ଜୀବନର ଅର୍ଥ ଖୋଜୁଥିବା ମାନବ ଚିରକାଳ ହେଉଛି ଭଗବାନଙ୍କ ଏକ ଅଂଶ । ତାଙ୍କରି ମାୟାରେ ସୃଷ୍ଟି ଚାଲିଛି ଏବଂ ତାଙ୍କରି ଇଚ୍ଛାରେ ପ୍ରତ୍ୟେକ କାର୍ଯ୍ୟ ସମ୍ପନ୍ନ ହେଉଛି । ଭଗବାନଙ୍କ ସେବା କହିଲେ କେବଳ ପୂଜା-ଅର୍ଚ୍ଚନା ,ନୁହେଁ, ବରଂ ତାଙ୍କ ପ୍ରତି ସମର୍ପିତ ହୋଇ ଜୀବନର ପ୍ରତ୍ୟେକ କ୍ଷଣକୁ ପବିତ୍ର କରିବା ବୁଝାଏ ।

ପୁରାଣ ଓ ଶାସ୍ତ୍ର ଅନୁସାରେ, ଭଗବାନ ଶ୍ରୀହରି ନବଧା ନାମରେ ପରିଚିତ – ସମୟ, ଦେଶ, ଯଜ୍ଞ, କର୍ତ୍ତା, ଦ୍ରବ୍ୟ, ବେଦମନ୍ତ୍ର, ଅନ୍ନ, ବନଫଳ ଓ ସ୍ୱର୍ଗଫଳ ଆଦି ରୂପେ । ସେ ଜଗତକୁ ଚଳାଇବା ପାଇଁ ସୂର୍ଯ୍ୟ ରୂପେ ନିଜ ନିର୍ଦ୍ଧାରିତ ପଥରେ ବିଚରଣ କରୁଛନ୍ତି । ପ୍ରତି ମାସରେ ସେ ବିଭିନ୍ନ ନାମ, ଋଷି, ଗନ୍ଧର୍ବ, ଅପ୍ସରା, ଯକ୍ଷ, ରାକ୍ଷସ ଓ ନାଗଙ୍କ ସହ ରହି ସେମାନଙ୍କ ମାଧ୍ୟମରେ ବିଶ୍ୱକୁ ଶକ୍ତି ଓ ଜ୍ଞାନ ବଣ୍ଟନ କରୁଛନ୍ତି ।

ଯେପରି ବୈଶାଖ ମାସରେ ସୂର୍ଯ୍ୟଦେବ ଆର୍ଯ୍ୟମା ନାମରେ ବିରାଜମାନ କରୁଥାନ୍ତି ଏବଂ ତାଙ୍କ ସହ ଋଷି ପୁଲହ, ଗନ୍ଧର୍ବ ନାରଦ, ଅପ୍ସରା ପୁଞ୍ଜିକସ୍ଥଳୀ ଆଦି ରହି ମାସିକ କାର୍ଯ୍ୟ ସମ୍ପାଦନ କରନ୍ତି । ଏହିପରି ଜ୍ୟେଷ୍ଠରେ ମିତ୍ର, ଆଷାଢ଼ରେ ବରୁଣ, ଶ୍ରାବଣରେ ଇନ୍ଦ୍ର, ଭାଦ୍ରବରେ ବିବସ୍ୱାନ, ଆଶ୍ୱିନରେ ପୁଷ୍ୟ, କାର୍ତ୍ତିକରେ ବିଷ୍ଣୁ, ମାର୍ଗଶୀର୍ଷରେ ଅଂଶ, ପୌଷରେ ଭଗ, ମାଘରେ ତ୍ୱଷ୍ଟା, ଫାଲ୍ଗୁନରେ ପର୍ଜନ୍ୟ ଏବଂ ଚୈତ୍ରରେ ଧାତା ନାମରେ ସୂର୍ଯ୍ୟ ପ୍ରକଟିତ ହୁଅନ୍ତି ।

