ଆମ ସଂସ୍କୃତି ପରମ୍ପରା ର ଅନନ୍ୟ କୃଷି ଭିତ୍ତିକ ପର୍ବ ରଜ ପର୍ବ ର ଅନେକ ଅନେକ ଶୁଭେଚ୍ଛା ଓ ଶୁଭ କାମନା । ସମଗ୍ର ଓଡିଶା ରେ ରଜ ପର୍ବ କୁ ଗଣ ପର୍ବ ରୂପେ ପାଳନ କରାଯାଉ ଥିବା ବେଳେ ଉତ୍ତର ଓଡିଶା ର ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଓ କେନ୍ଦୁଝର ଜିଲ୍ଲା ରେ ରଜ ପର୍ବ କୁ ନେଇ ରହିଛି ଅନେକ ସ୍ୱତନ୍ତ୍ରତା । ଏଠିକାର ମୂଳ ଅଧିବାସୀ ରୂପେ ଆଦି ଅନାଦି କାଳ ରୁ ବସବାସ କରି ଆସୁ ଥିବା ଭୂୟାଁ , ଜୁଆଙ୍ଗ , ବାଥୁଡି , ଖଡ଼ିଆ , ସାଉନ୍ତି ଆଦି ଜନଜାତି ର ଯୁବକ ଯୁବତୀ ମାନଙ୍କ ମଧ୍ୟରେ ରଜ ପର୍ବ ଏକ ସ୍ୱତନ୍ତ୍ର ସ୍ଥାନ ରଖେ । ଶିମିଳିପାଳ ର ନିଘଞ୍ଚ ଅରଣ୍ୟ ମଧ୍ୟ ରେ ବସବାସ କରୁ ଥିବା ଖଡ଼ିଆ , ବାଥୁଡି ଜନଜାତି ର ସୁନ୍ଦରୀ ଲାଳନା ହେଉ କି କେନ୍ଦୁଝର ର ଅଗମ୍ୟ ବାଂଶପାଳ ଭୂୟାଁ ପୀଢ଼ ର ଭୂୟାଁ ତରୁଣୀ ହଉ କି ଗୋନାସିକା ଗିରିଦେଶ ର ଜୁଆଙ୍ଗ ଯୁବତୀ ହଉ, ସମସ୍ତ ଙ୍କ ମନ ରେ ଏକ ଅପୂର୍ବ ଉନ୍ମାଦନା ଭରି ଦିଏ ଏହି ରଜ ପର୍ବ ।
🦚🦚🦚🦚🦚🦚

🚩🚩 ଅନୁଷ୍ଠିତ ହୁଏ ବିଶେଷ ପୂଜାର୍ଚ୍ଚନା ..

ମୟୂରଭଞ୍ଜର ଶକ୍ତିପୀଠ ଭାବେ ପରିଚିତ ଦେବକୁଣ୍ଡ ର ଅମ୍ବିକା ଠାକୁରାଣୀ ଓ ଏହା କୁ ଲାଗି ଥିବା ବିରାଟ ପାଟ ଠାକୁରଣୀ ଙ୍କ ପାଖରେ ବାଥୁଡି ସମ୍ପ୍ରଦାୟର ଲୋକ ଙ୍କ ଦ୍ଵାରା ବିଶେଷ ପୂଜାର୍ଚ୍ଚନା ହୁଏ । ସେହି ଭଳି କେନ୍ଦୁଝର ର ମା ତାରିଣୀ ଠାକୁରଣୀ , ସୀତାବିଞ୍ଜ ଓ ଅନ୍ୟାନ୍ୟ ଶକ୍ତି ପୀଠ ରେ ସ୍ୱତନ୍ତ୍ର ନୀତି ରେ ଦେହୁରୀ ମାନେ ପୂଜା କରନ୍ତି ।

