ନାଁ ଟି ତାର ରେବତୀ । ଫକିର ମୋହନଙ୍କ ଲେଖନୀର ରେବତୀ ନୁହେଁମ ବରଂ ଆଧୁନିକ ଗର୍ଭରୁ ଜାତ ଏପରି ଜଣେ କନ୍ୟା ଯିଏ ସମସ୍ତ ସାମାଜିକ ପ୍ରତିବନ୍ଧକର ଛାତି ଚିରି ନିଜ ସାମର୍ଥ୍ୟର ପରିଚୟ ଦେବାକୁ ଉଦ୍ୟମ କରୁଛି । ବ୍ୟାସକବିଙ୍କ ରେବତୀ ପାଖରେ ପାଠ ପଢ଼ିବା ପାଇଁ ଅଜସ୍ର ଇଚ୍ଛାଶକ୍ତି ଥିଲେ ମଧ୍ୟ ତତ୍କାଳୀନ ସାମାଜିକ ବିଧି ବ୍ୟବସ୍ଥା ଏବଂ ବୁଢ଼ୀ ମା ର ତାଗିଦ୍ କାରଣରୁ ସେ ନିଜକୁ ଚାରି କାନ୍ଥ ମଧ୍ୟରେ ସଙ୍କୁଚିତ କରି ରଖିଥିଲା କିନ୍ତୁ ମୋ କାହାଣୀର ରେବତୀ ପାଖେ ସମସ୍ତ ପ୍ରତିବନ୍ଧକ ଉନ୍ମୁକ୍ତ । ବୟସ ଏବେ ତାର ୧୭ ବର୍ଷ । କିଶୋରୀର କଞ୍ଚା ପାହାଚ ଉପରେ ଛିଡ଼ା ହୋଇ ସେ ଏବେ ସ୍ୱପ୍ନକୁ କିଣୁଛି । ମନରେ ତାର ସମୁଦ୍ର ଭରା ଆକାଂକ୍ଷା । ବଡ଼ ହୋଇ ପାଇଲଟ ହେବ‌ । ନିଜ ଇଚ୍ଛାକୁ ଖୋଲା ଆକାଶରେ ଉଡ଼ାଇବ । ବାପା ମା ମଧ୍ୟ ରେବତୀର ଦକ୍ଷତାକୁ ନେଇ ଖୁବ୍ ଗର୍ବିତ ଥାଆନ୍ତି । ଦଶମ ଶ୍ରେଣୀ ପରୀକ୍ଷାରେ ୮୪ ପ୍ରତିଶତ ମାର୍କ ଆଣିବା ପରେ ରେବତୀର ଆତ୍ମ ବିଶ୍ୱାସ ଦ୍ଵିଗୁଣିତ ହୋଇଯାଇଥାଏ। ଏହାପରେ ସେ +୨ ବିଜ୍ଞାନ ବିଷୟ ନେଇ କଲେଜରେ ପାଦ ଥାପିଲା । କଲେଜରେ ପଢ଼ିବା ସମୟରେ ରେବତୀ ଅନୁଭବ କରୁଥିଲା ତା ଚାରିପଟେ ଥିବା ଅତ୍ୟାଧୁନିକ ଜ୍ଞାନ କୌଶଳ ଏବଂ ପ୍ରଯୁକ୍ତିବିଦ୍ୟାର ପରିବେଶକୁ ଯାହା ସାହାଯ୍ୟରେ ସେ ଅତି ସହଜ ଭାବେ ତାକୁ ପ୍ରଭାବିତ କରୁଥିଲା ଏବଂ ନିଜ ଆଡ଼କୁ ଆକୃଷ୍ଟ କରୁଥିଲା । ପାଠ ପଢ଼ିବା ପାଇଁ ରେବତୀର ଫୋନଟିଏ ଆବଶ୍ୟକ ହେଲା । ଆଜିକାଲି ଦୁନିଆରେ ଛୋଟ ଛୋଟ ଛୁଆ ମଧ୍ୟ ଫୋନ୍ ଧରୁଛନ୍ତି ତେଣୁ ରେବତୀର ବାପା ମାଆ ତା ଆବଶ୍ୟକତାକୁ ଅତି ସହଜରେ ଗ୍ରହଣ କରିନେଲେ । ରେବତୀ ନୂଆ ଆଣ୍ଡ୍ରଏଡ ଫୋନ୍ ଟିଏ ଆଣିଲା । ବାସ୍ ଫୋନର ପରଷ ପାଇବା ପରେ ରେବତୀ ଜୀବନରେ ନୂଆ ମୋଡ଼ ଆସିଲା । ଯେଉଁ ଉଦ୍ଦେଶ୍ୟରେ ସେ ଫୋନଟି ଆଣିଥିଲା ତାହା ବାଟବଣା ହୋଇଗଲା । ସାଙ୍ଗମାନଙ୍କ ଦ୍ଵାରା