ଯଦି ଜଣେ ହଠାତ୍ ଆପଣଙ୍କୁ ଭାରତକୁ ନେଇ କୌଣସି ସଂକେତ କିମ୍ୱା ଚିହ୍ନ କଥା ପଚାରିବ ତେବେ ଆପଣଙ୍କ ମନରେ କଣ ଆସିବ। ନିଶ୍ଚିତ ମନେ ପଡ଼ିବ, ନାରଙ୍ଗୀ, ଧଳା ଓ ସବୁଜ ରଙ୍ଗର ମଝିରେ ନୀଳର ଚକ୍ର ଥାଇ ଏକ ଆୟତାକାର ଚିହ୍ନ। ଯଦି ଯୁକ୍ତରାଷ୍ଟ୍ର ଆମେରିକା କଥା ମନେ ପକାଇବା ତେବେ ଆପଣଙ୍କର କିଛି ତାରା ସହ ଗାର ପକା ଏକ ଚିତ୍ର ମନେପକାଇବେ। ଏମିତି ଯେକୌଣସି ଦେଶ କଥା ପଡ଼ିଲେ ଯାହା ଆପଣଙ୍କ ମନକୁ ଆସିବ ତାହା ନିଶ୍ଚୟ ସେ ଦେଶର ପତାକାର ରଙ୍ଗ ହୋଇଥିବ। ଅନ୍ତର୍ଜାତୀୟ ତଥା ବିଶ୍ୱ ସ୍ତରରେ ଯେକୌଣସି କାର୍ଯ୍ୟକ୍ରମରେ ମଧ୍ୟ ଭାରତର ପ୍ରତୀକ ଭାବେ ଏହି ତିନିରଙ୍ଗକୁ ନିଆଯାଏ। ତେବେ ଆମେ କହିପାରିବା ଯେ ଦେଶର ଜାତୀୟ ପତାକାକୁ ଆମ ଦେଶର ପ୍ରତୀକ ଭାବେ ନିଆଯାଏ। ସମସ୍ତ ଦେଶର ପ୍ରତୀକ ଭାବେ ସେ ଦେଶର ଜାତୀୟ ପତାକା ନିଆଯାଏ। ତେବେ ଜାତୀୟପତାକାର ଚୟନ ଓ ଗୁରୁତ୍ୱ ବିଷୟରେ ଆଜି କଥା ହେବା ।

ଜାତୀୟ ପତାକାର ଗୁରୁତ୍ୱ

ପିଲାଦିନୁ ସ୍ୱାଧୀନତା ଦିବସ ଓ ସାଧାରଣତନ୍ତ୍ର ଦିବସରେ ବୋଲୁଥିବା ଗୋଟେ ଗୀତ ମନେପଡ଼େ –

ବିଜୟୀ ବିଶ୍ୱ ତିରଙ୍ଗା ପ୍ୟାରା

ଝଣ୍ଡା ଉଂଚା ରହେ ହମାରା..

ସାନ ନ ଇସକି ଯାନେ ଯାୱେ,

ଚାହେ ଜାନ ଭଲେ ହି ଯାୱେ.....

ଏହା ହେଉଛି କବି ଶ୍ୟାମଲାଲ୍ ଗୁପ୍ତା ପରସାଦଙ୍କ ଦ୍ୱାରା ଲିଖିତ ଝଣ୍ଡା ଗାନର କିଛି ଉକ୍ତି। ଏ ଗୀତ ବୋଲିବା ବେଳେ ସତରେ ଶୀହରି ଉଠେ ଦେହ, ଯଦିଓ ପିଲାବେଳେ ଦେଶ, ଜାତି ତଥା ମାତୃଭୂମି ବିଷୟରେ କୌଣସି ସ୍ୱତଃସ୍ଫୂର୍ତ୍ତ ଭାବନା ନଥିଲା। ହେଲେ ପିଲାଦିନୁ ଶିଖାଯାଇଥିବା କଥା ଯେ ଆମ ଦେଶ ଭାରତ ସର୍ବାଗ୍ରେ ଏବଂ ଏହାର ସମସ୍ତ ଉପାଦାନକୁ ଆମେ ସମ୍ମାନ ଦେବା। ଏହା ହିଁ ମନରେ ରୁହେ ଯାହା ଏ ଗୀତ ବୋଲିବା ବେଳେ ଜାତୀୟ ପତାକା ପ୍ରତି ସମ୍ମାନ ଆଣିଦିଏ। ଏହି ପଦ ଅନୁସାରେ ଆମ ଜାତୀୟ ପତାକାର ମର୍ଯ୍ୟାଦା ବଜାୟ ରଖିବାକୁ ଆମେ ପ୍ରତିବଦ୍ଧ ହେବା ଏବଂ ଏଥିପାଇଁ ଆମ ଜୀବନ ମଧ୍ୟ ଦେବାକୁ ପଛାଇବା ନାହିଁ।

