ବିଷୟ ପ୍ରବେଶ -

*****************

ଜାତୀୟ ପତାକା କୌଣସି ଏକ ନିର୍ଦ୍ଦିଷ୍ଟ ଦେଶର ଗୌରବ ହୋଇଥାଏ,ଉକ୍ତ ଦେଶ ର ମାନ , ସ୍ବାଭିମାନ ଓ ପରିଚୟ ହୋଇଥାଏ। ଜାତୀୟ ପତାକା ର ମୁକ୍ତ ଭାବରେ ଉଡିବା ,ଉକ୍ତ ଦେଶର ସ୍ବାଧୀନତା,ପ୍ରଗତି ଓ ସମୃଦ୍ଧି ପ୍ରତିପାଦନ କରିଥାଏ।

ଭାରତ ହେଉଛି ଏକ ଗଣତାନ୍ତ୍ରିକ ରାଷ୍ଟ୍ର। ଏହି ଦେଶ ଦୀର୍ଘ ଦୁଇ ଶହ ବର୍ଷ ଇଂରେଜ ଶାସନାଧୀନ ରୁ ମୁକ୍ତି ପ୍ରାପ୍ତ କରି ୧୯୪୭ ମସିହା ଅଗଷ୍ଟ ୧୫ ରେ ସ୍ବାଧୀନତା ଲାଭ କରିଥିଲା। ଭାରତ ର ମୁକ୍ତ ଗଗନ ରେ ୟୁନିଅନ୍ ଜାକ୍ ବଦଳରେ ଉଡିଥିଲା ତ୍ରିରଙ୍ଗା ପତାକା । ପତାକା ଏକ ସାମାନ୍ୟ କପଡା ହୋଇଥାଏ। ମାତ୍ର ତାର ମୂଲ୍ୟବୋଧ ବହୁ ଅଧିକ ।ଏହି ପତାକା ପାଇଁ ଅନେକ ବୀର ନିଜର ଜୀବନ କୁ ପାଣି ଛଡାଇ ଦେଇଥିଲେ।ଏହା ପାଇଁ ଅନେକ ଙ୍କର ଜୀବନ ଦୀପ ମଧ୍ୟ ଲିଭି ଯାଇଥିଲା ।ଜାତୀୟ ପତାକା ମୁକ୍ତ ଗଗନ ରେ ଉଡିବା ଦେଶର ସମୃଦ୍ଧି ଦର୍ଶାଇଥାଏ। ଏହି ଜାତୀୟ ପତାକା ଦେଶ ଓ ଜାତି ର ଗୌରବ ହୋଇଥାଏ। ଏହି ଜାତୀୟ ପତାକା ସ୍ବାଭିମାନ ର ପ୍ରତୀକ ହୋଇଥାଏ। ଏହା ହିଁ ଦେଶ କୁ ସୁ ଉଚ୍ଚ ରେ ପହଞ୍ଚାଇ ପାରେ। ଏହାକୁ ସମ୍ମାନ ଦେବା ଓ ଏହାର ଗୌରବ କୁ ବଜାୟ ରଖିବା ପ୍ରତ୍ୟେକ ଦେଶ ବାସୀ ଙ୍କ ର ମୌଳିକ କର୍ତ୍ତବ୍ୟ ହୋଇଥାଏ। ଏହାର ଅସମ୍ମାନ ଦେଶ ଓ ଜାତି ପତନ ର କାରଣ ସାଜିଥାଏ।

