ଆଜିକାଲି ଏକା ବସିଲେ, ପିଲା ଦିନ କଥା ତକ ଖୁବ୍ ମନେ ପଡେ...
ପିଲାଦିନର ସବୁ ଦୁଷ୍ଟାମୀ,ସବୁ ଖେଳ... ଗିଲ୍ଲି ଡଣ୍ଡା,ଲଣ୍ଠନ ଚୋର,ଲୁଚକାଳି, ଛୁଆଁ ଛୁଇଁ,ବିଷ ଅମୃତ,ବିନା ନିୟମ କାନୁନ୍ ର କବାଡି କୁ ନିଜ ତିଆରି ରୁଲ ର କ୍ରିକେଟ ମ୍ୟାଚ୍...

ସେ କଁଇଚି ସାଇକେଲ, ଆମ୍ବ ତୋଟାର ଚୋରି କଞ୍ଚା ଆମ୍ବକୁ ଚୋରି ପିଜୁଳିର ସ୍ଵାଦ ଯେମିତି ସ୍ବର୍ଗ ସୁଖ ଥିଲା, ବ୍ଲାକ ଆଣ୍ଡ ହୁଆଇଟ ଟିଭି , ତା ପରେ କଲର୍ ଟିଭି କୁ ଡୀ.ଟି.ଏଚ ଜମାନା...ଦୂରଦର୍ଶନ ର ରଙ୍ଗୋଲି ପ୍ରୋଗ୍ରାମ୍ କୁ ଡୀ.ଟି.ଏଚ ର ସୋନପରି,ସାକାଲାକା ବୁମ୍ ଵୁମ୍, ଚନ୍ଦା ମାମା,ଶକ୍ତିମାନ,ହାତିମ୍,ଆହଟ୍,ଫିର କୋଇ ହୈ ଏମିତି ଗୁଡ଼ାଏ ପ୍ରୋଗ୍ରାମ ।
ଶନିବାର ଦିନ ସନ୍ଧ୍ୟାବେଳେ ପୁଣି ଦୂରଦର୍ଶନ ରେ ବିକ୍ରମ ବେତାଲ ସହ ମୀନା କାର୍ଟୁନ୍ କୁ ଓଡ଼ିଆ ଗିତିମାଳା,ରବିବାର ସ୍କୁଲ ଛୁଟି କୁ ଟିଭି ରେ ଓଡ଼ିଆ ମେଟିନି ଶୋ' ଆଉ ଯଦି ପ୍ରୋଗ୍ରାମ ରେ ସିଦ୍ଧାନ୍ତ–ରଚନା ଫିଲ୍ମ ଟେ ଚାଲିଛି ତ ମଜା ଡବଲ୍ ହେବା ଟା ସୁନିଶ୍ଚିତ ।