✳️✳️ ତିଆରି ହୁଏ ରଜ ଦୋଳି

କାଠ ର ଅଭାବ ନ ଥିବା ଏହି ଦୁଇ ଜିଲ୍ଲାର ପୁରପୁଲ୍ଲୀ ରେ ତିଆରି ହୁଏ ବିଶାଳ ବିଶାଳ ରଜ ଦୋଳି । ଚକ୍ରି ଦୋଳି , ଖାଇ ଦୋଳି , ପଟା ଦୋଳି ଆଦି ନିର୍ମାଣ କରା ଯାଇ ଥାଏ । ଏହାକୁ ଗ୍ରାମର କିଛି ଖାସ୍ ଯୁବକ ମାନେ ନିର୍ମାଣ କରି ଥାନ୍ତି । ଦୋଳି ନିର୍ମାଣର ପାରିଶ୍ରମିକ ବାବଦ ରେ ଗ୍ରାମବାସୀ ମାନେ ନିଜ ନିଜ ଘରୁ ପାଚିଲା ଜାମୁ କୋଳି , ଆମ୍ବ , ପଣସ ଆଦି ଭେଟି ଦିଅନ୍ତି ଦୋଳି ତିଆରି କରି ଥିବା ଯୁବକ ମାନଙ୍କୁ , ଯାହା କି ଏକ ବିରଳ ପରମ୍ପରା । ଦୋଳି ନିର୍ମାଣ ପରେ ଗ୍ରାମ ର ଦେହୁରୀ ଗ୍ରାମରେ ଥିବା ବିଭିନ୍ନ ଦେବା ଦେବୀ ଆସ୍ଥାନ ରେ ପୂଜା ପାଠ କରି ସାରିବା ପରେ ଦୋଳି ପାଖ କୁ ଆସି ଅନୁକୂଳ ପୂଜା କରି ଥାନ୍ତି ।

✳️✳️🚩🚩❇️❇️❇️🦚🦚

➡️ ଆରମ୍ଭ ହୁଏ ବାଦି ଗୀତ

ଗାଁ ଯୁବକ ଯୁବତୀ ମାନେ ସଜବାଜ ହୋଇ ଦୋଳି ଝୁଲିବା ପାଇଁ ଆସି ଦୋଳି ପାଖ ରେ ରୁଣ୍ଡ ହୁଅନ୍ତି । ଏମାନେ ଉଚ୍ଚ ଶିକ୍ଷିତ କିମ୍ବା ଲେଖକ ଲେଖିକା କିମ୍ବା କବି କବିୟତ୍ରୀ ନୁହଁନ୍ତି ତଥାପି ଦୋଳି ଝୁଲିବା ସମୟ ରେ ଏମାନେ ଅତି ସୁନ୍ଦର ଭାବେ ରେ ପରିସ୍ଥିତି କୁ ଖାପ୍ ଖୁଆଇଲା ଭଳି ଅନେକ ଖଞ୍ଜା ଗୀତ ଗାଇ ଥାନ୍ତି ଯାହାକି ଶ୍ରୁତି ମଧୁର ହେବା ସହ ଉପସ୍ଥିତ ଶ୍ରୋତାଗଣ କୁ ମଧ୍ୟ ଆମୋଦିତ କରି ଥାଏ । ଦୋଳି ଗୀତ କୁ ମୁଖ୍ୟତଃ ତିନି ଭାଗ ରେ ବିଭକ୍ତ କରା ଯାଏ ।

➡️ ବନ୍ଦନା ଗୀତ
➡️ ବାଦି ଗୀତ
➡️ ପ୍ରଶ୍ନ ଉତ୍ତର ମୂଳକ ଗୀତ

ଦୋଳି ଝୁଲିବାର ପ୍ରାରମ୍ଭ ରେ ଦୋଳି ଅନୁକୂଳ ଗୀତ ବଲା ହୁଏ , ଯାହା କୁ ଦୋଳି ବନ୍ଦନା ଗୀତ କୁହା ଯାଏ ।

✳️ ଆମେ ହେନୁ ପାଞ୍ଚ ଜଣ
ଅରୁଆ ଅକତା ଗୁଆ ଟେ ଆଣ
ଗୁଆ ଟେ ଆଣ ହୋ ..
କରିବା ଦୁଳି ବନ୍ଦାଣ ।।

✳️ ହାଣିଲି ଲଙ୍ଗଳ ମୁଣ୍ଢା
ପ୍ରଥମେ ବନ୍ଦଇଁ ବଡାମ ବୁଢା
ବଡାମ ବୁଢା ହୋ ..
ଗୀତ ଆସୁ ଯୋଡ଼ା ଯୋଡ଼ା ।।

✳️ ଡାହି ରେ ବୁଣିଲି ଆଶୁ
ଏ ଗୀତ ସରିଲେ ସେ ଗୀତ ଆସୁ
ସେ ଗୀତ ଆସୁ ହୋ ..
କଣ୍ଠେ ବଡାମଣୀ ବସୁ ।।

ଏହି ପରି ଭାବେ ବିଭିନ୍ନ ଦେବାଦେବୀ ଙ୍କୁ ସ୍ମରଣା କରି ବନ୍ଦନା ଗୀତ ଗାନ ପରେ ଯୁବକ ଯୁବତୀ ମାନଙ୍କ ମଧ୍ୟ ରେ ଦୋଳଗତ ଭାବେ ଆରମ୍ଭ ହୁଏ ବାଦି ଗୀତ ର ଆସର ।

ଯୁବକ ଦଳ -

ନଈ ବାଲି ଧସ ଧସ
ଭିଡ଼ ଭିତରେ କିସେଇଁ ପସ
କିସେଇଁ ପସ ହୋ ..
ବାଦି ଗୀତ ଠିକି ଆସ ।।

ଯୁବତୀ ଦଳ -
ପେଚା କଲା କୁରୁ କୁରୁ
ରହ ରେ ସଙ୍ଗାତ ଦମ୍ ଧରୁ
ଦମ୍ ଧରୁ ହୋ ..
ସାଙ୍ଗ ଆସି ନାଇଁ ଘରୁ ।।

ଯୁବକ ଦଳ -
ତାଳ ପତ୍ର ଖର ଖର
କେଉଁ ଠାରେ ନାନୀ ତୁମର ଘର
ତୁମର ଘର ହୋ ..
ଚଞ୍ଚଳ ଉତ୍ତର ଦିଅ ।।

ଯୁବତୀ ଦଳ -
ଆମେ ତୋ କେନ୍ଦୁଝରିଆ
ଗୀତ ଗାଇ ଦେମୁ ରସ ରସିଆ
ରସ ରସିଆ ହୋ ..
ରେମ୍ପ ତୁମ ଛାଡି ଯିଆ ।।

ହୁଳି ତଳେ ଭାଲୁ ଗାତ
ତୁମ ଘର କାହିଁ କୁହ ତ ମିତ
କୁହ ତ ମିତ ହୋ ..
ଆରମ୍ କରିବା ଗୀତ ।।

ଯୁବକ ଦଳ -
ବେଳ ବୁଡି ହେଲା ସଞ୍ଜ
ଆମର ଘର ତ ମୟୂରଭଞ୍ଜ
ମୟୂରଭଞ୍ଜ ହୋ ..
ଶୋଭା ତାର ଚାରୁ କୁଞ୍ଜ ।।

ସରଗି ଗଛ ର ଫୁଲ
ଗୀତ ରେ ହାରିନେ କି ଦେବ ମୂଲ
କି ଦେବ ମୂଲ ହୋ ..
ସେଇ କଥା କୁ ନ ଭୁଲ ।।

ଯୁବତୀ ଦଳ -
ଗଛ ରୁ ଫଳିଲା ବେଲ
ଖାଇବାକୁ ନାହିଁ ନିଆଁ ର ଝୁଲ
ନିଆଁ ର ଝୁଲ ହୋ ..
କିସ ଦେମୁ ତୁମ ମୂଲ ।।

