ଜୀବନ କେବଳ ଉତ୍ସବର ମେଳା ନୁହେଁ, ଏହା ରଣକ୍ଷେତ୍ର ମଧ୍ୟ। ଏହି ରଣ ଭୂମିରେ ଆମକୁ କେତେବେଳେ ଏଭଳି କଠୋର ପରିସ୍ଥିତିର ସମ୍ମୁଖୀନ ହେବାକୁ ପଡ଼େ, ଯାହାର ଆଘାତ ଏତେ ଗଭୀର ହୋଇଥାଏ ଯେ ମନୁଷ୍ୟ ନିଜକୁ ସମ୍ପୂର୍ଣ୍ଣ ବାଧ୍ୟ ଓ ନିସ୍ସହାୟ ଅନୁଭବ କରେ। ମନ ଭାଙ୍ଗି ଯାଏ, ଆଖି ଲୁହ ଧାରା ବହାଏ। କିନ୍ତୁ ଏହି ମୁହୂର୍ତ୍ତରେ ଆମେ ଯେଉଁ ପଥ ବାଛୁ, ତାହାହିଁ ଆମର ସାରା ଜୀବନକୁ ବଦଳାଇ ଦେଇଥାଏ। ଜୀବନର ଏକ ମହତ୍ତ୍ୱପୂର୍ଣ୍ଣ ସତ୍ୟ ହେଉଛି ଯେ, ଅପ୍ରିୟ ଘଟଣାଗୁଡିକ ଜୀବନର ଅଟଳ ଅଂଶ। ସେଗୁଡିକ ଆସେ ଆଉ ଆମର ମନୋବଳକୁ ପରୀକ୍ଷା କରି ଚାଲିଯାଏ, ଯେପରି ଘନ ମେଘ ଆକାଶକୁ ଘୋଡ଼ାଇ ଦେଇ ଚାଲିଯାଏ।

ଏଭଳି ସଙ୍କଟମୟ ମୁହୂର୍ତ୍ତରେ ଆମକୁ ବୁଦ୍ଧିମତାର ସହିତ କାର୍ଯ୍ୟ କରିବା ଜରୁରୀ। ଆମର ଜ୍ଞାନ ହେଉଛି ଏକ ଶକ୍ତିଶାଳୀ ଆଲୋକସ୍ତମ୍ଭ, ଯାହା ଅନ୍ଧକାରରେ ଆମକୁ ସଠିକ୍ ପଥ ଦେଖାଏ। ଯେ କୌଣସି ମର୍ମାନ୍ତିକ ଦୁଃଖଦାୟକ ଘଟଣାର ପରିଣାମରୁ ମୁକ୍ତି ପାଇବାର ଏକମାତ୍ର ସାଧନ ହେଉଛି ଏହି ଜ୍ଞାନ। ଜ୍ଞାନ ଆମକୁ ଶିଖାଏ ଯେ, ଆମେ ନିଜର ମନୋଭାବ, ଆଚରଣ ଓ ପ୍ରତିକ୍ରିୟାକୁ ନିୟନ୍ତ୍ରଣ କରିପାରିବା, ବାହ୍ୟ ପରିସ୍ଥିତିକୁ ନୁହେଁ। ଏବଂ ଯେତେବେଳେ ଆମେ ନିଜକୁ ନିୟନ୍ତ୍ରଣ କରିବା ଶିଖିଯାଉ, ସେତେବେଳେ ଦେଖିବାକୁ ପାଇବେ ଯେ ପରିସ୍ଥିତି ଆପେ ଆପେ ଆମର ଅନୁକୂଳ ହୋଇଯାଉଛି।

ଏହି ଅସହାୟତାର ଗଭୀର ଅନ୍ଧକାର ମଧ୍ୟରେ ଆମର ଭଗବାନଙ୍କ ଦୟା ଉପରେ ପୂର୍ଣ୍ଣ ବିଶ୍ୱାସ ରଖିବା ଏକ ସାହାଯ୍ୟକାରୀ ହାତଯୋଡ଼ି ପରି। ଆମର ଜ୍ଞାନ ତ ଅତି ସୀମିତ, ସମୁଦ୍ରର ଏକ ବିନ୍ଦୁ ସଦୃଶ। ଆମେ ଭଗବାନଙ୍କ ବିଶାଳ କାର୍ଯ୍ୟପ୍ରଣାଳୀର ଗୁପ୍ତ ରହସ୍ୟକୁ କେବେ ବୁଝିପାରିବା ନାହିଁ। ଆଜି ଆମେ ଯାହାକୁ ଏକ ଭୟଙ୍କର ଦୁର୍ଘଟଣା ଭାବି ଦୁଃଖୀ ହେଉଛି, ସେଇଟି ଆମ ଭଲ ପାଇଁ ହୋଇଥାଇପାରେ। ବୃକ୍ଷର ଡାଳ କାଟିବା ଯେପରି ତାକୁ ଆହୁରି ଶକ୍ତିଶାଳୀ ଓ ସମୃଦ୍ଧ କରିଦେଇଥାଏ, ସେହିପରି ଜୀବନର ଏହି କଠୋର ଛେଦନ ଆମ ଚରିତ୍ରକୁ ମଜଭୁତ ଓ ପରିପକ୍ୱ କରୁଥାଇପାରେ।

