ଅଖି ମୁଠି ଧରି କ୍ଷେତର ହୁଡ଼ାରେ

ଚାଷୀ ବିଲକୁ ଚାହୁଁଛି,

ଚାଷର ପ୍ରଥମ ଦିନଟି ରେ ଆଜି

ମନ ଖୁସିରେ ନାଚୁଛି ।

ଅଣ ଉଦିଆରୁ ଓଡିଆଣି ଉଠି

ଦାଣ୍ଡ ମୁଣ୍ଡ ଲିପିପୋଛି,

କୁଲା ବାଉଁଶିଆ ସଜ କରିଅଛି

ଝୋଟି ଚିତା ପକାଇଛି ।

ଘରର ଉତ୍ତରେ ମାଣ ବସାଇଛି

ଚକୁଳି ପିଠା କରିଛି ,

ଗଉଣୀ ରେ ଅଖି ମୁଠି ଭରି ଦେଇ

ନାଲି କନା ଘୋଡ଼ାଇଛି ।

ପିଠଉରେ ମାଣ ସଜ ସେ କରିଛି

ସିନ୍ଦୂର ଦେଇ ମାଣରେ ,

ଶଙ୍ଖ ହୁଳହୁଳି ଶବଦେ ଉଛୁଳେ

ଗାଁର ପ୍ରତି ଘରେ ଘରେ।

ହଳ କରି ବିଲ ପାଗ ସଜାଡ଼ିଛି

ଅଖି ମୁଠି ବୁଣି ଦେବ,

ମାତା ଲକ୍ଷ୍ମୀ ପାଶେ ମାନସିକ କରି

ଚାଷ କାମ ଆରମ୍ଭିବ।

ମାଆ ଆଗେ ଦୀପାବଳି ଜାଳି ଦେଇ

ମୁଣ୍ଡିଆଟେ ମାରିଦେଲା ,

ବିହନ ବେତୁଲି କାଖରେ କାଖେଇ

କ୍ଷେତକୁ ବାହାରି ଗଲା।

ମୁଣ୍ଡିଆଟେ ମାରି ମାଟି ମାଆ ପାଦେ

ଅନୁମତି ମାଗିଥାଏ,

ମାଆ ତୋର ଵକ୍ଷ ଚିରି ଫଳାଇବି

ଫସଲ ଟି କହିଥାଏ।

ମାତା ଶାକମ୍ବରି ମାତା ଅନ୍ନପୂର୍ଣ୍ଣା

ହୋଇଗଲେ ସୁପ୍ରସନ୍ନ,

ଫଳିବ କ୍ଷେତରେ ସୁନାର ଫସଲ

ସଭିଙ୍କୁ ମିଳିବ ଅନ୍ନ।

ବୈଶାଖ ମାସର ତୃତୀୟା ତିଥି ରେ

ଅକ୍ଷୟତୃତୀୟା ଆସେ,

ଶ୍ରୀଜଗନ୍ନାଥଙ୍କ ରଥ ଅନୁକୂଳ

ହୁଏ ଆନନ୍ଦ ଉଲ୍ଲାସେ।

ଧରାକୁ ଅବତରଣ କରିଥିଲେ

ଏହି ଦିନ ଗଙ୍ଗା ମାତା ,

ଏହି ପୂଣେ ଲଗନେ ପ୍ରକଟିତ ହୋଇ

ଥିଲେ ଅର୍ଣପୂର୍ଣା ମାତା।

ରେଣୁକାଙ୍କ ଗର୍ଭୁ ଜନ୍ମ ନେଇଥିଲେ

ପର୍ଶୁରାମ ଏହିଦିନ ,

ମହାପ୍ରଭୁଙ୍କର ଚନ୍ଦନ ଯାତ୍ରାର

ଆରମ୍ଭ ହୁଏ ଏଇଦିନ।

ବସନ୍ତର ଶେଷ ଓ ଗ୍ରୀଷ୍ମର ଆରମ୍ଭ

ହୋଇଥାଏ ଏହି ଦିନ,

କୃଷ୍ଣ ସୁଦାମା ଙ୍କ ମିଳନ ପର୍ବଟି

ହେଇଥିଲା ଏହି ଦିନ।

ଦ୍ରୌପଦୀ ଙ୍କୁ ସୂର୍ଯ୍ୟ ଦେବ କୃପା କରି

ଅକ୍ଷୟ ପାତ୍ର ଟି ଦେଲେ ,

ଭଗବାନ ନର ନାରାୟଣ ଜନ୍ମ

ଏହି ଦିନ ହେଇଥିଲେ ।

ସନାତନଙ୍କର ମୁଖ୍ୟ ଚାରି ଧାମ

ଦ୍ୱାର ଆଜି ଖୋଲା ଥାଏ ,

କେତେ ପିଠାପଣା ଭୋଗ ରାଗ କରି

ସନାତନି ଖୁସି ହୁଏ।

ସତ୍ୟଯୁଗର ଆରମ୍ଭ ହୋଇଥିଲା

ଅକ୍ଷୟ ତୃତୀୟାଦିନ ,

ଜୟଦେବଙ୍କର ଜନମ ନକ୍ଷତ୍

ପଡ଼ିଥାଏ ଏହି ଦିନ।

କେତେ ମହାନତା ଭରି ରହିଅଛି

ଅକ୍ଷୟ ତୃତୀୟା ଜାଣ,

ସର୍ବଶୁଭ ଓ ମଙ୍ଗଳ କର୍ମ ପାଇଁ

ଶ୍ରେଷ୍ଠ ଅଟେ ଏହିଦିନ।

ସୁନ୍ଦର ପବିତ୍ର ଧାର୍ମିକ ମହତ୍ୱ

ଭରି ଅଞ୍ଜଳି ରେ ଆସେ ,

ଓଡ଼ିଆ ଘରରେ ପରବ ପାଳନ୍ତି

ସର୍ବେ ଆନନ୍ଦ ଉଲ୍ଲାସେ।

ଲିଳା ମୟୀ ଦାଶ

କେନ୍ଦ୍ରାପଡ଼ା

ଅକ୍ଷୟତୃତୀୟା।

Akshay tritiya