ନାରୀ ଜୀବନ : ଏକ ଅବଲୋକନ

ମହାନ ସଂସ୍କୃତି, ଐତିହ୍ୟ ଓ ପାରମ୍ପାରିକ ମୂଲ୍ୟବୋଧରେ ପରିପୂର୍ଣ୍ଣ ଏହି ସଂସାରରେ ନାରୀ ଜୀବନଟି ଏକ ଅଦ୍ଭୁତ ଗାଥା। ନାରୀ ଏହି ଜଗତର ଅବିଭାଜ୍ୟ ଅଂଶ ଏବଂ ସମାଜର ଆଧାର। ନାରୀ ଅନ୍ତର୍ଧାରଣାର ମୂର୍ତ୍ତି, ସେ ମମତାର ପ୍ରତିମୂର୍ତ୍ତି, ସେ ଉଦାରତାର ଦୂତୀ। ନାରୀ ହେଉଛି ଜଗତର ଅଖଣ୍ଡ ଶକ୍ତି, ସେ ସର୍ବସଂହା। ସମାଜର ଅଖଣ୍ଡ ଉନ୍ନତିର ଅଖଣ୍ଡ ପ୍ରେରଣା ଏବଂ ସଂସାରର ମୂଳ ଆଧାର ହେଉଛି ନାରୀ। ନାରୀ ହେଉଛି ଜୀବନ ଦାୟିନୀ, ପ୍ରେମ ଓ ସମର୍ପଣର ଜୀବନ୍ତ ମୂର୍ତ୍ତି। ନାରୀ ବିନା ଏ ପୃଥିବୀ ଅନ୍ଧକାରମୟ ଏଵଂ ନିର୍ଜୀବ ସଦୃଶ।ନାରୀ ଜୀବନ ହେଉଛି ସଂଘର୍ଷ, ଆଶା, ଏବଂ ସାଧନାର ଏକ ରୂପ। ସେ ଜନ୍ମରୁ ଆରମ୍ଭ କରି ଜୀବନର ଅନ୍ତ ପର୍ଯ୍ୟନ୍ତ କେବେ ମାତୃଭାବେ, କେବେ ଭଗିନୀ ଭାବେ, କେବେ କାହାର ଜୀବନସାଥୀ ଭାବେ ନିଜକୁ ପ୍ରମାଣିତ କରିଥାଏ ଏବଂ ଏହି ଗତିଶୀଳ ଜୀବନର ଗତିପଥରେ ସେ ଅନେକ ବିପଦ, ଅନ୍ୟାୟ, ଅତ୍ୟାଚାରର ଶିକାର ହୋଇଥାଏ। କିନ୍ତୁ,ଏହି ମହାନ ଭୂମିକା ବହନ କରୁଥିବା ବେଳେ ସେ ଅନେକ ଅନ୍ୟାୟ, ଅବହେଳା ଓ ଅପମାନର ଶିକାର ହୋଇଥାଏ।

ନାରୀ ଜୀବନର ମହତ୍ତ୍ଵ ଓ ସଂଘର୍ଷ
_________________________
ଜଣେ ନାରୀ ତାହାର ଜୀବନର ଆରମ୍ଭ କରେ ଜଣେ ଝିଅ ରୂପରେ। ଘରେ ଝିଅଟିଏ ଜନ୍ମ ହେଲେ ତା'କୁ ଅନେକ ସ୍ଥାନରେ ଅଭିଶାପ ଭାବରେ ଗ୍ରହଣ କରାଯାଏ। ଯଦି ଓ ନାରୀ ମାନେ ହିଁ ଏହି ସଂସାରକୁ ଜନ୍ମ ଦେଇଥାନ୍ତି, ତଥାପି ସେମାନେ ଅନେକ ଅସୁବିଧା, ଅନ୍ୟାୟ, ଓ ଅବମାନନାର ଶିକାର ହୋଇଥାନ୍ତି। ଜଣେ ଝିଅ ଯେତେବେଳେ ବଡ଼ ହୋଇଯାଏ ସେତେବେଳେ ସେ ଅନେକ ସମସ୍ୟା, ସଂଘର୍ଷର ପଥକୁ ଗମନ କରେ,ନିଜ ଶିକ୍ଷା, ନିଜ ସ୍ଵାଧୀନତା, ନିଜ ସ୍ବପ୍ନ ପାଇଁ ସେ ସଂଗ୍ରାମ କରେ। ତଥାପି ତାହାର ଶିକ୍ଷାର ରାସ୍ତାରେ କଣ୍ଟା ସାଜେ ଏ ସମାଜରେ ବିବାହ ବନ୍ଧନ।

