*କାଳୀକା*
(ଜନ୍ମ ବୃତ୍ତାନ୍ତ)

ହିମବନ୍ତ ହେମନ୍ତ ର ପ୍ରାରମ୍ଭରେ ଆଦ୍ୟାଶକ୍ତି ମହାମାୟା ମା କାଳୀ ଙ୍କର ପୂଜାର୍ଚ୍ଚନା ବେଶ୍ ଚିତ୍ତାକର୍ଷକ ।ଭାରତ ତଥା ଓଡ଼ିଶା ର ପୁରପଲ୍ଲୀରେ ପ୍ରସିଦ୍ଧ ସହର ଭଦ୍ରକ ସମେତ ଅନେକ ସ୍ଥାନରେ ମହା ଆଡ଼ମ୍ବରରେ ପାଳିତ ହୋଇ ଆସୁଛି।
କନ୍ୟାମାସ ଠାରୁ ତୁଳାମାସରେ ମହାଳୟା ପିଣ୍ଡଦେବା ଠାରୁ ପୟା ପିଣ୍ଡଦାନ ମଧ୍ୟରେ ମହାଦେବୀ ଙ୍କ ଆବାହନ ହୋଇଥାଏ, ପିତୃପୁରୁଷମାନେ ଅନ୍ଧାରରେ ଆସି ଆଲୋକରେ ବିଦାୟ ନିଅନ୍ତି,ସେହି ଅମାବାସ୍ୟାର ନିଶାର୍ଦ୍ଧରେ ତନ୍ତ୍ର ଶକ୍ତିର ଆଧାର ମା ଶ୍ୟାମାକାଳୀଙ୍କୁ ଆରାଧନା କରାଯାଏ।
ଶରତ ଋତୁର ପ୍ରଭାବରେ କାଶତଣ୍ଡି ଫୁଲର ପସରା ମେଲାଇ ଧରାବତରଣ କରନ୍ତି ଜଗତକଲ୍ୟାଣୀ, ମମତାମୟୀ ,ପରମ ବୈଷ୍ଣବୀ,ପରମ ସନାତନୀ , ରୁଦ୍ରାଣୀ ,ଭବାନୀ ମା ଜଗଦମ୍ବା ଯୋଗେଶ୍ଵରୀ,ଯୋଗମାୟା, ଅଗ୍ନିରୂପା, ଅଯୋନିସମ୍ଭୂତା , ଦୂର୍ଗେ ଦୁର୍ଗତିନାଶିନୀ ,ମା ଅଭୟ ବରଦାୟିନୀ ମା ଦୁର୍ଗା।

ବରରେ ବରୀୟାନ,ତେଜରେ ତେଜୀୟାନ ହୋଇଥିବା ମହିଷାସୁର ଅଦମ୍ୟ ଶକ୍ତି ଓ ସାହସରେ ତ୍ରିଲୋକ ବିଜୟୀ ହୋଇଥିଲା,ଦେବ - ଦାନବ - ଗନ୍ଧର୍ବ - ଯକ୍ଷ - ରାକ୍ଷସ - ନାଗ - ନରଙ୍କୁ ନିଜ ଵାହୁ ବଳରେ ବଶକରି ରଖିଥିଲା ।
ତାର ଅତ୍ୟାଚାର ର ପ୍ରତାପ ଏତେ ବୃଦ୍ଧି ହୋଇଥିଲା ,ସମସ୍ତେ ତ୍ରାହି ତ୍ରାହି କହୁଥିଲେ। ତାପରେ ସମସ୍ତେ ବିଷ୍ଣୁଲୋକ ବୈକୁଣ୍ଠ ପୁରରେ ପହଞ୍ଚି ନାରାୟଣଙ୍କୁ ପ୍ରାର୍ଥନା କରିବାକୁ ଲାଗିଲେ -