ଉଡୁଥାଉ ସଦା ଅହିଂସା ଅନିଳ,

ଦୃଢ ହେଉ ମନ ଯେପରି ଅଚଳ।

ହଟାଇବା ପାପ ସାଜିକି ଅନଳ,

ଅନ୍ୟାୟ ଜାଳିବା ସାଜି ମୁକ୍ତାଫଳ।

ବ୍ୟାଘ୍ର ପରି ହେବା ନହୋଇ ଛାଗଳ,

ଦୂର କରି ଆମେ ମିଥ୍ୟାର ଉପଳ।

ସତ୍ୟ ରେ କରିବା ହୃଦୟ ମଞ୍ଜୁଳ,

ଢାଳିବା ସର୍ବଦା ପ୍ରେମର ସଲିଳ।

ଇନ୍ଦୁ ପରି ଆମେ ରହିବା ଶୀତଳ,

କରିବା ଆମର ଚରିତ୍ର କୋମଳ।

ମହାନ ଦେଶର ଆମେ ଯେ ଉତ୍ପଳ,

କରିବା ସୁରକ୍ଷା ସାଜିକି ଭୂପାଳ।

ଦୂରକରି ଅନୁଚର ସାୟଂକାଳ,

ଖୋଲିବା ଦେଶର ସ୍ବାଧୀନ ସକାଳ।

ହସିବା ଯେପରି ହସୁଛି କମଳ,

ଦନ୍ତାବଳ ଆମେ ନୁହେଁ ଯେ ଦୁର୍ବଳ।

ଦେଖାଇ ବିଶ୍ବକୁ ଏକତାର ବଳ,

ଉଡାଇବା ଧରି ତ୍ରିରଙ୍ଗା ଚିରାଳ।

ଭାରତର ଜାତୀୟ ପତାକା ସଂପୂର୍ଣ୍ଣ ଭାରତ ଦେଶକୁ ପ୍ରତିନିଧିତ୍ୱ କରୁଥାଏ। ଭାରତର ଜାତୀୟ ପତାକା ୧୯୪୭ ମସିହା ଜୁଲାଇ ୨୨ ତାରିଖରେ ପିଙ୍ଗଳି ଭେଙ୍କୟାଙ୍କଦ୍ୱାରା ପ୍ରସ୍ତୁତ ହୋଇଥିଲା । ପତାକାଟି ଏକ ନିର୍ଦ୍ଧିଷ୍ଟ ଶୈଳୀରେ ନିର୍ମିତ, ଯାହାର ପ୍ରତିଟି ଅଂଶର ନିର୍ଦ୍ଧିଷ୍ଟ ଅର୍ଥ ରହିଛି ।ଏହା ର ଅନେକ ମହତ୍ତ୍ଵ ରହିଛି। ଏଥିରେ ବ୍ୟବହୃତ ହୋଇଥିବା ରଙ୍ଗ , ଏହାର ଆକୃତି ଓ ଏହାର ଗଠନ ରେ ଅନେକ ଅର୍ଥ ରହିଛି। ପୃଥିବୀରେ ଭିନ୍ନ ଭିନ୍ନ ଶାସନ ବ୍ୟବସ୍ଥିତ ଦେଶ ରହିଛି। ଯେପରିକି ଅନେକ ଦେଶରେ ଗଣତନ୍ତ୍ର ଶାସନ ବ୍ୟବସ୍ଥା ଚାଲୁଥିବା ବେଳେ ଅନେକ ଦେଶ ରେ ଏକଛତ୍ରବାଦ,ଅନେକ ରେ ରାଜତନ୍ତ୍ର, ଅନେକ ରେ କମ୍ୟୁନିଷ୍ଟ ଶାସନ ବ୍ୟବସ୍ଥା ଚାଲୁଅଛି‌। ମାତ୍ର ପ୍ରତ୍ୟେକ ଦେଶରେ ଜାତୀୟ ପତାକା ର ବହୁ ମହତ୍ତ୍ଵ ରହିଛି। ଏହି ଜାତୀୟ ପତାକା ଦେଶ ଅସ୍ତିତ୍ବ ର ପରିଚୟ ହୋଇଥାଏ।

