ସୋର ଲାଗୁଚେ ମା ଗୋ ମୋତେ,

ତୁଇ ନେ଼ଇନ ଜେ ଦୁଃଖ ଲାଗୁଚେ କେତନି କେତେ ।।

ସୋର ଲାଗୁଚେ ଗୋ ମା ତୋର ପନତ୍ କାନି ,

ତୋର ରଜା ରାନୀ କଥାନି ।।

ସୋର୍ ଲାଗୁଚେ ତୋର ହାତ ରନ୍ଧା ଭାତ୍ ତୁନ୍

ସୁଆଦ ଲାଗୁ ଥିଲା ନେଇ ଲାଗି ଥିଲେ ଭି ନୁନ୍ ।‌।

ଭୁକେ ଥିଲେ ଭି ଗୋ ମା

ପଚ୍ରାବାର୍ କେ ପାଖେ କେହି ନେ଼ଇନ, ତୋର ବାଗିର କେହି ନୁହେଁ ସେ ଇନ,

ଭୋକ ନେ଼ଇ ଲାଗୁ ଥିଲେ ଭି କହସୁ

ଖାଇ ଦେ ରେ ଧନ ।।

ସୋର୍ ଲାଗସି ଗୋ ମା ତୋର ମିଛେ ମିଛେ ଦଉ ଥିବା ଗାଲି,

ଗାଲି ଦେଇ କରି ଧନ ରେ ମୋର୍ ସୁନା ରେ କହି କୋଲ୍ କେ ନେସୁ ତୁଲୀ ।।

ଚୁମା ଚଟା ଦେଇ ଗେଲ କରୁ ଥିଲୁ କେତେ ,

ଅବୁଝା ହେଲେ ବୁଝେଇ ଦେଉ ଥିଲୁ ମିଠା ମିଠା କହି କରି ସତେ ।।

ମୋତେ ଦୁଃଖ ହେଲେ ଗୋ ମା କାନ୍ଦୁ ଥିଲୁ ତୁଇ,

ମୋର୍ ଆଖି ଲୁହୁ ଦେଖି ନେଇ ପାରୁଥିଲୁ ସହି ।।

ଆଏଜ୍ ଏତେ ମୁଇଁ କାନ୍ଦୁଚେ ତତେ ସୋର କରୁଚେ ,

ଆଖିର ପାୟେନ୍ ପୁଛ ବାର୍ କେ ତୋର ପନତ୍ କାନି ନୁରୁଚେ ।।

✍️ସୁଧାଶ୍ରୀ

ଶ୍ରୀରାମ ନଗର ବ୍ରହ୍ମପୁର ଗଞ୍ଜାମ