*ମୁଦ୍ରା ରାକ୍ଷସ*
ମୁଦ୍ରା ରାକ୍ଷସର କବଳରେ ନର
ପଡ଼େଯେବେ ପାରେ ନାହିଁ ମୁକୁଳି,
ଜୀବନ ଜଞ୍ଜାଳ ହୁଏ ଅସମ୍ଭାଳ
ଦଳି ହୋଇ ଶେଷେ ପଡ଼ଇ ବଳି!

ସର୍ବଦା ଅଭାବ କରି ଦିଏ ଖର୍ବ
ହଜାଏ ବୁଦ୍ଧି ସେ ହରାଏ ନିଧି,
ରୋଗରେ ସଢ଼ଇ ଋଣ ବଢ଼ି ଯାଇ
କାଳ ଗତି ପଥ ଦିଅଇ ରୋଧି,
ବିପଦରେ ପଡ଼ି ଛାଡ଼ୁ ଥାଏ ରଡ଼ି
ଆପଣାର ଯାଏ ପରଠୁ ବଳି,
ମୁଦ୍ରା ରାକ୍ଷସର କବଳରେ ନର
ପଡ଼େଯେବେ ପାରେନାହିଁ ମୁକୁଳି!

ହୁଏ ବାଟ ବଣା ଭୁଲି ଖାଲ ଖଣା
କର୍ମ କାରବାର ଅବାଟେ ଚାଳେ,
ଅତି ପଥେ ଧାଏଁ ଇତି ଆପଣାଏ
ମରଣ ବରଣ କରେ ଅକାଳେ!

ବନ୍ଧୁରେ ବଇରି ଭାବ ଆସେ ଧରି
ଅମୃତ କି ସତେ ପାଲଟେ ବିଷ,
ପଡ଼େ ହାହାକାର ସର୍ବହରା ପୁର
ଶୂନ୍ୟ ହୁଏ ସତେ ଧନ୍ୟ ମଣିଷ,
ରୋଗ ଋଣ ସାଥୀ ରଣ କରାମତି
ଦେଖାଇ ତତ୍କାଳ କରେ ଅର୍ଦ୍ଦଳି,
ଜୀବନ ଜଞ୍ଜାଳ ହୁଏ ଅସମ୍ଭାଳ
ଦଳି ହୋଇ ଶେଷେ ପଡ଼ଇ ବଳି!

ଅର୍ଥ ପଛେ ଧାଇଁ ବ୍ୟର୍ଥ ହେବା କାହିଁ
ଜୀବ ମଧ୍ୟେ ସାର ଜନମ ପାଇ,
ଶାଶ୍ୱତ କର୍ମର ଶକ୍ତି ଅସୁମାର
ସତ୍ୟ ସାଧନାରେ ଯିବା ଆଗେଇ!

*************************
ଅବସରପ୍ରାପ୍ତ ପ୍ରଧାନ ଶିକ୍ଷକ, ଡେଙ୍ଗାଡି, ଗଞ୍ଜାମ।
୯୫୮୩୪୩୮୧୭୪
************************

ମୁଦ୍ରା ରାକ୍ଷସ

ସୀମାଞ୍ଚଳ ପଣ୍ଡା