ଭାବନା ର ସୁଅ ଦ୍ରୁତଗାମୀ ରେଳ ଖୋଜି ବୁଲୁଥାଏ ଆନନ୍ଦ ପନ୍ଥା,

ତୃପ୍ତି ମିଳିଯାଏ ଦେଖିଦେଲେ ଟିକେ ପ୍ରାକୃତିକ ସୌନ୍ଦର୍ଯ୍ୟ ର ସତ୍ତା।

ଏକତ୍ରିତ କରି ପଦେ ଅଧେ ତଥ୍ୟ ଯାହା ଇତିହାସ ସାଇତି ଥିଲା,

ଭାବନା ରାଇଜେ ବୁଡି କରି ବନ୍ଧୁ ବୁଲି ଆସିଲି କୋରାପୁଟ ଜିଲ୍ଲା ।

ଅନୁପମ ତା'ର ମାଟି ର ମହକ ଅନ୍ତ ନାହିଁ ସୌନ୍ଦର୍ଯ୍ୟ ର,

ରଙ୍ଗ ମାଟି ପରା ଆବିଷ୍କୃତ ଲାଗି ଥାଏ ସଦା ପରା ତତପର ।

ଉତ୍ତପ୍ତ ନୁହଁଇ ଗ୍ରୀଷ୍ମପାତ ଏଠି ସୁଖଦ ଅଟେ ସୁବର୍ଣ୍ଣ ଶରତ,

ମୌସୁମୀ ଏଠାରେ ଭାରି ଅଳସୁଆ ଶୀତ ଦୃଶ୍ୟ ଅତ୍ୟନ୍ତ ବିସ୍ମିତ ।

ଆଦିବାସୀ ଜନେ ନିରୀହ ତ' ଏଠି ଗାଆନ୍ତି ଏକତା ର ନିଆରା ମନ୍ତ୍ର,

କୋରପୁଟିଆ ଙ୍କ ସାଙ୍ଗେ ମିଶି ଗଲେ ଶିଖିବ ନିଃସ୍ଵାର୍ଥପରତା ସୂତ୍ର ।

୧୯୩୬ ମସିହା ଉତ୍କଳ ଦିବସେ କୋରାପୁଟ ହେଲା ପ୍ରତିଷ୍ଠା,

ନିର୍ଭୀକ ଜଂଗଲୀ ପାହାଡ଼ ଝରଣା କହିଦିଏ କେତେ ଆଶୁଣା କଥା ।

ସତ୍ତା, ନଳ, ଅଙ୍ଗ, ସୂର୍ଯ୍ୟ ଯେତେ ବଂଶ କରିଥିଲେ ଆଡ଼ମ୍ବରେ ଶାସନ,

ଯେତେ ସବୁ ଏଠି ପର୍ଯ୍ୟଟନ ସ୍ଥଳୀ କିଣି ନିଏ ତୁଚ୍ଛ ମନୁଷ୍ୟ ର ମନ ।

ଅଙ୍କାବଙ୍କା ସରୁ ପାହାଡିଆ ରାସ୍ତା ନୈସର୍ଗିକ ଶୋଭା ଭରିହୋଇ ଥିଲା,

ତା' ଠାରୁ ସୁନ୍ଦର ସବୁଜିମା ଘେରା ପୂର୍ବଘାଟ ଦେଓମାଳି ପର୍ବତମାଳା ।

ପର୍ବତ ଶିଖରେ ଛିଡ଼ା ହୋଇ ଯିଏ ନିମିଷେ ଉପରକୁ ଚାହିଁ ଦେବ,

ଜାଣିରଖ ବନ୍ଧୁ ସରଗ ର ସୁଖ ହାତ ପାହାନ୍ତା ରେ ଜାବୁଡ଼ି ନେବ।

ଚୂନ ପଥର, ବକ୍ସାଇଟ୍ ଆଉ ରନ୍ ଭଳି ଖଣିଜ ସଂପଦ ରେ ପୂର୍ଣ୍ଣ,

ପାହାଡି ପକ୍ଷୀ ର ଡ଼ାକ ଶୁଣିବା କୁ ଯେମିତି ଡେରି ରଖିଥିବ କାନ।

ଶାବର ଶ୍ରୀକ୍ଷେତ୍ର ଜିଲ୍ଲା ପାଇଁ ବର କେନ୍ଦ୍ର ଅଟେ କୋରାପୁଟ ହୃଦୟ ର,

ଜଗନ୍ନାଥ ପରା ଅଧିପତି ସେଠି ପ୍ରକୃତି ର କୃପା ଅଟେ ଅପାର ।

ପ୍ରଭୁ ମହାଦେବ ଗୁପ୍ତେଶ୍ୱର ରୂପେ ସ୍ଵୟଂ ଚମତ୍କାରେ ବିରାଜମାନ,

ଏପରି ବିରଳ ଅପରୂପ ଲିଙ୍ଗ ଭାରତ ରେ ପରା ବୃହତ୍ତମ ।

ରାଣୀ ଡୁଡୁମା ଜଳପ୍ରପାତ ଯେ' କୁଟୁଳୀମାଳା ପାହାଡ଼ ବକ୍ଷୁ ନିର୍ଗତ,

ଜୟପୁର ରାଜା ବିଜୟ ଚନ୍ଦ୍ରାକ୍ଷ ଦେଖିଲେ ରାଣୀ ଙ୍କ ଖସିଲା ପଣତ ।

ସତର୍କ ର ବାର୍ତ୍ତା ରାଣୀ ଙ୍କୁ ଦେବା କୁ ମାରିଲେ ତିନି ଟି ଶର,

ଲଜ୍ଜ୍ୟାପୂର୍ଣ୍ଣ ହୋଇ ଡୁଡ଼ୁମା ପ୍ରପାତେ ଜଳାଞ୍ଜଳି ଦେଲେ ନିଜ ଜୀବନ ର ।

ସେହଦିନଠାରୁ ଡୁଡ଼ୁମା ପ୍ରପାତ ରାଣୀ ଡୁଡ଼ୁମା ନାମେ ଜଣାଗଲା,

ଜନମତ କହେ ରାଣୀ ଙ୍କ ର ମୁଣ୍ଡଖୋଲା କେଶ ଧରି ଜଳେ ଭାସୁ ଥିଲା ।

ପତ୍ର ଆଢ଼ୁଆଳେ ରାତ୍ରି ଅନ୍ଧକାରେ ଯେବେ ଚାନ୍ଦ ଆଗମନ କଲା,

ଭାବନା ବି ପୁଣି ପ୍ରକୃତି ର ସେଇ ମନୋରମ ଦୃଶ୍ୟେ ସ୍ଥିର ହୋଇ ରହିଗଲା ।

ନାମ: ଭାଗ୍ୟଲକ୍ଷ୍ମୀ ସାହୁ

ଭାବନା ରାଇଜେ କୋରାପୁଟ ବାସ୍ନା