କୋଟି ଓଡ଼ିଆଙ୍କ ମଉଡ଼ମଣି ସେ

ବିଶ୍ଵ ବ୍ରହ୍ମାଣ୍ଡର ନାଥ

ଭକତ ପ୍ରେମରେ ସଦା ସିଏ ବନ୍ଧା

ନାମ ବହି ଜଗନ୍ନାଥ ।

ଅଗତିର ଗତି , ଅନାଥର ନାଥ , ମୋ ପ୍ରିୟତମ ମଣିମାଙ୍କ ଅଭୟ ଚରଣାର ବିନ୍ଦୁରେ ଏ ଦାସର ସାଷ୍ଟାଂଗ ଦଣ୍ଡବତ । ମହାପ୍ରଭୁଙ୍କ ବିଷୟରେ ଯେତେ କହିଲେ ସେତେ ଅଧୁରା । ତାଙ୍କୁ କିଏ ବା କଳନା କରିପାରିବ ? ସିଏ ତ ଭାବର ଠାକୁର । ମାନବୀୟ ଲୀଳା କରି ଯୁଗେ ଯୁଗେ ପତିତ ଜନଙ୍କୁ ଉଦ୍ଧାର କରୁଛନ୍ତି ସେ । ଆମ ଉତ୍କଳୀୟ ସଂସ୍କୃତିର ପ୍ରାଣକେନ୍ଦ୍ର ସେ । ସୁନା, ରୂପା, ଧନ, ଅଳଙ୍କାରରେ ସିଏ ସନ୍ତୁଷ୍ଟ ହୁଅନ୍ତିନି । କେବଳ ଅସରନ୍ତି ଭକ୍ତି ଭାବର ଡୋରିରେ ହିଁ ସେ ବନ୍ଧା । ଏହି ଅଧମ ଆଜି ନିଜର ସଦ୍ୟ ଅନୁଭୂତିରୁ କିଛି କଥା ଆପଣଙ୍କ ସାମ୍ନାରେ ରଖିବ । ସେଦିନ ଥାଏ ପବିତ୍ର ଶ୍ରୀ ଗୁଣ୍ଡିଚା ଯାତ୍ରା ବା ଘୋଷ ଯାତ୍ରା । ଭକ୍ତ ଓ ଭଗବାନଙ୍କ ଏହି ଅପୂର୍ବ ମିଳନର ପର୍ବରେ ବିଶ୍ଵ ନାଚି ଉଠୁଥାଏ । ଗୋଟିଏ ଘରୋଇ କଲେଜରେ ଅଧ୍ୟାପନା କରୁଥିବା ହେତୁ ମୋର ସେଦିନ ଛୁଟି ନଥାଏ । ମୁଁ ଯେହେତୁ କୋରାପୁଟରେ ରୁହେ ତେଣୁ ଏଠାରେ ପ୍ରସିଦ୍ଧ ଶାବର ଶ୍ରୀକ୍ଷେତ୍ରରେ ରଥଯାତ୍ରା ଦେଖିବା ପାଇଁ ମନରେ ମୋର ଅହେତୁକ ଇଚ୍ଛା ଥିଲା କିନ୍ତୁ କର୍ମରେ ବନ୍ଧା ହୋଇଥିବା ହେତୁ ମଣିମାଙ୍କ ପାଖରେ ଗୁହାରି ଜଣାଇ ମୁଁ ପିଲାଙ୍କୁ ପାଠ ପଢିବାକୁ ଗଲି । କ୍ଲାସ କରି ସାରିବା ପରେ ମୋ ଚେୟାରରେ ଯାଇ ବସିପଡ଼ିଲି । ମହାପ୍ରଭୁଙ୍କୁ ଦେଖିବାକୁ ଚର୍ମ ଚକ୍ଷୁ ଅଧର୍ଯ୍ୟ ହୋଇ ପଡୁଥିଲା । ଆକାଂକ୍ଷାକୁ ବୁଝାଇ ମନେ ମନେ ଭାବିଥିଲି ମୋ ପ୍ରଭୁଙ୍କୁ ଟିକେ ଦର୍ଶନ କରନ୍ତି କି । ଠିକ୍ ଏହି ସମୟରେ ପୁରୀର ବିଶ୍ଵ ପ୍ରସିଦ୍ଧ ରଥଯାତ୍ରାର ସିଧା ପ୍ରସାରଣ ଫୋନ୍ ମାଧ୍ୟମରେ ଦେଖିବା ପାଇଁ ମୋବାଇଲ୍ ବାହାର କଲି । ଯେମିତି ଓଟିଭି ଚ୍ୟାନେଲ ଖୋଲିଲି ମୋ ଆଖି ଆଶ୍ଚର୍ଯ୍ୟରେ ସ୍ତବ୍ଧ ହୋଇଗଲା । କାରଣ ମୋ ଆଖି ସାମ୍ନାରେ ମଣିମାଙ୍କ ପହଣ୍ଡିର ଦିବ୍ୟ ଦୃଶ୍ୟ ନାଚି ଉଠୁଥିଲା । ନିସ୍ତରିଲି ନିସ୍ତରିଲି ମଣିମା । କି ସୌଭାଗ୍ୟ ମୋର । ଇଏ ଗୋଟିଏ ଅପୂର୍ବ ସଂଯୋଗ ବୋଲି ଭାବିଲି । କେତେବେଳେ ମହାପ୍ରଭୁ ମୋ ଭାବକୁ ଶୁଣିଦେଲେ ଏ କଥା ଭାବି ଆଖି ଜକେଇ ଆସିଲା ।ସତରେ ସିଏ ମନର କଥା ବୁଝନ୍ତି , ସମସ୍ତ ଭାବକୁ ଜାଣନ୍ତି । କେବଳ ଭକ୍ତିର ମାର୍ଗକୁ ପ୍ରସାରିତ କଲେ ତାଙ୍କୁ ସହଜରେ ପାଇହୁଏ । ଏହି ତେଲ ଲୁଣର ସଂସାରକୁ ସିଏ ହିଁ ଚଳାଉଛନ୍ତି । ତାଙ୍କରି ବିନା ଆମ ପରିଚୟ ହିଁ ନାହିଁ । ତେଣୁ ମନରୁ ସମସ୍ତ ଲୋଭ , ମୋହ , ଅହଂ , କାମନା ଛାଡ଼ି କେବଳ ଭକ୍ତି ଚିତ୍ତରେ ତାଙ୍କୁ ସ୍ମରଣ କରନ୍ତୁ ଏବଂ ନିଜକୁ ସମର୍ପଣ କରିଦିଅନ୍ତୁ । ଦେଖିବେ ସିଏ ନିଶ୍ଚୟ ଆପଣଙ୍କ ଡାକ ଶୁଣିବେ ।

ମନ ଓ ପ୍ରାଣ ଆନନ୍ଦରେ ଗାଇଉଠୁ ଜୟ ଶ୍ରୀ ଜଗନ୍ନାଥ ।

ନାମ :- ରାଜେଶ୍ ରାୟ

ଅଧ୍ୟାପକ , ଉଦ୍ଭିଦ ବିଜ୍ଞାନ ବିଭାଗ, ବିଦ୍ୱାନ୍ ମହାବିଦ୍ୟାଳୟ, ଜୟପୁର, କୋରାପୁଟ

ମୋବାଇଲ୍ :- ୬୩୭୧୫୫୫୯୪୦

ଭାବର ଠାକୁର.....

ମୋ ମଣିମା