ରୁଚିକା କହିଲେ , " ହଁ ରେ ସମୁ ତୁ ଠିକ୍ କହିଛୁ । ସମସ୍ତେ ଆମକୁ ଅନାଥ କୁହନ୍ତି । ମୁଁ ତ ଗର୍ବ ରେ କହିବି ଆମେ ଅନାଥ ନୁହେଁ । ନିଜର ପରିବାର ସିନା ନାହିଁ , ରକ୍ତ ସଂପର୍କୀୟ ସିନା କେହି ନାହାଁନ୍ତି କିନ୍ତୁ ତା ଠାରୁ ବଡ ହୃଦୟରୁ ଗଢି ଉଠିଥିବା ସଂପର୍କର ଲୋକମାନେ ଆମ ପାଖରେ ଅଛନ୍ତି । ଯେଉଁମାନେ ଆମ ଦୁଃଖ , କଷ୍ଟ , ସୁଖ ରେ ସାଥ୍ ଦେଉଛନ୍ତି । ଏ ଆଶ୍ରମର ପରିଚାଳିକା ମାନେ ଆମକୁ ବାପା , ମା' ର ସ୍ନେହ ଦେଉଛନ୍ତି , ଆଶ୍ରମର ପିଲାମାନେ ଆମକୁ ଭାଇ ଭଉଣୀ ର ସ୍ନେହ - ସମ୍ମାନ - ଭକ୍ତି ଦେଉଛନ୍ତି । ସବୁଠାରୁ ବଡ଼ କଥା ହେଉଛି ଯେ ଆଶ୍ରମର ସମସ୍ତ ସଦସ୍ୟ ମାନଙ୍କ ଭିତରେ 'ଏକତା ଭାବ' ଭରି ରହିଛି । ସମସ୍ତ ଙ୍କ ମଧ୍ୟରେ ଶାନ୍ତି ଭାବ ରହିଛି । ଏହା ଠାରୁ ଅଧିକ ଆଉ ଜୀବନରେ କ'ଣ ଦରକାର କହ । " ଏହି ସବୁ କଥାବାର୍ତ୍ତା ଭିତରେ ' ଖୁସି ' ବୋଲି ଜଣେ ଛୋଟ ଝିଅ ଆସି କହିଲା , " ସମୃଦ୍ଧି ଦିଦି ତୁମକୁ ଲତା ମାଉସୀ ଡାକୁଛନ୍ତି । ଆଶ୍ରମକୁ ବଡବାବୁ (ଆଶ୍ରମର ମୁଖ୍ୟ ) ଆସିଛନ୍ତି । ଶୀଘ୍ର ଚାଲ ତୁମେ । " ଏହା ଶୁଣି ରୁଚିକା ଓ ସମୃଦ୍ଧି ଶୀଘ୍ର ଶୀଘ୍ର ଲତା ମାଉସୀ ଙ୍କ ପାଖକୁ ଗଲେ ।

                 ରୁଚିକା ଓ ସମୃଦ୍ଧି ବଡବାବୁ ଙ୍କୁ ନମସ୍କାର କରିଲେ । ବଡବାବୁ ସମୃଦ୍ଧି କୁ ପାଖକୁ ଡାକି କହିଲେ , " ଲତା ଠାରୁ ତୋ ମାର୍କ୍ ବିଷୟରେ ଜାଣିଲି । ବହୁତ ଖୁସି ଲାଗୁଛି ରେ । ଭଗବାନ ତୋ ଇଚ୍ଛା ପୂରଣ କରନ୍ତୁ । ଏମିତି ଆଗକୁ ଆଗକୁ ଉନ୍ନତି କର୍ । ଆର ଥର ଭଳି ଏଥର ମଧ୍ୟ ତୋତେ ମୁଁ ଆଗକୁ ପଢିବା ପାଇଁ ସାହାଯ୍ୟ କରିବି । କିନ୍ତୁ ତୋ ନିଜ ଖର୍ଚ୍ଚ ତୁ ନିଜେ ବୁଝିବୁ । ମୁଁ ତୋର ପଢା ଖର୍ଚ୍ଚ ସବୁ ବୁଝିବି । ତୋ ପାଇଁ କିଛି କାମ ମଧ୍ୟ ଖୋଜି ଦେବି ଯାହାଦ୍ୱାରା ତୁ ତୋ ନିଜ ଖର୍ଚ୍ଚ ନିଜେ ବହନ କରି ପାରିବୁ । " ଏତିକି କଥା ଶୁଣି ସମୃଦ୍ଧି ର ଖୁସି ରେ ଆଖି ଛଳ ଛଳ ହୋଇଗଲା । ସେ ବଡବାବୁ ଙ୍କ ପାଦ ପାଖରେ ବସି ପାଦ ଛୁଇଁ କହିଲା , " ବଡବାବୁ ମୁଁ ଆପଣଙ୍କ ଋଣ କେବେହେଲେ ମଧ୍ୟ ଶୁଝି ପାରିବି ନାହିଁ । ଆପଣଙ୍କୁ ବହୁତ ବହୁତ ଧନ୍ୟବାଦ । " ବଡବାବୁ କହିଲେ , " ଆରେ ତୁ ମୋତେ ଧନ୍ୟବାଦ କ'ଣ ପାଇଁ ଜଣାଉଛୁ । ତୁମେ ମାନେ ତ ମୋ ଝିଅ ଭଳି । ଆଉ ଯଦି ତୁ ଧନ୍ୟବାଦ ଦେବା ପାଇଁ ଚାହୁଁଛୁ ତାହେଲେ ଲତା ଙ୍କୁ ଧନ୍ୟବାଦ ଜଣା । ସିଏ ହିଁ ମୋତେ ଆଉ ଟିକିଏ ପୂର୍ବରୁ ତୋ ବିଷୟରେ ଫୋନ କରି କହିଲେ ଏବଂ ପଢାଇବା ପାଇଁ ଅନୁରୋଧ କରିଥିଲେ । "

