ଗଜଲକ୍ଷ୍ମୀ ମାଆ ତୁ ଗଜବାହିନୀ

ଜୟ ମାଆ ସାଗର ଦୁଲଣୀ ,

ତୋ କୃପା ରହୁ ସର୍ବଦା

ମିଳୁ ଧନ,ବୁଦ୍ଧି, ବିଦ୍ୟା, ଜ୍ଞାନଭଣ୍ଡାର

ମାଆ ମହାମାୟୀ କର ସୁଦୟା । ।

ଜୟ ମାଆ ଗଜଲକ୍ଷ୍ମୀ ତୁହି କମଳା

ତୋ ପ୍ରିୟ ବାହନ ଧବଳ ପେଚା ,

ମାଗୋ ପଦ୍ମାସନୀ,ବିଷ୍ଣୁପାଟରାଣୀ

ଚତୁର୍ଭଜେ ଚରଣେ ତୋର ବନ୍ଦନ

ପଙ୍କଜ ଦେଇ କରୁଛି ବରଣ । ।

ଜୟ ଜୟ ମାଆ ଅନ୍ନପୂର୍ଣ୍ଣା ତୁହି ଲକ୍ଷ୍ମୀ

ତୋ କରୁଣା ଥାଉ ସବୁରି ଉପରେ ,

ବିଶ୍ଵାମିତ୍ରଙ୍କ ଅଭିଶାପରେ

ଦେବରାଜ ଇନ୍ଦ୍ର ହରାଇଲେ ସମ୍ପତ୍ତି

ସର୍ବସ୍ବ ହରାଇ କରିଲେ ଶୋକ । ।

ଜୟ ଜୟ ମାଲୋ ତୁହି ବୀଣାପାଣି

ସାଗର ମନ୍ଥନରୁ ହେଲୁ ତୁହି ସୃଷ୍ଟି

ଫେରାଇ ଦେଲୁ ଇନ୍ଦ୍ରଙ୍କ ବିଭବ,

ମାଆ ମହାଲକ୍ଷ୍ମୀ ମମତାମୟୀ

ତୋ ଦୟା ଥିଲେ ସବୁ ସମ୍ଭବ । ।

ଅଷ୍ଟତଳପଦ୍ମ ଉପରେ ମହାଲକ୍ଷ୍ମୀ

ଧରିଛୁ ମାଆ ସୁନାର କଳସ

ଦୁଇ ପାର୍ଶ୍ବରେ ଦୁଇଟି ଗଜ ସର୍ବଦା

ତମକୁ କରନ୍ତି ଜଳ ଅଭିଷେକ ,

ଆଠଟି ନାମରେ ତୁହି ମାଆ ନାମିତ । ।

ପ୍ରଥମ ନାମ : - ଧନ ଲକ୍ଷ୍ମୀ

ତୁହି ମାଲୋ ଅଟୁ ଧନ ଲକ୍ଷ୍ମୀ ଦେବୀ

ମାଣ ମାଣ ଧାନର ତୁହି ଠାକୁରାଣୀ,

ତୋହରି ପୂଜା କଲେ ମାଆ

ରହେନାହିଁ କେବେ କାହା ଅଭାବ

ପାଏ ଯଶ, ମାନ, ଖ୍ୟାତି ଅର୍ଜନ । ।

ଦ୍ୱିତୀୟ ନାମ : - ଧାନ୍ୟ ଲକ୍ଷ୍ମୀ

ଧାନ୍ୟ ଲକ୍ଷ୍ମୀ ମାଲୋ ତୁହି ନାରାୟଣୀ

ହସ୍ତିନାପୁରେ ଆସି ଥିଲେ ବ୍ୟାସମୁନି

ହସ୍ତ ଯୋଡ଼ି ପଚାରନ୍ତି କୁନ୍ତୀ ,ଗାନ୍ଧାରୀ

