ରାମ ରାଜ୍ୟ। ମହାପ୍ରଭୁ ଶ୍ରୀ ରାମଚନ୍ଦ୍ର ଅଯୋଧ୍ୟାରେ ରାଜତ୍ଵ କରୁଛନ୍ତି। କେହି ଅଶାନ୍ତି ରେ ଦୁଃଖରେ ନ ଥାନ୍ତି। ସମସ୍ତ ପ୍ରକାର ପ୍ରଜାଗଣ ମହା ଆନନ୍ଦ ରେ କାଳାତିପାତ କରୁଥାନ୍ତି। ହଠାତ୍ ଜଣେ ବ୍ରାହ୍ମଣଙ୍କର ବାର ବର୍ଷର ପୁତ୍ରର ଅକାଳ ମରଣ ଘଟିଲା। ପୁତ୍ରର ମୃତ୍ୟୁ ରେ ବ୍ରାହ୍ମଣ ବ୍ରାହ୍ମଣୀ ଭାଙ୍ଗି ପଡ଼ିଲେ।

✍️ତେଜସ୍ଵୀ ବ୍ରାହ୍ମଣ ମୃତ ପୁତ୍ରର ଶବକୁ କାନ୍ଧରେ ପକାଇ ଅଯୋଧ୍ୟା ର ସିଂହଦ୍ଵାର ସମ୍ମୁଖରେ ଉପସ୍ଥିତ ହେଲା। ସେତେବେଳେ ରାଜା ଶ୍ରୀରାମ ଚନ୍ଦ୍ର ଦରବାରରେ ପ୍ରଜାଙ୍କ ଭଲ ମନ୍ଦ ବୁଝୁଥିଲେ। ବ୍ରାହ୍ମଣ କାନ୍ଦି କାନ୍ଦି ଶ୍ରୀରାମ ଙ୍କୁ ଜଣାଇଲା,- ' କୁହ ରାଘବ! ରାମ ରାଜ୍ୟ ରେ ଅକାଳ ମରଣ। ମୋର ଛୋଟ ପୁଅଟି ଅକାଳ ରେ କାଳ କବଳିତ ହୋଇଛି।ବାପ ଆଗରେ ପୁଅ ମରିଯିବା ଘୋର ପାପର ଫଳ।

✍️ମୁଁ ମୋ ଜାଣିବାରେ ଜୀବନରେ କିଛି ପାପ କରି ନାହିଁ।ଏହା ନିଶ୍ଚିତ ରାଜାଙ୍କ ପାପର ଫଳ। ଯେଉଁ ରାଜ୍ଯରେ ଅନ୍ୟାୟ ହୁଏ, ତା'ର କୁପରିଣାମରେ ଅକାଳ ମରଣ ଘଟିଥାଏ।ଆପଣ ମୋ ପୁଅକୁ ବଞ୍ଚାଇ ଦିଅନ୍ତୁ। ନୋହିଲେ ମୋ ସ୍ତ୍ରୀ ସହିତ ଆପଣଙ୍କ ଦ୍ୱାର ଆଗରେ ଅନଶନ କରି ପ୍ରାଣ ହରାଇ ଦେବି। ଆପଣ ବ୍ରହ୍ମ ହତ୍ୟା ଦୋଷରେ ଦୋଷୀ ହେବେ।'

ଏକଥା ଶୁଣି ରାମଚନ୍ଦ୍ର ଡରି ଗଲେ।

✍️ତତ୍ କ୍ଷଣାତ୍ ମାର୍କଣ୍ଡେୟ,ମୁଦ୍ ଗଲ, ବାମଦେବ, କାଶ୍ୟପ, କାତ୍ୟାୟନ, ଜାବାଳି,,ଗଉତମ ଓ ନାରଦ ପ୍ରଭୃତି ଆଠଜଣ ବିଦ୍ୱାନ ଋଷିଙ୍କୁ ନେଇ ଏକ ବିଦ୍ୱତ୍ ପରିଷଦ ଗଠନ କରି ସମସ୍ୟା ର ସମାଧାନ ପାଇଁ ବାଟ ଦେଖାଇବା କୁ କହିଲେ। ସମିତି ରେ ବହୁ ଆଲୋଚନା ହେଲା।

