ପ୍ରେମ କ’ଣ ?

ପ୍ରେମ ଅଟେ ଅତି ଶକ୍ତିଶାଳୀ ମତି

ଭାବ ସରଳ ଆନନ୍ଦ ।

ଅଟେ ଆକର୍ଷିତା ଭାବପ୍ରବଣତା

ହୃଦୟେ ନଥାଏ ଛନ୍ଦ ।।

ମାନସିକ ଚିନ୍ତା ଶାରୀରିକ ବ୍ୟଥା

ଭାଙ୍ଗିଦିଏ ଅବସାଦ ।

ସ୍ନେହ ଶ୍ରଦ୍ଧା ଦୟା କ୍ଷମା ସହିଷ୍ଣୁତା

ମନରେ ହରଷ ସ୍ୱାଦ।।

ପରିବାର ପ୍ରେମ ସବୁଠୁ ଉତ୍ତମ

ସର୍ବଦା ବନ୍ଧୁତ୍ବପୂର୍ଣ୍ଣ ।

ପ୍ରେମ ଅଟେ ଅନ୍ତ- ରଙ୍ଗ ପ୍ରତିବଦ୍ଧ

ଉତ୍ସାହ ତା ଉପାଦାନ।। (ଛନ୍ଦ -ବଙ୍ଗଳାଶ୍ରୀ)

ଉଦ୍ଧୃତି ୧:- प्रेम ईश्वरस्य महत्त्वमपारितोषिकमस्ति ।

ଅର୍ଥ – ପ୍ରେମ ଈଶ୍ୱରଙ୍କର ସବୁଠାରୁ ବଡ ଉପହାର ଅଟେ ।

ପିତାମାତା ଠାରେ ଭଗ୍ନୀ ସହୋଦରେ ସୁହୃଦ ସଖା ସଙ୍ଗତେ ,

ସ୍ନେହ ଶ୍ରଦ୍ଧା ଭକ୍ତି ଭରିଥିବା ପ୍ରୀତି ଭାବ ଘେନିଅଛୁ ସତେ ।

ପ୍ରେମ ମୟ ଭଗବାନ।

ପ୍ରେମ ଅଟେ ତାଙ୍କ ଅବଦାନ ।।(ଛନ୍ଦ – ମାଳିନୀ )

ଉଦ୍ଧୃତି ୨ :- प्रेमणा हृदयानि जयति ।

ଅର୍ଥ – ପ୍ରେମ ଦ୍ୱାରା ହୃଦୟ ଜିଣିହୁଏ ।

ସରଳ ହୃଦୟ ମନରେ ପ୍ରେମ ବନ୍ଧୁତା ଭରି ।

ସ୍ନେହେ ଅବିରତ ବର୍ଷାରେ ପ୍ରୀତି ଶରଧା ଧରି ।।

ସନ୍ତୋଷ ଭାବରେ ତେଜିଣ ମନୁ ଶତ୍ରୁତା ଭୟ ।

ପ୍ରେମେ କରି ହୁଏ ଶତ୍ରୁର ହୃଦୟକୁ ବିଜୟ ।। (ଛନ୍ଦ – ରାମକେରୀ)

ଉଦ୍ଧୃତି ୩:-Love does not claim possession but give freedom.(Rabindra Nath Tagore)

ଅର୍ଥ – ପ୍ରେମ ଅଧିକାର ଦାବି କରେନାହିଁ ବରଂ ସ୍ୱାଧୀନତା ପ୍ରଦାନ କରେ । (ରବିନ୍ଦ୍ର ନାଥ ଠାକୁର)

ପ୍ରେମ ଅଟଇ ଅସୀମ ସୌନ୍ଦର୍ଯ୍ୟରେ ପୂର୍ଣ୍ଣ।

ସଦା ତୋଷିଥାଏ ମନ କରିଣ ସ୍ୱାଧୀନ।।

ମାଗେ ନାହିଁ ଅଧିକାର ନଥାଏ ବିବାଦ ।

ଯହିଁ ଭରପୂର ଥାଏ ହର୍ଷମୟ ସ୍ୱାଦ ।।

ଅମୂଲ୍ୟ କିରୀଟ ବହେ ସର୍ବଦା ମହକେ ।

ହୃଦ କାଞ୍ଚନର ମୋତି ପ୍ରେମରେ ଚମକେ ।।(ଛନ୍ଦ – ପୁରାଣ ବୃତ୍ତି/ଚଉଦ ଅକ୍ଷର/ଆଶାବରୀ)