ବିବାହ ପରେ ନାରୀର ଏକ ନୂଆ ଜୀବନ ଆରମ୍ଭ ହୁଏ। ସେ ଏକ ନୂଆ ପରିବାର, ନୂଆ ପରିବେଶକୁ ଗ୍ରହଣ କରି ନିଜ ଅସ୍ତିତ୍ଵକୁ ସଂଘର୍ଷ ମଧ୍ୟରେ ବଞ୍ଚେଇ ରଖିବା ପାଇଁ ଚାହେଁ। ସେ ଜଣେ ଜୀବନସାଥୀ ଭାବରେ, ଜଣେ ମା ଭାବରେ, ଜଣେ ଗୃହିଣୀ ଭାବରେ ନିଜକୁ ପ୍ରମାଣିତ କରିବାକୁ ଲାଗେ। ତା'ପରେ ବି ସେ ଅନେକ ଅବହେଳା, ଅନ୍ୟାୟ, ଓ ଅପମାନର ଶିକାର ହୁଏ। ଆମର ଏହି ସମାଜରେ ଅଧିକାଂଶ ଦେଖାଯାଏ ଯେ, ଜଣେ ନାରୀ ତା'ର ଜୀବନକୁ ନିଜ ଇଚ୍ଛା ଅନୁଯାୟୀ ଜୀବନ୍ତ ରଖି ପାରିନଥାଏ। ସେ ଅନ୍ୟମାନଙ୍କ ଅପେକ୍ଷା ଓ ନିର୍ଦ୍ଦେଶ ଅନୁଯାୟୀ ନିଜର ଜୀବନକୁ ବିତେଇ ଦେଇଥାଏ।

ଏହି ଅବସ୍ଥା ଆଜି ପର୍ଯ୍ୟନ୍ତ ବଦଳି ନାହିଁ। ଅନେକ ସ୍ଥାନରେ ନାରୀମାନେ ଏବେ ବି ଶିକ୍ଷା ଓ ସ୍ଵାଧୀନତାର ଅଭାବରେ ନିଜର ଜୀବନକୁ ବିତେଇ ଦେଉଛନ୍ତି। ଗୃହହିଂସା, ଅପମାନ, ଲାଞ୍ଛନା ,ଅପହରଣ, ବାଲ୍ୟବିବାହ ଏହିପରି ଅନେକ ଅନ୍ୟାୟ ଆଜି ନାରୀମାନଙ୍କ ସଫଳତାର ରାସ୍ତାରେ ବାଧା ଦେଉଛି।
ନାରୀମାନେ ଆଜି ବି ଅନେକ ଅଞ୍ଚଳରେ ଶିକ୍ଷାର ଅଭାବ, ବାଲ୍ୟ ବିବାହ, ଗୃହହିଂସା, ଅନ୍ୟାୟ ଓ ଯୌତୁକର ନିଆଁରେ ଜଳି ଅନେକ ଉପେକ୍ଷାର ଶିକାର ହେଉଛନ୍ତି। ଏହି ଅନ୍ୟାୟକୁ ଅବସାନ କରିବା ପାଇଁ ଆମ୍ଭେ ମାନେ ଏକ ଶକ୍ତିଶାଳୀ ସମାଜ ଗଠନ କରିବା ନିହାତି ଆବଶ୍ୟକ, ଯେଉଁଠାରେ ପୁରୁଷ ଓ ନାରୀକୁ ସମାନ ଅଧିକାର ପ୍ରଦାନ କରାଯାଉଥିବ।
ନାରୀର ଜୀବନ ଅତ୍ୟନ୍ତ କଷ୍ଟକର ଏବଂ ସଂଘର୍ଷମୟ। ମାନବ ସମାଜରେ ଅନେକ ସମୟରେ ନାରୀ ମାନଙ୍କୁ ନିମ୍ନ ଦୃଷ୍ଟିଭଙ୍ଗିରେ ଦେଖାଯାଏ। ଯେଉଁ ନାରୀ ଏହି ସଂସାରକୁ ନୂଆ ଜୀବନ ଦେଇଥାଏ, ସେହି ନାରୀ ଆଜି ଅନ୍ୟାୟର ଶିକାର ହେଉଛି କିନ୍ତୁ ଏବେ ସମୟ ଆସିଛି ନାରୀମାନଙ୍କୁ ଅଗ୍ରସର ହେବାକୁ ପଡ଼ିବ।