ଭାରତର ଜାତୀୟ ପତାକା ର ଭିନ୍ନ ଭିନ୍ନ ରଙ୍ଗ ଓ ଏହାର ଆକାର-

******************************************

ଭାରତର ଜାତୀୟ ପତାକା କୁ ତ୍ରିରଙ୍ଗା ପତାକା କୁହାଯାଏ। କାରଣ ଏଥିରେ ମୁଖ୍ୟତଃ ତିନୋଟି ରଙ୍ଗ ଦେଖିବାକୁ ମିଳିଥାଏ।ଏହି ପତାକାର ଉପରେ ନାରଙ୍ଗୀ, ମଝିରେ ଧଳା ଓ ତଳେ ସବୁଜ ରଙ୍ଗ ରହିଅଛି । ମଝିରେ ଥିବା ଧଳା ରଙ୍ଗ ଉପରେ ୨୪ ଅଖ ଥିବା ଅଶୋକ ଚକ୍ର ମଧ୍ୟ ରହିଛି । ପତାକାର ଉପରେ ଥିବା କେଶରୀ ରଙ୍ଗ ଦେଶବାସୀଙ୍କ ସାହସ ଓ ବୀରତ୍ୱକୁ ସୂଚିତ କରିଥାଏ । ସେହିପରି ମଝିରେ ଥିବା ଧଳା ରଙ୍ଗ ସତ୍ୟ ଓ ଶାନ୍ତିର ପ୍ରତୀକ ଭାବରେ ଗ୍ରହଣ କରାଯାଇଅଛି। ଏବଂ ନିମ୍ନରେ ଥିବା ସବୁଜ ରଙ୍ଗ ଭ୍ରାତୃତ୍ୱର ପ୍ରତୀକ ବହନ କରିଥାଏ । ମଝିରେ ଥିବା ଅଶୋକ ଚକ୍ର ଦେଶର ପ୍ରଗତିକୁ ସୂଚାଇ ଥାଏ । ପତାକାର ମଝିରେ ଶୋଭା ପାଉଥିବା ଅଶୋକ ଚକ୍ର ବା ଧର୍ମ ଚକ୍ର ଦେଶ ପ୍ରଗତିର ପ୍ରତୀକ । ଏଥିରୁ ନାଗରିକଙ୍କୁ ଦେଶ ଭକ୍ତିର ପ୍ରେରଣା ମିଳିଥାଏ । ମୌର୍ଯ୍ୟ ସମ୍ରାଟ ଅଶୋକ ସାରନାଥଠାରେ ଏକ ସିଂହ ସହ ଏହି ଚକ୍ରର ନିର୍ମାଣ କରିଥିଲେ ।ଏହି ଚକ୍ର କୁ ଜାତୀୟ ପତାକା ରେ ସ୍ଥାନିତ କରାଯାଇଅଛି। ସମୟର ପରିବର୍ତ୍ତନ ସହ ଜାତୀୟ ପତାକା ରେ ମଧ୍ୟ ଅନେକ ପରିବର୍ତ୍ତନ ଦେଖିବାକୁ ମିଳିଛି। ପ୍ରାରମ୍ଭରେ ଜାତୀୟ ପତାକା ର ଆକାର ବା ଆକୃତି ଏପରି ନଥିଲା। ଅନେକ ବର୍ଷ ର କ୍ରମାଗତ ପରିବର୍ତ୍ତନ ସହ ଏହା ଆଜି ନୂତନ ରୂପ ଧାରଣ କରିପାରିଛି।

