ବିଷୟ ପ୍ରବେଶ-

******************

ଶିକ୍ଷା ପ୍ରଦାନ ଓ ଗ୍ରହଣ କରିବାର ପରିଭାଷା ସମୟାନୁକ୍ରମେ ପରିବର୍ତ୍ତିତ ହୋଇଛି । ଶିକ୍ଷା ବ୍ୟବସ୍ଥା ଏକ ପରିବର୍ତ୍ତନଶୀଳ ବ୍ୟବସ୍ଥା। ସମୟ ର ଅଗ୍ରଗତି ଶିକ୍ଷା ଦାନ ,ଶିକ୍ଷା ଗ୍ରହଣ ରେ ମଧ୍ୟ ବହୁ ପରିବର୍ତ୍ତନ ଦେଖିବାକୁ ମିଳିଥାଏ।ପ୍ରାଚୀନ କାଳରେ ଗୁରୁକୁଳ ଶିକ୍ଷା ବ୍ୟବସ୍ଥା ପ୍ରଚଳିତ ଥିଲା। ତରୁଲତା ଛାୟା ର ଆଶ୍ରୟ ନେଇ ଅନେକ ବ୍ୟକ୍ତି ନିଜର ବ୍ୟକ୍ତିତ୍ଵ କୁ ବିକଶିତ କରିପାରିଥିଲେ। ପରବର୍ତ୍ତୀ ସମୟରେ ଏହା ପରିପର୍ତ୍ତିତ ହୋଇ ଶ୍ରେଣୀଗୃହଭିଭିକ ଶିକ୍ଷା ବ୍ୟବସ୍ଥା ର ଆରମ୍ଭ ହେଲା । ଏହି ବ୍ୟବସ୍ଥାରେ ପିଲା ମାନେ ବିଦ୍ୟାଳୟ କିମ୍ବା ଚାଟଶାଳୀରୁ ଶିକ୍ଷା ଲାଭ କରିବେ। ଆଧୁନିକ ବାସ୍ନା ରେ ସମ୍ମୋହିତ ହୋଇ ଅଧୁନା ସମାଜ ରେ ପ୍ରଚଳିତ ହେଉଛି ଅନଲାଇନ ଶିକ୍ଷା ବା ଇ-ଶିକ୍ଷା। ଏହି ବ୍ୟବସ୍ଥା ରେ ଇଣ୍ଟରନେଟ ମାଧ୍ୟମରେ ଶିକ୍ଷା ଦାନ କରାଯାଇଥାଏ। ଏହି ବ୍ୟବସ୍ଥା ରେ ବିଦ୍ୟାର୍ଥୀ ଓ ଶିକ୍ଷକ ଏକ କୋଠରିରେ ବସି ଶିକ୍ଷା ଲାଭ କରିବାର ଆବଶ୍ୟକତା ନ‌ଥାଏ। ପରସ୍ପର ହଜାର ହଜାର କିଲୋମିଟର ଦୂରତା ରେ ରହି ମଧ୍ୟ ଇଣ୍ଟର୍ନେଟ୍ ମାଧ୍ୟମରେ ପରସ୍ପର ସଂପର୍କ ସ୍ଥାପନ କରି ଶିକ୍ଷା ଲାଭ କରି ପାରିବେ।ବିଗତ କିଛି ବର୍ଷ ପୂର୍ବେ ଯେତେବେଳେ କୋରାନା ମହାମାରୀ ନିଜର ତାଣ୍ଡବ ଲୀଳା ରଚୁଥିଲା। ସେତେବେଳେ ଲୋକମାନେ ବହୁ ଦୁଃଖ କଷ୍ଟରେ ସମୟ ଅତିବାହିତ କରୁଥିଲେ। ଘରୁ ବାହାରକୁ ପାଦ ପକେଇବାର ଅର୍ଥ ଜୀବନ କୁ ପାଣି ଛଡେଇ ଦେବା ସହ ସମାନ ଥିଲା। ଏଭଳି ଘଡିସନ୍ଧି ମୂହୁର୍ତ୍ତ ରେ ପିଲା ମାନଙ୍କ ର ପାଠ ପଢା ଉପରେ ବହୁ କୁ ପ୍ରଭାବ ପକେଇଥିଲା । ଏହି ସମସ୍ୟା କୁ ସମାଧାନ କରି ପାରିଥିଲା ଅନଲାଇନ୍ କ୍ଲାସ୍। ଘରେ ରହି ନିରାପଦରେ ପିଲା ମାନେ ପାଠ ପଢି ପାରିଥିଲେ। ଏହି ବ୍ୟବସ୍ଥା ର ଗୁରୁତ୍ବ ସଂପର୍କରେ ଲୋକ ମାନେ ଅବଗତ ହୋଇପାରିଲେ। ଏବଂ ଏହା ର ବହୁଳ ବ୍ୟବହାର ଆରମ୍ଭ କରିଥିଲେ। ଏହା ଫଳରେ ଶିକ୍ଷା କ୍ଷେତ୍ରରେ ଏକ ନୂତନ ବିପ୍ଳବ ସୃଷ୍ଟି ହୋଇ ପାରିଥିଲା।

