ଏଇ ସମାଜ ସହ ଖାପ ଖୁଆଇ ଚାଲିବା ନିମନ୍ତେ ବିଭିନ୍ନ ସ୍ଥାନରେ ଭିନ୍ନ ଭିନ୍ନ ଚରିତ୍ର ଧାରଣ କରୁଥିଲେ ମଧ୍ୟ ଆମର ବ୍ୟକ୍ତିତ୍ଵ, ଆମ ବ୍ୟବହାର, ଭାବଭଙ୍ଗୀ ଏବଂ ଭେଶପୋଷା ଦ୍ଵାରା ଆମେ ଲୋକଙ୍କ ଆଗେ ଚିହ୍ନା ପଡ଼ିଥାଉ | ଭିନ୍ନ ଭିନ୍ନ ସ୍ଥାନ ଓ କାର୍ଯ୍ୟକଳାପ ପାଇଁ ବିଭିନ୍ନ ପୋଷାକ ଆମ ସଭ୍ୟ ସମାଜ ଦ୍ୱାରା ବାଛି ନିଆ ଯାଇଚି | ମାତ୍ର ପୋଷାକ ର ଇତିହାସ କୁ ଆଧାର କଲେହିଁ ଆମେ ତାର ମହତ୍ତ୍ଵ ବର୍ତ୍ତମାନ ସମୟ ରେ ଜାଣି ପାରିବା |

ଆମ ଭାରତ ଏକ ବିଭିନ୍ନତା ର ଦେଶ ହିସାବରେ ସମଗ୍ର ବିଶ୍ୱରେ ପ୍ରତିଷ୍ଠିତ ହୋଇଛି | ହେଲେ ବିଭିନ୍ନତା ର ଆଧାର କଣ? ଆମ ଜାତି, ଧର୍ମ ଆଉ ଭାବଭଙ୍ଗୀ ତ! ତାହେଲେ ସେଥିରୁ ଆମ ପୋଷାକ ଆଉ ସାଜ ଶୃଙ୍ଗାର କେମିତି ବାଦ୍ ପଡ଼ିଯିବ? ହେଲେ ଯେବେ ମଣିଷ ଗଛର ବକ୍କଳ ତ୍ୟାଗ କରି ସୂତା ବୁଣା କପଡ଼ା ପିନ୍ଧିବା ଆରମ୍ଭ କଲା, ସେତେବେଳେ ହୁଏତ କପଡ଼ା କୁ କାଟି ବିଭିନ୍ନ ପୋଷାକ ତିଆରି କରିବା ପ୍ରଥା ଆରମ୍ଭ ହୋଇ ନଥିଲା | ଆଉ ସର୍ବ ପୁରାତନ ସଂସ୍କୃତି ମାନଙ୍କ ମଧ୍ୟରେ ଗଣିତ ଭାରତୀୟ ସଂସ୍କୃତିରେ ପୁରୁଷ ମାନେ ଧୋତି ଆଉ ସ୍ତ୍ରୀ ମାନେ ଶାଢ଼ୀ ପିନ୍ଧିବା ହେଉଛି ଏହାର ପ୍ରମାଣ | କପଡ଼ା କୁ ଶାଢ଼ୀ ଭଳି ପିନ୍ଧିବାର ପ୍ରଥା ଖ୍ରୀଷ୍ଟପୂର୍ବ ୨୮୦୦ ରୁ ୧୮୦୦ ମଧ୍ୟରେ ଆରମ୍ଭ ହୋଇ ଯାଇ ଥିଲା | ପରବର୍ତ୍ତୀ କାଳରେ ରବୀନ୍ଦ୍ରନାଥ ଟାଗୋର ଙ୍କର ଭାଉଜ ଜନାନନ୍ଦିନି ଦେବୀ ପ୍ରଥମ ଥର ଶାଢ଼ୀ ସହ ବ୍ଲାଉଜ ପିନ୍ଧିବାକୁ ପ୍ରଶ୍ରୟ ଦେବାକୁ ଆରମ୍ଭ କରିଥିଲେ | ଯାହା ଦ୍ଵାରା ମହିଳା ମାନେ ମଧ୍ୟ ଜନସାଧାରଣ ଙ୍କ ଆଗକୁ ନିଃସଙ୍କୋଚରେ ଆଗେଇ ଆସି ପାରିବେ |

ଏତତବ୍ୟତିତ ଅନେକ ତର୍କ ବିତର୍କ ଏବଂ ଅନୁସନ୍ଧାନ ଅନୁସାରେ ଭାରତର ପାଣିପାଗ, ଜୀବନ ଶୈଳୀ ଏବଂ ମହିଳା ମାନଙ୍କର ରୂପ ରଙ୍ଗର ମାଧୁର୍ଯ୍ୟକୁ ଆଖି ଆଗରେ ରଖି ଶାଢ଼ୀ କୁ ସର୍ବୋତ୍ତମ ପୋଷାକ ରୂପରେ ଗ୍ରହଣ କରା ଯାଇଛି |କୌଣସି ବ୍ୟକ୍ତି ବିଶେଷଙ୍କୁ ତାଙ୍କ ପୋଷାକ ପରିଧାନର ମାପକାଠି ରେ ତୁଳନା କରା ଯାଇ ନପାରେ | ମାତ୍ର କଥା ଯେତେବେଳେ ସୋନ୍ଦର୍ଯ୍ୟ ଏବଂ ସଭ୍ୟତା ରେ ଆସି ପହଞ୍ଚେ, ପ୍ରତ୍ୟେକ ମହିଳା ମାନେ କୋଉଠି ନା କୋଉଠି ଶାଢ଼ୀ ଆଡ଼କୁ ନିଜର ମନ ବଳାନ୍ତି |