✍️ଶେଷରେ ନାରଦ ମୁନି ସମିତିର ମତ ଶୁଣାଇ କହିଲେ,' ରାଘବ ! ଆପଣଙ୍କ ରାଜ୍ୟରେ ସମ୍ଭୂକ ନାମରେ ଜଣେ ଶୁଦ୍ର ସଶରୀରରେ ସ୍ୱର୍ଗ ଯିବାପାଇଁ ଘୋର ତପସ୍ୟା କରୁଛି।

✍️ତାହାରି ଉଗ୍ର ତପସ୍ୟା ଫଳରେ ବାତାବରଣ ଅଶାନ୍ତ ହୋଇପଡିଛି। ତ୍ରେତୟାରେ ତପସ୍ୟା ଯୁଗ ଧର୍ମ ନୁହେଁ। ରାଜ୍ୟ ଉପରେ ଏହାର ପ୍ରଭାବ ପଡ଼ିଲା। ରାଜ୍ୟର ପାପ ରାଜା ମୁଣ୍ଡରେ ଯାଏ। ତେଣୁ ଆପଣ ଏହି ଦୋଷରେ ଦୋଷୀ ହୋଇଛନ୍ତି।ଆପଣ ତାକୁ ଏହି କାର୍ଯ୍ଯରୁ ନିବୃତ କରନ୍ତୁ।

✍️ ଯଦି ସେ ନ ମାନେ ତାକୁ ହତ୍ଯା କରନ୍ତୁ।ତା ଫଳରେ ଏହି ବାଳକ ଜୀବିତ ହୋଇଯିବ।ଶ୍ରୀରାମ ବଡ଼ ଅଡ଼ୁଆରେ ପଡ଼ିଗଲେ।ସେ ନିର୍ଦ୍ଦୋଷ ଲୋକ କୁ କିପରି ଦଣ୍ଡ ଦେବେ।ପରେ ଭାବିଲେ ପ୍ରାଣପ୍ରିୟା ସୀତାଙ୍କୁ ନିର୍ଦ୍ଦୋଷରେ ଦଣ୍ଡ ଦେଇଛି। ସେପରି ସ୍ଥଳେ ଏଥିରୁ ପଛେଇବି କାହିଁକି? ପୁଣି ଭାବିଲେ ଏ ବିଚାରା ଘୋର କ‌ଷ୍ଟ କରି ସ୍ୱର୍ଗକୁ ଯିବାକୁ ଚାହୁଁଛି।ମୋ ନିଜ ହାତରେ ବଧ କରି ମୋକ୍ଷ ପ୍ରଦାନ କରିବି।

✍️ଏହିପରି ଭାବି ଭାବି ଶ୍ରୀରାମ ପୁଷ୍ପକ ଯାନରେ ଯାଇ ସମ୍ଭୂକର ତପସ୍ୟା ସ୍ଥାନରେ ପହଞ୍ଚିଗଲେ।ଏକ ସୁନ୍ଦର ସରୋବର କୂଳରେ ସେ ପାଦ ଉପରକୁ ଓ ମୁଣ୍ଡ ତଳକୁ କରି କଠିନ ତପସ୍ୟା କରୁଥିଲା। ରାମଚନ୍ଦ୍ର ତାକୁ ସବୁ ପଚାରିଲେ।ସେ ସଵୁ କଥା ସତ ସତ କହିଦେଲା।

✍️ ତାପରେ ରାମଚନ୍ଦ୍ର ତାକୁ ବୁଝାଇଲେ - ' ଭାଇ ଏହା ଯୁଗଧର୍ମ ନୁହେଁ।' ସେ କହିଲା - ' ମହାଶୟ! ମୁଁ ସଶରୀରରେ ସ୍ୱର୍ଗକୁ ଯିବାକୁ ଚାହୁଁଛି,ଏହା ମୋର ସତ୍ୟ ପ୍ରତିଜ୍ଞା। କୌଣସି ପ୍ରକାରରେ ସେ ବୁଝିଲା ନାହିଁ।

✍️ଶ୍ରୀରାମ ସ୍ୱହସ୍ତରେ ଖଡ୍ଗ ଦ୍ବାରା ସମ୍ଭୂକର ଶିରଚ୍ଛେଦ କଲେ।ସେ ପ୍ରଭୁଙ୍କର ଭୁବନ ମୋହନ ରୂପ ଦର୍ଶନ କରି ମୋକ୍ଷ ପ୍ରାପ୍ତି ହେଲା।ଏଣେ ବ୍ରାହ୍ମଣର ମୃତ ବାଳକ ଜୀବିତ ହେଲା।🌹🌹