ବିଭିନ୍ନ ମହାମାରୀ ଯେତେବେଳେ ନିଜର କାୟା ବିସ୍ତାର କରୁଥିଲା ସେତେବେଳେ ଏହାର ପ୍ରଥମ ପ୍ରଭାବ ପଡିଲା ଶିକ୍ଷା ବ୍ୟବସ୍ଥା ଉପରେ ।ଏପରି ବିପଦ ପୂର୍ଣ୍ଣ ପରିସ୍ଥିତି ଯୋଗୁଁ ଶିକ୍ଷାନୁଷ୍ଠାନ ଗୁଡିକ ଗୁଡିକ ଖୋଲିବା ଉପରେ କଟକଣା ଲଗାଯାଇଥିଲା, ମାସ ମାସ କରି ଅଧା ଶିକ୍ଷାବର୍ଷ ବିତିଗଲେ ମଧ୍ୟ ପରିସ୍ଥିତି ରେ ସୁଧାର ପରିଲକ୍ଷିତ ହେଲା ନାହିଁ । ଏହା ନିୟନ୍ତ୍ରଣରେ ଆସିବା ନିମନ୍ତେ କେତେ ଯେ ସମୟ ଲାଗିବା କହିବା ଅସମ୍ଭବ ଥିଲା। ଶିକ୍ଷାନୁଷ୍ଠାନ ଗୁଡିକ ବନ୍ଦ ହେବା ଫଳରେ ବିଶ୍ବର ୧୯୧ ଟି ଦେଶର ପ୍ରାୟତଃ ୧୫୮ କୋଟି ଏବଂ ଭାରତରେ ପ୍ରାକ୍ଷ ପ୍ରାୟ ୩୨ କୋଟି ଛାତ୍ରଛାତ୍ରୀ ପ୍ରଭାବିତ ହୋଇଥିଲେ । ଏଥି ନିମନ୍ତେ ସରକାର ଇଣ୍ଟରନେଟ ମାଧ୍ଯମରେ ଶିକ୍ଷାକୁ ପ୍ରତ୍ୟେକ ପିଲାଙ୍କ ନିକଟରେ ପହଞ୍ଚାଇବାକୁ ଚେଷ୍ଟା କରିଥିଲା ।ବିଫଳ ହୋଇଯାଇଥିବା ଶିକ୍ଷା ବର୍ଷ ର ପାଠ ପଢା କୁ ସରକାର ପୁନର୍ବାର ଆରମ୍ଭ କରିପାରିଥିଲେ।ଏହି ବ୍ୟବସ୍ଥା ଦ୍ବାରା ପିଲାମାନେ ସୁରକ୍ଷିତ ଭାବରେ ଘରେ ରହି ନିଜ ର ପାଠ ପଢା କୁ ଚାଲୁ ରଖି ପାରିଲେ।