ଭାରତର ବିଭିନ୍ନ ସ୍ଥାନରେ ଭିନ୍ନ ଭିନ୍ନ ଶୈଳୀରେ ଶାଢ଼ୀ ପରିଧାନ କରି ମହିଳା ମାନେ ନିଜର ସୌନ୍ଦର୍ଯ୍ୟ ଏବଂ ଶାଢ଼ୀ ପ୍ରତି ନିଜର ଭଲପାଇବାର ପ୍ରଦର୍ଶନ କରିଛନ୍ତି | କୋଉ ପ୍ରକାରର କାମ ପାଇଁ କୋଉ ପ୍ରକାରରେ ଶାଢ଼ୀ ପିନ୍ଧିଲେ ଜଣେ ସୁନ୍ଦର ଏବଂ ସୁରକ୍ଷିତ ରହିବ ତାହା ଆଜିକାଲିର ମହିଳା ମାନଙ୍କୁ ବେଶ୍ ଭଲ ଭାବରେ ଜଣା |

ଭାରତ ଆଜି ନିଜର ଶିକ୍ଷା, ଦକ୍ଷତା, ଚାଲିଚଳନ ଏବଂ ପରିଧାନରେ ସମଗ୍ର ବିଶ୍ୱର ଯୁବ ପୀଢ଼ି ସହ ତାଳ ଦେଇ ଚାଲିଚି | ନାରୀ ମାନେ ଆଧୁନିକତା ଦିଗରେ ଅନେକ ଜାଗାରେ ନିଜ ଶାଖା ମେଲେଇ ସାରିଲେଣି, ମାତ୍ର ଆଜିବି ଅଧିକାଂଶ ନାରୀ ନିଜର ମୂଳଦୁଆକୁ ନ ଭୁଲି ସଂସ୍କାର ଏବଂ ଐତିହ୍ୟର ମାଟିରେ ନିଜର ଚେର ମେଲାଇ ଠିଆ ହୋଇଛନ୍ତି ଯାହା ଏକ ଅତ୍ୟନ୍ତ ଗୌରବର ବିଷୟ |

ବ୍ୟବସାୟ ପରିପେଖିରେ ମଧ୍ୟ ବୁଦ୍ଧିଜୀବୀ ମାନେ ଶାଢ଼ୀକୁ ଅନେକ ପ୍ରାଧାନ୍ୟ ଦେଇଛନ୍ତି | ବିଭିନ୍ନ ଅଞ୍ଚଳର ଆଞ୍ଚଳିକ ଶାଢ଼ୀ ମାନ ଦେଶ ବିଦେଶରେ ଅନେକ ଚର୍ଚ୍ଚାର ବିଷୟ ପାଲଟିଛି |

ଆମ ଦେଶର ଅନେକ ଲୋକପ୍ରିୟ ଶାଢ଼ୀ ଯେମିତିକି:

-ବନାରଶି

-କାଞ୍ଜିବରମ୍

-ସମ୍ବଲପୁରୀ

-କୋଟା

-ଭାଗଲପୁରି

ଏହିପରି ଅନେକ ଶାଢ଼ୀ ଲୋକ ମାନଙ୍କ ବହୁ ପ୍ରିୟ ଯାହା ବିଦେଶରେ ମଧ୍ୟ ପ୍ରଶଂସାର ପାତ୍ର ହୋଇ ପାରିଛି | ଆଜିର ନୂତନ ସମାଜରେ ଅନେକ ଶିକ୍ଷିତ ଏବଂ ଉଚ୍ଚ ପଦବୀ ଧାରି ମହିଳା ମାନେ ପାଶ୍ଚାତ୍ୟ ପରିଧାନକୁ ପଛରେ ପକେଇ ଅନେକ ସ୍ଥାନରେ ଶାଢ଼ୀ ପିନ୍ଧିବା ପାଇଁ ଆଗଭର ହେଉଛନ୍ତି |

ନିଜ ସଂସ୍କୃତିକୁ ସାଙ୍ଗରେ ନେଇ ଆଗକୁ ବଢିବା ହିଁ ହେଉଛି ପ୍ରକୃତ ଆଧୁନିକତା | ନିଜ ପରିଧାନ ଏବଂ ନିଜ ସଂସ୍କାର କୁ ସମ୍ମାନ ଦେବା ହିଁ ପ୍ରକୃତରେ ଆଧୁନିକ ହବାର ମୂଳମନ୍ତ୍ର |

ସୁସ୍ମିତା ଜେନା

ବିଶାଖାପାଟଣା

ଭାରତୀୟ ସଂସ୍କୃତିରେ ଶାଢ଼ୀର ମହତ୍ତ୍ୱ Importace of Saree in Indian Culture

ଶାଢ଼ୀର ଇତିହାସ ଏବଂ ବର୍ତ୍ତମାନ