ଏହି ସମସ୍ତ ଶକ୍ତିମାନ ଭଗବାନଙ୍କ ସେବାରେ ନିୟୋଜିତ । ଋଷିମାନେ ସୂର୍ଯ୍ୟଙ୍କୁ ବେଦମନ୍ତ୍ରରେ ସ୍ତୁତି କରନ୍ତି, ଗନ୍ଧର୍ବଗଣ ତାଙ୍କ ଗୁଣଗାନ କରନ୍ତି, ଅପ୍ସରାମାନେ ନୃତ୍ୟ କରନ୍ତି, ନାଗଗଣ ତାଙ୍କ ରଥକୁ ବାନ୍ଧିଥାଆନ୍ତି, ଯକ୍ଷଗଣ ସେହି ରଥକୁ ସଜ୍ଜିତ କରନ୍ତି ଏବଂ ଶକ୍ତିଶାଳୀ ରାକ୍ଷସଗଣ ରଥକୁ ପଛରୁ ଠେଲି ଆଗୁଆନ୍ତି । ଏସବୁ ଦେଖିବାକୁ ପାଇଁ ଆମେ ଭୁଲିଯାଉ ଯେ ସୂର୍ଯ୍ୟ କେବଳ ଏକ ଜ୍ୱଳନ୍ତ ଗୋଲକ ନୁହଁନ୍ତି, ବରଂ ସେ ଜଗତର ପାଳକ ଏବଂ ଜ୍ଞାନର ପ୍ରଦାତା ।

ତେଣୁ ଭଗବାନଙ୍କ ସେବା ହେଉଛି ଏହି ବିଶ୍ୱବ୍ୟବସ୍ଥାରେ ତାଙ୍କରି ଏକ ଅଂଶ ହୋଇ ରହିବା । ପ୍ରତିଦିନ ସକାଳେ ଓ ସନ୍ଧ୍ୟାରେ ଏହି ଦିବ୍ୟ ଶକ୍ତିଙ୍କୁ ସ୍ମରଣ କରିବା, ତାଙ୍କ ପ୍ରତି କୃତଜ୍ଞତା ଜ୍ଞାପନ କରିବା ଏବଂ ପ୍ରକୃତି ଓ ଜୀବନର ପ୍ରତ୍ୟେକ ଅଂଶରେ ତାଙ୍କୁ ଦର୍ଶନ କରିବା – ଏହାହିଁ ହେଉଛି ଆମର ପ୍ରକୃତ ସେବା । ଯେଉଁ ବ୍ୟକ୍ତି ଏହା ଅନୁଭବ କରେ, ତାହାର ସମସ୍ତ ପାପ ନଷ୍ଟ ହୋଇଯାଏ ଏବଂ ଜୀବନ ଧନ୍ୟ ହୁଏ ।

କହିବାକୁ ଗଲେ, ଭଗବାନଙ୍କ ସେବା କେବଳ ଏକ ଧାର୍ମିକ କର୍ତ୍ତବ୍ୟ ନୁହେଁ, ଏହା ଏକ ଜୀବନଦର୍ଶନ । ଯେତେବେଳେ ଆମେ ପ୍ରକୃତି, ପରିବେଶ ଓ ପରସ୍ପର ସହିତ ସହଯୋଗ ଓ ସେବାର ଭାବନା ରଖୁ, ସେତେବେଳେ ଆମେ ଭଗବାନଙ୍କ ସେବାରେ ନିଜକୁ ନିୟୋଜିତ କରୁ । ଏହି ଜ୍ଞାନ ହିଁ ଆମକୁ ଜନ୍ମ-ମୃତ୍ୟୁର ଚକ୍ରରୁ ମୁକ୍ତି ଦେଇ ପରମାତ୍ମା ସହ ଏକତ୍ୱ ଅନୁଭବ କରାଏ ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

‌ବ୍ରହ୍ମପୁର ଗଞ୍ଜାମ !!

ଭଗବାନଙ୍କ ସେବା : ଜୀବନର ପରମ ଲକ୍ଷ୍ୟ

ଭଗବାନଙ୍କ ସେବା : ଜୀବନର ପରମ ଲକ୍ଷ୍ୟ