ଗତବର୍ଷ ମଧ୍ୟ ଏ ସମୟରେ ସେ ଯାଇଥିଲା | ପୁରୁଷୋତ୍ତମ ଅଙ୍କଲଙ୍କୁ ମଧ୍ୟ ପ୍ରତିବର୍ଷ ପରି ଗତବର୍ଷ ନିମନ୍ତ୍ରଣ ଦେଇଥିଲେ ବାପା | କିନ୍ତୁ ଗତବର୍ଷ ଅଙ୍କଲ ଯାଇପାରିଲେନି ସାଙ୍ଗରେ ଯାଇଥିଲା ଟିକି | ଟିକିର ପୁରାନାମ ସୃତିପ୍ରିୟଦର୍ଶିନୀ ଚୌଧୁରୀ | ଗତବର୍ଷ କଳା ଓଡ଼ିଆ ଅନର୍ସ ଗ୍ରାଜୁଏସନ ସାରି ପୋଷ୍ଟ ଗ୍ରାଜୁଏସନ ଆରମ୍ଭ କରିଛି | ଛୋଟବେଳୁ ସହରରେ ରହିଥିବାରୁ ଗ୍ରାମୀଣ ଅଞ୍ଚଳ ପାଇଁ ଟିକିର ଟିକେ ଅଧିକ ଦୁର୍ବଳତା | ସହର ଟିକିଏ ଦୂରରେ | ଗାଁକୁ ଯିବାକୁ ଦୁଇଟି ବସ ବଦଳେଇବାକୁ ପଡେ ଆଉ ଗାଆଁ ପାଖ ବସ ଷ୍ଟାଣ୍ଡରୁ ଛୋଟ ଗାଡ଼ିରେ 15 ମାଇଲ ଯିବାକୁ ପଡିବ | ପୁରୁଷୋତ୍ତମ ଅଙ୍କଲ ସନ୍ଦୀପକୁ ଭାରି ବିଶ୍ୱାସ କରନ୍ତି | ଏମିତିରେ ବି ପ୍ରକାଶ ଜିଦି କରି ଆସିବାକୁ କହିଥିଲା | କେହିଜଣେ ନଗଲେ କଥାଟା ଖରାପ ହେବ | ଟିକିର ପାଠ ଆରମ୍ଭ ହୋଇନି, ଯାଉ ବୁଲିକି ଆସୁ | ଟିକିର ମଧ୍ୟ ଯିବାକୁ ଭାରି ଇଚ୍ଛା | ଗାଆଁ ବୁଲିବ, ପ୍ରକୃତିର ପାଖାପାଖି ରହିବ ପୁଣି ପସନ୍ଦର ମଣିଷ ସହିତ | ମେଘପର୍ବ ଚାରିଦିନ ଆଗରୁ ଗଲେ ସପ୍ତାହେ ଛୁଟି ରାକ୍ଷୀ ପୁନେଇଁ ସାରି ଆସିବ ବୋଲି ସନ୍ଦୀପ ଛୁଟି ନେଇଥିଲା, ଘରକୁ ଚିଠି ମଧ୍ୟ ଲେଖିଦେଇଥିଲା | କିନ୍ତୁ ଛୁଟି ନେବାର ଦିନେ ଆଗରୁ ରବିବାର ପଡିବାରୁ ସେଦିନ ଯିବାକୁ ବାହାରିଲା | ସାଙ୍ଗରେ ଟିକି ଆଉ ସାଙ୍ଗରେ ଅଙ୍କଲ ଦେଇଥିବା ବିଦେଶୀ ସିଗାର, ବାପାଙ୍କର କୁଆଡେ ଭାରି ପସନ୍ଦ | ଅଙ୍କଲ କୁହନ୍ତି ଆଗରୁ ବାପା ସେମିତି ନଥିଲେ ଏଇ କିଛି ବର୍ଷ ଆଗରୁ ଏସବୁ ଆରମ୍ଭ କରିଛନ୍ତି | ସେ ଯାହାବି ହେଉ ଶୀଘ୍ର ବାହାରିଯିବା କଥା ନହେଲେ ସନ୍ଧ୍ୟା ହେଲେ ଗାଁକୁ ଛୋଟ ଗାଡି ମିଳିବା ମୁସ୍କିଲ | ପୁଣି ମଝିରେ ଆଉଗୋଟିଏ ଗାଡି ବଦଳେଇବାକୁ ପଡିବ | ଏ ଗାଡି ଛାଡିବ ଦିନ 12 ଟାରେ ପହଞ୍ଚିବ 3 ଘଣ୍ଟା ଛାଡି ମଙ୍ଗଳ ବଜାର ଛକରେ ସେଥିରୁ ଆଉ ଗୋଟେ ଗାଡି ପୁଣି 3 ଘଣ୍ଟା ଗାଡି ପହଞ୍ଚିବ ଶାମୁକାଗଡ଼ ବସ ଷ୍ଟାଣ୍ଡ ସନ୍ଧ୍ୟା 6 ଟାରେ ତାପରେ ଛୋଟ ଗାଡ଼ିରେ ଗଲେ ଘରେ 8 ଟା ଶୁଦ୍ଧା ପହଞ୍ଚି ହେବ | ଶ୍ରାବଣ ଚାଲିଛି….