ଭାରତୀୟ ଜାତୀୟ ପତାକା ର ଇତିହାସ -

*******************************************

ଭାରତୀୟ ସ୍ୱାଧୀନତା ସଂଗ୍ରାମ ସମୟ ମଧ୍ୟରେ ଭାରତୀୟ ପତାକାର ନକ୍ସା ରେ ବହୁ ବାର ପରିବର୍ତ୍ତିତ ହୋଇଥିଲା।ପ୍ରାରମ୍ଭିକ ସମୟରେ ୧୮୫୭ ମସିହା ବିଦ୍ରୋହ ରେ ପ୍ରଥମେ ଜଣେ ଇଂରେଜ ଶାସକଙ୍କଦ୍ୱାରା ଭାରତର ଏକକୀୟ ପତାକା ନିର୍ମାଣର ପ୍ରସ୍ତାବ ଆସିଥିଲା। ଅତୀତରେ ବହୁ ପରିବର୍ତ୍ତନ ଘଟିବା ପରେ ଶେଷରେ ସ୍ୱାଧୀନ ଭାରତର ଜାତୀୟ ପତାକା ଭାବେ ତ୍ରିରଙ୍ଗାକୁ ଗ୍ରହଣ କରାଯାଇଅଛି । ଭାରତର ପ୍ରଥମ ଜାତୀୟ ପତାକା ୧୯୦୬ ମସିହା ଅଗଷ୍ଟ ୭ରେ କଲିକତାସ୍ଥିତ ପାର୍ସି ବାଗାନ ଛକ ରେ ଉତ୍ତୋଳନ କରାଯାଇଥିଲା ବୋଲି ଗ୍ରହଣ କରାଯାଏ। ସେତେବେଳେ ଏହି ପତାକାର ରଙ୍ଗ ଲାଲ, ହଳଦୀ ଓ ସବୁଜ ଥିଲା । ଦ୍ୱିତୀୟ ଜାତୀୟ ପତାକା ଜର୍ମାନୀର ଷ୍ଟୁଟଗାର୍ଟ ସହରରେ ୧୯୦୭ ମସିହା ଅଗଷ୍ଟ ୨୨ରେ ଉତ୍ତୋଳନ କରାଯାଇଥିଲା । ଏହାକୁ ସେତେବେଳେ ସପ୍ତର୍ଷି ପତାକା କୁହାଯାଉଥିଲା । ୧୯୦୬ ପତାକାଠାରୁ ଏହା ଦେଖିବାକୁ ଟିକେ ଭିନ୍ନ ଥିଲା । ଏହି ପତାକାର ଉପରେ ପଦ୍ମ ଚିହ୍ନ ଓ ସପ୍ତର୍ଷିଙ୍କୁ ଦର୍ଶାଉ ଥିବା ୭ଟି ତାରା ଥିଲା । ୧୯୧୭ରେ ତୃତୀୟ ଥର ପାଇଁ ପତାକାର ପରିବର୍ତ୍ତନ କରାଯାଇଥିଲା । ସେହି ସମୟରେ ଡ. ଆନିବେଶାନ୍ତଙ୍କ ଘରୋଇ ଶାସନ ଆନ୍ଦୋଳନ ଆରମ୍ଭ କରିଥିଲେ। ଏହି ଆନ୍ଦୋଳନ ସମୟରେ ଲାଲ ଓ ସବୁଜ ରଙ୍ଗ ବିଶିଷ୍ଟ ପତାକା କୁ ବ୍ୟବହାର କରାଯାଇଥିଲା । ୧୯୨୧ ମସିହାରେ ଆନ୍ଧ୍ର ପ୍ରଦେଶର ବିଜୟୱାଡାରେ ଜାତୀୟ କଂଗ୍ରେସ କମିଟିର ବୈଠକ ଅନୁଷ୍ଠିତ ହୋଇଥିଲା । ପିଙ୍ଗଳି ଭେଙ୍କୟା ନାମକ ଆନ୍ଧ୍ର ପ୍ରଦେଶର ଜଣେ ଯୁବକ ଭାରତୀୟ ଜାତୀୟ ପତାକାର ଏକ ଡିଜାଇନ ପ୍ରସ୍ତୁତ କରି ମହାତ୍ମା ଗାନ୍ଧୀଙ୍କୁ ପ୍ରଦାନ କରିଥିଲେ । ଏହି ପତାକାରେ ଲାଲ ଓ ସବୁଜ ଏହିପରି ୨ଟି ରଙ୍ଗ ଥିଲା । ଏହି ଦୁଇ ରଙ୍ଗ ହିନ୍ଦୁ ଓ ମୁସଲମାନ୍‍ ଦୁଇ ପ୍ରମୁଖ ଧର୍ମର ପ୍ରତୀକ ଥିଲା । ତେବେ ଏହି ଦୁଇ ସମ୍ପ୍ରଦାୟକୁ ଛାଡି ଅନ୍ୟ ଧର୍ମାବଲମ୍ବିଙ୍କ ପାଇଁ ମଝିରେ ଧଳା ରଙ୍ଗ ଦେବାକୁ ଗାନ୍ଧିଜୀ ପ୍ରସ୍ତାବ ଦେଇଥିଲେ । ୧୯୩୧ ମସିହାରେ କେଶରୀ, ଧଳା ଓ ସବୁଜ ରଙ୍ଗରେ ଜାତୀୟ ପତାକା ତିଆରି କରାଯାଇଥିଲା । ପତାକାର ମଝିରେ ଅରଟ ଚିହ୍ନ ବ୍ୟବହାର କରାଯାଇଥିଲା । ଏହି ପତାକା ମଧ୍ୟ ସ୍ଥାୟୀ ନଥିଲା,ଏହା ମଧ୍ୟ ପରିବର୍ତ୍ତନ କରାଯାଇଥିଲା । ଶେଷରେ ପତାକାର ଶୀର୍ଷ ଭାଗରେ କେଶରୀ, ମଝିରେ ଧଳା ଓ ନିମ୍ନ ଭାଗ ଘନ ସବୁଜ ରଙ୍ଗ ଓ ସମସ୍ତ ରଙ୍ଗ ସମାନ ପ୍ରକାରର ଆୟତନରେ ସଜ୍ଜିତ ହେବା ଆବଶ୍ୟକ ବୋଲି ମତ ପ୍ରକାଶ ପାଇଥିଲା । ପତାକାର ମଝିରେ ୨୪ଟି ଅର ବିଶିଷ୍ଟ ନୀଳ ରଙ୍ଗର ଚକ୍ର ରହିବା ଆବଶ୍ୟକ । ଏହି ଆକୃତିର ପତାକାକୁ ୨୨ ଜୁଲାଇ ୧୯୪୭ରେ ସାମ୍ବିଧାନିକ କମିଟି ଗ୍ରହଣ କରି ନେଇଥିଲା । ଏହି ପତାକା ରେ ତିନୋଟି ପ୍ରଧାନ ରଙ୍ଗ ଥିବାରୁ, ସେହିଦିନଠାରୁ ଭାରତର ଜାତୀୟ ପତାକାକୁ ତ୍ରିରଙ୍ଗା ବୋଲି କୁହାଯାଉଛି ।

