ଭକ୍ତ ନରସିଂହ ମେହତା ଙ୍କ ଜନ୍ମ ଗୁଜରାଟର ଜୁନାଗଡ଼ ସହରରେ ଗୋଟିଏ ବ୍ରାହ୍ମଣ କୁଳ ରେ ହୋଇଥିଲା । ବାଲ୍ୟ କାଳୁ ତାଙ୍କ ଜୀବନ ସାଧୁସନ୍ଥ ଙ୍କ ମେଳରେ ବିତିଥିଲା । ସେହି ସାଧୁସଙ୍ଗତି ର ପ୍ରଭାବ ରେ ତାଙ୍କ ମନରେ ଶ୍ରୀ ରାଧାକୃଷ୍ଣ ଙ୍କ ପ୍ରତି ଭକ୍ତି ର ଉଦୟ ହେଲା । ଧିରେ ଧିରେ ଭଗବାନ ଶ୍ରୀକୃଷ୍ଣ ଙ୍କ ଭକ୍ତି ଏବଂ ଭଜନ କୀର୍ତ୍ତନ ରେ ତାଙ୍କର ଅଧିକାଂଶ ସମୟ ବ୍ୟତୀତ ହେବାରେ ଲାଗିଲା, କିନ୍ତୁ ପରିବାରର ଲୋକେ ତାଙ୍କର ଭଜନ କୀର୍ତ୍ତନ ଭକ୍ତି ଆଦି କୁ ପସନ୍ଦ କରୁ ନଥିଲେ । ସେମାନେ ୟାଙ୍କୁ ଗୃହସ୍ଥାଶ୍ରମ ର ସାଂସାରିକ କାର୍ଯ୍ୟ ରେ ମନୋନିବେଶ କରିବା ପାଇଁ କହୁଥିଲେ । ପରନ୍ତୁ ଏହା ଭକ୍ତ ନରସୀ ଜୀ ଙ୍କ ଉପରେ କୈାଣସି ପ୍ରଭାବ ପକାଇ ନଥିଲା । ଦିନେ ତାଙ୍କ ଭାଉଜ କହିଲେ "ତୁମର ଯଦି ଏତେ ଭକ୍ତି ଉଛୁଳି ପଡୁଛି ତେବେ ଭଗବାନ ଙ୍କ ସହ ସାକ୍ଷାତ କରି ଆସୁନା ??

ଏହି କଥା ତାଙ୍କ ଉପରେ ଯାଦୁ ଭଳି ପ୍ରଭାବ ପକାଇଲା, ସେ ସେହି କ୍ଷଣି ଗୃହତ୍ୟାଗ କରି ବାହାରିଗଲେ ଏବଂ ଜୁନାଗଡ଼ ର କିଛି ଦୂର ଏକ ଜଙ୍ଗଲ ରେ ଥିବା ଏକ ପୁରୁଣା ଶିବ ମନ୍ଦିର ରେ ବସି ଭଗବାନ ଶଙ୍କର ଙ୍କ ଉପାସନା ଓ ଧ୍ୟାନ କରିବାରେ ଲାଗିଲେ ତାଙ୍କ ଉପାସନା ରେ ସନ୍ତୁଷ୍ଟ ହୋଇ ଭଗବାନ ଶଙ୍କର ପ୍ରକଟିତ ହୋଇ ବରମାଗିବା କୁ କହିଲେ । ଭକ୍ତ ନରସୀ ଜୀ ଭାବୁକ ହୋଇ କହିଲେ "ପ୍ରଭୋ..!! ମୋତେ ବର ମାଗିବା ଆସେ ନାହିଁ, ଯଦି କିଛି ଦେବାକୁ ଚାହୁଁଛନ୍ତି ଆପଣ ଙ୍କର ଯାହା ପ୍ରିୟ ସେହି ପ୍ରିୟଧନ ମୋତେ ପ୍ରଦାନ କରନ୍ତୁ । ଭଗବାନ ଶଙ୍କର ଅତ୍ୟନ୍ତ ପ୍ରସନ୍ନ ହେଲେ ଓ କହିଲେ ଧନ୍ୟ ତମେ ନରସୀ ଜୀ ମୋର ସବୁଠାରୁ ପ୍ରିୟ ଭଗବାନ ଶ୍ରୀକୃଷ୍ଣ ଅଟନ୍ତି ଅତଃ ମୁଁ ତୁମକୁ କୃଷ୍ଣଭକ୍ତି ର ବରଦାନ ପ୍ରଦାନ କରୁଛି । ତାପରେ ପ୍ରଭୁ ଶିବ ନରସୀ ଜୀ ଙ୍କୁ ଗୋଲକ ଧାମ ନେଇ ଶ୍ରୀ ରାଧାମାଧବ ଙ୍କ ଦର୍ଶନ ମଧ୍ୟ କରାଇଥିଲେ । ସେଠାରେ ଭକ୍ତ ନରସୀ ଶ୍ରୀରାଧାକୃଷ୍ଣ ଙ୍କ ଦିବ୍ୟ ରାସଲୀଳା ର ଦର୍ଶନ କରିଥିଲେ ।