ଜାତୀୟ ପତାକା ପରିକଳ୍ପନାର ଇତିବୃତ୍ତ

ତେବେ ଆପଣ ଜାଣନ୍ତି କି ଏହି ଜାତୀୟ ପତାକାର ଯେଉଁ ଡିଜାଇନ୍ ଆମେ ଏବେ ଦେଖୁଛେ, ତାହା ପ୍ରକୃତରେ ପ୍ରଥମ ନୁହେଁ। ଏହା ପୂର୍ବରୁ ପାଞ୍ଚଥର ପରିକଳ୍ପନା କରାଯାଇଛି ଜାତୀୟ ପତାକାର ରୂପରେଖ। ପ୍ରଥମଥର ପାଇଁ ୧୯୦୪ ରୁ ୧୯୦୬ ପର୍ଯ୍ୟନ୍ତ ସ୍ୱାମୀ ବିବେକାନନ୍ଦଙ୍କ ଶିଷ୍ୟା ଭଗିନୀ ନିବେଦିତା ଏକ ନାଲି ରଙ୍ଗର ପତାକା ଚୟନ କରିଥିଲେ ଯାହାର ମଝିରେ ହଳଦିଆ ରଙ୍ଗର ବଜ୍ର(ହିନ୍ଦୁ ଶାସ୍ତ୍ରାନୁସାରେ ଇନ୍ଦ୍ର ଦେବଙ୍କ ଅସ୍ତ୍ର) ଚିତ୍ର ସହ ବଙ୍ଗଳାରେ ବନ୍ଦେ ମାତରଂ ଲେଖାଥିଲା।

· କୋଲକତା ପତାକା

ସର୍ବପ୍ରଥମେ ଜାତୀୟ ପତାକା ୧୯୦୬ କଲିକତା ବା ତତ୍କାଳୀନ କାଲକାଟାରେ ସ୍ୱଦେଶୀ ବଞ୍ଚାଓ ବିଦେଶୀ ହଟାଓ ଆନ୍ଦୋଳନ ବେଳେ ଉତ୍ତୋଳନ କରାଯାଇଥିଲା।

· ଜାତୀୟତାବାଦୀ ପତାକା

ଏହା ପରେ ୧୯୦୬ ଅଗଷ୍ଟ ୭ରେ ବଙ୍ଗ ବିଭାଜନ ବିରୋଧୀ ରାଲିରେ କୋଲକତାର ପାର୍ସୀ ବାଗାନ ଛକଠାରେ ଉତ୍ତୋଳନ ହୋଇଥିଲା ଆଉ ଏକ ପତାକା। ଏହାକୁ ସଚ୍ଚିନ୍ଦ୍ର ବୋଷ ଓ ସୁକୁମାର ମିତ୍ର ଡିଜଇନ୍ କରିଥିଲେ।

· ବର୍ଲିନ୍ କମିଟି ପତାକା

ଏହା ପରେ ୧୯୦୭ରେ ଆଉ ଏକ ପତାକା ମ୍ୟାଡାମ୍ ବିକାଜୀ କାମା, ବିନାୟକ ଦାମୋଦର ସଭରକର ଓ ଶ୍ୟାମଜୀ ବର୍ମାଙ୍କ ଦ୍ୱାରା ଡିଜାଇନ୍ କରାଯାଇ ଜର୍ମାନୀର ଷ୍ଟଟଗ୍ରାଟ୍ ଠାରେ ଉତ୍ତୋଳନ କରାଯାଇଥିଲା। ବିଦେଶୀମାଟିରେ ଏହା ପ୍ରଥମଥର ପାଇଁ ଭାରତୀୟ ପତାକା ଉତ୍ତୋଳନ ଥିଲା।