ଉଦ୍ଧୃତି ୪:- ପ୍ରେମ ତ୍ୟାଗ ଓ ନିଃସ୍ଵାର୍ଥପର ହେବା ଜରୁରୀ ।

ଥିଲେ ଭାବନା ନିଃସ୍ଵାର୍ଥ । ସେହିଠାରୁ ପ୍ରେମ ଜାତ ।।

ନବୀନ ପଲ୍ଲବୀ ପରି । ଉଠଇ ଜାଗ୍ରତ କରି ।।

ତ୍ୟାଗ ରୁ ପ୍ରେମ ଉଦ୍ଭବ । ଅଟେ ସୌନ୍ଦର୍ଯ୍ୟ ବିଭବ ।।

ନଥିଲେ ଛନ୍ଦ କପଟ । ପ୍ରେମ ବନ୍ଧନ ଅତୁଟ

ଶରଧା ପ୍ରୀତି ଚନ୍ଦନେ । ପ୍ରେମ ମୟ ଭଗବାନେ ।।( ଛନ୍ଦ – ଅଷ୍ଟାକ୍ଷରୀ )

ଉଦ୍ଧୃତି ୫ :- Love is a space for refuge for pain and for growth .(Olivia)

ଅର୍ଥ – ପ୍ରେମ ହେଉଛି ଆଶ୍ରୟ, ଯନ୍ତ୍ରଣା ଏବଂ ବୃଦ୍ଧି ପାଇଁ ଏକ ସ୍ଥାନ ।

ପ୍ରେମ ଏକ ନାବ ଉଷ୍ମତା ଜଳେ ।

ଥାଏ ଶୁଭାଶୁଭେ ଥାଏ ଜଟିଳେ ।।

ବୁଡିଯିବା ଶଙ୍କା ଥାଏ ମନରେ।

ବୁଡ଼ିଗଲେ ଆଉ ଉଠି ନପାରେ ।।

ଏହି ପ୍ରେମ ନାବ ଦିଏ ଆଶ୍ରୟ।

କେବେ ଯନ୍ତ୍ରଣାର ଦିଅଇ ଭୟ ।।

ସାହସେ ପରଖି ନାବକୁ ଧରି ।

କ୍ଳେଶ ମୟ ନଦୀ ହୋଇବା ପାରି ।। (ଛନ୍ଦ – ଚକ୍ରକେଳି)

ଉଦ୍ଧୃତି ୬:- Love is composed of single soul inhabiting two bodies. (Aristotle)

ଅର୍ଥ- ପ୍ରେମ ହେଉଛି ଦୁଇଟି ଶରୀର ରେ ଥିବା ଏକକ ପ୍ରାଣ।

ଦୁଇପବିତ୍ର ହୃଦୟ ମନ୍ଦିରେ ପ୍ରାଣ।

ଦୁଇ ପବିତ୍ର ଆତ୍ମା କୁ କରେ ମିଶ୍ରଣ।।

ପ୍ରେମ ଅଟେ ସେ ସ୍ୱରୂପ କୁଭାବ ନାହିଁ।

ଦୁଇଟି ଅଭୁଲା ମନକୁ ଦିଏ ମିଶେଇ।।

ଭେଦଭାବ ନାହିଁ ସେହି ଅଟଇ ପ୍ରେମ।

ଆନନ୍ଦ ଯେପରି ମିଶେ ଜୀବ ପରମ।। (ଛନ୍ଦ- ଚିନ୍ତାଦେଶାକ୍ଷ)

ଉଦ୍ଧୃତି ୭:- where there is love there is life. ( Mahatma Gandhi)