ଯୁବକ ଦଳ -
ଆହା ରେ ରମଣୀ ରସା
ବୁଡ଼େଇବୁ କି ଆଉ କୁଳ ବେଉସା
କୁଳ ବେଉସା ହୋ ..
ଦାଣ୍ଡେ କରୁ ନକ ହସା ।।

ଯୁବତୀ ଦଳ -
ଦୁଆରେ କେ କଲା କାଦ
ପଡି ନାଇଁ ଦିନେ କା ଘରେ ପାଦ
କା ଘରେ ପାଦ ହୋ ..
ମିଛ ଟାରେ ଅପବାଦ ।।

ଯୁବକ ଦଳ -
ଫୁଟିଛି ନାଲି ପଳାସ
ବାସ ନାହିଁ ଖାଲି ରୂପ ସରସ
ରୂପ ସରସ ହୋ ..
ଖଣ୍ଡେ ଦୂରୁ ଥାଇ ହସ ।।

ଯୁବତୀ ଦଳ -
ନଈ ପାଣି ହଲ ଚଲ
କଥା ରେ ତୁମର ନାଇଁ ତ ମୂଲ
ନାଇଁ ତ ମୂଲ ହୋ ..
ତୁମେ ତ ଶିମିଳିଫୁଲ ।।

ଯୁବକ ଦଳ -
କଇମ କାଠ ପାନିଆଁ
କହି ଦିଅ ଥରେ ତୁମର ନାଆଁ
ତୁମର ନାଆଁ ହୋ ..
ହୋଇବା ବର କନିଆଁ ।।

ଯୁବତୀ ଦଳ -
ଚେଙ୍ଗ ମାଛ ଗବ ଗବ
ପର ଝିଅ ଟାକୁ କରୁଛ ଲୁଭ
କରୁଛ ଲୁଭ ହୋ ..
ପଣ ଦେନେ ସିନା ଯିବ ll

ଯୁବକ ଦଳ -
ଗହୀର ବିଲ ର କୋବି
ଯେତେ ପଣ ନେବ ସେତେ ତ ଦେବି
ସେତେ ତ ଦେବି ହୋ ...
ବାହା ହେଇ ସାଙ୍ଗେ ନେବି ।।

ଯୁବତୀ ଦଳ -
ଶାଳୁଆ ଗଛ ର ଛାଇ
ଆମର ଝିଅ ଗା ଶିକ୍ଷିତ ନାଇଁ
ଶିକ୍ଷିତ ନାଇଁ ହୋ ..
ନେବ ହେନେ କିସ ପାଇଁ ।।

ଯୁବକ ଦଳ -
ଗଛ ରେ ଧରିଲା ଫଳ
ତୁମେ ତ ରେ ନାନୀ କଲେଜ ପଳହ
କଲେଜ ପଳହ ହୋ ..
ଆମେ ଧରୁଛଉଁ ହଳ ।।

ପତର ନେଲା ଉଡେଇ
ତୁମ ପଛା ପୁଛି ଯିମୁ ଗୋଡେଇ
ଯିମୁ ଗୋଡେଇ ହୋ ..
ନାଇଁ ଦେବ ବାହୁଡେଇ ।।

ଯୁବତୀ ଦଳ -
ରସୁଣ ଖାଇଲା ପୁକ
ଦିନେ ହସି ଦେନେ କି ଯିବ ଦୁଃଖ
କି ଯିବ ଦୁଃଖ ହୋ ...
ଯେତେ ହେନେ ପର ନୁକ ।।