· ହୋମ୍ ରୁଲ ଫ୍ଲାଗ୍

ହୋମରୁଲ୍ ଲିଗ୍ ଆନ୍ଦୋଳନ ବେଳେ ବାଲ ଗଙ୍ଗାଧର ତିଲକଙ୍କ ଦ୍ୱାରା ଏକ ପତାକା ପ୍ରଣୟନ କରାଯାଇଥିଲା। ଏହି ଆନ୍ଦୋଳନରେ ତିଳକଙ୍କର ଦାବି ଥିଲା ଭାରତକୁ ଇଂରେଜ ଅଧିନରୁ ମୁକ୍ତ କରି ଏକ ଉପରାଜ୍ୟ ବା ଜମିଦାରୀ ରାଜ୍ୟର ମାନ୍ୟତା ମିଳିବା। ଏଣୁ ସେ ହିଁ ଏହି ପତାକାର ଡିଜାଇନ୍ କରି ବ୍ରିଟିଶ୍ ପତାକା ସହିତ ମିଶାଇ ଏକ ପରିକଳ୍ପନା କରିଥିଲେ।

· ମହାତ୍ମା ଗାନ୍ଧୀଙ୍କ ପତାକା

୧୯୨୧ରେ ମହାତ୍ମା ଗାନ୍ଧୀ ଏକ ପତାକାର ପରିକଳ୍ପନା କରିଥିଲେ। ଏଥିରେ ଉପରେ ସବୁଜ ଓ ତଳେ ଲାଲର ଆୟତାକାର କ୍ଷେତ୍ରଥିଲା। ମଝିରେ ନୀଳ ରଙ୍ଗର ଏକ ଚରଖାର ଚିତ୍ରଥିଲା। ସବୁଜ ଆଶାର ସଂକେତ ଥିବା ବେଳେ ଲାଲ ତ୍ୟାଗର ସଂକେତ ଥିଲା। ଚରଖା ଆମ ଦେଶର ଲୋକମାନଙ୍କର ସ୍ୱାବଲମ୍ବୀ ହେବାର ସଂକେତ ଥିଲା। ହେଲେ କିଛି ଲୋକଙ୍କ ଦ୍ୱାରା ପ୍ରତିବାଦ ଯୋଗୁଁ ଏହା ମଧ୍ୟ କାର୍ଯ୍ୟକାରୀ ହୋିପାରି ନଥିଲା।

· ସ୍ୱରାଜ ପତାକା

ପୂର୍ବ ପତାକାଟି ଧାର୍ମିକ ଦୃଷ୍ଟିକୋଣ ରଖୁଥିବାରୁ ସେଥିରେ ସଂଶୋଧନ କରି ଉପରେ ନାରଙ୍ଗୀ, ମଝିରେ ଧଳା ଓ ତଳେ ସବୁଜ ରଙ୍ଗ ରଖି ଡିଜାଇନ୍ କରାଗଲା ଆଉ ଏକ ପତାକା ଯାହା ୧୯୨୩ ରେ ହୋଇଥିଲା। ନାରଙ୍ଗୀ ଓ ସବୁଜ ହିନ୍ଦୁ ଓ ମିସଲିମ ସମ୍ପ୍ରଦାୟର ପ୍ରତୀକ ହୋଇଥିବା ବେଳେ ଧଳା ବାକି ସବୁ ଧର୍ମକୁ ସମ୍ମାନ ଦିଏ। ମଝିରେ ଥିବା ଚରଖା ସ୍ୱଦେଶୀ ଆନ୍ଦୋଳନର ପ୍ରତୀକ। ଏହା ପିଙ୍ଗଲୀ ଭେଙ୍କୟାଙ୍କ ଦ୍ୱାରା ଡିଜାଇନ୍ ହୋଇଥିଲା।

