ଶୈଶବ ଆଜି ଅଭିଶପ୍ତ (Childhood is cursed today)

କୋମଳ ଶିଶୁର ମନରେ ଉଙ୍କି ମାରୁଥିବା ପ୍ରଶ୍ନ ଅଟକିଯାଏ-----ଭାରି ବୋଝର ପାଠରେ। ସେ ଧୂଳିରେ ଗଡ଼ିବା ଜାଣିନି, ପ୍ରଜାପତି ଓ କଙ୍କି ଧରିବା ଶିଖିବା ଆଗରୁ ଜୋର କରି ନଦିଦିଆ ଯାଉଛି ପାଠ।ଯେଉଁ ପାଠର ମୂଲ୍ୟକୁ ସମୀକ୍ଷା କଲେ ଜଣାପଡିବ କେତେ ପ୍ରାସଙ୍ଗିକତା ରହିଛି ସେଥିରେ।

ପ୍ରକୃତି ହେଉଛି ଶିଶୁର ଶ୍ରେଷ୍ଠ ପାଠଶାଳା।ସେଥିରୁ ସେ ଯାହା ଜ୍ଞାନ ପାଇ ପାରିବ, ଜୀବନ ତମାମ ବହି ପାଠକୁ ବାଟି ଘଷି ମାଜି ପିଇଲେ ସେଥିରୁ କାଣିଚାଏ ଶିକ୍ଷା ପାଇବ କି ନାହିଁ ସନ୍ଦେହ।ପିଲାଟି ତିନି ବର୍ଷ ହେବା ଆଗରୁ ଯିବ ଖେଳ ସ୍କୁଲ।ସତେ ଯେପରି ଘରେ ଖେଳିବାକୁ ତାପାଇଁ ସ୍ଥାନର ଅଭାବ।ମାଆର ପଣତ ଧରି ଲୋଟି ପଡିବାର ଆନନ୍ଦ, ଅଳି କରିବାର ଆନନ୍ଦ କଣ ଜାଣି ପାରେନି।

ଏ କି ଅତ୍ୟାଚାର ସତରେ! ଭାବିଲେ ଲୁହ ଆସିଯାଏ ଆଖିରେ। ତାହେଲେ ଆଗ କାଳରେ କେହି ଗୁଣୀ ଜ୍ଞାନୀ ଲୋକ ନ ଥିଲେ ସମାଜରେ ?

ତେବେ ଏଇ ପ୍ରହସନ କାହିଁକି? ପିଲା ପଢିବ, ସମୟ ଆସିଲେ। ତା ପୂର୍ବରୁ ଜୋର କରି ପ୍ଲେ ସ୍କୁଲ, ନର୍ସରୀ, କେ ଜି, ଏହାର ଆବଶ୍ୟକତା କଣ? ବାପା ମାଆଙ୍କର ଜଞ୍ଜାଳ କମିବ ? ଚାକିରୀଆ ମା ଟିକିଏ ଦାୟିତ୍ତ୍ୱମୁକ୍ତ ହେବ କିଛି ସମୟପାଇଁ? ନା ଆଧୁନିକତା ଇଂରାଜୀ ଶୈଳୀକୁ ଅନୁକରଣ କରିବା? ଏବେର ଫମ୍ପା ସଭ୍ୟତାକୁ ଶତ କୋଟି ପ୍ରଣାମ। ଶିଶୁର ମାନସିକ ବିକାଶର ଅନ୍ତରାୟ ନିଜେ ପିତା ମାତା। ମାତା ଘରେ ଯାହା ଶିକ୍ଷା ଦିଏ, ତାହା କଣ ବାହାର ଲୋକ ଅଧିକ ଦେଇପାରିବ?। ପିଲାଟିଏ ହସି ଖେଳି ବୁଲି ଯାହା ଶିଖେ, ବହିର ନିର୍ଜୀବ ଛବି ଦେଖି କେତେ ବେଶି ଶିଖିବ। ଯନ୍ତ୍ର ଚାଳିତ ଖେଳଣା ସେ। ସ୍ୱାଭାବିକତା ହଜିଯାଏ, ଶୈଶବରୁ। ଯେଉଁଟା ଜ୍ଞାନ ଆହରଣ କରିବାର ପ୍ରକୃଷ୍ଟ ସମୟ।