ଆମେ ଏହା ବୁଝିବା ଜରୁରୀ ଯେ, ଆମର ଏହି ସ୍ଥୂଳ ଓ ସୀମିତ ବୁଦ୍ଧି ଦ୍ୱାରା ପରିସ୍ଥିତିର ପ୍ରକୃତ ଏବଂ ଗଭୀର କାରଣକୁ ଜାଣିବା ସମ୍ଭବ ନୁହେଁ। ତେଣୁ ଏଥିରେ ନିଶ୍ଚୟ କିଛି ନା କିଛି ମଙ୍ଗଳ ନିହିତ ଅଛି ବୋଲି ଧାର୍ଯ୍ୟ କରିବା ଉଚିତ। ବିପଦର ସମୟରେ ଆମକୁ ଭଗବାନଙ୍କ ନ୍ୟାୟ ଓ ଅନନ୍ତ ଦୟା ଉପରେ ଆହୁରି ଦୃଢ଼ ବିଶ୍ୱାସ ରଖିବା ଉଚିତ। ଆମେ ଭୟଭୀତ ହେବା ଉଚିତ ନୁହେଁ ଏବଂ ବିପଦ ଟଳିଯାଏ ଯାଏଁ ଅଚଳ ଧୈର୍ଯ୍ୟ ଧାରଣ କରିବା ଉଚିତ। ଯେପରି ଏକ ବଡ଼ ବୃକ୍ଷ ପ୍ରଚଣ୍ଡ ଝଡ଼ରେ ମଧ୍ୟ ନଭସ୍ଥଳୀ ଆଡ଼କୁ ମୁଣ୍ଡ ଟେକି ଠିଆ ହୋଇରହେ, ଆମକୁ ମଧ୍ୟ ଧୈର୍ଯ୍ୟ ହୋଇ ସହିଷ୍ଣୁତା ରଖିବାକୁ ହେବ।

ସନ୍ତୋଷର ଶାସ୍ତ୍ରୀୟ ଉପଦେଶ ଏଭଳି କଷ୍ଟଦାୟକ ସମୟ ପାଇଁ ହିଁ ରଚିତ। ସନ୍ତୋଷର ଅର୍ଥ ନିଜର କର୍ତ୍ତବ୍ୟକୁ ଅବହେଳା କରିବା ନୁହେଁ, ବରଂ ଉପୁଜିଥିବା ପରିସ୍ଥିତିରେ ମନକୁ ବ୍ୟତିବ୍ୟସ୍ତ ଓ ଅସ୍ଥିର ନ କରିବା। ସନ୍ତୋଷ ହେଉଛି ଏକ ଅବସ୍ଥା ଯେଉଁଥିରେ ବାହ୍ୟ ଘଟଣା ଆମର ଆଭ୍ୟନ୍ତରୀଣ ଶାନ୍ତିକୁ ଛିନ୍ନଭିନ୍ନ କରିପାରେ ନାହିଁ। ସନ୍ତୋଷ ହେଉଛି ଏକ ସୁରକ୍ଷା କବଚ। ସନ୍ତୋଷର ଆଲୋକରେ ପରିସ୍ଥିତିର ତୀବ୍ରତା ଓ ଭୟଙ୍କରତା ଅଧା ହୋଇଯାଏ। ଯେତେବେଳେ ଆମେ ମନ୍ଥର ହୋଇ ଚିନ୍ତା କରୁ, ଦେଖୁ ଯେ ଆମର ଦୁଃଖର ଅଧାଭାଗ କେବଳ ଆମର ଅତ୍ୟଧିକ ଚିନ୍ତା ଓ ଅହେତୁକ ଭୟରୁ ସୃଷ୍ଟି ହୋଇଥାଏ।

ତେଣୁ, ଜୀବନର ଚାଲିବା ପଥରେ ଆସିଥିବା ପ୍ରତ୍ୟେକ ବାଧା, ପ୍ରତ୍ୟେକ ବିପର୍ଯ୍ୟୟକୁ ଏକ ପରୀକ୍ଷା ଭାବରେ ଗ୍ରହଣ କରିବା ଉଚିତ। ଏହି ପରୀକ୍ଷାରେ ଆମର ମନୋବଳ, ଆମର ଧୈର୍ଯ୍ୟ ଓ ଆମର ଆତ୍ମବିଶ୍ୱାସକୁ ଜିତ କରିବାର ଏକ ସୁଯୋଗ ରୂପେ ଦେଖିବା ଉଚିତ। ଯେଉଁ ବ୍ୟକ୍ତି କଠୋର ପରିସ୍ଥିତିରେ ମଧ୍ୟ ନିଜର ମନୋବଳ ଉଚ୍ଚ ରଖେ, ସେ ଜୀବନର ଯୁଦ୍ଧରେ ବିଜୟୀ ହୁଏ। ଜୀବନର ସଫଳତା ବାହ୍ୟ ପରିସ୍ଥିତି ଉପରେ ନିର୍ଭର କରେ ନାହିଁ, ବରଂ ଆମର ଆଭ୍ୟନ୍ତରୀଣ ମନୋବଳ, ଆମର ଦୃଷ୍ଟିକୋଣ ଉପରେ ନିର୍ଭର କରେ। ଆମେ ଯଦି ଦୃଢ଼ ମନୋବଳ ରଖିପାରିବା, ତାହାହେଲେ କୌଣସି ପରିସ୍ଥିତି ଆମକୁ ପରାସ୍ତ କରିପାରିବ ନାହିଁ। ଆମର ମନୋବଳ ହିଁ ଆମକୁ ଜୟୀ କରାଏ, ପରିସ୍ଥିତି ନୁହେଁ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ପରିସ୍ଥିତି ନୁହେଁ, ମନୋବଳ ନିର୍ଣ୍ଣୟ କରେ ଜୀବନ

ପରିସ୍ଥିତି ନୁହେଁ, ମନୋବଳ ନିର୍ଣ୍ଣୟ କରେ ଜୀବନ