             ସମୃଦ୍ଧି ବଡବାବୁ ଙ୍କୁ କହିଲା , " ବଡବାବୁ ଲତା ମାଉସୀ ତ ଆମମାନଙ୍କ ମା' ବାପା ସବୁ କିଛି । ଆଉ ଆପଣମାନେ ତ ଆମର ଭଗବାନ । ତେଣୁ ଧନ୍ୟବାଦ ଦେଇ ଆପଣଙ୍କ ସାହାଯ୍ୟ ର ଅପମାନ କରିବା କୁ ମୁଁ ଚାହୁଁ ନାହିଁ । ଯଦି କେବେ ମୁଁ ଆପଣଙ୍କ କୌଣସି କାମରେ ଆସିପାରିବି ତାହେଲେ ମୁଁ ବହୁତ ଖୁସି ହେବି । ମୁଁ ଆପଣଙ୍କୁ କଥା ଦେଉଛି ବଡବାବୁ , ଆପଣ ଯେବେ ଯାହା କରିବାକୁ କହିବେ ମୁଁ ତାହା ଖୁସି ରେ ଖୁସି ରେ ମାନିନେବି । "

               ବଡବାବୁ ଯିବା ପରେ ସମୃଦ୍ଧି ଲତା ମାଉସୀ ଙ୍କ ପାଖକୁ ଯାଇ କହିଲା ," ମାଉସୀ ପୂର୍ବ ଥର ମଧ୍ୟ ମୁଁ ତୁମମାନଙ୍କ ପାଇଁ ପଢି ପାରିଥିଲି । ଆଉ ଆଜି ମଧ୍ୟ । ତୁମେ ଆମ ସମସ୍ତ ଙ୍କ ର ମା' । ମା' ର ଋଣ କେବେ ଶୁଝି ହୁଏ ନାହିଁ । ମୋତେ ଆଶୀର୍ବାଦ କର ମାଉସୀ ଯେମିତି ମୋ ପାଇଁ କେହି କେବେ କଷ୍ଟ ପାଆନ୍ତୁ ନାହିଁ , ସମସ୍ତ ଙ୍କ ମୁହଁ ରେ ଯେମିତି ମୁଁ ହସ ଫୁଟାଇ ପାରିବି ସବୁଦିନ । " ଲତା ମାଉସୀ ସମୃଦ୍ଧି ର ମୁଣ୍ଡ ଆଉଁସି କହିଲେ , " ଏଇଟା ତ ମୋର କର୍ତ୍ତବ୍ୟ ଥିଲା । ତାଛଡା ଏସବୁ ମୁଁ ନୁହେଁ ରୁଚିକା ପାଇଁ ସବୁ ସମ୍ଭବ ହୋଇପାରିଛି । ସିଏ ହିଁ ତ ଆଜି ସକାଳୁ ଆସି ମୋତେ ତୋର ସବୁ କଥା ଜଣାଇ ଅନୁରୋଧ କରିଥିଲା ବଡବାବୁ ଙ୍କୁ କହିବା ପାଇଁ । ତୋର ସବୁ ଇଚ୍ଛା ପୂରଣ ହେଉ । ସବୁବେଳେ ଖୁସିରେ ରହ ............. "😊😊😊
କ୍ରମଶଃ ........

❣ଟୋପାଏ ସିନ୍ଦୂର❣

(ଭାଗ-5)