କବିତା - ମୌସୁମୀ ବର୍ଷା
କବି - ସୌମ୍ୟ ରଞ୍ଜନ ନନ୍ଦ
କେନ୍ଦୁଝର
୯୫୮୩୭୦୧୫୩୧
*****************************

ଆଷାଢ଼ର ଶେଷେ ଶ୍ରାବଣପ୍ରାରମ୍ଭେ
ଧରଣୀମୋ ଆତ୍ମହରା,
ପୁଲକିତ ହେବ ସବୁଜିମା ବେଶେ
ଦେଖିବ ଫୁଲର ପସରା ।୧।।

ସୁରୁଜ ସାଥିରେ ଲୁଚକାଳି ଖେଳେ
କଳାକଳା ମେଘବାଦଲ,
ପବନ ସାଥିରେ ମୟୂର କି ! ନାଚେ
କି!ସୁନ୍ଦର ସୃଷ୍ଟି ସ୍ରଷ୍ଟାର। ୨।।

ସଜ ହୋଇଲେଣି ବେଙ୍ଗବେଙ୍ଗୁଲୀଏ
ଗାଇବେ ମଧୁର ଗୀତ,
ଦୂରେ ଘଡଘଡି ମୁରୁକି ହସୁଛି
ବିଜୁଳିକୁ କରି ମିତ। ୩।।

ଦାଣ୍ଡ ଧୂଳି ନିଶ୍ଚେ ଭାବିଛି ମନରେ
ତୁମ ସହ ଖେଳିବାକୁ ,
ପକୃତିର ରାଣୀ ଦେଖିଛି ସପନ
ବନ୍ଧୁଭାବେ ପାଇବାକୁ। ୪।।

କୂପକି ତଡ଼ାଗ ନଦୀ ପୁଷ୍କରିଣୀ
ଏକାକାର ହୋଇ କୁହନ୍ତି,
ତୁମ ପାଦ ଦିଅ ଆମ ଭୁବନରେ
କୂଳ ଲଂଘି ଟିକେ ବୁଲନ୍ତି। ୫।।

ଚାରାଗଛଟିଏ ମହାଦ୍ରୁମ ହେବ
ରଖିଅଛି ସିଏ କାମନା,
ଚାଷୀଭାଈ ମୋର ଦୁଇହାତେ ନେବ
ଭିଜାମାଟିର ସେ ବାସନା। ୬।।

ଧରଣୀ ତା ଦେବ ଅମୃତ ଆସନ
ପ୍ରେମମୟ ସ୍ବର୍ଗସୁଧାକୁ,
ଆସିଯାଅ ତୁମେ ଚଢ଼ି ପକ୍ଷୀରାଜ
ମେଣ୍ଟାଅ ସଭିଙ୍କ ତୃଷ୍ଣାକୁ। ୭।।

ଚାତକ କହୁଛି ରହିବି ଚାହିଁକି
ପିଇବାକୁ ସ୍ୱର୍ଗସୁଧା,
ସ୍ୱର୍ଗୁ ଆସେ ଝରି ପିଏ ମନଭରି
କେହି ନାହିଁ ଦେବେ ବାଧା। ୮।।

ମର୍ତ୍ତ୍ୟବାସୀଙ୍କର ଅସହ୍ୟ ଯନ୍ତ୍ରଣା
ହୋଇଲାକି ଦୃଷ୍ଟିଗୋଚର,
ପ୍ରେମ ବରଷିଲ ସନ୍ତୁଷ୍ଟ କରିଲ
ଧନ୍ୟ ସୁଧା ତୁମେ ସ୍ବର୍ଗର। ୯।।

ଗରିବ ହାତରେ ଲଙ୍ଗଳ କ୍ଷେତରେ
ଚାଷୀ ଫଳେଇବ ସୁନା,
ମୌସୁମୀ ବର୍ଷାରେ ଯୁଆଳି କାନ୍ଧରେ
ଚାଷୀକୁ ବିଦେଶ ମନା ।୧୦।।

ଫୁଟାଇବ ହସ ହସୁଥିବ କ୍ଷେତ
ଧରଣୀମୋ ସବୁଜିମାରେ,
ବସୁଧା ହସିବ ଶସ୍ୟଶାଳୀ ହୋଇ
ଧନରତ୍ନ ସମ୍ପଦରେ ।୧୧।।

ସବୁଜ ଶିଶୁଟି ବଡ଼ ହୋଇଯିବ
ଖୁସି ଦେବ ଆଣି ବୁଣି,
ପାଣିକାଦୁଅରେ ହସୁଥାଏ ଚାଷୀ
ସପନକୁ ସତମଣି। ୧୨।।

ରଖିଛି ବିଶ୍ୱାସ ପେଟ ଚାଖଣ୍ଡକ
ବର୍ଷସାରା ପୁରିଯିବ,
ଅମାର ଭିତରେ ସାଇତିବ କିଛି
ଝିଅଟା ଡାକ୍ତରୀ ପଢ଼ିବ। ୧୩।।

ନିଅଣ୍ଟ ପଡ଼ିଲେ ଚାଷୀଟା ଭାବିଛି
କିଛି ଜମି ବିକିଦେବ,
ପୁଅଟି ତାହାର ଭାରି ପାରିବାର
କୃଷି ବୈଜ୍ଞାନିକ ହେବ। ୧୪।।

ଓଡ଼ିଶାର ଭାଈ ଭଉଣୀ ଯଦିଓ
ଉଚ୍ଚପଦେ ରହିଅଛ,
ବାପାଙ୍କର ନିଶ୍ଚେ ବିଲର ସପନ
ସତକରି ଦେଖାଇଛ। ୧୫।।

ଭୁଲି ହେବନାହିଁ ଗାଁ,ଚାଷୀଟିର
ଅଛପର ଚାଳ ଦୁଃଖ,
ତଥାପି ଚାଷୀକୁ ମୌସୁମୀ ବରଷା
ଦେଇଯାଏ କେତେ ସୁଖ। ୧୬।।

ସର୍ବଜୀବଠାରେ ଦେଖାଇଛ ଦୟା
ଧନ୍ୟବାଦ ସ୍ୱର୍ଗସୁଧା,
ତୁମ ସ୍ପର୍ଶମାତ୍ରେ ମେଘର ମହ୍ଲାର
ସବୁଜ କରୁଛି ବସୁଧା। ୧୭।।

###

ମୌସୁମୀ ବର୍ଷା (ଏକ ଚାଷୀର ସପନ)

ସୌମ୍ୟ ରଞ୍ଜନ ନନ୍ଦ