ଆଜି ବିଶ୍ୱ ମାନସିକ ସ୍ୱାସ୍ଥ୍ୟ ଦିବସ। ଏହି ଦିନଟି ମୋ ପାଇଁ ଖୁବ୍ ଗୁରୁତ୍ୱପୂର୍ଣ୍ଣ, କାରଣ ମୁଁ ନିଜେ ମାନସିକ ସମସ୍ୟାର ସମ୍ମୁଖୀନ ହୋଇଥିଲି। ମୋର ଅନୁଭୂତି ଶେୟାର କରିବାକୁ ଚାହୁଁଛି, ଯାହା ଦ୍ୱାରା ଅନ୍ୟମାନେ ମଧ୍ୟ ସଚେତନ ହୋଇପାରିବେ।

ଦୁଇ ବର୍ଷ ତଳର କଥା। ମୁଁ ଚାକିରି ଓ ପରିବାରର ଚାପରେ ରହିଗଲିକି ମନ ଖୁବ୍ ଭାରୀ ଲାଗୁଥିଲା। ରାତିରେ ନିଦ୍ରା ଆସୁନଥିଲା, ଖାଦ୍ୟରେ ରୁଚି ନଥିଲା, ଏବଂ ସବୁବେଳେ ଏକ ଭୟ ଓ ଚିନ୍ତା ମନକୁ ଘେରି ରହୁଥିଲା। କିନ୍ତୁ ସବୁଠାରୁ ବଡ କଷ୍ଟ ଥିଲା କି, ମୁଁ କାହାକୁ କହିପାରୁନଥିଲି। ଲୋକେ କ'ଣ ଭାବିବେ? ମୋ ଚାକିରି ଚାଲିଯିବ କି? ଲୋକେ ପାଗଳ ବୋଲି ଡାକିବେ କି?

ମୋର ଏକ ବନ୍ଧୁ ଥିଲେ, ଯିଏକି ଏକ ଛୋଟ କମ୍ପାନୀରେ କାମ କରୁଥିଲେ। ତାଙ୍କର ମଧ୍ୟ ଏହିଭଳି ଅବସ୍ଥା ହୋଇଥିଲା। ସେ ଧୀରେ ଧୀରେ ସବୁଠାରୁ ଦୂରେଇ ଯାଉଥିଲେ। ଆମେ ସମସ୍ତେ ଭାବୁଥିଲୁ ସେ ଖୁବ୍ ବ୍ୟସ୍ତ ଅଛନ୍ତି। କିନ୍ତୁ ସତ୍ୟଟା ଥିଲା ଭିନ୍ନ। ସେ ଗଭୀର ବିଷାଦରେ ପଡିଥିଲେ। ଦୁର୍ଭାଗ୍ୟବଶତଃ, ସେ ସମୟରେ ଆମେ କେହି ତାଙ୍କୁ ବୁଝିପାରିନଥିଲୁ କିମ୍ବା ସାହାଯ୍ୟ କରିପାରିନଥିଲୁ।

ଶେଷରେ ମୁଁ ମଧ୍ୟ ଖୁବ୍ ଦୁଃଖରେ ପଡିଗଲି। ମୋ ଶରୀର ଓ ମନ ଦୁଇଟିଯାକ ଖରାପ ଲାଗିଲା। ତାହା ପରେ ମୁଁ ମୋ ସାଙ୍ଗକୁ ସବୁକଥା କହିଲି। ସେ ମୋତେ ଜଣେ ସାଇକୋଲୋଜିଷ୍ଟଙ୍କ ପାଖେ ନେଇଗଲେ। ପ୍ରଥମେ ମୋର ବହୁତ ଭୟ ଲାଗୁଥିଲା, କିନ୍ତୁ ଡାକ୍ତରଙ୍କ ସାହାଯ୍ୟରେ ମୁଁ ଧୀରେ ଧୀରେ ଭଲ ହୋଇଆସିଲି।

ଏହି ଅନୁଭୂତିରୁ ମୁଁ ଯାହା ଶିଖିଲି:

ପ୍ରଥମେ, ମାନସିକ ଅସୁସ୍ଥତା କେବେବି ଦୂର୍ବଳତା ନୁହେଁ। ଯେପରି ଆମର ଶରୀର ଅସୁସ୍ଥ ହୁଏ, ସେହିପରି ଆମର ମନ ମଧ୍ୟ ଅସୁସ୍ଥ ହୋଇପାରେ। ଏଥିପାଇଁ ଡାକ୍ତରଙ୍କ ପାଖେ ଯିବା ଲଜ୍ଜାର କଥା ନୁହେଁ।

ଦ୍ୱିତୀୟତଃ, ଆମେ ସମସ୍ତେ ଆମ ଚାରିପାଖରେ ଲକ୍ଷ୍ୟ ରଖିବା ଉଚିତ। ଯଦି କେହି ବନ୍ଧୁ କିମ୍ବା ପରିବାର ସଦସ୍ୟ ହଠାତ୍ ବହୁତ ଚୁପ୍ ହୋଇଯାଉଛନ୍ତି, ବାରମ୍ବାର ରୋଗଗ୍ରସ୍ତ ହେଉଛନ୍ତି, କିମ୍ବା ଖୁସିରେ ନଥାଉଛନ୍ତି, ତାଙ୍କୁ ଏକାକୀ ଛାଡିଦେଲା ଭଲ ନୁହେଁ। ତାଙ୍କ ସହିତ କଥା ହେଉ, ତାଙ୍କୁ ବୁଝିବାକୁ ଚେଷ୍ଟା କରୁ।

ତୃତୀୟତଃ, ମାନସିକ ସ୍ୱାସ୍ଥ୍ୟ ବିଷୟରେ କଥା ହେବା ଜରୁରୀ। ଯେତେବେଳେ ଆମେ ଏହା ନିଜର ଭିତରେ ରଖିଦେଉ, ସମସ୍ୟା ଆହୁରି ବଢିଯାଏ। କିନ୍ତୁ ଯେତେବେଳେ ଆମେ କାହାକୁ କହିଦେଉ, ଅଧା ସମସ୍ୟା ସେତେବେଳେ କମିଯାଏ।

ବିଶ୍ୱ ମାନସିକ ସ୍ୱାସ୍ଥ୍ୟ ଦିବସ ଆମକୁ ଏହି ସଚେତନତା ଦେଇଥାଏ। ଏହା କେବଳ ଏକ ଦିବସ ନୁହେଁ, ଏକ ଜରୁରୀ ସନ୍ଦେଶ। ମନ ଓ ଶରୀର ଉଭୟ ସୁସ୍ଥ ହେଲେ ତବେ ଆମେ ସତରେ ସୁଖୀ ହୋଇପାରିବା।

ଆସନ୍ତୁ, ଆଜିର ଏହି ଦିବସରେ ଆମେ ପ୍ରତିଶ୍ରୁତି ନେବା ଯେ:

· ଆମେ ଆମର ମାନସିକ ସ୍ୱାସ୍ଥ୍ୟକୁ ଗୁରୁତ୍ୱ ଦେବା

· ମାନସିକ ସମସ୍ୟା ଥିବା ଲୋକଙ୍କୁ ସମର୍ଥନ କରିବା

· ଏହି ବିଷୟରେ ଖୋଲା ଭାବରେ କଥା ହେବା

କାରଣ, ଏକ ସୁସ୍ଥ ସମାଜ ଗଠନ କରିବାର ପ୍ରଥମ ପାହାଚ ହେଉଛି ଏକ ସୁସ୍ଥ ମନ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!