· ସ୍ୱାଧୀନ ଭାରତର ପତାକା

୧୯୪୭ରେ ଦେଶ ସ୍ୱାଧୀନ ହେବା ପରେ ରାଜେନ୍ଦ୍ର ପ୍ରସାଦଙ୍କ ଅଧ୍ୟକ୍ଷତାରେ ଗଠିତ ଏକ କମିଟି ଦ୍ୱାରା ବର୍ତ୍ତମାନର ଜାତୀୟ ପତାକାର ଡାଜାଇନ୍ ପରିକଳ୍ପନା କରାଯାଇଥିଲା। ଏଥିରେ ମଝିରେ ଚରଖାକୁ ବଦଳାଇ ଅଶୋକ ଚକ୍ର ସ୍ଥାନିତ କରାଗଲା। ରଙ୍ଗଗୁଡ଼ିକର ମହତ୍ତ୍ୱ ବଦଳିଗଲା ଏବଂ ନାରଙ୍ଗୀ ସାହସ ଓ ନିଷ୍ଠା, ଧଳା ଶାନ୍ତି ଓ ସଦ୍‌ଭାବନା ଏବଂ ସବୁଜ ରଙ୍ଗ ବିଶ୍ୱାସ ଓ ପ୍ରଗତିର ପ୍ରତୀକ ଭାବେ ଜଣାଗଲା। ମଝିରେ ଥିବା ଅଶୋକ ଚକ୍ରର ମହତ୍ତ୍ୱ ଥିଲା ଧର୍ମ ବା ଭଲ କର୍ମର ପ୍ରତୀକ।

ଜାତୀୟ ପତାକା ସମ୍ପର୍କିତ କିଛି ନିୟମାବଳୀ

ଆମର ଜାତୀୟ ପତାକା ଆମର ସ୍ୱାଭିମାନ ଓ ଗାରିମାର ପ୍ରତୀକ। ଏହାର ସମ୍ମାନ ରକ୍ଷା ପାଇଁ କେତେ ଯେ ଯବାନ୍ ସୀମାନ୍ତରେ ନିଜର ପ୍ରାଣ ବଳି ଦେଉଛନ୍ତି। ଯେପର୍ଯ୍ୟନ୍ତ ଆମ ଦେଶର ସାର୍ବଭୌମତାର ପ୍ରତୀକ ତ୍ରିରଙ୍ଗା ଫରଫର ହୋଇ ଉଡ଼ୁଥିବ ସେ ପର୍ଯ୍ୟନ୍ତ ଆମ ଜାତିର ସ୍ୱାଭିମାନ ଜୀବିତ ଥିବ। ତେଣୁ ଏହାକୁ ଆମର ଜାତୀୟ ପର୍ବ ଭାବେ ଆମ ସ୍ୱାଧୀନତା ଓ ସାର୍ବଭୌମତାର ପ୍ରତୀକ ଭାବେ ଉଡ଼ାଯାଏ।

୧୯୫୦ ମସିହାରେ ଜାତୀୟ ଚିହ୍ନ ଓ ସଂକେତ ଆଇନ୍ ପ୍ରଣୟନ ହୋଇଥିଲା ଏବଂ ୧୯୭୧ରେ ଜାତୀୟ ପତାକା ସମ୍ମାନ ଆଇନ୍ ପ୍ରଣୟନ ହେଲା ଯାହା କି କୌଣସି ପ୍ରକାର ମନ୍ଦ କିମ୍ୱା ଭୁଲ ଉପାୟରେ ଏହାର ବ୍ୟବହାରକୁ ବିରୋଧ କରେ। ତେବେ ୨୦୦୨ରେ ଏକ ଜାତୀୟ ପତାକା କୋଡ୍ ବା ନ୍ୟାସନାଲ୍ ଫ୍ଲାଗ୍ କୋଡ୍ ପ୍ରଣୟନ କରାଗଲା ଯାହା ଏହି ଦୁଇ ଆଇନକୁ ମିଶାଇ କେତୋଟି ପ୍ରମୁଖ ନିର୍ଦ୍ଦେଶାବଳୀ ପ୍ରଦର୍ଶିତ କରୁଥିଲା। ଏଥିରେ ସମ୍ପୂର୍ଣ୍ଣ ଭାବେ ଜାତୀୟ ପତାକା ଉଡ଼ାଇବାର ନିୟମ, ସ୍ଥାନ ତଥା ଏହାକୁ ସମ୍ମାନର ସହ ଉତ୍ତୋଳନ କରିବାର ବିଧି ଦର୍ଶାଯାଇଛି। ଏଥିରେ ଜାତୀୟ ପତାକାର କପଡ଼ା, ତିଆରି ମାଧ୍ୟମ ବିଷୟରେ ମଧ୍ୟ ଉଲ୍ଲେଖ ରହିଛି।