ଅନଲାଇନ ଶିକ୍ଷାର ସୁଗୁଣ :-

********************

ବିପଦଜନକ ପରିସ୍ଥିତି ରେ ଅନଲାଇନ ଶିକ୍ଷା ଦ୍ବାରା ବିଦ୍ୟାର୍ଥୀ ସୁରକ୍ଷିତ ହୋଇ ଘୋରୋଇ ବାତାବରଣ ରେ ରହି ଶିକ୍ଷା ଅର୍ଜନ କରିପାରୁଛନ୍ତି। ବିଭିନ୍ନ ସଂକ୍ରମଣ ପ୍ରଭାବରୁ ନିଜକୁ ମଧ୍ଯ ସୁରକ୍ଷିତ କରିପାରୁଛନ୍ତି । ବିଦ୍ୟାର୍ଥୀ ମାନେ ନିଜ ସୁବିଧା ଅନୁସାରେ ପାଠ ପଢିପାରୁଛନ୍ତି । ଶିକ୍ଷକ ଦେଇଥିବା ଶିକ୍ଷାଦାନ କୁ ରେକର୍ଡ କରି ବାରମ୍ଵାର ଶୁଣିପାରୁଛନ୍ତି ଏବଂ ବିଷୟ ଗୁଡିକୁ ଠିକ ଭାବରେ ବୁଝି ପାରୁଛନ୍ତି ।

ଅଧୁନା ଶିକ୍ଷା ବ୍ୟବସ୍ଥା ପ୍ରତିଯୋଗିତା ମୂଳକ ଶିକ୍ଷା ବ୍ୟବସ୍ଥା ଉପରେ ଆଧାରିତ।ଏଭଳି ପ୍ରତିଯୋଗିତା ମୂଳକ ଶିକ୍ଷା ବ୍ୟବସ୍ଥା ପାଇଁ ଅନଲାଇନ୍ ଶିକ୍ଷା ବ୍ୟବସ୍ଥା ଅତ୍ୟନ୍ତ ଉନ୍ନତମାନର ହୋଇଥାଏ।ବଡ ବଡ ପରୀକ୍ଷା ନିମନ୍ତେ ମଧ୍ୟ ପ୍ରସ୍ତୁତି କରଣ ପାଇଁ ଅନଲାଇନ୍ ଶିକ୍ଷା ବ୍ୟବସ୍ଥା ଉପଯୁକ୍ତ ସାବ୍ୟସ୍ତ ହୋଇ ପାରିଛି। ପ୍ରଶାସନିକ ସେବା ପରୀକ୍ଷାରେ ମଧ୍ଯ ଅନଲାଇନ ମାଧ୍ଯମରେ ପଢି ବହୁତ ବିଦ୍ୟାର୍ଥୀ କୃତକାର୍ଯ୍ୟ ହାସଲ୍ କରି ପାରୁଛନ୍ତି।

ଇଣ୍ଟରନେଟ ମାଧ୍ୟମରେ ଆମେ ବିଭିନ୍ନ ପ୍ରକାରର ଶିକ୍ଷା ଲାଭ କରି ପାରିଥାଉ।କୃଷି ବିଜ୍ଞାନ, ଡାକ୍ତରୀ ବିଜ୍ଞାନ, ରୋଷେଇ ଶିକ୍ଷା, ସିଲେଇ କରିବା ଇତ୍ୟାଦି ଅନେକ ପ୍ରକାର ର ଶିକ୍ଷା ଲାଭ କରିପାରିଥାଉ। ଅଫଲାଇନ୍ ବଦଳରେ ବହୁ ଅନୁଭବୀ ଓ ପାରଙ୍ଗମ ଶିକ୍ଷକ ମାନେ ଅନଲାଇନ୍ ରେ ଶିକ୍ଷାଲାଭ ଆରମ୍ଭ କରୁଛନ୍ତି। ଇଣ୍ଟରନେଟ ମାଧ୍ୟମରେ ଭିନ୍ନ ଭିନ୍ନ ଭାଷା ର ଶିକ୍ଷା ଦାନ କରା ଯାଇ ପାରୁଛି। ଏହା ଦ୍ବାରା କିଛି ପିଲା ନୁହେଁ ବରଂ ଅନେକ ପିଲା ଉପକାର ପାଇ ପାରୁଛନ୍ତି।ଆମ ହାତ ମୁଠାରେ ସବୁ କିଛି ଶିକ୍ଷାର ଉତ୍ସ ରହି ପାରୁଛି।