ଜାତୀୟ ପତାକା ଉଡାଇବାର ବିଧି ବା ନିୟମ-

*******************************************

୨୦୦୨ ମସିହା ଜାନୁୟାରୀ ୨୬ ତାରିଖରେ ଜାତୀୟ ପତାକା ଉଡାଇବାକୁ ନେଇ ଏକ ଆଇନ୍‌ ସଂଶୋଧନ କରାଯାଇଥିଲା। ଜଣେ ନାଗରିକ ବା ଯେକୌଣସି ସରକାରୀ ଓ ବେସରକାରୀ ଅନୁଷ୍ଠାନ ଜାତୀୟ ପତାକା ଉଡ଼ାଇବାକୁ ଚାହୁଁଥିଲେ ନିମ୍ନୋକ୍ତ ନିୟମ ଅନୁକରଣ କରିବା ଉଚିତ୍‍:

* ବିଭିନ୍ନ ଶିକ୍ଷାନୁଷ୍ଠାନ ଓ ସରକାରୀ, ବେସରକାରୀ କାର୍ଯ୍ୟାଳୟ ଯେକୌଣସି ଦିନ ପତାକା ଉତ୍ତୋଳନ କରିପାରିବେ। କିନ୍ତୁ ପତାକାର ଗରିମା ଯେପରି କ୍ଷୁଣ୍ଣ ନହୁଏ ସେଥିପ୍ରତି ଧ୍ୟାନ ଦେବା ଆବଶ୍ୟକ ।ଏହା ଏକ ଗୁରୁତ୍ତ୍ୱପୂର୍ଣ ବିଧି ଅଟେ। ପତାକା ର ଗରିମା ଵଜାୟ ରଖିବା ପ୍ରତ୍ୟେକ ନାଗରିକ ଙ୍କର ମୌଳିକ କର୍ତ୍ତବ୍ୟ ହୋଇଥାଏ।

* ଭାରତୀୟ ନାଗରିକ ଙ୍କ ବ୍ୟତୀତ ବିଦେଶୀ ନାଗରିକମାନେ ମଧ୍ୟ ଭାରତ ମଧ୍ୟରେ ପତାକା ଉତ୍ତୋଳନ କରିପାରିବେ । ସେମାନଙ୍କ ଘର କିମ୍ବା କାର୍ଯ୍ୟାଳୟ ଉପରେ ପତାକା ଲଗାଇ ପାରିବେ ।

* କୌଣସି ନିର୍ଦ୍ଦିଷ୍ଟ ସମ୍ପ୍ରଦାୟ ପୃଥକ୍‍ ଭାବେ ଜାତୀୟ ପତାକା ବ୍ୟବହାର କରିପାରିବେ ନାହିଁ । ଭାରତରେ ଏକ ପ୍ରକାର ର ପତାକା ସମସ୍ତେ ଗ୍ରହଣ କରି ପାରିବେ ଏବଂ ବ୍ୟବହାର କରିପାରିବେ।

* ଜାତୀୟ ପତାକାରେ କୌଣସି ପୋଷାକ କିମ୍ବା ଅନ୍ୟ ବ୍ୟବହୃତ ପରିଧାନ ସାମଗ୍ରୀ ପ୍ରସ୍ତୁତ କରିବା ଉଚିତ୍‍ ନୁହେଁ ।ଏହା କୁ ପାଳନ କରିବା ମଧ୍ୟ ଆମ୍ଭ ମାନଙ୍କର ମୌଳିକ କର୍ତ୍ତବ୍ୟ ଅଟେ।

* ସୂର୍ଯ୍ୟୋଦୟ ପରଠାରୁ ସୂର୍ଯ୍ୟାସ୍ତ ପର୍ଯ୍ୟନ୍ତ ଜାତୀୟ ପତାକା ଉଡ଼ାଇବା ବିଧି ରହିଛି ।ଏହି ସମୟ ଅତିକ୍ରମ କରିଯିବା ପରେ ଜାତୀୟ ପତାକା ଉତ୍ତୋଳନ କରିବା ଅନୁଚିତ୍ ହୋଇଥାଏ।

* ପତାକାକୁ ଭୂମିରେ ଛୁଆଁଇବା କିମ୍ବା ପାଣିରେ ବୁଡ଼ାଇବା ଆଇନ୍ ବିରୋଧୀ ଅଟେ।ସାଧାରଣ ଦିବସରେ କୌଣସି ଗାଡି, ଟ୍ରେନ, ପାଣି ଜାହାଜ ଓ ଉଡ଼ାଜାହାଜରେ ଜାତୀୟ ପତାକା ଲଗାଇବା ଉଚିତ୍‍ ନୁହେଁ ।

* ପତାକା ଉଡିବା ବେଳେ ସର୍ବୋଚ୍ଚ ରେ ଉଡିବା ଆବଶ୍ୟକ ।ତାହା ଠାରୁ ଅଧିକ ଉଚ୍ଚରେ ଅନ୍ୟ କୌଣସି ଜିନିଷ ରଖିବା ବେଆଇନ ଅଟେ।