ପୁରାତନ ଯୁଗରେ ନାରୀର ଅବସ୍ଥା
________________________

ପୁରାତନ ଯୁଗରେ ନାରୀମାନେ ଅଧିକ ଅବହେଳିତ ଓ ଉପେକ୍ଷିତ ଥିଲେ। ସେମାନଙ୍କର ଜୀବନ କେବଳ ଘର, ପରିବାର ଓ ସଂସାର ମଧ୍ୟରେ ସୀମିତ ଥିଲା। ଶିକ୍ଷା, ସ୍ୱାଧୀନତା, ଅଧିକାର ଓ ନ୍ୟାୟ ପାଇଁ ସେମାନେ ଏକ ଦୀର୍ଘ ସଂଘର୍ଷ କରୁଥିଲେ। ନାରୀମାନଙ୍କୁ ପୂର୍ବ କାଳରେ କେବଳ ଘରର ଚାରି କାନ୍ଥରେ ବନ୍ଦୀ କରି ରଖା ଯାଉଥିଲା ଏବଂ ପୁରୁଷମାନେ ସମସ୍ତ ଅଧିକାର ଦାବି କରୁଥିଲେ। ଏସବୁ ପରିବର୍ତ୍ତେ ବି ନାରୀମାନେ କେବେ ନିଜ ଆତ୍ମଶକ୍ତିକୁ ହରେଇ ନାହାନ୍ତି ଏବଂ ନିଜର ଅଧିକାର ପାଇବା ପାଇଁ ଯୁଗେ ଯୁଗେ ଲଢେଇ କରି ଆସୁଛନ୍ତି।