ସ୍କୁଲ ଜୀବନ ବି କିଛି କମ୍ ମଜାଦାର ନ ଥିଲା... ପାଠପଢା କୁ କିଏ ସେତେ ମନେ ପକଉଛି ଯେ, ବେଶି ଟା ସେ ମିଡ ଡେ ମିଲ ମନେ ପଡ଼େ, ତା ପରେ ଦିଦି ମାନଙ୍କୁ ଠୁ ପାହାର ପାଇ ସାରି ଘରକୁ ଆସି ବୋଉ ଠୁ ପ୍ରସାଦ ଗ୍ରହଣ,ସେଠୁ ଟିକେ ପାଣି ଗ୍ରହଣ ପରେ ଭୋଜନ ଆସନ।ଆସନ ରୁ ଉଠୁ ଉଠୁ ସିଧା ଖେଳ ପଡିଆ... ସେଠି ବାତ୍ରାମି କରି ଗୁଡ଼ାଏ ଜାଗାରେ ଖଣ୍ଡିଆ ଆୱାର୍ଡ଼ ନେଇ ଘରକୁ... ଘରକୁ ଆସି ପୁଣି ବାବାଙ୍କ ଠୁ ଡବଲ ପ୍ରସାଦ ଗ୍ରହଣ ।
ଏମିତି ଥିଲା ଆମ ପିଲା ଦିନ, ୨ ଟଙ୍କା ପାଇଗଲା ପରେ ଲାଗୁଥିଲା ଯେମିତି ଆମେ ଗୋଟେ ଗୋଟେ ଅମ୍ବାନୀ ... ଗୁରୁଚେଲା, କାଣ୍ଟା ଲଗା ଲଟେରୀ, ଟ୍ରମ୍ପ କାର୍ଡ...ଏମିତି କେତେ ଅନର୍ଥକ ଜିନିଷ । ରେଡିଓ ର ଦୁନିଆ ରେ ହଜି ଯାଉଥିଲା ଛୋଟିଆ ଚିନ୍ତାହିନ ମନ। ଖରାଛୁଟି ରେ ମାମୁଘର ଯାଇ ଅଜା ଆଈ ପାଖରେ ରହିବା ଅଳି କୁ , ଦିନ ସାରା ଘରେ ରହି ପୋଖରୀ ରେ ଗାଧେଇବା, ପଖାଳ କଂସା ଟେ ଖାଇ ଦେଇ ଗାଆଁ ଦାଣ୍ଡ ରେ ବୁଲିବା ଆଉ ସବୁ ଦୁଃଖ କୁ ପକେଟ୍ ରେ ପୁରେଇ ନିର୍ଭୀକ ନିଶ୍ଚିନ୍ତ ଜୀବନ ବଞ୍ଚିବା ଦିନ ବି ଗୋଟେ ଅଲଗା ସ୍ବର୍ଗ ଥିଲା ।

ଏବେ ବସି ଭାବେ...ମୁଁ ପୁଣି ଫେରି ଯାଆନ୍ତି କି ଆଉ ଥରେ ମୋ ପିଲାଦିନ କୁ?? ବଞ୍ଚି ପାରନ୍ତି କି ସେ ନିଶ୍ଚିନ୍ତ ଦୁନିଆ କୁ??? ହେଲେ... ସମୟ ର ସ୍ରୋତ କୁ କିଏ କାଟି ପାରିଛି...ଏଇ ଲହରୀ ରେ ଭାସି ଆଜି ପ୍ରାପ୍ତ ବୟସ ର ଜୀବନ ତଟ ରେ ଜୀବନ ଲାଗି ଯାଇଛି,ଏଠୁ କେବଳ ପିଲାଦିନ କୁ ସ୍ମୃତି ଜହ୍ନ ପରି ଦେଖି ହୁଏ,ହେଲେ ଛୁଇଁ ହୁଏନି... ସତରେ ସମୟ ବଡ଼ ବଳବାନ...ଏବେ କେବଳ ସ୍ମୃତି ଦରିଆ ରେ ଭସିବା ହିଁ ସମ୍ଭବ ତଥାପି ଏତିକି କହିବି... ଭାରି ମନେ ପଡେ ମତେ ମୋ ପିଲା ଦିନ...।

ଆମେ ବୋଧେ ଗୋଟେ ଅଲଗା ପିଢ଼ିର ପିଲା... ଆମେ ସରକାର ବଦଳିବା ଦେଖିଛେ, ବ୍ଲାକ ଆଣ୍ଡ ହୁଆଇଟ ଟିଭିକୁ କଲର୍ ରେ ବଦଳିବା ଦେଖିଛେ, ଦୂରଦର୍ଶନ କୁ ଡିଶ୍ ରେ ବଦଳିବା ଦେଖିଛେ,ରେଡିଓ କୁ ଏମ୍ପି ୩ ପ୍ଲେୟାର ହେବାର ଦେଖିଛେ, ଲକ୍ ଡାଉନ୍, ନୋଟ ବନ୍ଦୀ, ମହାମାରୀ, ଆଉ ଏବେ ଯୁଦ୍ଧ ଦେଖୁଛେ...।

ସ୍ମୃତିର ଗୋଧୂଳି

...