ଯୁବକ ଦଳ -
ଆମ୍ବ ଗଛ ବନେ ବନେ
ପାସ୍ ର ପୀରତି ଦୂର କୁ ଗନେ
ଦୂରକୁ ଗନେ ହୋ ..
ଖଜୁ ଥିବ ମନେ ମନେ ।।
ଯୁବତୀ ଦଳ -
ଆହାର ଆଟୁଲ ଟୁଲ
କେଉଁ ନଦୀଟା ରେ ଭାସି ଆସିଲ
ଭାସି ଆସିଲ ହୋ ..
ଖାଲିଟା ରେ ହୁଅ ଗେହ୍ଲ ।।

ତାଟିଆ ଉପରେ ଗିନା
ଏତେ ବଡ଼ ଟୋକା ରହିଛ ସିନା
ରହିଛ ସିନା ହୋ ..
ଭାଉଜ ର ଛୁଆ ଘିନା ।।

ଯୁବକ ଦଳ -
ଗଡ଼ିଆ ଆଳି ର ନିମ
ଯେ ଡାଳ ଧରିଲି ସେ ଡାଳ ହୀନ
ସେ ଡାଳ ହୀନ ହୋ .. .
ଅଭଳା ରେ ଗେଲା ଦିନ ।।

ଯୁବତୀ ଦଳ -
ହିଡ ଡେଇଁ ଗଲି ଗାର
ଯେଉଁ ପିଲା ଦେବ ସୁନାର ହାର
ସୁନାର ହାର ହୋ ..
ସେହି ପିଲାଦରକାର ।।

ଯୁବକ ଦଳ -

ତୁ ଯଦି ହେବୁ ମୋହର
ତୋତେ କିଣି ଦେବି ମଠା ଚାଦର୍
ମଠା ଚାଦର ହୋ ..
କେତେ ମାରୁ ଆଖି ଠାର ।।

ଯୁବତୀ ଦଳ -
ସୁଜୁନା ଗଛ ର ଅଠା
ତୋତେ ମିଳେ ନାହିଁ ଛିଡା କପଡା
ଛିଡା କପଡା ହୋ ..
ମୋତେ ଯାଚୁ ଅଛୁ ମଠା ।।

ଏହି ଭଳି ଭାବ ରେ ଖଞ୍ଜା ଗୀତ ମାଧ୍ୟମ ରେ ପରିଚୟ ଠାରୁ ଆରମ୍ଭ କରି ପ୍ରେମ ନିବେଦନ ସହିତ ଆବେଗ ଅନୁଭୂତି ଓ ନୀତି ଦିନ ଜୀବନ ର ଏକ ନିଚ୍ଛକ ପ୍ରତିଛବି ର ଚିତ୍ରଣ ଏହି ବାଦି ଗୀତ ମାଧ୍ୟମ ରେ ଦେଖିବା ପାଇଁ ମିଳେ ।

🌳🦚🌳🦚🌳

ପୁଣି ଗୋଟିଏ ଦଳ ଅନ୍ୟ ଦୋଳ ର ବୁଦ୍ଧି ଏବଂ ଜ୍ଞାନ ପରୀକ୍ଷା ପାଇଁ ବିଭିନ୍ନ ପ୍ରକାର ପ୍ରଶ୍ନ ଉତ୍ତର ମୂଳକ ଗୀତ ଗାନ କରିବାର ଦେଖା ଯାଏ ।

ପ୍ରଶ୍ନ- ନୂଆ ତଟିଆରେ ଘିଅ
ସୀତା ଠାକୁରାଣୀ କାହାର ଝିଅ ..
କାହାର ଝିଅ ହୋ
ଏହାର ଜବାବ ଦିଅ ।।

ଉତ୍ତର- ଅଡ଼ୁଆ ସୁତାର ଖିଅ
ସୀତା ଠାକୁରାଣୀ ଜନକ ଝିଅ
ଜନକ ଝିଅ ହୋ
ଏହାର ଉତ୍ତର ନିଅ ।।

ପ୍ରଶ୍ନ- କାଳୀ ଗାଈ ମାରେ ନାତ
ବୀର ରାମଚନ୍ଦ୍ର ହୋ କାହାର ପୁତ
କାହାର ପୁତ ହୋ..
ନ କହିଲେ ହେବ ଭୂତ ।।

