ଗୋପାଳ ଦେଖିଲା ଅବିରତ ବର୍ଷାରେ କେମିତି ଆଖପାଖ ସବୁଜିମାରେ ହସି ଉଠୁଛି। ସ୍କୁଲରୁ ଫେରି ଆସିଲା ସେ । ରଫ୍ ଖାତା ଚିରି କାଗଜ ଡଙ୍ଗା କରି ଗାଁ ଦାଣ୍ଡରେ ଭସେଇବାରେ ଲାଗିଲା । ଲଗାଣ ବର୍ଷା ଯୋଗୁଁ ସ୍କୁଲ ଛୁଟି ଘୋଷଣା ହେଲା ।

ଗୋପାଳ ଖେଳିଲା, ଦୌଡିଲା ପାହାଡ଼ ପାଖକୁ ବୁଲିଲା ଜଙ୍ଗଲ ପାଖରେ। ତାକୁ ଅନୁଭବ ହେଲା ଯେମିତି ପ୍ରକୃତି ହସୁଛି ଓ ତାହା ସହ କଥା ହେଉଛି । ସେଦିନ ବର୍ଷା ପ୍ରାୟ ଛାଡି ଯାଇଥାଏ। ଗାଁ ଲୋକ ନଦୀ କୂଳ ବୁଲିବାକୁ ଯାଇଥାନ୍ତି, ଦେଖିବାକୁ ନଦୀ ବଢ଼ିର ଦୃଶ୍ୟ।

ପୋଲ ଉପରେ ପାଣି ଚାଲିଛି। ଦୁଇଟି ଗାଁ ଗମନା ଗମନ ବିଛିନ୍ନ ପ୍ରାୟ। ଏହି ସମୟରେ ପାଖ ଗାଁର ଜଣେ ରୋଗରେ ପିଡୀତ ବ୍ୟକ୍ତି ପୋଲ ଉପର ପାଖରେ ଆସି ଅଟକି ଯାଇଛନ୍ତି। ସାଙ୍ଗରେ ପରିବାର ଲୋକ ମଧ୍ୟ ଅଛନ୍ତି । ହେଲେ କାହାର ସାହାସ ହେଉନି ନଦୀ ପାର କରିବାକୁ । ଗୋପାଳ ସାହାସ ବନ୍ଧିଲା, ଡେଇଁ ପଡ଼ିଲା ପାଣି ଭିତରକୁ । ରୋଗୀ ଓ ପରିବାର ଲୋକ ମାନକୁ ସହଯୋଗ କଲା ନଦୀ ପାର ହେବାକୁ ।

ହେଲେ ପରିବାରର ଶେଷ ସଦସ୍ୟଙ୍କୁ ପାର କରିବା ସମୟରେ ନଦୀ ସୁଅ ବଢ଼ିବାରେ ଲାଗିଲା । ତଥାପି କଷ୍ଟ କରି ସେ ତାଙ୍କୁ ଏ ପାରି କୂଳକୁ ଆଣିଲା। ହେଲେ ହଠାତ୍ ଗୋଟିଏ ଅଘଟଣ ଘଟିଲା। ଗୋଟିଏ ପାଣି ସ୍ରୋତ ସହ ଭଉଁରୀ ମାଡ଼ି ଆସିଲା । ଗୋପାଳକୁ ଭସେଇ ନେଲା। ଗୋପାଳ ଭାସିଗଲା ।

ଲୋକ ମାନଙ୍କର ଚିତ୍କାର ଶୁଣି ଗାଁ ଲୋକ ଦୌଡ଼ି ଗଲେ । ହେଲେ କେହି ସାହାସ କରି ତାକୁ ଉଦ୍ଧାର କରି ପାରିଲେ ନାହିଁ। ପର ଦିନ ଦମକଳ ଓ ଓଡ୍ରାଫ ଟିମ୍ ଆସିଲେ । ଗୋପାଳକୁ ଖୋଜିବାରେ ଲାଗିଲେ । ହଠାତ୍ ଦେଖିଲେ କେହି ଜଣେ ଭାସୁଛି। ସଙ୍ଗେ ସଙ୍ଗେ ଉଦ୍ଧାର କରି ଉପରକୁ ଆଣିଲେ । ହେଲେ ଦେଖିଲା ବେଳକୁ , ଗୋପାଳ ଜୀବନ ହରେଇ ବସିଛି।

ନିଜ ପ୍ରାଣକୁ ତ୍ୟାଗ କରିଛି। ଏ ଜଳ ମଧ୍ୟ ଅଜବ , କିଛି ନିଏନି ସବୁ ଫେରେଇ ଦିଏ । ହେଲେ ସେଦିନ ସେ ନେଲା ଗୋପାଳ ଜୀବନ। ଭାସିଗଲା ଦୂର ଦିଗନ୍ତରେ , ହେଲେ ଫେରେଇ ଦେଲା ଗୋପାଳ ମୃତ ଦେହ ।

ଝୁରିଲେ ବଣ, ଜଙ୍ଗଲ , ଝରଣା ଓ ପାହାଡ଼ । ଗୋପାଳ ବାଟକୁ ଚାହିଁ ରହିଲେ । ମେଘ ମାଳ ମଧ୍ୟ ଖୋଜିଲେ ଗୋପାଳ ର ସେ ମଧୁର ବଂଶୀର ସ୍ୱରକୁ । ଯିଏ ସବୁଦିନ ପାଇଁ ହଜିଗଲା । ପ୍ରତିବର୍ଷ ମୌସୁମୀ ଆସେ , ଯାଏ । ଖୁବ ବରଷେ ହେଲେ ଗୋପାଳ ଆସେନି ନା ଶୁଭେ ତାର ସ୍ୱର।

ଗପବାଲା ଓ ମୌସୁମୀ -୩

ତୃତୀୟ ଭାଗ