ଦିନ ରାତି ଭଜନ କୀର୍ତ୍ତନ ରେ ଲାଗି ରହିବା ତଥା ଭରଣ ପୋଷଣ ପାଇଁ କୈାଣସି କାର୍ଯ୍ୟ ନକରିବା କାରଣ ରୁ ଭକ୍ତ ନରସୀ ଜୀ ଙ୍କ ପରିବାର ରେ ଥରେ ଥରେ ଉପବାସ ର ସ୍ଥିତି ଆସି ଯାଉଥିଲା । ତାଙ୍କର ପତ୍ନୀ ସବୁବେଳେ ତାଙ୍କୁ କିଛି ଅର୍ଥ ଉପାର୍ଜନ ପାଇଁ କାର୍ଯ୍ୟ କରିବା ପାଇଁ କହନ୍ତି କିନ୍ତୁ ଭକ୍ତ ନରସୀ ଙ୍କୁ ବିଶ୍ୱାସ ଥିଲା ଯେ ତାଙ୍କର ଭରଣ ପୋଷଣ ର ସମସ୍ତ ଦାୟିତ୍ବ ଭଗବାନ ସ୍ଵୟଂ ବହନ କରିବେ । ସେଇଥିପାଇଁ ଗୀତା ରେ ଭଗବାନ କହିଛନ୍ତି "ଅନନ୍ୟଶ୍ଚିନ୍ତୟନ୍ତୋ ମାଂ ଯେ ଜନାଃ ପର୍ଯ୍ୟୁପାସତେ ତେଷାଂ ନିତ୍ୟାଭିଜୁକ୍ତାନାଂ ଯୋଗକ୍ଷେମ ବହାମ୍ୟହମ୍ ।। ଭକ୍ତ ନରସୀ ଜୀ ଙ୍କ ପୁତ୍ରୀ ର ବିବାହ ର ସମସ୍ତ ବ୍ୟବସ୍ଥା ସ୍ଵୟଂ ଶ୍ରୀକୃଷ୍ଣ କରିଥିଲେ ବୋଲି ଜନଶ୍ରୁତି ରହିଛି । ସେହି ପ୍ରକାରେ ତାଙ୍କ ପୁତ୍ର ର ବିବାହ ମଧ୍ୟ ଭଗବାନ ଙ୍କ କୃପାରୁ ସମ୍ଭବ ହୋଇଥିଲା ।

ଥରେ ନରସୀ ଜୀ ଙ୍କ ଜାତି ର ଲୋକ ତାଙ୍କୁ କହିଥିଲେ ତୁମେ ତୁମ ପିତା ଙ୍କ ଶ୍ରାଦ୍ଧ କରାଇ ସମସ୍ତ ଙ୍କୁ ଭୋଜନ ରେ ଆପ୍ୟାୟିତ କର । ଭକ୍ତ ନରସୀ ଜୀ ଧ୍ୟାନସ୍ଥ ହୋଇ ଭଗବାନ ଶ୍ରୀକୃଷ୍ଣ ଙ୍କ ସ୍ମରଣ କଲେ ଏବଂ ଦେଖୁଦେଖୁ ସମସ୍ତ ବ୍ୟବସ୍ଥା ହୋଇଗଲା । ଶ୍ରାଦ୍ଧ ଦିନ କିଛି ଘିଅ କମ୍ ହୋଇଗଲା ତେଣୁ ଭକ୍ତ ନରସୀ ଜୀ ପାତ୍ର ଧରି ବଜାର କୁ ଘିଅ ଆଣିବା ପାଇଁ ଗଲେ , ଯାଉ ଯାଉ ବାଟରେ କିଛି ସନ୍ଥମଣ୍ଡଳୀ ଙ୍କୁ ହରି କୀର୍ତ୍ତନ କରିବାର ଦେଖିଲେ , ଏବଂ ସେ ମଧ୍ୟ ଭାବ ବିଭୋର ହୋଇ ସେଥିରେ ସାମିଲ ହୋଇଗଲେ ଏବଂ କୀର୍ତ୍ତନ ରେ ଏମିତି ତଲ୍ଲୀନ ହୋଇଗଲେ ଯେ ଘିଅ ଆଣିବା କଥା ଭୁଲିଗଲେ । ଘରେ ତାଙ୍କର ପତ୍ନୀ ବଡ଼ ବ୍ୟଗ୍ରତା ର ସହ ତାଙ୍କର ପ୍ରତୀକ୍ଷା କରି ଥାଆନ୍ତି । ଅନ୍ୟ ପଟେ ଭକ୍ତବତ୍ସଳ ଭଗବାନ ନରସୀ ଜୀ ଙ୍କ ବେଶଧରି ଘିଅପାତ୍ର ଧରି ତାଙ୍କ ଘରେ ପହଞ୍ଚିଗଲେ । ବ୍ରାହ୍ମଣ ଭୋଜନ ସୁଚାରୁରୂପେ ସମ୍ପନ୍ନ ହୋଇଗଲା ।