ନାରୀମାନଙ୍କ ଉନ୍ନତି ଓ ଅବଦାନ
_______________________

ବୈଦିକ ଯୁଗରୁ ଆରମ୍ଭ କରି ଆଜି ପର୍ଯ୍ୟନ୍ତ ନାରୀ ଜୀବନରେ ଅନେକ ପରିବର୍ତ୍ତନ ଦେଖିବାକୁ ମିଳୁଛି। ପୂର୍ବରୁ ନାରୀମାନେ ଘର ମଧ୍ୟରେ ବନ୍ଦୀ ରହୁଥିଲେ, କିନ୍ତୁ ଆଜି ସେମାନେ ଶିକ୍ଷା, ରୋଜଗାର, ରାଜନୀତି, ଓ ବିଭିନ୍ନ କ୍ଷେତ୍ରରେ ନିଜ ପରିଚୟ ସ୍ଥାପନ କରୁଛନ୍ତି।ପୁରୁଣା ମାନସିକତା ଅନୁଯାୟୀ, ନାରୀମାନେ କେବଳ ଘର ଓ ଘରୋଇ କାମ କରିବା ପାଇଁ ହିଁ ଏଇ ଜଗତରେ ଆସିଛନ୍ତି।କିନ୍ତୁ ଆଜିର ଆଧୁନିକ ସମୟରେ ନାରୀମାନେ ଏହି ଧାରଣାକୁ ଭାଙ୍ଗି ଦେଇଛନ୍ତି ବର୍ତ୍ତମାନ ଯୁଗରେ ନାରୀମାନେ ଅନେକ କ୍ଷେତ୍ରରେ ନିଜ ଅବଦାନ ରଖୁଛନ୍ତି। ସେମାନେ ଏବେ ଡାକ୍ତର, ଅଧ୍ୟାପିକା, ପ୍ରଶାସକ, ବୈଜ୍ଞାନିକ, ମିଡିଆ ଅଫିସର, ପ୍ରତିରକ୍ଷା ବାହିନୀ, ଦୂରଦର୍ଶନ ଏବଂ ବ୍ୟବସାୟ ଜଗତରେ ଅଗ୍ରଣୀ ଭୂମିକା ବହନ କରିଛନ୍ତି। ଆଜିର ନାରୀ ମାନେ ଏକ ସ୍ୱାଧୀନ, ସୁଶିକ୍ଷିତ ଓ ଆତ୍ମନିର୍ଭର ଜୀବନ ଯାପନ କରୁଛନ୍ତି। ଏହା ଏକ ନୂଆ ଆଶା ଓ ଉଜ୍ଜ୍ୱଳ ଭବିଷ୍ୟତର ସଂକେତ।

ଉପସଂହାର
____________
ସମାଜର ଉନ୍ନତି ପାଇଁ ନାରୀ ଏକ ଅବିଚ୍ଚିନ୍ନ ଅଂଶ। ତେଣୁ ନାରୀମାନଙ୍କୁ ଅବହେଳା କିମ୍ବା ଉପେକ୍ଷା କରିବା ଏକ ମହାପାପ ସମାନ। ନାରୀ ବିନା ଜଗତର କୌଣସି ଅସ୍ତିତ୍ଵ ନାହିଁ।ତେଣୁ ନାରୀମାନଙ୍କୁ ସମ୍ମାନ, ସୁଯୋଗ ଏବଂ ସ୍ୱାଧୀନତା ଦେବା ଆମ ସମସ୍ତଙ୍କର ପ୍ରମୁଖ ଦାୟିତ୍ୱ। ନାରୀ ଆତ୍ମନିର୍ଭଶୀଳ ହେଲେ ଆମ ସମାଜ ଏକ ଉଜ୍ଜଳ ଅଭିମୁଖେ ଗତି କରିବ। ନାରୀ ଶକ୍ତିକୁ ଉତ୍ସାହିତ କରିବା ଆମର ପ୍ରଧାନ କର୍ତ୍ତବ୍ୟ ହେବା ଉଚିତ୍।

ଯେଉଁ ସମାଜ ନାରୀମାନଙ୍କୁ ସମ୍ମାନ ଦେଇଥାଏ
ସେହି ସମାଜ ଅବଶ୍ୟ ଉନ୍ନତି କରିଥାଏ।
ନାରୀ ଯେଉଁଠି ସଶକ୍ତ, ସେଠି ସମାଜ ଉନ୍ନତ।
ନାରୀ ଯେଉଁଠି ସୁଯୋଗପ୍ରାପ୍ତ, ସେଠି ଅଗ୍ରଗତି ନିଶ୍ଚିତ।
ନାରୀ ଜୀବନ ହେଉଛି ଉଜ୍ଜ୍ୱଳ ପ୍ରଭାତର ଅଖଣ୍ଡ ରଶ୍ମି,
ଯେଉଁଥିରେ ନିହିତ ଅଛି ଜଗତକୁ ଅଗ୍ରସର କରିବାର ଶକ୍ତି।

ନାରୀ ଜୀବନ: ଏକ ଅବଲୋକନ

ନାରୀ ଜୀବନ: ଏକ ଅବଲୋକନ