କହିବ କି ଥରେ

-----------------

ଚଳାଅ କିପରି ପ୍ରଭୁ ଏ ସାରା ଜଗତ?
ତୁମକୁ କି ବୁଝି ହେବ ପଢି ଭାଗବତ?

ତୁମକୁ କି ଦେଖିହେବ ଗଲେ ଶ୍ରୀମନ୍ଦିର?
ତୁମକୁ କି ମାପିହେବ ଆହେ ନିରାକାର?

ତୁମେ ବାସ୍ତବ ନା ତୁମେ ମନର ଭାବନା?
ତୁମେ ଉଲ୍ଲାସ ନା ତୁମେ ହୃଦୟ ବେଦନା?

କାଇଁ ପ୍ରଭୁ ଗଢୁଥିଲ ଏ ସାରା ସଂସାର?
କାଇଁ ପ୍ରଭୁ ଶୂନ୍ୟ କଲ ଦୁଃଖି ମନ ଘର?

ଦେଖ ଥରେ ମଣିଷ କୁ ଦିଅ ଥରେ ଧ୍ୟାନ,
ମଣିଷ ଗଢିଲ ଯଦି ଦେଲ କାଇଁ ମନ?

ବିନା ପଲକରେ ପ୍ରଭୁ ଖୋଲିଛ ନୟନ,
କେତେବେଳେ ପ୍ରଭୁ ତୁମେ କର ଯେ ଶୟନ?

ନିରାଶା ମନରେ ପ୍ରଭୁ ଆଶାକୁ ଭରୁଛ,
କେଉଁ ଉପାୟରେ ପ୍ରଭୁ ମନକୁ ପଢୁଛ?

କେତେ ବଡ଼ ଉଦର ଯେ ତୁମର ମଣିମା?
ଖାଇବାରେ ଟପିଯାଅ ସବୁ ଶେଷ ସୀମା।

ମିଛମାୟା ସଂସାରରେ ତୁମେ କଣ ସତ?
ମିଛ କହି ଯାଇଛ ଯେ କାନ୍ଦେ ଗୋପ ମାତ।

କୁହ ପ୍ରଭୁ କଣ ଥିଲା ରାଧିକା ର ଦୋଷ?
ମିଛେ କିଆଁ ଧରୁଥିଲ ପ୍ରେମିକ ର ବେଶ?

ସବୁ ଜାଣି ସୀତାଙ୍କୁ ବି ପରୀକ୍ଷା କରିଲ,
ପର କଥା ଶୁଣି କାଇଁ ପରିତ୍ୟାଗ କଲ?

କେଉଁ ଯୁଗେ କେତେ ପ୍ରଭୁ ଅବତାର ନିଅ?
ଅଧର୍ମୀଙ୍କୁ ନାଶ କରି ତୁମେ କଣ ପାଅ?

ବିଶ୍ବାସ ର ଧାରା ହୋଇ ଅବିଶ୍ବାସ କର,
କେତେ ଡାକ ଦେଲେ ଯାଇଁ ହାତ ଆସି ଧର।

ଭକତର ଭକତିରେ ସନ୍ଦେହ କି କର?
ଅଜଣା ଭଳିଆ କିମ୍ପା ଅଭିନୟ କର?

ତୁମର ଜଣାଣ ପାଇଁ ଅଛିକି ମଂତର?
କିପରି ହୋଇବି ପ୍ରଭୁ ତୁମରି କିଙ୍କର?

କେଉଁ ଅଭିନୟ ପାଇଁ ଧରା କୁ ଯେ ଆସ?
ମନର ନାୟକ ସାଜି ହୃଦୟରେ ବସ!!

_________________________
*ସୌମ୍ୟ ରଞ୍ଜନ ରାୟ*
ଭୂୟାଁଉଆସ, ଗୁଆମାଳ, ଭଦ୍ରକ
ଫୋ:୯୩୩୭୬୧୪୩୬୩

କହିବ କି ଥରେ

ମୋ କାଳିଆ ସାଆନ୍ତ ଙ୍କୁ ମୋର ବ୍ୟକ୍ତିଗତ ପ୍ରଶ୍ନ