ବର୍ଷା ହେଉଛି…କେବଳ ମନହେଲେ ବେଳେବେଳେ ଛାଡୁଛି | ଦୁହେଁ ଗାଡ଼ିରେ ବସିଲେ ଗାଡି ଚାଲିଲା |

ଝରକା କଡରେ ଟିକି ଭିତରକୁ ସନ୍ଦୀପ | ସହରଟା ଛାଡି ଜାତୀୟ ରାଜପଥରେ ଗାଡି ଚାଲିଲା | କେଉଁଠି ଛୋଟ ବଜାର ତ କେଉଁଠି ମଫସଲ ଗାଆଁ | ସନ୍ଦୀପ ବାହାରକୁ ଅନେଇ କଣ ସବୁ ଭାବିଚାଲିଥାଏ | ବାହାରେ ଜୋର ବର୍ଷା | କିଛି ସମୟ ଭିତରେ ଦୁହିଁଙ୍କ ଆଖିକୁ ନିଦ ଲାଗିଗଲା | ଗାଡି ପହଞ୍ଚିଲା ମଙ୍ଗଳ ବଜାର ଛକ | ଦୁହେଁ ଗାଡି ବଦଳାଇ ବସିଗଲେ ଶାମୁକାଗଡ଼ ଅଭିମୁଖେ | ଏବେ ଦୁହିଁଙ୍କ ଭିତରେ ଖୁବ ବାର୍ତ୍ତାଳାପ ହେଲା, ଏମିତିରେ ବି ଦୁହେଁ ଦୁହିଁଙ୍କ ଖୁବ ନିଜର | କଥା କଥାରେ ଟିକି ଅନେକ ଥର ପ୍ରେମର ପୃଷ୍ଟି କରୁଥାଏ କିନ୍ତୁ ସନ୍ଦୀପ ବୁଝିବାକୁ ନାରାଜ | ଏମିତି କଥା ହେଉହେଉ କେତେବେଳେ ସନ୍ଧ୍ୟା ହୋଇଗଲା ଜଣାପଡିଲାନି | ମୌସୁମୀ ସମୟ କେତେବେଳେ କେଉଁ ଜାଗାରେ ବର୍ଷା ହେଉଛି ଆଉ କେଉଁଠି ଛାଡୁଛି | ଶାମୁକାଗଡ଼ ପହଁଞ୍ଚୁ ପହଁଞ୍ଚୁ ସମ୍ପୂର୍ଣ୍ଣ ଅନ୍ଧକାର | ଅଳ୍ପ ଅଳ୍ପ ବର୍ଷା ବି ହେଉଛି | ସନ୍ଦୀପ ଛୋଟ ଗାଡି ଖୋଜି ଖୋଜି ଥକିଲା କିନ୍ତୁ ଗାଡି ମିଳିଲାନି | ଗାଁକୁ ଯାଉଥିବା ଗାଡି ସବୁ ଏ ବର୍ଷା ପାଇଁ କିଛି ଦିନ ହେବ ଶୀଘ୍ର ପଳାଉଛନ୍ତି | ବାପାଙ୍କୁ ଚିଠିରେ କାଲି ଆସିବା କଥା କହିଥିବାରୁ ଗାଡି ବ୍ୟବସ୍ଥା ବି କରାହେଇନି | ନହେଲେ କମ ସେ କମ ଶଗଡିଆଟିଏ ଆସିଥାନ୍ତା |