ଉତ୍ତର- ପାଣିରେ ଟାଣିଲି ଗାର
ଦଶରଥ ସୁତ ରାମ ଚନ୍ଦର
ରାମ ଚନ୍ଦର ହୋ ..
ଶୁଣୁଥା ମୋର ଉତ୍ତର ।।
ପ୍ରଶ୍ନ - ଷୋଳ ଚକ ଜଗନ୍ନାଥ
ଦୋଳି ଖେଳ ଟା ରେ କେଉଁଠୁ ଜାତ
କେଉଁଠୁ ଜାତ ହୋ ..
ଫିଟାଇ କୁହ ଏଥର ।।

ଉତ୍ତର - ଆହା ମୋ ଦ୍ୱିତୀୟା ଜହ୍ନ
ଶିଆଳି ଲତା ରୁ ଦୋଳି ଜନମ
ଦୋଳି ଜନମ ହୋ ..
ଝୁଲି ଥିଲେ ଭଗବାନ ।।

ଏହି ପରି ଭାବରେ ଦୁଇ ଗୋଷ୍ଠି ମଧ୍ୟରେ ପ୍ରଶ୍ନ ଉତ୍ତରକୁ ଗୀତ ମାଧ୍ୟମରେ ଗାନ କରି ଜ୍ଞାନ ପରୀକ୍ଷା କରି ଥାନ୍ତି ଓ ଗୋଟିଏ ଗୋଷ୍ଠି ଜିତିଥାଏ । ଜିତିବା ଗୋଷ୍ଠି, ହାରିବା ଗୋଷ୍ଠିକୁ ପୁଣି ଗୀତ ମାଧ୍ୟମରେ ନିଜର ପରାଜୟ ସ୍ୱୀକାର କରିବା ପାଇଁ ଆହ୍ୱାନ ଦେଇଥାନ୍ତି ।

ପର୍ବତେ ନାଚେ ମୟୂର
ହାରିଗଲ ବୋଲି ସ୍ୱୀକାର କର
ସ୍ୱୀକାର କର ହୋ..
ଆପେ ଚାଲି ଯିବ ଘର ।।

ପୁଣି ହାରି ଯାଇ ଥିବା ଦଳ ର ମନ ଦୁଃଖ ଦେଖି ଅନ୍ୟ ଦଳରୁ ସହାନୁଭୁତି ପୂର୍ଣ୍ଣ ଗୀତ ଶୁଣିବା ପାଇଁ ମିଳେ ..

❇️🌾
ପାଚିଲା ଆମ୍ବ ପଣସ
ଆସ ନିନୀ ଘରି ଦୋଳି ରେ ବସ
ଦୋଳି ରେ ବସ ହୋ ..
ନ କରି ମନ ବିରସ ।।

❇️🌾
ନେଉଟିଆ ଶାଗ ଭଜା
ଜୀବନ ରେ ନାନୀ କରିଥା ମଜା
କରିଥା ମଜା ହୋ ..
ବାନ୍ଧି ନେବ ଯମ ରଜା ।।
❇️🌾
ସୁଜୁନା ମୂଳେ ପାଉଁଶ
ଜିଇଁଛେଇ ବୋଲି ରଙ୍ଗ ରବସ
ରଙ୍ଗ ରବସ ହୋ ..
ମରିନେ ଖାର ପାଉଁଶ ।।

(ବାଥୁଡି ଓ ଭୂୟାଁ ଜନଜାତି ର ରଜ ଦୋଳି ଗୀତ ରୁ ସଂଗୃହୀତ )