ଅନଲାଇନ ଶିକ୍ଷାର ବିଭିନ୍ନ ମାଧ୍ଯମ:-

*************************

ଶିକ୍ଷାକୁ ଅନଲାଇନ ମାଧ୍ଯମରେ ପଢାଇବା ନିମନ୍ତେ ବିଦ୍ୟାଳୟ ମାନଙ୍କ ରେ ନିମନ୍ତେ ୱାଟସଅପ୍ ମୋବାଇଲ ଆପ୍ଲିକେସନରେ ଶ୍ରେଣୀ ଅନୁଯାୟୀ ଗ୍ରୁପରେ ବିଭକ୍ତ କରିଦିଆ ଯାଉଛି।ଶିକ୍ଷା ସମ୍ବନ୍ଧୀୟ କୌଣସି ତଥ୍ୟ ଉକ୍ତ ଗ୍ରୁପ୍ ମାଧ୍ୟମରେ ପଠେଇ ଦିଆ ଯାଉଛି। ଏହା ବ୍ୟତୀତ ୟୁଟ୍ୟୁବରେ ଶିକ୍ଷା ଭିତ୍ତିକ ଚେନାଲ୍ ମାନ ଖୋଲି ଲାଇଭ୍ କ୍ଲାସ୍ କିମ୍ବା ରେକର୍ଡେଡ୍ କ୍ଲାସ୍ ମାଧ୍ୟମରେ ବିଭିନ୍ନ ଭାଷାରେ ବିଭିନ୍ନ ବିଷୟରେ ଶିକ୍ଷାଦାନ କରା ଯାଇ ହେଉଛି। ବିଭିନ୍ନ ଶିକ୍ଷାନୁଷ୍ଠାନ ମାନଙ୍କ ରେ ଗୁଗଲମିଟ୍ ଜରିଆରେ ବହୁ ଦୂରରେ ଅବସ୍ଥିତ ବିଦ୍ୟାର୍ଥୀ ମାନଙ୍କୁ ଶିକ୍ଷା ଦାନ କରା ଯାଇ ହେଉଛି। ବିଭିନ୍ନ ବେସରକାରୀ ଶିକ୍ଷାନୁଷ୍ଠାନ ମାନଙ୍କରେ ମଧ୍ଯ ଅନଲାଇନ ଶିକ୍ଷା ପ୍ରଦାନ ଉପରେ ଗୁରୁତ୍ବ ଦିଆଯାଉଛି । ଅନଲାଇନ ଶିକ୍ଷା କୁ ଆଧାର କରି ଅନେକ କଂପାନୀ ମାନ ମଧ୍ୟ ଗଢି ଉଠିଛି।ଯେପରି ବାଇଯୁସ ଏବଂ ଟପର୍ସ ଭଳି କେତେକ କମ୍ପାନି ଶିକ୍ଷାକୁ ଅତ୍ୟନ୍ତ ରୋମାଞ୍ଚକର ଶୈଳୀରେ ପିଲାଙ୍କୁ ବୁଝାଇବା ପାଇଁ ଅନଲାଇନ୍ ଶିକ୍ଷା କୁ ମାଧ୍ୟମ ଭାବେ ଗ୍ରହଣ କରିଛନ୍ତି। ଏପରି ଶିକ୍ଷା ଦାନ ବା ଶିକ୍ଷା ବ୍ୟବସ୍ଥା ବିଦ୍ୟାର୍ଥୀ ଆଦୃତ ଲାଭ କରିପାରିଛି । ଲାଇଭଚାର୍ଟ, ମେସେଜ ଓ କଲ ମାଧ୍ୟମରେ ପିଲା ନିଜ ସମସ୍ତ ପ୍ରଶ୍ନ ଓ ଆଶଙ୍କାର ଉତ୍ତର ଶିକ୍ଷକଙ୍କୁ ପଚାରି ପାରୁଛନ୍ତି ଏବଂ ତାର ସମାଧାନ ମଧ୍ୟ ପାଇପାରୁଛନ୍ତି।