କି ବ୍ରତ କରିଲେ ସୁଖସମୃଦ୍ଧି ମିଳେ

ଶାନ୍ତି ,ଧନ,ପୁତ୍ର,ସମ୍ପତ୍ତି ପାଇବା । I

ତୃତୀୟ ନାମରେ : - ବିଦ୍ୟା ଲକ୍ଷ୍ମୀ

ତୋହରି ନାମ ଅଟଇ ଯେ ବିଦ୍ୟା ଲକ୍ଷ୍ମୀ

ସନ୍ତୁଷ୍ଟ କଲେ ମୁର୍ଖ ବି ହୁଏ ପଣ୍ଡିତ ,

ବେଦବ୍ୟାସ କହିଲେ ଶୁଣ ହେ ରାଣୀ

ମହାଲକ୍ଷ୍ମୀଙ୍କ ବ୍ରତ ଅଟେ ସୁଖସମୃଦ୍ଧି

ଯାହା କରିଲେ ଧନସମ୍ପଦ ବଢ଼ିବ । ।

ଚତୁର୍ଥ ନାମରେ : - ବିଜୟ ଲକ୍ଷ୍ମୀ

ମା ତୁହି ବିଜୟର ଲକ୍ଷ୍ମୀ ଠାକୁରାଣୀ

ବ୍ୟାସ ଦେବ କହନ୍ତି ଶୁଣ ଦେଇ ମନ

ଭାଦ୍ରବ ଶୁକ୍ଳ ଅଷ୍ଟମ ସାରିଣ ସ୍ନାନ

ବ୍ରତ କରିବ ପୁରା ଷୋହଳ ଦିନ ,

ଷୋହଳ ଗଣ୍ଠି ପକାଇ ଦେବ । ।

ପଞ୍ଚମ ନାମ : - ଆଦି ଲକ୍ଷ୍ମୀ

ସ୍ମରଣ କରି କହିବ ମାଆ ଆଦି ଲକ୍ଷ୍ମୀ

ହଳଦୀ ପାଣି ଦୁବ ସାଥେ ମିଶାଇ,

ଷୋହଳ ଦିନ ନିଷ୍ଠାରେ ପୂଜା କରିବ

ମାଆଙ୍କ ପ୍ରତିମା ହସ୍ତୀ ଉପରେ ରଖି

ମାଆଙ୍କୁ ଭକ୍ତିରେ ପ୍ରସନ୍ନ କରୁଥିବ । ।

ଷଷ୍ଠ ନାମରେ : - ସନ୍ତାନ ଲକ୍ଷ୍ମୀ

ଜୟ ଜୟ ମାଲୋ ତୁହି ସନ୍ତାନ ଲକ୍ଷ୍ମୀ

ପହଞ୍ଚିଗଲା ଲକ୍ଷ୍ମୀ ବ୍ରତର ଦିନ,

ମହିଳାଙ୍କୁ ଆଣି କୁନ୍ତୀ ଆଉ ଗାନ୍ଧାରୀ

ବୁଝାଇ କହିଲେ ବ୍ରତର ମାହାତ୍ମ୍ୟ

ଗଜଲକ୍ଷ୍ମୀ ବ୍ରତ ପାଳନ କରିଲେ । ।

ସପ୍ତମ ନାମରେ : - ଗଜ ଲକ୍ଷ୍ମୀ

ମାଆ ତୁହି ଅଟୁ ଗଜ ଲକ୍ଷ୍ମୀ ଠାକୁରାଣୀ

ଖୁବ୍ ଶୀଘ୍ର ଆସିଲା ଷୋଡ଼ଶ ଦିନ,

ମାଆ ବସିବେ ହସ୍ତୀରେ ପୂଜା ବେଳେ

ଗାନ୍ଧାରୀଙ୍କ ଶତ ପୁତ୍ର ମାଟିରେ କଲେ

ଏକ ବିରାଟ ସୁନ୍ଦର ଭାବରେ ହାତୀ । ।

