ବିଶ୍ବ ସରକାର
==========

ନିର୍ବାଚନେ ଯେବେ ଛିଡା ହୁଅ ତୁମେ,
ବିରୋଧୀ ଙ୍କ ବିନା ଗଢ ସରକାର,
ତୁମ ପରି ପ୍ରାର୍ଥୀ ଲୋଡ଼ନ୍ତି ଜନତା,
ତୁମେ ପରା ସାରା ବିଶ୍ଵର ଆଦର।

ଭୋଟ୍ ଦେବାପାଇଁ ଉଠିଯାଏ ହାତ,
ମୁଖରୁ ବାହାରେ ମଣିମା ମଣିମା,
ତୁମେ ଯେବେ ଆସ ଜନ ମଇଦାନ,
ଜନ ସିନ୍ଧୁ ଦିଶେ ସମର୍ଥକ ଜମା।

କେମିତି କରଯେ ସଭିଙ୍କୁ ନିଜର?
ଅଧା ଗଢା ହାତେ ଆଲିଙ୍ଗନ କର,
ଭକତ ପ୍ରେମିକ ଭାବଗ୍ରାହୀ ସାଜି,
ନିର୍ବାଚନ ଲାଗି କରଯେ ପ୍ରଚାର।

କିଲୋଡା ତୁମର ପ୍ରଚାର ମଣିମା?
ନିର୍ବାଚନ ବିନା ବିଜୟ ତୁମର,
ବିଶ୍ବ ର ଯେତକ ଶକ୍ତ ସରକାର,
ଲାଗନ୍ତି ସତେକି ତୁମ ଅନୁଚର।

ଜନତା ଙ୍କ ପାଇଁ ଏତେ ଚିନ୍ତା କର!
ଚିନ୍ତାରେ ତୁମର ନପଡେ ପଲକ,
ଆଜି କାଲି ନେତା ବଡ ସ୍ବାର୍ଥପର,
ତୁମେ ବା କିପରି ସାଜିଲ ନାୟକ?

ସତରେ ତୁମେ ଭ୍ରଷ୍ଟ ନେତା ନୁହେଁ ତ?
ତୁଳସୀ ମାଳକୁ ବେକରେ ପକାଅ!
ଆଚ୍ଛା କହିଲ! କେଉଁ ଦଳ ତୁମର?
ତୁମ ଦଳର ଚିହ୍ନକୁ ତ ଦେଖାଅ।

ବିସ୍ମିତ ଲାଗଇ ଦେଖିଲେ ତୁମକୁ,
କିପରି ବୁଝୁଛ ଜନତା ଙ୍କ ମନ?
ନେତା ତ ବୁଝନ୍ତି ନେଲାପରେ ଯାଇ,
ଗରିବ ହସ୍ତରୁ ଅର୍ଜିଥିବା ଧନ।

ବହୁତ୍ ସମ୍ପତି ଅଛିନା ତୁମର?
ତୁମେ ଥିଲ କଣ ,ପୁରୀ ଜମିଦାର?
ଏତେ ବଡ ଦାଣ୍ଡ , ଏତେ ବଡ ଘର!
ଦେଖୁଛି ତୁମର କ୍ଷମତା ଅପାର!

ତୁମ ପାଖେ ଲୁଚେ ସିନ୍ଧୁ ଗରଜନ ,
ଯେପରି ଲୁଚଇ ମନୁ ଅହଙ୍କାର ,
ମନେ ଗଢି ତୁମେ ଉଚ୍ଚା ମେଘନାଦ,
ଦୂରେଇକି ରଖ ପାପ ପାରାବାର।

ବୋଧେ ତୁମେ ଜଣେ ମହା ଯାଦୁଗର,
ପ୍ରେମ ଆଇନ୍ ର ତୁମେ କାରିଗର,
କେଉଁ ଯାଦୁ ବଳେ ଚଳାଅ ସଂସାର?
କେନୁହେଁ ତୁମଠୁ ବଡ ସରକାର।
___________________________

ସୌମ୍ୟ ରଞ୍ଜନ ରାୟ
ଭୂୟାଁଉଆସ, ଗୁଆମାଳ, ଭଦ୍ରକ
ଫୋ:୯୩୩୭୬୧୪୩୬୩

ବିଶ୍ବ ସରକାର

ହେ ଜଗା! କେବେ ତୁମେ ଯଦି ନିର୍ବାଚନ ରେ ଭାଗ ନିଅ!!!