ଅନଲାଇନ ଶିକ୍ଷା ନିମନ୍ତେ ସରକାରଙ୍କର ବିଭିନ୍ନ ପଦକ୍ଷେପ -

****************************************

ଅନଲାଇନ ଶିକ୍ଷାର ପ୍ରସାର ପାଇଁ ବିଶେଷ୍ କରି ଓଡ଼ିଶା ରେ ରାଜ୍ୟ ସରକାର ମଧୁ ମୋବାଇଲ ଆପ୍ଲିକେଶନ, ଦିକ୍ସା ମୋବାଇଲ ଆପ୍ଲିକେଶନ ଲଞ୍ଚ୍ କରିଛନ୍ତି ଏବଂ ଶିକ୍ଷା ସଂଯୋଗ ଭଳି କାର୍ଯ୍ୟକ୍ରମ ପ୍ରାରମ୍ଭ କରିଛନ୍ତି ।ଏହି କାର୍ଯ୍ୟକ୍ରମ ମାଧ୍ୟମରେ ସମସ୍ତ ବିଦ୍ୟାର୍ଥୀ ମାନଙ୍କୁ ଅନଲାଇନ ଶିକ୍ଷା ବ୍ୟବସ୍ଥାରେ ଯୋଡିବା ନିମନ୍ତେ ପ୍ରୟାସ କରାଯାଉଅଛି ।ରାଜସ୍ଥାନ ରାଜ୍ୟ ରେ ରାଜ୍ୟ ସରକାର ରେଡିଓ ମାଧ୍ୟମରେ ଶିକ୍ଷାର ପ୍ରସାରଣ କରାଉଛନ୍ତି । କେରଳ ରାଜ୍ୟରେ ରାଜ୍ୟ ସରକାର ନିଜସ୍ବ ଶିକ୍ଷାଭିଭିକ ଦୂରଦର୍ଶନ ଚ୍ୟାନେଲ ଖୋଲି ତାରି ମାଧ୍ୟମରେ ପିଲା ମାନଙ୍କୁ ଶିକ୍ଷା ଦାନ କରାଯାଉଛି। ତେଲେଙ୍ଗାନା ରାଜ୍ୟ ର ରାଜ୍ୟ ସରକାରଙ୍କ ଖେଲ ମୋବାଇଲ ଆପ୍ଲିକସନ , ଜାମ୍ମୁକାଶ୍ମୀର ସରକାରଙ୍କ ପ୍ରୋଜେକ୍ଟ ହୋମ କ୍ଲାସ ଏବଂ ଚଣ୍ଡିଗଡ ସରକାରଙ୍କ ଫୋନିକ୍ସ ମୋବାଇଲ ଆପ ଏହି ଅନଲାଇନ ଶିକ୍ଷାକୁ ବିଦ୍ୟାର୍ଥୀଙ୍କ ନିକଟରେ ପହଞ୍ଚାଇବାକୁ ଉଦ୍ୟମ ଆରମ୍ଭ କରିଛି । ଏହା ଛଡା ଦୂରଦର୍ଶନ/ସ୍ବୟମପ୍ରଭାର ୩୨ଟି ଚାନେଲ ୧୯୦୨ଟି ବିଷୟରେ ୬୦୦୦୦ ଭିଡିଓ ପ୍ରସ୍ତୁତକରି ପ୍ରସାରିତ କରାଯିବା କଥା ମାନବ ସମ୍ବଳ ବିକାଶ ମନ୍ତ୍ରୀ ସୂଚନା ଦେଇଛନ୍ତି ।

