟୁସେନା ବିଭାଗରେ କାମ କରୁଥିବା ରିତେଶ ଉଗ୍ରବାଦୀମାନଙ୍କ ଷଡ଼ଯନ୍ତ୍ରର ଶିକାର ହୋଇ ଲ୍ୟାଣ୍ଡମାଇନ ବିସ୍ଫୋରଣରେ ଅଦିନରେ ପ୍ରାଣ ହରାଇ ଥିଲା। ଏ ଖବର ପାଇବା ପରେ ଘରର ପରିସ୍ଥିତି ନ କହିବା ଭଲ। ବାପା ମା ଙ୍କ ଏକମାତ୍ର ପୁତ୍ର ସନ୍ତାନ ଚାଲିଯିବା ପରେ ଦୁହେଁ ବଞ୍ଚି ଥାଉ ଥାଉ ମୁର୍ଦ୍ଦାର ପାଲଟିଯାଇଛନ୍ତି। ସୋନାଲି ହସ୍ପିଟାଲରେ। ରିତେଶର ମୃତ୍ୟୁ ଖବର ଶୁଣିବା ପରଠାରୁ ଚେତା ଫେରୁନଥାଏ। ରିତେଶର ଶେଷକୃତ୍ୟ ସମ୍ପନ୍ନ ପରେ ଯେ ଯାହା ଘରକୁ ଚାଲିଗଲେ। ଯାଇପାରିନଥିଲା ସୋନାଲି। ବାପା ମା ଙ୍କ ସବୁ କଥାକୁ ଅଣଦେଖା କରି ଗୋଟିଏ ଜିଦ୍ ଧରିଥିଲା ଯେ ସେ ଆଉ ବିବାହ କରିବନାହିଁ , ରିତେଶ ପରେ ତା ବାପା ମା ଙ୍କ କଥା ସେ ନିଜେ ବୁଝିବ।

*******************************

ରିତେଶ ଯିବାର ପାଞ୍ଚ ବର୍ଷ ହେଲାଣି।ସୋନାଲି ଏକା ବସିଥାଏ ଏକ ସମୁଦ୍ରକୂଳରେ ଥିବା ବେଞ୍ଚରେ । ଯୋଉଠି କେବେ ଦୁହେଁ ସାଙ୍ଗହୋଇ ସମୟ କାଟୁଥିଲେ। ଏତିକି ବେଳେ ଦୁଇଜଣ ପ୍ରେମୀ ଯୁଗଳ ତାକୁ ଦେଖି ଆସି ପଚାରିଲେ,"ଆପଣ ସୋନାଲି ରାୟ ନା ? ଲ୍ୟାଣ୍ଡମାଇନ ବିସ୍ଫୋରଣରେ ପ୍ରାଣ ହରାଇଥିବା ରିତେଶ ଦାଶଙ୍କ ସହ ଆପଣଙ୍କ ବାହାଘର ହେଇଥାନ୍ତା। ତାଙ୍କ ଭଳି ଜଣେ ସଚ୍ଚୋଟ ଦେଶପ୍ରେମୀଙ୍କ ମୃତ୍ୟୁ ଖବର ଶୁଣି ବହୁତ କଷ୍ଟ ଲାଗିଲା। ଆଚ୍ଛା ଆପଣ ଚାହିଁ ଥିଲେ ଆଉ କାହାକୁ ବିବାହ କରିପାରିଥାନ୍ତେ ,କଲେନି କାହିଁକି?"ସୋନାଲି ହସି ଦେଇ କହିଲା,"ତାଙ୍କ ଶରୀର ନ ଥାଉ ତାଙ୍କ ଆତ୍ମା ସହ ମୋ ମିଳନ ହେଇସାରିଛି। ତମ ଭାଷାରେ ମୁଁ ଲିଭ୍ ଇନ୍ ରେ ଅଛି । ଜଣଙ୍କ ସହ ଲିଭ୍ ଇନ୍ ରେ ରହି ଆଉ ଆଉ କାହାକୁ ବିବାହ କରିଥାଆନ୍ତି କିପରି???"

✍️ ଅନୀତା ଦାସ୍,ଶିକ୍ଷୟିତ୍ରୀ, ଯାଜପୁର

ଫୋନ୍ -୯୮୫୩୦୩୯୨୬୦

କ୍ଷୁଦ୍ର ଗଳ୍ପ - ଲିଭ ଇନ୍

ସୋନାଲି ହସି ଦେଇ କହିଲା,"ତାଙ୍କ ଶରୀର ନ ଥାଉ ତାଙ୍କ ଆତ୍ମା ସହ ମୋ ମିଳନ ହେଇସାରିଛି। ତମ ଭାଷାରେ ମୁଁ ଲିଭ୍ ଇନ୍ ରେ ଅଛି ।"