· ପତାକାର ଆକାର ବିଷୟରେ ସବିଶେଷ ତଥ୍ୟ ଏଥିରେ ପ୍ରଦତ୍ତ। ସରକାରୀ ଅଧିକାରୀଙ୍କ କାର ଆଦିରୁ ନେଇ ଏୟାରକ୍ରାଫ୍ଟରେ ବ୍ୟବହାର କରିବା ଲାଗି ପତାକାର ବିଭିନ୍ନ ଆକାର ରହିଛି, ଯେପରି କି- ଏୟାର କ୍ରାଫ୍ଟର ପତାକା ଆକାରର ଲମ୍ୱ ୪୫୦ମି.ମି. ଓ ପ୍ରସ୍ଥ ୩୦୦ ମି.ମି ହୋଇଥାଏ ଏବଂ ଭି.ଭି.ଆଇ.ପି ଫ୍ଲାଇଟ୍‌ର ପତାକା ଆକାର ୨୨୫ ମି.ମି ଲମ୍ବ ଓ ୧୫୦ ମି.ମି. ଦୈର୍ଘ୍ୟ ବିଶିଷ୍ଟ ହୋଇଥାଏ।

· ଜାତୀୟ ପତାକାକୁ ନିୟମିତ ଭାବେ କୌଣସି ବେସରକାରୀ ତଥା ବ୍ୟବସାୟିକ ବ୍ୟବହାର ପାଇଁ ଉଡ଼ାଯାଇପାରିବ ନାହିଁ। ପତାକାକୁ କେବଳ କେହି ଜବାନ କିମ୍ୱା ମାନ୍ୟଗଣ୍ୟ ନେତା ତଥା ମହାପୁରୁଷମାନଙ୍କୁ ରାଷ୍ଟ୍ରୀୟ ମର୍ଯ୍ୟାଦା ଦେବା ଉଦ୍ଦେଶ୍ୟରେ ଅର୍ଦ୍ଧ ନିମିତ କରାଯିବ, ନତୁବା ଅନ୍ୟ କୌଣସି ସ୍ଥାନରେ ଏପରି କରାଯିବ ନାହିଁ। କୌଣସି ଜାଗାରେ ଚିରା ଫଟା ପତାକା ବ୍ୟବହାର ହେବ ନାହିଁ।

· ଜାତୀୟ ପତାକାକୁ କୌଣସି ବ୍ୟକ୍ତି ଦେହରେ ଗୁଡ଼ାଇ ପାରିବେ ନାହିଁ କିମ୍ୱା ହାତରେ, ଗୋଡ଼ରେ ଏଥିରୁ କୌଣସି ପୋଷାକ ତିଆରି କରି ପିନ୍ଧି ପାରିବେ ନାହିଁ। ଏହାକୁ ଏକ ସାଧାରଣ କନା ପରି କୌଣସି ଖାଦ୍ୟ ଦ୍ରବ୍ୟ କିମ୍ୱା ଅନ୍ୟ ଦ୍ରବ୍ୟ ନେବା ଆଣିବାରେ ବ୍ୟବହାର କରାଯିବ ନାହିଁ।

· କୌଣସି ପରିସ୍ଥିତିରେ ଆମ ଜ୍ଞାତ ସାରରେ ଜାତୀୟ ପତାକାକୁ ଭୂମିରେ ପକାଇବା କିମ୍ୱା ଜଳରେ ପକାଇବା ଏକ ଅପରାଧ। ଜାତୀୟ ପତାକା ସହିତ ଅନ୍ୟ କୌଣସି ପତାକା ଉଡ଼ି ପାରିବ ନାହିଁ। ଏହାକୁ କୌଣସି ସାଜସଜ୍ଜାର ଉପାଦାନ ଭାବେ ବ୍ୟବହାର କରାଯାଇପାରିବ ନାହିଁ।

· ଜାତୀୟ ପତାକା ସର୍ବଦା ହସ୍ତତନ୍ତ ପ୍ରସ୍ତୁତ ସୂତା, ଉଲ୍ କିମ୍ୱା ସିଲ୍କ କପଡ଼ାର ହେବା ଆବଶ୍ୟକ। ଅନ୍ୟ କୌଣସି ପଦାର୍ଥ ବା କାଗଜରେ ପ୍ରସ୍ତୁତ ଜାତୀୟ ପତାକା ସାଧାରଣ ନାଗରିକମାନେ କୌଣସି ଜାତୀୟ ଉତ୍ସବରେ ଉଡ଼ାଇ ପାରିବେ କିନ୍ତୁ ଉତ୍ସବ ଶେଷରେ ପତାକାକୁ ସସମ୍ମାନେ ରଖାଯିବ।