ଅନଲାଇନ ଶିକ୍ଷାର ଦୁର୍ଗୁଣ -

********************

ଅନଲାଇନ ଶିକ୍ଷା ନିମନ୍ତେ ବିଭିନ୍ନ ଆବଶ୍ୟକ ଉପକରଣ ଯଥା ସ୍ମାର୍ଟ ଫୋନ , କମ୍ପ୍ୟୁଟର, ଇଣ୍ଟରନେଟର ସୁବିଧା ସମସ୍ତଙ୍କ ପାଖରେ ଉପଲବ୍ଧ ନ ଥାଏ। ତେଣୁ ଅନେକ ପିଲା ଏହି ଅନଲାଇନ୍ ଶିକ୍ଷା ସୁବିଧା କୁ ଗ୍ରହଣ କରି ପାରନ୍ତି ନାହିଁ। ଏକ ସର୍ଭେ ଅନୁଯାୟୀ ଭାରତରେ ପ୍ରାୟ ୯୦ ଲକ୍ଷ ବିଦ୍ୟାର୍ଥୀ ଅନଲାଇନ ଶିକ୍ଷାରୁ ବଞ୍ଚିତ ହେଉଛନ୍ତି କାରଣ ସେମାନଙ୍କ ପାଖରେ କୌଣସି ଉପକରଣ ର ଉପଲବ୍ଧି ନାହିଁ । ଆଜି ବି ଭାରତର ୧୬% ଘରେ ୧ ରୁ ୮ ଘଣ୍ଟା ହିଁ ବିଜୁଳି ରହୁଛି । ଏହାର ଅର୍ଥ ଦେଶର ଅନେକ ଲୋକ ପଛୁଆ ବର୍ଗ ରେ ରହି ଜୀଵନ ଅତିବାହିତ କରୁଛନ୍ତି। ଅନଲାଇନ ଶିକ୍ଷା ନିମନ୍ତେ ବହୁ କଷ୍ଟରେ ଅର୍ଥ ଉପାର୍ଜନ କରି ମୋବାଇଲ୍ ଫୋନ୍ କିଣୁଛନ୍ତି। ତା ବାଦ୍ ସେଥିରେ ବ୍ୟବହୃତ ଇଣ୍ଟରନେଟ ନିମନ୍ତେ ଅଲଗା ଅର୍ଥ ବ୍ୟୟ କରିବାକୁ ପଡୁଛି। ଦେଶରେ ଡାଟା କଂପାନୀ ମାନେ ନିୟମିତ ସମୟ ବ୍ୟବଧାନ ରେ ଡାଟା ର ମୂଲ୍ୟ କୁ ବଢାଇ ଚାଲିଛନ୍ତି। ଏହି କାରଣ ପାଇଁ ଅନେକ ପିଲା ଉପଯୁକ୍ତ ଅନଲାଇନ୍ ଶିକ୍ଷା ରୁ ବଞ୍ଚିତ ହେଉଛନ୍ତି। ଦେଶର ପ୍ରତ୍ୟେକ ସ୍ଥାନ ରେ ଇଣ୍ଟରନେଟର ସୁବିଧା କରା ଯାଇନାହିଁ। ପିଲାମାନେ ପାଠ ପଢିବା ନିମନ୍ତେ ବହୁ ଦୂର ଚାଲି ଚାଲି ପାହାଡ ଉପରେ କିମ୍ବା ଗଛ ଚଢି ନେଟୱର୍କ ସନ୍ଧାନ କରି ପାଠ ପଢିବାକୁ ପ୍ରୟାସ କରୁଛନ୍ତି।