ଶ୍ରୀକୃଷ୍ଣ ଗୋବିନ୍ଦ ହରେ ମୁରାରୀ ହେ ନାଥ ନାରାୟଣ ବାସୁଦେବ,କୃପାବିଦେହି ମହୀପାଳ ସିନ୍ଧୁ ନିରାଶ୍ରୟମାମ ଜଗଦୀଶ ରକ୍ଷ ।
ଭଗବାନ ବିଷ୍ଣୁ ଅନନ୍ତନିଦ୍ରାରୁ ଉଠି ଦେବଗଣଙ୍କୁ ଦେଖି ଚିନ୍ତିତ ହୋଇପଡିଲେ ,ଅଗ୍ନିରୁ କନ୍ୟା ଟିଏ ଜାତ କଲେ ,ସମସ୍ତ ଦେବତା କନ୍ୟାଙ୍କୁ ନିଜ ଅସ୍ତ୍ର ,ଶସ୍ତ୍ର ,ବିଦ୍ୟା ଆଦି ପ୍ରଦାନ କଲେ । ସବୁ ଦେବଦେବୀଙ୍କ ତେଜରେ କନ୍ୟାଟି ତେଜୀୟାନ୍ ତଥା ବଳବାନ ହେବାକୁ ଲାଗିଲା । ତତ୍ପରେ ଦେବୀ ପ୍ରଚଣ୍ଡ ଉଦଣ୍ଡ ରୁପରେ କେଶ ମୁକୁଳା କରି ଉଲ୍ଲଗ୍ନ ହୋଇ ମହିଷାସୁର ଆଦି ଅନେକ ଦୈତ୍ୟ ଙ୍କୁ ନିପାତ କରିଥିଲେ ।
ଦୈତ୍ୟ ବଧ ପରେ ନିଜ ଶରୀରକୁ ଦେଖି ଲଜ୍ୟା ବୋଧ ପ୍ରକାଶ କଲେ , କୁମାରୀତ୍ଵଭରା ନବଯୌବନସମ୍ପନ୍ନା ହୃଦୟଟି ବିବାହ ପାଇଁ ବ୍ୟାକୁଳ ହେଉଥିଲା କିନ୍ତୁ କୌଣସି ବିଦୁଷ ସମ୍ମତି ପ୍ରଦାନ କରିନଥିଲେ। ବିବସନା,ଲଜ୍ୟା ତେଜ୍ୟା ଉନ୍ମୁକ୍ତ କେଶ ଶଯ୍ୟା କୁ ଦେଖିକି କିଏ ବା କାହିଁକି ବାହା ହେବାପାଇଁ ଇଚ୍ଛା ପ୍ରକାଶ କରିବ ! ,ଯାହା ଦେବୀକନ୍ୟା ମା ଦୁର୍ଗାଙ୍କୁ ଅତିଶୟ ମର୍ମାହତ କରିଥିଲା।
ଯିଏ ସମସ୍ତଙ୍କ ମଙ୍ଗଳ ନିମିତ୍ତ ସମସ୍ତଙ୍କ ଜୀବନ ରକ୍ଷା ପାଇଁ ନିଜକୁ ବିବସନା କରି ଅସୁରକୂଳ ଆଗରେ ଲଜ୍ୟା ପରିତ୍ୟାଗ କରିବାକୁ ଦ୍ୱିଧା ପ୍ରକାଶ କରିନି ,ତାକୁ ବିବାହ କରିବା ପାଇଁ ଏତେ ସଙ୍କୋଚ କଣ ପାଇଁ? ମୁଁ କଣ ବିବାହ ଯୋଗ୍ୟା ନୁହଁ !?ଆଦି ତମାମ ପ୍ରଶ୍ନର ଉତ୍ତରରେ ଦେବୀ ଙ୍କ ଚକ୍ଷୁ କ୍ରୋଧରେ ପ୍ରଜ୍ଜଳିତ ହେବାକୁ ଲାଗିଲା। କ୍ରୋଧାଗ୍ନୀ ଅବପାତ ର ରୂପ ନେଲା, ଦେବୀ ଉଦ୍ୟତ ହେଲେ ସବୁ ସଂସାରକୁ ଧ୍ଵଂସ କରିବା ପାଇଁ ,ପଶୁ ପକ୍ଷୀ ନର, ରାକ୍ଷସ ,କିନ୍ନର ,ଗନ୍ଧର୍ବ ,ଯକ୍ଷ , ଦେଵତା ଆଦି ଯାହାଙ୍କୁ ଦେଖିଲେ ହତ୍ୟା କଲେ , ମୁଣ୍ଡମାଳା ଧାରଣ କଲେ,ରକ୍ତ ପାନ କଲେ,।ତାଙ୍କ ସହଚରୀ ଯୋଗିନୀ , ବେତାଳି ମାନେ ମଧ୍ୟ ରକ୍ତ ,ମାଂସ , ଅସ୍ଥି ଖାଇଲେ । ଖଡଗ ଖର୍ପର ଧରି ସଂହାର କରିବାକୁ ଲାଗିଲେ ।ବ୍ରହ୍ମାଣ୍ଡ ଥର ହର ହେବାକୁ ଲାଗିଲା ,ଅଳ୍ପ ସମୟରେ ସବୁ ଧ୍ଵଂସ ହେଇଯିବ ଆଶଙ୍କା କଲେ ଭଗବାନ ଦେବ ଦେବ ମହାଦେବ କୈଳାଶପତି ସଦାଶିବ ତ୍ରିଶୂଳଧାରୀ ଶଙ୍କର ,ଯାହାଙ୍କର ତୃତୀୟ ନେତ୍ର ଖୋଲିଲେ ତ୍ରିପୁର ଧ୍ଵଂସ ହେଇଯିବ ସେ କିଂକର୍ତ୍ତବ୍ୟମୁଢ ହୋଇ ଦେବୀଙ୍କ ପଥ ଅବରୋଧ କଲେ,ପଥରେ ଶୋଇଗଲେ ,ଦେବୀ ଉତ୍ୟକ୍ତ ଉନ୍ମାଦ ଅବସ୍ଥାରେ ଆସି ଦକ୍ଷିଣ ପାଦଟି ଭଗବାନ ସଦାଶିବଙ୍କ ଜଟାଯୁଟ,ରୁଦ୍ରାକ୍ଷରେ ସୁସଜ୍ଜିତ ,ଭସ୍ମ ବିଭୂତିରେ ଲେପିତ ଛାତିରେ ଉପରେ ପକାଇ ଦେଇଛନ୍ତି।ଜାଣିପାରି ନାହାନ୍ତି, ହଠାତ୍ ଜିଭ ବାହାର କରି ଦେଇଛନ୍ତି ,ତତ୍ପରେ କ୍ରୋଧ ଶାନ୍ତ ମୁଦ୍ରାକୁ ଆସିଛି, ବାମାଙ୍ଗୀ ଭାବରେ ଆଶୁତୋଷ ଗ୍ରହଣ କରିଛନ୍ତି ।
ଯାହାଙ୍କୁ ଆଜି ଆମେ ଆଦ୍ୟାଶକ୍ତି ମା ଶ୍ୟାମାକାଳୀ ରୂପରେ ପୂଜା କରୁଛନ୍ତି।