ଏପଟେ କୀର୍ତ୍ତନ ସମାପ୍ତ ହେବାରେ ଅନେକ ରାତି ହୋଇ ଯାଇଥିଲା । ନରସୀ ଜୀ ଚିନ୍ତିତ ହୋଇ ଘିଅ ନେଇ ଘରେ ପହଞ୍ଚିଲେ ଏବଂ ବିଳମ୍ବ ଯୋଗୁଁ ପତ୍ନୀ ଙ୍କୁ କ୍ଷମା ପ୍ରାର୍ଥନା କଲେ । ପତ୍ନୀ କହିଲେ "ସ୍ଵାମୀ..! ଏଥିରେ କ୍ଷମା ମାଗିବାର କ'ଣ ଆବଶ୍ୟକତା ଅଛି ? ଆପଣ ହିଁ ତ କିଛି ସମୟ ଆଗରୁ ଘିଅ ଆଣି ବ୍ରାହ୍ମଣ ମାନଙ୍କୁ ଭୋଜନ କରାଇଥିଲେ !"

ନରସୀ ଜୀ ଅବାକ୍ ହେଇଗଲେ , ସେ ଜାଣିପାରିଲେ ଏସବୁ ପ୍ରଭୁ ହିଁ କରିଛନ୍ତି । ସେ ପତ୍ନୀ ଙ୍କୁ କହିଲେ " ଧନ୍ୟ ତୁମେ ଭାଗ୍ୟବାନ ସେ ମୁଁ ନଥିଲି ସେ ଥିଲେ ସାକ୍ଷାତ ଭଗବାନ ଶ୍ରୀକୃଷ୍ଣ !!"

ଏହା ଶୁଣି ନରସୀ ଜୀ ଙ୍କ ପତ୍ନୀ ଆଶ୍ଚର୍ଯ୍ୟ ଚକିତ ହୋଇ ଭାବୁକ ହୋଇଗଲେ । ଏହି ଭଳି ଅନେକ ଦିବ୍ୟ ଘଟଣା ତାଙ୍କର ଜୀବନ କାଳ ରେ ଘଟିଛି । କିଛି ବର୍ଷ ପରେ ତାଙ୍କ ପତ୍ନୀ ଓ ପୁତ୍ର ର ଦେହାନ୍ତ ହେଇଯାଇଥିଲା ଏବଂ ସଂପୂର୍ଣ୍ଣ ଜୀବନ ଭକ୍ତ ନରସୀ ଜୀ ଭଗବାନ ଙ୍କ ଭଜନ କୀର୍ତ୍ତନ ଭକ୍ତି ରେ ବିତାଇଥିଲେ, ତାଙ୍କ ରଚିତ ଅନେକ ଭାବଭକ୍ତି ମଧ୍ୟ ଭଜନ ଖୁବ୍ ପ୍ରସିଦ୍ଧ । ସେ ଅସଂଖ୍ୟ ନରନାରୀ ଙ୍କୁ ଭକ୍ତି ର ମାର୍ଗଦର୍ଶନ କରାଇ ପରିଶେଷରେ ଗୋଲକ ଧାମ କୁ ଚାଲିଗଲେ ।

ନମୋ ନାରାୟଣ

ପରମ ବୈଷ୍ଣବ ନରସୀ ମେହତା

ପରମ ବୈଷ୍ଣବ ନରସୀ ମେହତା