ଅନଲାଇନ ମାଧ୍ଯମରେ ଶିକ୍ଷା ଲାଭ କୁ ନେଇ ଓଡିଶାରେ ପ୍ରାୟ ୭୦ ଲକ୍ଷ ପିଲାଙ୍କ ମଧ୍ୟରୁ କେବଳ ମାତ୍ର ୨୨ ଲକ୍ଷ ପିଲା ଉପକୃତ ହୋଇ ପାରୁଛନ୍ତି। ଓଡିଶାର ଖୋର୍ଦ୍ଧା ଓ ବରଗଡ ଜିଲ୍ଲାକୁ ଛାଡିଦେଲେ ଅନ୍ୟ କୌଣସି ଜିଲ୍ଲାରେ ରେ ୫୦% ବିଦ୍ୟାର୍ଥୀ ଶିକ୍ଷା ସଂଯୋଗ କାର୍ଯ୍ୟକ୍ରମରେ ଯୋଗଦାନ କରି ପାରି ନାହାଁନ୍ତି । ଏହା ଛଡା ଦୂରଦର୍ଶନ ମାଧ୍ୟମରେ ପ୍ରସାରିତ ଶିକ୍ଷା କାର୍ଯ୍ୟକ୍ରମ ର ସୁବିଧା କେବଳ ୬୧ % ପିଲା ପାଇ ପାରିଛନ୍ତି ।ଏହା ବ୍ୟତୀତ ଛୋଟ ପିଲା ମାନେ ମୋବାଇଲ୍ କୁ ଘଣ୍ଟା ଘଣ୍ଟା ଧରି ଦେଖିଲା ଵେଳକୁ ସେମାନଙ୍କ ଚକ୍ଷୁ ଉପରେ ଏହାର କୁ ପ୍ରଭାବ ପଡିଥାଏ । ଉପରୋକ୍ତ ଆଲୋଚନା ରୁ ଜଣାଗଲା ଯେ ଏହି ଶିକ୍ଷା ବ୍ୟବସ୍ଥା ରେ ସୁବିଧା ଥିଲେ ବି ଅନେକ ଅସୁବିଧା ବି ରହୁଛି। ଇଣ୍ଟରନେଟ ର ସୁବିଧା ରେ ଉପଲବ୍ଧି ,ଡାଟା ର ମୂଲ୍ୟ ହ୍ରାସ କରାଗଲେ ଏହି ଶିକ୍ଷା ବ୍ୟବସ୍ଥା ଦ୍ବାରା ଅନେକ ପିଲା ଉପକୃତ ହୋଇ ପାରିବେ।

ବିଷୟ ପ୍ରସ୍ଥାନ -

*****************

ଶିକ୍ଷା ବ୍ୟବସ୍ଥାରେ ନିୟମିତ ଭାଵରେ ପରିବର୍ତ୍ତନ ସ୍ବାଗତ ଯୋଗ୍ୟ ଅଟେ । ଆମେ ଦେଖିଲେ ଯେ ଏହି ବ୍ୟବସ୍ଥା ରେ ଅନେକ ସୁବିଧା ଥିବା ବେଳେ ଅନେକ ଅସୁବିଧା ମଧ୍ୟ ରହିଅଛି। ଏହି ବ୍ୟବସ୍ଥା କରୋନା ମହାମାରୀ ବ୍ୟାପି ଥିବା ସମୟରେ ପିଲାଙ୍କ ଭବିଷ୍ୟତ ରେ ଘୋଟି ଆସିଥିବା ଅନ୍ଧକାରର ଛାୟା କୁ କିଛି ମାତ୍ରା ରେ ହଟାଇବାକୁ ମୁଖ୍ୟ ଭୂମିକା ଗ୍ରହଣ କରିଥିଲା।ମୋବାଇଲ୍ ହେଉ କିମ୍ବା କମ୍ପ୍ୟୁଟର,ଏଥିରେ ସୁଗୁଣ ଥିବା ବେଳେ ଅନେକ ଦୁର୍ଗୁଣ ମଧ୍ୟ ରହିଛି ।ଏହାକୁ ବ୍ୟବହାର କରି ବିଦ୍ୟାର୍ଥୀ ମାନେ ସଂପୂର୍ଣ୍ଣ ଭାବେ ଅଭ୍ୟସ୍ତ ହୋଇ ଗଲେଣି।ଏହା କୁ ଯଦି ଉଚିତ୍ ବ୍ଯବହାର କରାଯାଏ। ଏବଂ ଶିକ୍ଷା ବ୍ୟବସ୍ଥା ଉଭୟ ଅଫଲାଇନ୍ ଏବଂ ଅନଲାଇନ୍ ମାଧ୍ୟମରେ ହୁଏ, ତେବେ ଉଭୟ ବ୍ୟବସ୍ଥା ର ସୁଫଳତା ପିଲାମାନେ ହାସଲ୍ କରି ପାରିବେ।

_______________________________________________

ପ୍ରସ୍ତୁତି -ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଅନଲାଇନ୍ ଶିକ୍ଷାର ସୁବିଧା ଏବଂ ଅସୁବିଧା | Benefits and Drawbacks of Online Education in Odia

ଅନଲାଇନ ଶିକ୍ଷାଦାନ: ଶିକ୍ଷା ବିପ୍ଲବ ର ଶୁଭାରମ୍ଭ