ଶାମୁକାଗଡ଼ ପର୍ବତ ଘେରା ଅଞ୍ଚଳ | କିଛି ବର୍ଷ ଆଗରୁ ଏଇ ପାଖରେ ଥିବା ପର୍ବତ ସବୁକୁ ହିଲ ଷ୍ଟେସନ କରାଯାଇଛି | ପାଖରେ କିଛି ୱାଟରଫଲ ମଧ୍ୟ ଥିବାରୁ ପର୍ଯ୍ୟଟକଙ୍କ ଭିଡ଼ ଲାଗିରହେ | ଗାଡି ନ ମିଳିବାରୁ ସନ୍ଦୀପ ପାଖ ଝୁମ୍ପୁଡ଼ି ହୋଟେଲରୁ ଖାଇବା ଆଣିଲା ଆଉ ଦୁହେଁ ବସି ଖାଇଲେ | ଖାଇବା ଭଲ ହୋଇନଥିଲା କିନ୍ତୁ ଟିକିକୁ ଏସବୁ ଫରକ ପଡୁନଥିଲା | ସବୁ କିଛି ନୂଆ ନୂଆ ଲାଗୁଥିଲା | ଏମିତି ସ୍ଥିତିରେ ସେ ଆଗରୁ କେବେ ପଡିନି, ଆଉ ସାଙ୍ଗରେ ଏମିତିରେ ବି ସନ୍ଦୀପ | ଡରିବା ତ ଦୂରର କଥା ସେ ଏ ସ୍ଥିତିର ମଜ଼ା ନେଉଥିଲା | ହିଲ ଷ୍ଟେସନ ହେଲେ ମଧ୍ୟ ରହିବା ପାଇଁ ହାତ ଗଣତି କେତୋଟି ହୋଟେଲ | ବହୁତ ଖୋଜାଖୋଜି ପରେ ବି କୌଣସି ରୁମ ମିଳିଲାନି | ଶେଷରେ ଦୁହିଁଙ୍କୁ ଶାମୁକାଗଡ଼ ପାଖାପାଖି ସନ୍ଦୀପର ଏକ ସାଙ୍ଗର ଘରକୁ ଯିବାକୁ ପଡିଲା | ମେଟ୍ରିକ ପଢିଲା ବେଳର ସାଙ୍ଗ | ଗରିବ ପିଲାଟି ବିବାହ ସରିଛି | ଝିଅଟିକୁ ଦୁଇବର୍ଷ ହେବ | ଟିକି ଆଉ ସନ୍ଦୀପ ଗୋଟେ ଛତା ନେଇ ଚାଲିଲେ…ଯାଇ ପହଞ୍ଚିଲେ ସାଙ୍ଗ ଘରେ | ସାଙ୍ଗ ଆସି କବାଟ ଖୋଲି ସନ୍ଦୀପକୁ ଦେଖି ଭାରି ଖୁସି ହେଲା | ଚାଳ ଝୁମ୍ପୁଡ଼ି ଘର | ତଥାପି ଦୁହିଁଙ୍କ ପାଇଁ ଗୋଟିଏ କକ୍ଷ ସଫା କରିଦେଲା | ଟିକିକୁ ସନ୍ଦୀପ ପଚାରିଥିଲା ଆଜି ଏମିତି ଅସୁବିଧାରେ ମୋ ସହ ଟିକେ ଆଡ଼ଜଷ୍ଟ କରିକି ରହିଯିବ ନା…? ଟିକି ତ ମନେମନେ ଭାରି ଖୁସି କିନ୍ତୁ ଉପର ମୁହାଁ ମୁହଁ ଶୁଖେଇକି କହିଦେଲା ହଉ ଠିକ ଅଛି | ସେଥିପାଇଁ ସନ୍ଦୀପ କେତେ ବୁଝେଇଲାଣି ସେତେବେଳୁ | ଦଉଡିଆ ଖଟଟା ଅବଶ୍ୟ ଓସାରିଆ ଅଛି | ଓଦା ପୋଷାକ ବଦଳେଇ ଖଟରେ ଦୁହେଁ | ବାହାରେ ପ୍ରବଳ ବର୍ଷା | ବେଳେବେଳେ ବିଜୁଳି ଚମକି ଘଡଘାଡ଼ ହେଉଥାଏ ଆଉ ଟିକି ଆଉ ଟିକେ ସନ୍ଦୀପ ପାଖକୁ ଲାଗିଯାଉଥାଏ ଆଉ ଡରଡର ସ୍ୱରରେ କହୁଥାଏ ମୋତେ ଭାରି ଡର ଲାଗୁଛି | ମନରେ କିଛି ନଥିଲେବି ସନ୍ଦୀପ ତାକୁ ବୁଝେଇବାକୁ ଯାଇ ଟିକିଏ ଆଉଜେଇ ଆଣି କହିଥାଏ ତମେ ଆଖି ବନ୍ଦ କରି ଚୁପ ଚାପ ଶୋଇପଡ….. ମୁଁ ଅଛି ପା ଡ଼ରୁଛ କାହିଁକି….? ହଠାତ ଗୋଟେ ବିକୃତର ଶବ୍ଦ ଚାରିଆଡେ ଖେଳିଯାଇ ପାଖରେ କେଉଁଠି ବଜ୍ରାଘାତ ହେଲା | ଭାରି ଭୟଙ୍କର ଶବ୍ଦ ହେଲା | ଡରରେ ଟିକି ଆଖିରୁ ଲୁହ ଆସିଗଲା ଆଉ ସେ ସନ୍ଦୀପ ବେକତଳେ ମୁହଁ ଜାକି ସନ୍ଦୀପକୁ ଜୋରରେ ଜାବୁଡ଼ିଧାରି ସକେଇ କାନ୍ଦିବାକୁ ଲାଗିଲା | ସନ୍ଦୀପ କଣ କରିବ ବୁଝିପାରିଲାନି, ସେ କେବଳ ଟିକିକୁ ଜାବୁଡି ଧରିଥାଏ | ଏସବୁ ଭିତରେ କେତେବେଳେ ସନ୍ଦୀପର ଓଠ ଟିକିର ମଥାକୁ ଛୁଇଁଲାଣି | ପରିସ୍ଥିତି ଶାନ୍ତ ହେଉ ହେଉ ଦୁହିଁଙ୍କୁ ନିଦ ହେଇଗଲା | ସକାଳୁ ଦୁହେଁ ସାଙ୍ଗ ପାଖରୁ ବିଦାୟ ନେଇ ଗାଆଁ ଅଭିମୁଖେ ଚାଲିଲେ | ପାଖାପାଖି ବସିଥିଲେ ମଧ୍ୟ ଗତ ରାତିର ଘଟଣା ଯୋଗୁଁ ଲାଜରେ ଦୁହେଁ ଦୁହିଁଙ୍କୁ ଆଖି ମିଶେଇ ପାରୁନଥାନ୍ତି | ସନ୍ଦୀପର ନଜର ଯେତେବେଳେ ଟିକି ଆଖିରେ ପଡେ, ଟିକି ସେତେବେଳେ ଲାଜରେ ଜଳି ପୋଡି ପାଉଁଶ ହୋଇଯାଏ |

ସକାଳ ସୁରୁଜ ଉଉଁଛି ସେ ପେନ୍ଥାପେନ୍ଥା ନହକିଆ ବାଦଲ ଭିତରୁ ଧୂସରିଆ ହୋଇ | ଧଳା ଯବନିକା ପଛରେ ଲାଲ ଟହଟହ ଦିଶୁଥିବା ମେଘୁଆ ସୂର୍ଯ୍ୟ ଟିକେ ଦିଶୁଛି ପୁଣି ମିଳେଇ ଯାଉଛି| ଶାମୁକାଗଡ଼ରୁ ଗାଡି ଚାଲିଲା ଉତ୍ତର ମୁଖା ଗାଆଁ ଅଭିମୁଖେ | 15 ମାଇଲ କିନ୍ତୁ ରାସ୍ତା ଖରାପ ଯୋଗୁଁ ଟିକିଏ ଅଧିକ ସମୟ ଲାଗେ | ଏ ରାସ୍ତା ନାଆଁ ମାଟି ସଡକ, ମାନେ ଆଗରୁ ମାଟି ସଡ଼କ ଥିଲା ଏଇ ଦୁଇ ଚାରି ବର୍ଷ ଆଗରୁ ପିଚୁ ହୋଇଥିଲା | କେମିତି କେଜାଣି ଦୁଇଟା ବର୍ଷାରେ ପିଚୁ ଉଠି ମେଣ୍ଟାଲ ବାହାରି ପଡିଛି | ରାସ୍ତା ଗୋଟେ କଡରେ ଲମ୍ବା ଲମ୍ବା କ୍ଷେତ ଆଉ ଟିକିଏ ଦୂରରେ ସେଇ ଗାଆଁ ଦେଇ ଆସିଥିବା କଜଳ ଲାଞ୍ଜିଆ ଝରଣା | ସେ ଝରଣା ଡେଇଁ କିଛି କ୍ଷେତ ଯେମିତିକି ଗୋଟେ ପରେ ଗୋଟେ ଲଦି ହେଇଛନ୍ତି ଆଳୁବସ୍ତା ପରି ତାକୁ ଲାଗି ମାଫସଲି ଜନବସତିଟା ଏଇ ଏବେ ନିଦରୁ ଉଠୁଛି | ଦୂରରେ ପାହାଡ଼ଟା ମୁହଁ ଧୋଇନି ଲେଞ୍ଜରା ଲାଗିଛି | ଠାଏଁ ଠାଏଁ ଲମ୍ବା ଲମ୍ବା ତାଳଗଛ ନଇଁ ପଡୁଛି ଉଠୁଛି ପୁଣି ପଡୁଛି କହୁଛି ଆଉ ନଇଁ ଯିବି ପଛେ ଭାଙ୍ଗିବି ନାଇଁ | କ୍ଷେତ ସବୁ ଲହଡି ମାରୁଛନ୍ତି ବହପ ଦେଖେଇ କେତେବେଳେ ପଛକୁ ଯାଉଛନ୍ତି କେତେବେଳେ ଆଗକୁ ଯାଉଛନ୍ତି, ଦେହରୁ ପାଣି ଝାଡୁଛନ୍ତି | ଚଢେଇ ଦଳେ ଉଡୁଛନ୍ତି…ଉଡିଯାଉଛନ୍ତି ମେଘୁଆ ଆକାଶକୁ ଚାହିଁ ହସିହସି, କହୁଛନ୍ତି ହେଇ ଦେଖ ଲୋକଗୁଡ଼ା କେମିତି ଚାଲୁଛନ୍ତି ଉଡୁନାହାନ୍ତି | ଆକାଶଟା କେଉଁଠି କଳା କଳା ଦିଶୁଛି ଆଉ କେଉଁଠି ଚନ୍ଦା ହୋଇଯାଇଛି | ବାଦଲ ଗୁଡା ଦୌଡୁଛନ୍ତି ସେ ପାଇକରାଇ ରଜାର ଘୋଡା ଦୌଡ଼ିଲା ପରି ଲାଗୁଛି ଏଇ ଧକ୍କା ହେଇଯିବ ଆଗରେ | ହାଲୁକା ମେଘୁଆ ପବନ ଆସୁଛି ଗାଡ଼ିଟାକୁ ଥରେଇ ଦେଇଯାଉଛି | ଆଉ ରାସ୍ତାର ଆରକଡ଼ ଜଙ୍ଗଲ ଲାଗିଛି ଏକର ଏକର | ଶାଳ ଜଙ୍ଗଲଟା ଭିତରେ ଖଞ୍ଜାଖଞ୍ଜି କେତେ ଗଛପତ୍ର ଲତା ଆଗକୁ ଆଗକୁ ନଣ୍ଡା ପାହାଡକୁ ଲାଗିଛି | ଠାଏଁ ଠାଏଁ ସେ ଖଣ୍ଡିଆ ଗୁଚ୍ଛା ଭିତରେ ଜଙ୍ଗଲୀ ଛତୁ ସବୁ କଣେଇ ଚାହୁଁଛନ୍ତି ରାଗି ରାଗି | ଟିକି ଦେଖୁଛି ଯେ ଦେଖୁଛି ସେ ଦୂରରୁ ପାଖକୁ ବେଳେବେଳେ ପାଖରୁ ଦୂରକୁ | ପଟଳରେ ଚିତ୍ରସବୁ ଗୁନ୍ଥି ହେଇଯାଉଛନ୍ତି ଆଉ ରହୁଛନ୍ତି ଯାଇ ମିଠା ମିଠା ସ୍ମୃତି ପାଠାଗାରରେ | ଗାଡି ଚାଲିଛି.. ସେ ଦୂରରୁ ଦଲକାଏ ପବନ ଆସିଲା ଯେ କ୍ଷେତଟା ଲହଡିଟିଏ ମାରି ଆସି ଗାଡ଼ିରେ ପିଟି ହେଇଗଲା | ଟିକି ଦେହଟା ଶୀତେଇ ଦେଲା ଆଉ ସେ ସଙ୍ଗେ ସଙ୍ଗେ ଅଜାଣତରେ ସନ୍ଦୀପର ପାପୁଲିକୁ ଜାବୁଡି ପକେଇଲା | ଗାଡି ଯାଇ ଲାଗିଲା ଗାଁରେ | ସନ୍ଦୀପ ଆଉ ଟିକି ଘରକୁ ଗଲେ | ଘରେ ଏମାନଙ୍କୁ ଦେଖି ସମସ୍ତେ ବହୁତ ଖୁସି | ସାନ ଭଉଣୀ ଟିକିକୁ ନେଇଗଲା |

କ୍ରମଶଃ.....

ମୌସୁମୀ ଡାଏରୀ

ଦ୍ଵିତୀୟ ଭାଗ