ସଂଗ୍ରାମୀ ବଚନ

******************
ଆରେ ଗୋରା ସରକାର!
କେତେ ଦିନ ଆଉ ରହିବ?
ଈଶ୍ବରଙ୍କ ଯହିଁ ଅନ୍ତ ଘଟିଥିଲା,
ତୁମେ କି ଅମର ହୋଇବ?

ମୂର୍ଖ ଭାବୁଥିଲ ବୋଲି,
ନିଜ ଆୟତ୍ତରେ ରଖିଲ,
ଇଂରାଜୀ ଭାଷାର ମହତ୍ତ୍ବ ଦେଖାଇ,
ଆଞ୍ଚଳିକ ଭାଷା ଖାଇଲ।

ମାରିଦେଲ ସ୍ବାଧୀନତା,
କଲ ନଷ୍ଟ ଦେଶ ଏକତା,
ମୁହଁ ଖୋଲିଦେଲେ କଲ ଅତ୍ୟାଚାର,
ଭାଙ୍ଗିଲ ସରବ ସମତା।

କଲ ପଶୁ ବ୍ୟବହାର,
ଛଡାଇଲ ମୁଖେ ଆହାର,
ହଜାଇ ଦେଇକି ଆମ ଅଧିକାର,
କରିଲ ଜାତିକୁ ପ୍ରହାର।

ଲୋଭ ଦୃଷ୍ଟି ପକାଇଲ,
ସ୍ବଦେଶେ ମହଲ ଗଢିଲ,
ବାଣିଜ୍ୟ ବାହାନେ କରିଲ ଶାସନ,
ଜାତୀୟତା ପ୍ରେମ ଲୁଟିଲ।

ଆରେ ଗୋରା ସରକାର!
ଏ ଜାତି କଅଣ ଡରିବ?
ମରିବାକୁ ଯିଏ ସର୍ବଦା ପ୍ରସ୍ତୁତ,
ତାକୁ କଣ ମାରି ପାରିବ?

ଲୁଟିନିଅ ଅଛି ଯାହା,
ଏ ଜାତି ନୋହିବ ଗରିବ,
ମୃତ କୁ ମାରିକି ବାହାଦୂରୀ କିଆଁ?
ସଚ୍ଚୋଟରେ କେବେ ଲଢିବ?

ଗାନ୍ଧୀ ଡାକରାକୁ ଶୁଣ,
ହୃଦୟ ଥରେକି ତୁମର?
ଜଣେ ଯଦି ଭାଙ୍ଗେ ମୂଳଦୁଆ ତମ,
ବିନ୍ଦୁ ପଛେ ଅଛି ସାଗର।

ଏ ଦେଶ ନୁହେଁ ତୁମର,
କର ଯେତେ ସ୍ବାର୍ଥ ସାଧନ,
ଏ ସୁପ୍ତ ଜାତିର ନିଦ୍ରା ଭାଙ୍ଗିଗଲେ,
ବୁଜିବ ତୁମର ନୟନ।

___________________________________________
ଲେଖନୀ ଚାଳନା: ସୌମ୍ୟ ରଞ୍ଜନ ରାୟ

ସଂଗ୍ରାମୀ ବଚନ|| ଓଡିଆ କବିତା

ଜୀବନ ଦେବାକୁ ପ୍ରସ୍ତୁତ ଯେ, ସେ ବା କାହାକୁ ଡରିବ?