ଅଳ୍ପ ବିଦ୍ୟା ଭୟଙ୍କରୀ

ଆଜିକାଲି ଘରେବସି ଖୁବ୍‌ ସହଜରେ ଇଣ୍ଟରନେଟ୍‌ରୁ ମିଳିପାରