ବାହାଘର ଠିକ ହୋଇ ସାରିଥିବାରୁ ସେଦିନ ସିମନ୍ ଆଉ ତାର ମାଆ ମିଶି ଗହଣା କିଣିବା ପାଇଁ ଦୋକାନକୁ ବୋହୂକୁ ସାଙ୍ଗରେ ନେଇ ଯିବା ପାଇଁ ତାର ଘରକୁ ଗଲେ। ସିମନର ଶାଶୁ ନିଜ ଝିଅ ସ୍ମିତାକୁ ମୁଣ୍ଡିଆ ମାରିବା ପାଇଁ କହିବାରୁ ସେ ଦୂରରୁ ନ ଛୁଇଁ ସିମନକୁ ମୁଣ୍ଡିଆ ମାରିଲା। କାର୍‌ରେ ବସିବାକୁ ଯିବା ବେଳେ ମାଆ ଆଗରେ ଯାଉଥିବା ବେଳେ ସିମନ ସ୍ମିତାକୁ ପାଖରେ ଏକା ପାଇ କହିଲା ,"ତା ହେଲେ ମତେ ଛୁଇଁବନି ନା ,ହଉ ହଉ , ମନ ରହିଲା ଯେ...."

ସ୍ମିତା ଲାଜେଇ ଯାଇ ସେପଟେ ହସି ହସି ଆଖିରେ ଆଖି ନ ମିଶେଇ ପଳେଇଗଲା।

କାର୍‌ରେ ହିରୋ ସିଦ୍ଧାନ୍ତ ଅଭିନୀତ ପ୍ରସିଦ୍ଧ ଗୋଟେ ଓଡ଼ିଆ ଗୀତ ବାଜୁଥିଲା...

"ସୁନେଲି ସୁନେଲି ଖରା ତୋ ମୁହଁ ସାରା ..

କେବେ ଦିଶୁ ଗୋଲାପି ତୁ କେବେ ଦିଶୁ ଗୋରା..

ତୋ ଓଠରୁ ଝରିପଡ଼େ ହସ ଚୁନା ଚୁନା..

ତୋ ଆଖି ମୋ ଆଇନା.."

ସେମାନେ ଦୋକାନରେ ପହଞ୍ଚି ସ୍ମିତା ପାଇଁ ରାଣୀହାର ପସନ୍ଦ କରିଲେ । ଏଥର ସ୍ମିତା ହାରଟି ପିନ୍ଧି ବାରମ୍ବାର ସିମନ୍ ଆଡ଼କୁ ଚାହୁଁଥାଏ ,କିନ୍ତୁ ସିମନ ଜାଣି ଜାଣି ଟିକେ ହଇରାଣ କରିବା ପାଇଁ ଅଲଗା ବ୍ୟସ୍ତ ରହିବା ଭଳି ଦେଖାଉଥାଏ।

ଶାଶୁ ଅନ୍ୟ ଗହଣା ଦେଖିବା ପାଇଁ ସେପଟେ ଯିବାରୁ ସ୍ମିତା ଗୁଣୁଗୁଣୁ ହୋଇ ଅଧା ରହିଥିବା ଗୀତ ଗାଇବାକୁ ଲାଗିଲା..

"ମତେ ତ ଉଡ଼େଇ ନିଏ ପବନ ଝୁଲଣା ..

ଫୁଲ ତ ପିନ୍ଧେଇ ଦିଏ ମୋ ଦେହେ ଗହଣା...

ତୁମେ ମୋର ପାଖେ ଥିଲେ କିଛି ମୁଁ ଚାହେଁନା...."

ଏଥର ସିମନ ହସିହସି ସ୍ମିତାକୁ ଚାହିଁଲା ,ଆଉ ହାରଟି ତାକୁ ମାନୁଛି ବୋଲି ଆଖି ଠାରରେ ଜଣାଇଲା।

ଦୁଇ ଜଣଙ୍କ ଚାରି ଚକ୍ଷୁର ମିଳନରେ ଗୀତଟି ପରିବେଶକୁ ଖୁବ୍ ରୋମାଣ୍ଟିକ କରୁଥିଲା..

"ତୋ ଆଖି ମୋ ଆଇନା ,

ତୋ ଆଖି ମୋ ଆଇନା......"

✍️ ଅଂଶୁମାନ ମହାନ୍ତି

ତା -୭.୧୦.୨୦୨୫ ରିଖ