· ଏହି କୋଡ୍‌ର ଧାରା ୨ରେ ବର୍ଣ୍ଣିତ ରହିଛି ବିଭିନ୍ନ ଶିକ୍ଷାନୁଷ୍ଠାନମାନଙ୍କରେ ଜାତୀୟ ଉତ୍ସବ ପାଳନ ବେଳେ ପିଲାମାନେ କିପରି ପତାକାକୁ ସମ୍ମାନ ଦେବେ। ଜାତୀୟ ପତାକା ତଳେ ଠିଆ ହୋଇ ନେବାକୁ ଥିବା ଶପଥଟି ଏହିପରି-

ମୁଁ ଏହି ଜାତୀୟ ପତାକା ଏବଂ ଏହା ପ୍ରତିନିଧିତ୍ୱ କରୁଥିବା ସାର୍ବଭୌମ, ସାମାଜିକ, ଧର୍ମନିରପେକ୍ଷ ଗଣତାନ୍ତ୍ରିକ ରାଷ୍ଟ୍ର ପ୍ରତି ସର୍ବଦା କର୍ତ୍ତବ୍ୟନିଷ୍ଠ ରହିବି।

ଏହା ଜାତୀୟ ପତାକା କୋଡ୍ ବା ଫ୍ଲାଗ୍ କୋଡ୍‌ରେ ଉଲ୍ଲେଖ ଥିବା ନିୟମଗୁଡ଼ିକର କିଛି ଉଦ୍ଧୃତି ମାତ୍ର। ଏହା ସହିତ ଆମ ତ୍ରିରଙ୍ଗା ପତାକା ସମ୍ପର୍କିତ ଆହୁରି ଅନେକ ନିତି ନିର୍ଦ୍ଦେଶ ଏଥିରେ ବର୍ଣ୍ଣିତ ଅଛି। ଏହାର ଅମାନ୍ୟ କରୁଥିବା ବ୍ୟକ୍ତି ଧର୍ତ୍ତବ୍ୟ ଅପରାଧ କରୁଛନ୍ତି ବୋଲି ଧରାଯାଏ।

ଉପସଂହାର

ଆମ ଜାତୀୟ ପତାକା ହେଉଛି ଆମର ରାଷ୍ଟ୍ରୀୟ ସଂହତି। ଆମେ ଯେତେଥର ବି ଜାତୀୟ ପତାକା ଉତ୍ତୋଳନ କରିବା ରାଷ୍ଟ୍ରୀୟ ସଂଗୀତ ଗାନ କରିବା ବିଧେୟ। ଏହା ଦ୍ୱାରା ପତାକାକୁ ଉପଯୁକ୍ତ ସମ୍ମାନ ମିଳେ। ଏକ ଦେଶର ଜାତୀୟତା, ସଂସ୍କୃତି ତଥା ଲୋକଭାବନାର ପ୍ରତୀକାତ୍ମକ ଭାବେ ଜାତୀୟ ପତାକା ପ୍ରତିପାଦିତ କରେ। ଏଣୁ ସର୍ବଦା ଆମେ ଆମର ଜାତୀୟ ପତାକାକୁ ଉଚିତ୍ ସମ୍ମାନ ପ୍ରଦର୍ଶନ କରି ଉତ୍ତୋଳନ କରିବା ଆବଶ୍ୟକ। ସଂନ୍ଧ୍ୟା ପୂର୍ବରୁ ଏହାକୁ ଅବତରଣ କରି ଯତ୍ନର ସହ ରଖିବା ଆବଶ୍ୟକ। ଏହା ଆମ ରାଷ୍ଟ୍ରୀୟତାର ପ୍ରତୀକ। ଆମ ପୂର୍ବପୁରୁଷମାନଙ୍କର ଅଦମ୍ୟ ସାହସ ତଥା ଶ୍ରମର ସାଂକେତିକ ନିଦର୍ଶନ ଆମ ରାଷ୍ଟ୍ରୀୟ ଧ୍ୱଜା। ଏଣୁ ଆସନ୍ତୁ ଆମ ଜାତୀୟ ପତାକାକୁ ନେଇ ଗର୍ବ କରିବା ଏବଂ ସମ୍ମାନର ସହ ଜାତୀୟ ପର୍ବ ପାଳିବା।

ଆମ ଜାତୀୟ ପତାକା- ଏକ ଅବଲୋକନ/ Our national flag is our pride.

ଝଣ୍ଡା ଉଂଚା ରହେ ହମାରା..