ଅର୍ଥ – ଯେଉଁଠାରେ ପ୍ରେମ ଅଛି ସେହିଠାରେ ଜୀବନ ଅଛି।

ପ୍ରେମମୟ ଏ ଜୀବନ ସୁଖ ସୌହାର୍ଦ୍ଦ୍ୟପୂର୍ଣ୍ଣ।

ସଦା ଆନନ୍ଦ ଉଲ୍ଲାସ ହୁଅଇ ରାତ୍ରି ଦିନ।।

ପ୍ରେମ ହେଉଛି ପ୍ରଶ୍ୱାସ ଶ୍ରଦ୍ଧା ବିଶ୍ବାସ ।

ନିର୍ମଳ ହୃଦୟ ଜୀବନେ କରଇ ବାସ।।

ପ୍ରେମରେ ଜୀବନ ହୁଏ ସରଳତା ସୁନ୍ଦର।

ଶାନ୍ତି ସନ୍ତୋଷ ସ୍ଥାପନ ସଦା ହୁଏ ଶରୀର।। (ଛନ୍ଦ- ଲଳିତକାମୋଦୀ)

ଉଦ୍ଧୃତି ୮:- Love the therefore the only low of life . (Swami Vivekanand)

ଅର୍ଥ – ପ୍ରେମ ଜୀବନର ଏକମାତ୍ର ନିୟମ।

ଜୀବନକୁ ଶୃଙ୍ଖଳିତ,

ପ୍ରେମ ରଖଇ ରକ୍ଷିତ ।

ସଦା ପ୍ରତିହତ କରଇ ବିପଦ ବନ୍ଧା ପ୍ରେମରେ ଜଗତ ।।

କରେ ଜୀବନ ସରଳ,

ପ୍ରୀତି ଭାବ କରେ ଠୁଳ ।

ନାହିଁ ଅବାଞ୍ଛିତ ବଚନ ଅମୃତ ପ୍ରେମ ଅଟେ ଶକ୍ତିବଳ ।। ( ଛନ୍ଦ – ଘଣ୍ଟାରବ )

ଉଦ୍ଧୃତି ୯:- ପ୍ରକୃତ ପ୍ରେମ ଅମର । ( କାଳିଦାସ, ଶକୁନ୍ତଳା କାବ୍ୟ)

ପ୍ରେମ ଅଟଇ ଅମର ଅଜୟ ଅମୃତ ସ୍ବର

ନାହିଁ ବିନାଶ ତାହାର ପ୍ରକୃତ ପ୍ରେମେ ।

ନାହିଁ ତାର ପଟାନ୍ତର ଜୀବନ ହୁଏ ମଧୁର

ରୂପ ପଲ୍ଲବିତ ଚିର ପୀରତି ଦ୍ରୁମେ ।

ନାହିଁ ତାହାର ରୂପରେଖ।

କେବେ ସୁଖ ଥାଏ କେବେ ଜୀବନେ ଦୁଃଖ ।।( ଛନ୍ଦ - ଚୋଖି )

ଉଦ୍ଧୃତି ୧୦ :- ପ୍ରେମ ହିଁ ସେବା । ( ବେଦ)

ପ୍ରେମ ଲିଭାଇବ ସେବା ମାଧ୍ଯମ।

ମାତା ପାର୍ବତୀଙ୍କ କଥା ମରମ।।

ବିନା ଆଶା କରି ସେବା ପ୍ରଦାନେ।

ଲଭେ ସ୍ୱର୍ଗ ଧାମ ଉଦାର ପଣେ।।

କରୁଣା ନିଃସ୍ୱାର୍ଥ ସେବା,

ଅଧ୍ୟାତ୍ମ ବିକାଶି ହୁଏ ଦିବାନିଶି, ପ୍ରେମର ଉପମା ଦେବା।। (ଛନ୍ଦ- ଋଷିକୁଲ୍ୟା)

ପ୍ରେମ ଉଦ୍ଧୃତି 10 Quotes on Love in Odia

10 Quotes on Love in Odia