ସାଧାରଣତଃ ତନ୍ତ୍ର ସାଧନାପାଇଁ ମା ଙ୍କୁ ତିନୋଟି ରୁପରେ ବିରାଜମାନ କରିଥାନ୍ତି।

୧- ପ୍ରାତଃ ସମୟରେ କୁମାରୀ ବେଶରେ କୁସୁମ କଳିକା ପରି ଜପାମାଳା ଜପ କରନ୍ତି ।
୨- ମଧ୍ୟାହ୍ନରେ ପୌଢ଼ବଧୂ ରୁପରେ ବିକଶିତ ବଦନରେ ରାତିର ଅନ୍ଧକାର ପରି ଚାରୁ ନେତ୍ରରେ ଦର୍ଶନ ଦିଅନ୍ତି ।
୩- ସନ୍ଧ୍ୟା ସମୟରେ ବୃଦ୍ଧ ରୁପରେ ଗଳିତ କୁଚ ଯୁଗୋରେ ମୁଣ୍ଡମାଳା ପରିଧାନ କରି ମହାକାଳୀ ବେଶରେ ବିଦ୍ୟମାନ ହୁଅନ୍ତି।

ପ୍ରମାଣ -
ଓଁ ପ୍ରାତଃସ୍ୟାତ୍ କୌମାରୀ କୁସୁମ କଳିକୟା ଜପମାଳା ଜପନ୍ତି।
ମଧ୍ୟାନ୍ନେ ପୌଢ଼ାରୂପା ବିକଶିତ ବଦନା
ଚାରୁନେତ୍ରା ନିଶାୟାମ୍।
ସନ୍ଧ୍ୟାକାଳେ ବୃଦ୍ଧାରୁପା କୁଚଗଲିତଯୁଗା
ମୁଣ୍ଡାମାଳା ବହନ୍ତି।
ସା ଦେବୀ ଦେବଦେବୀ ତ୍ରିଭୁବନ ଜନନୀ
ପାତୁମାମ୍ ବିଶ୍ୱେଶ୍ୱରୀ ।

ମହାଦେବୀ ତନ୍ତ୍ର ଶକ୍ତିର ଆଧାର ମହାମାୟୀ କଳିକାଦେବୀଙ୍କ ପରି ମହାଦେବ ମଧ୍ୟ ମୁଣ୍ଡମାଳ ପରିଧାନ କରିଥାନ୍ତି।ମହାମାୟୀ ପଚାରନ୍ତି ମହାଦେବଙ୍କୁ କଣ ପାଇଁ ଓ କାହାର ମୁଣ୍ଡକୁ ଆପଣ ସଦାସର୍ବଦା ପରିଧାନ କରିଛନ୍ତି ? ପଶୂପତି କୁହନ୍ତି ;ଦେବୀ ,ଏସବୁ ମୁଣ୍ଡ ଆପଣଙ୍କର । କାହିଁ କେତେ ଯୁଗରୁ ମୁଁ ସଦା ସର୍ବଦା ସମାଧିସ୍ଥ ଅଛି କିନ୍ତୁ ଅନେକ ଯୁଗରେ ଆପଣ ଅନେକ ଜନ୍ମ ନେଇ ସାରିଛନ୍ତି,ତାର ପ୍ରମାଣ ସ୍ୱରୂପ ଆମର ପ୍ରେମ ଭଲପାଇବା ସ୍ୱରୂପ ଆପଣ ମୋର ଅତି ପ୍ରିୟ ହୋଇଥିବାରୁ ମୁଁ ଆପଣଙ୍କ ଶିର ସବୁ ମାଳା କରି ପିନ୍ଧିଛି।
ଆପଣ ମୋ ସହ ସଦା ସର୍ବଦା ଅଛନ୍ତି ଆଉ ରହିଥିବେ ।ଆମେ ଦୁଇଜଣ ଏକ ଓ ଅଭିନ୍ନ ସବୁ ଯୁଗରେ,ଏହାହିଁ ସତ୍ୟ ଓ ନିୟତି ର ବିଧାନ ।
ଆମେ ସତ୍ୟ ,ଆମେ ଶିବ ଓ ଆମେ ହିଁ ସୁନ୍ଦର।
ଆମ ପ୍ରେମ ଯୁଗ ଯୁଗାନ୍ତର।🙏🙏

ଜୟ ମାକାଳୀ.

କରାଳବଦନାମ ଘୋରଂ
ମୁକ୍ତକେଶୀ ଚତୁର୍ଭୁଜାମ,
କାଲିକା ଦକ୍ଷିଣାମ ଦିବ୍ୟାମ,
ମୁଣ୍ଡମାଲା ବିଭୂଷିତାମ୍।

ହର ହର ମହାଦେବ .

କଂକାଳମାଳା ପରି ଶୋଭିତାୟେ
କପାଳ ମାଳା ପରି ଶୋଭିତାୟ
ଦିବ୍ୟାମ୍ୱରେୟେଚ ଦିଗମ୍ବରାୟ
ନମଃ ଶିବାୟ୍ୟେ ଚ ନମଃ ଶିବାୟ।।

#### ଶୁଦ୍ଧତା ,ବ୍ୟାକରଣ ,ଉପଯୁକ୍ତ ବିରାମ ଚିହ୍ନ ରେ ଯଦି ତ୍ରୁଟି ଥାଏ ଦୟା କରି କ୍ଷମା କରିବେ। ମତାମତ ଦେବାକୁ ଭୁଲିବେ ନାହିଁ।ଦୀପାବଳୀର ଶୁଭକାମନା।

କାଳୀକା (ଜନ୍ମ ବୃତ୍ତାନ୍ତ)

ସୌମ୍ୟ ରଞ୍ଜନ ନନ୍ଦ