ଅଷ୍ଟମ ନାମରେ : - ବୀର ଲକ୍ଷ୍ମୀ

ଧନ୍ୟ ଧନ୍ୟ ମାଲୋ ତୁହି ବୀର ଲକ୍ଷ୍ମୀ

ଏତେ ବିଶାଳ ହାତୀକୁ ଦେଖିବା ପାଇଁ

ସବୁ ମହିଳା ଗଲେ ଗାନ୍ଧାରୀ ପାଖକୁ,

କୁନ୍ତୀଙ୍କ ହସ୍ତୀ ଦେଖିବାକୁ ଗଲେ ନାହିଁ

ଗାନ୍ଧାରୀ ମାତା ବି ନିମନ୍ତ୍ରଣ ଦେଲେନି I l

କୁନ୍ତୀଙ୍କୁ ଭାରି ବାଧିଲା ନିମନ୍ତ୍ରଣ ନ ପାଇ

ବିରହ ଦୁଃଖରେ ଭାଙ୍ଗି ପଡ଼ିଲେ

ପାଞ୍ଚ ପାଣ୍ଡବ ସବୁ କଥା ଶୁଣି କହିଲେ

ଅର୍ଜୁନ କହନ୍ତି ମନ କରନି କଷ୍ଟ ,

ତମେ ବି ପୂଜା କରିବ ହସ୍ତୀରେ । ।

ଅର୍ଜୁନ କହନ୍ତି ଶୁଣ ମାତା ହେ କୁନ୍ତୀ

ଗାନ୍ଧାରୀ ମାତାଙ୍କ ମାଟି ହସ୍ତୀ

ତମ ପୂଜା ପାଇଁ ସ୍ୱୟଂ ଐରାବତ ,

ଲୁହ ପୋଛି ଦେଇ ମାଆ ତମେ

ଲକ୍ଷ୍ମୀ ପୂଜା ପାଇଁ ପ୍ରସ୍ତୁତ ହୁଅ । ।

ଇନ୍ଦ୍ରଙ୍କୁ ମାଗିଲେ ଅଜୁର୍ନ ଐରାବତ

ସନ୍ଧ୍ୟାରେ ଦେବ ହସ୍ତୀ ଆସିଲା,

ତାଙ୍କୁ ଦେଖିବାକୁ ସମସ୍ତେ ଠୁଳ

ଗହଳିରେ ଭରିଲା ପୂଜା ସ୍ଥଳ

ଗାନ୍ଧାରୀ ପାଖରେ କେହି ନାହିଁ । ।

ଗାନ୍ଧାରୀଙ୍କ ମନ ହେଲା ଯେ ଭାରି ଦୁଃଖ

କୁନ୍ତୀ ରଖିଲେ ହସ୍ତୀ ଉପରେ ଲକ୍ଷ୍ମୀ,

ପଙ୍କଜ କୁସୁମ, ଧୂପ, ଝୁଣା ଦେଇ

ମାଆଙ୍କୁ ଭକ୍ତିରେ ସମର୍ପଣ କଲେ

ପଣ୍ଡିତେ ସବୁ ବେଦମନ୍ତ୍ର ପଢ଼ିଲେ । ।

କୁନ୍ତୀ ଓ ମହିଳା ସବୁ ବ୍ରତ ବାନ୍ଧିଲେ

ଐରାବତ ପାଇଁ ବାଢ଼ିଲେ ବ୍ୟଞ୍ଜନ

ସ୍ୱାଦିଷ୍ଟ ଭୋଜନ ସହ ଯମୁନା ପାନ

ଅନ୍ନପୂର୍ଣ୍ଣା ମାଆଙ୍କୁ ପୁରା ପ୍ରସନ୍ନ

ଶେଷରେ ଲକ୍ଷ୍ମୀଙ୍କ ହେଲା ବିସର୍ଜନ । ।