ଘର ଦାୟୀ ନା ସମାଜ ଦାୟୀ (Society & Family - Who is Responsible for that)

ଘର ଦାୟୀ କି ସମାଜ ଦାୟୀ ବଡ କଥା ନୁହେଁ।ବଡ କଥା ହେଉଛି, ପିଲାକୁ ପିଲା ଭଳି ହେବାକୁ ଦିଅ। ତାର ଶିଶୁ ସୁଲଭ ମସ୍ତିଷ୍କରେ ଅଯଥା ପାଠ ଅଧିକ ଚାପିଦେଇ ତାକୁ ନଷ୍ଟ ହେବାକୁ ଦିଅନ୍ତୁନି।ଏବେର ବିଦ୍ୟା କଣ ସମସ୍ତେ ଅଳ୍ପ ବହୁତ ଜାଣନ୍ତି।ସଫ୍ଟ ୱେର ଯୁଗ ଦେଶକୁ ଦିନେ ଧ୍ୱଂସ ଆଡକୁ ଟାଣି ନେବ ସନ୍ଦେହ ନାହିଁ। ପିଲାକୁ ଭଲ ମଣିଷ କରି ଗଢ।ତା ଭିତରେ ମଣିଷ ପଣିଆକୁ ଜାଗ୍ରତ କରାଇପାରିଲେ ତାର, ସମାଜର ଚରମ ଉନ୍ନତି ସାଧିତ ହେବ। ମୂଢ ପ୍ରବୃତ୍ତି ଲୋପ ହୋଇଯିବ। ସୁନାଗରିକ ହେବାକୁ ହେଲେ, ଛୋଟ ବେଳରୁ ପ୍ରୟାସ କରିବାକୁ ହେବ।ଖାଲି ମାର୍ଗର ପରିବର୍ତ୍ତନର ଆବଶ୍ୟକତା ରହିଛି।ଯାହା ଆଜି ବିରଳ ସମାଜରେ।କେତୋଟି ପିଲା ପିଲାଟିଏ ଭଳି ହୋଇ ବାହାରିବେ?

ଦାମୀ ପୋଷାକ, ଜୋତା, ଟାଇ ଏଇସବୁ ସ୍ମାର୍ଟନେସ ବଢାଇବ ସତ, କିନ୍ତୁ ଏମିତି କିଛି ହଜିଯାଉଥିବ ଯାହା ପଛେ ଖୋଜି ପାଇବନି।କୌଣସି ପିତା ମାତାଙ୍କ ମନରେ ଦୁଃଖ ଦେବାପାଇଁ ଲେଖିବାର ଅଭିପ୍ରାୟ ନାହିଁ।କେବଳ ଭିତରର ସୂକ୍ଷ୍ମ ଚେତନାକୁ ଜାଗ୍ରତ କରିବାପାଇଁ ଲେଖିବାର ଉଦ୍ଦେଶ୍ୟ। ପିଲାଙ୍କର ମଙ୍ଗଳ କାମନା ମୋ ପାଇଁ ଏକାନ୍ତ କାମ୍ୟ।

ସହଜ ସରଳ ସାବଲୀଳ ଗତିରେ ପିଲା ବଢିଲେ ବୌଦ୍ଧିକ ଚିନ୍ତାଧାରାର ବିକାଶ ଅବଶ୍ୟ ଘଟିବ।

।ଚିତ୍ରା ରାଣୀ ପାତ୍ର।

।ବାଲେଶ୍ୱର।

ଆଜିର ଅଭିଶପ୍ତ ଶୈଶବ | Today's Cursed Childhood in Odia

ଆଜିର ସମୟରେ ଶୈଶବ କିପରି ଅଭିଶପ୍ତ ପାଲଟି ଯାଇଛି ଚାଲନ୍ତୁ ଜାଣିବା ଏହି ବ୍ଲଗ୍ ରୁ।