ଦୁଃଖ ନିକଟକୁ ପତ୍ରଟିଏ

ଶ୍ରଦ୍ଧେୟ ଦୁଃଖ
ତୁମ ଦ୍ୱାରା ଅତିଷ୍ଠ ହୋଇ ନୁହେଁ
ବରଂ ତୁମ କିଛି କଥାରେ ପରିପୃଷ୍ଠ ଓ
କିଛି କଥାରେ ସନ୍ତୁଷ୍ଟ ହୋଇ
ଜୀବନର ଭଙ୍ଗା ଗଢ଼ା ନୀତି ଅନୁସାରେ
ମୁଁ ତୁମକୁ ଏ ପତ୍ରଟି ଲେଖୁଛି
ହଁ ମୁଁ ଜାଣିଛି.........
ତୁମେ ମୋତେ ବହୁତ୍ ଭଲପାଅ
ହଁ ନିଜଠାରୁ ବି ଅଧିକ ମୋତେ ଗୁରୁତ୍ଵ ଦିଅ
ସେଥିପାଇଁ ତ ଏତେ ଅଣଦେଖା କରିବା ସତ୍ତ୍ୱେ ବି
ମୋ ପାଖକୁ ତୁମେ ଚାଲି ଆସ ଆଉ
କହିଦିଅ ଯେ ମୁଁ ତୁମକୁ ବହୁତ୍ ଭଲ ପାଏ ବୋଲି
ମୁହୂର୍ତ୍ତେ ବି ତୁମ ବିନା ରହି ପାରିବିନି ବୋଲି
ଏ ନୀରବ ଚାହାଣୀକୁ ଦେଖି
ଏ ଚୁପଚାପ୍ ଚେହେରାକୁ ଦେଖି
ତୁମେ ବୋଧେ ମୋ ପ୍ରେମରେ ପଡ଼ି ଯାଇଛ।
ହଁ ମୁଁ ବୁଝି ପାରିଛି ତୁମ ଭଲ ପାଇବାକୁ
ବହୁତ୍ କିଛି ଶିଖି ସାରିଛି ତୁମ ଠାରୁ
ଅପେକ୍ଷା, ଧୈର୍ଯ୍ୟ ଓ ଅଦୃଶ୍ୟ ସନ୍ନିହିତ ଭଲ ପାଇବା
କିନ୍ତୁ ମୋର ଗୋଟିଏ ନମ୍ର ଅନୁରୋଧ....
ତୁମେ ଅଳ୍ପ ସମୟ ପାଇଁ ଦୂରେଇ ଯାଅ ମୋ ଠାରୁ
କାରଣ ତୁମର ଏ ଅବିରତ ପ୍ରେମ
ମୋ ସ୍ବପ୍ନରେ ଅନେକ ବାଧା ସୃଷ୍ଟି କରୁଛି
କିନ୍ତୁ ହଁ ମୁଁ ତୁମେ ମୋ ଠାରୁ ଦୂରେଇ ଗଲେ ବି
ତୁମର ପ୍ରେମକୁ ମୁଁ ପ୍ରତିକ୍ଷଣ ଅନୁଭଵ କରିବି
ତୁମର ପ୍ରତିଟି ଶିକ୍ଷାକୁ ସ୍ମରଣ କରି
ଅପେକ୍ଷା କରିବି ଏକ ଆଲୋକମୟ ଆଗାମୀକୁ........

ଇତି ,
ତୁମ ଶ୍ରଦ୍ଧେୟା ପୂଜା

ପୂଜା ସା
ସ୍ନାତକୋତ୍ତର ଓଡ଼ିଆ ବିଭାଗ ପ୍ରଥମ ବର୍ଷ
ମା ମାଣିକେଶ୍ଵରୀ ବିଶ୍ଵବିଦ୍ୟାଳୟ ଭବାନୀପାଟଣା,କଳାହାଣ୍ଡି ।