ବାସ୍ତବ ରେ ଆଜି କାଲି ର ସୌଖିନ ସେଲିବ୍ରେସନ ଠାରୁ ବହୁ ଦୂର ରେ ଥିବା ଏହି ଜନଜାତି ଗୋଷ୍ଠି ଗୁଡିକ ର ରଜ ଦୋଳି ଗୀତ ଗୁଡିକ ବେସ୍ ମାର୍ମିକ ଓ ତାତ୍ପର୍ଯ୍ୟପୂର୍ଣ୍ଣ । ଖଞ୍ଜା ଗୀତ ମାଧ୍ୟମ ରେ ଜୀବନ ର ମୂଲ୍ୟବୋଧ କୁ ବେସ୍ ଭଲ ଭାବରେ ବୁଝେଇ ଦେଇ ପାରନ୍ତି । ଏ ସବୁ ଗୀତ ଗୁଡିକ ତିନି ଧାଡି ବିଶିଷ୍ଟ ହୋଇ ଥାଏ । ପ୍ରଥମ ଧାଡି ଟି ଆଠ ଅକ୍ଷର ବିଶିଷ୍ଟ ହୋଇ ଥିଲା ବେଳେ ମଝି ଧାଡି ଟି ଏଗାର ଅକ୍ଷର ବିଶିଷ୍ଟ ହୋଇ ଥିବା ଏବଂ ଶେଷ ଧାଡି ଟି ମଧ୍ୟ ଆଠ ଅକ୍ଷର ବିଶିଷ୍ଟ ହୋଇ ଥାଏ । ଏ ସବୁ ଗୀତ ଗୁଡିକ ଲିଖିତ ଆକାର ରେ ନ ଥିଲେ ମଧ୍ୟ ପୀଢ଼ି ପରେ ପୀଢ଼ି ହୋଇ ଜନମୁଖ ରେ ଉଜ୍ଜୀବିତ ରହି ଆସିଛି । ତେବେ ଆଜିର ଆଧୁନିକ ଯୁଗ ରେ ଯୁବକ ଯୁବତୀ ମାନେ ଏହି ନିଆରା ରାଜଦୋଳି ଗୀତ ରୁ ନିଜକୁ ଦୂରେଇ ରଖୁ ଥିବାରୁ ଏହି ଗୀତ ଗୁଡିକ ବଞ୍ଚେଇ ରହିବା ପାଇଁ ଏହାର ଲିଖିତ ସଂରକ୍ଷଣ ର ଆବଶ୍ୟକତା ରହିଛି । ତଥାପି ଏତିକି ରେ ସରି ଯାଇ ନାହି ଏହି ରଜ ଦୋଳି ଗୀତ .. ଯେତେ ଲେଖିଲେ ବି ଏ ଗୀତ ର ଅନ୍ତ ନାହିଁ .. ଛନ୍ଦ ମାଧ୍ୟମ ରେ ଖଞ୍ଜି ଖଞ୍ଜି ଆହୁରି ଅନେକ ଗୀତ ହୋଇ ପାରିବ ..

ଲେଖାର ଶେଷ କୁ ଏତିକି କହିବି

ବାଟ ରେ ପଡିଛି ଖୁଣ୍ଟି
ଗୀତ ସରି ନାଇଁ ଯାଉଛ ଉଠି
ଯାଉଛ ଉଠି ହୋ ..
ବାଟ ରେ ପଡିବ ଝୁଣ୍ଟି ।।

ଧନ୍ୟବାଦ ଓ ଶୁଭେଚ୍ଛା ସହ
ଆଲେଖ୍ୟ :- ଆଦିତ୍ୟ କୁମାର ନାଏକ
ମୟୂରଭଞ୍ଜ ମିରର୍

ଉତ୍ତର ଓଡିଶା ର ରଜ ପର୍ବ ଏବଂ ଏହାର ସ୍ୱତନ୍ତ୍ରତା

ମୟୂରଭଞ୍ଜ କେନ୍ଦୁଝର ଜିଲ୍ଲାର ଲୋକ ସଂସ୍କୃତି