* ଖଦି କିମ୍ବା ହସ୍ତତନ୍ତରେ ଜାତୀୟ ପତାକା ତିଆରି ହେବା ଆବଶ୍ୟକ । ଅନ୍ୟ କୌଣସି ସାମଗ୍ରୀରେ ପତାକା ପ୍ରସ୍ତୁତ କରିବା ମଧ୍ୟ ବେଆଇନ ହୋଇଥାଏ । ଏଥିପାଇଁ ଜୋରିମାନା ସହ ୩ ବର୍ଷ ଜେଲ ଦଣ୍ଡର ମଧ୍ୟ ଦଣ୍ଡ ବିଧାନ ରହିଛି।

ବିଷୟ ପ୍ରସ୍ଥାନ-

****************

ଜାତୀୟ ପତାକା କୁ ସମ୍ମାନ କରିବା କିମ୍ବା ଅସମ୍ମାନ କରିବା ତାହା ଆମ ମାନଙ୍କ ଉପରେ ନିର୍ଭର କରିଥାଏ। ଏହି ସେଇ ତ୍ରିରଙ୍ଗା,ଯାହା ପାଇଁ ଶତ ଶତ ବୀର ନିଜର ପ୍ରାଣ ବଳୀ ଦେଇ ଥିଲେ। ଏହି ସେଇ ତ୍ରିରଙ୍ଗା ଯାହା ପାଇଁ ଅନେକ ବିପ୍ଳବ , ଆନ୍ଦୋଳନ, ହରତାଳ , ସତ୍ୟାଗ୍ରହ ସଂଗଠନ କରାଯାଇଥିଲା। ଏ ଜାତୀୟ ପତାକା, ବହୁ ବର୍ଷ ତପସ୍ୟା ର ଫଳ। ଏ ପତାକା ପ୍ରତ୍ୟେକ ନାଗରିକ ର ମାନ ଓ ସ୍ବାଭିମାନ ର ସାହସ ଓ ବିରତ୍ବ ର , ଶାନ୍ତି ଓ ମୈତ୍ରୀ ର , ପ୍ରଗତୀ ଓ ସମୃଦ୍ଧି ର ପ୍ରତିକ ।ଏହାର ମାନ ମର୍ଯ୍ୟାଦା ବଜାୟ ରଖିବା ଏବଂ ଆମେ ଶିଖିବା ସହ ଆମ ମାନଙ୍କର ଆଗାମୀ ପିଢ଼ି କୁ ଏହି ଶିକ୍ଷା ଦେବା କି ଏ ଦେଶର ଜାତୀୟ ପତାକା ର ସ୍ଥାନ ସଦା ଉଚ୍ଚରେ। ଏ ପତାକା ନିମ୍ନଗାମୀ ହେବା,ଏ ଦେଶ ଓ ଜାତି ର ପତନ ସୁନିଶ୍ଚିତ କରାଇଥାଏ। ତେଣୁ ଏହାର ମୂଲ୍ୟବୋଧ ବୁଝିବା ଏବଂ ଅନ୍ୟକୁ ବୁଝାଇବା।

_________________________________________________

ପ୍ରସ୍ତୁତି- ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଜାତୀୟ ପତାକା ଏବଂଏହାର ସମସ୍ତ ରଙ୍ଗ, ଇତିହାସ ଓ ଉଡାଇବାର ବିଧି| All about Indian national flag

ପ୍ରତ୍ୟେକ ନାଗରିକ ର ମାନ ଓ ସ୍ବାଭିମାନ ର ପ୍ରତୀକ ଭାବେ ପରିଗଣିତ ହେଉଥିବା ମୁକ୍ତ ଗଗନର ସେହି ମୁକ୍ତ ଧ୍ବଜାର ବିଶ୍ଳେଷଣ।