ପ୍ରଭାବିତ ହୋଇ ରେବତୀ ଫୋନରେ ଥିବା ସାମାଜିକ ଗଣମାଧ୍ୟମ ପ୍ରତି ଆକୃଷ୍ଟ ହେଲା । ଅନ୍ୟମାନଙ୍କର ରିଲ୍ସ ଭିଡ଼ିଓ ଦେଖି ନିଜେ ମଧ୍ୟ ସେହି ଆଡ଼କୁ ଆକର୍ଷିତ ହେଲା । ଧିରେ ଧିରେ ତା ମନ ପାଠରୁ ଦୂରେଇ ଯାଇ ସାମାଜିକ ଗଣମାଧ୍ୟମରେ ଯୋଡ଼ି ହୋଇ ରହିଲା । ନିଜକୁ ଲୋକ ଲୋଚନକୁ ଆଣିବା ତଥା ଅନ୍ୟମାନଙ୍କ ସାମ୍ନାରେ ପ୍ରସିଦ୍ଧି ପାଇବାର ନିଶା ତା ସ୍ବପ୍ନକୁ ଛଡ଼େଇ ନେଲା । ରେବତୀ ଖାଇବା ପିଇବା ଭୁଲି ମୋବାଇଲ୍ ରିଲ୍ସରେ ମାତିଲା । ଲୋକମାନଙ୍କ ପସନ୍ଦକୁ ସାଉଁଟିବା ପାଇଁ ସେ ନିଜର ମର୍ଯ୍ୟାଦା ପରିସୀମାକୁ ଭୁଲିଗଲା। ଆଉ ଆଜି ରେବତୀର ଅବସ୍ଥିତି ଟିକେ ଅଲଗା । ସାମାଜିକ ଗଣମାଧ୍ୟମର ମାୟାରେ ପଡ଼ି ସେ ପ୍ରେମ ବିବାହ କରି ଅନ୍ୟଘରେ ନିର୍ଯାତନା ପାଉଛି । ନିଜ ଆଖିର ଲୁହକୁ ଚୁପି ଚୁପି ନିଜେ ପିଉଛି । ଘରଲୋକଙ୍କ ସହ ତାର ସବୁ ସମ୍ପର୍କ କଟି ଯାଇଛି । ଦିନେ ପାଇଲଟ ହେବାକୁ ସ୍ବପ୍ନ ଦେଖିଥିବା ମନ ଆଜି ଅସହାୟ ହୋଇପଡିଛି । ରେବତୀ ଆଜି ଭାବୁଛି ତା ପୂର୍ବ ଜନ୍ମର କଥା । ସେ ସମୟର ରେବତୀ ପାଖେ ଏହି ଅତ୍ୟାଧୁନିକ ଉଦ୍ଭାବନ ଗୁଡ଼ିକ ନଥିଲା ସତ କିନ୍ତୁ ତା ପାଖରେ ଗୋଟିଏ ସୁନ୍ଦର ଚରିତ୍ର ଥିଲା , ମାନ ସମ୍ମାନ ଥିଲା , ଆକଟ ଥିଲା , ସେ ନିଜକୁ ପ୍ରକୃତି ସହ ଯୋଡୁଥିଲା । ଆଉ ଆଜିର ରେବତୀ ଯେତେଯେତେ ଆଧୁନିକ ହେଉଛି ତାର ଲକ୍ଷ୍ୟ ସେତେ କ୍ଷୀଣ ହୋଇ ଯାଉଛି । ବର୍ତ୍ତମାନର ସାମାଜିକ ବ୍ୟବସ୍ଥା ସମ୍ପୂର୍ଣ୍ଣ ଭାବେ ଆଧୁନିକ ବଳୟରେ ବନ୍ଦୀ । ମୁଁ ମୋବାଇଲ୍ କୁ ଦୋଷ ଦେଉନି କିନ୍ତୁ ସେଥିରେ ଥିବା କିଛି ଅତ୍ୟାଧୁନିକ କରାମତି କଥା କହୁଛି ଯାହାଦ୍ଵାରା ଆଜି ଅନେକ ଜୀବନ ପଥଭ୍ରଷ୍ଟ । ଏହାହିଁ ବର୍ତ୍ତମାନ ସମାଜର ଅପ୍ରିୟ ସତ !!!!

ରାଜେଶ୍ ରାୟ

ଅଧ୍ୟାପକ , ବିଦ୍ୱାନ୍ ମହାବିଦ୍ୟାଳୟ, ଜୟପୁର , କୋରାପୁଟ

ମୋବାଇଲ୍ :- ୬୩୭୧୫୫&୯୪୦

ଆଧୁନିକ ରେବତୀ !!!!

କିଛି ଅବ୍ୟକ୍ତ କଥା..... By ରାଜେଶ୍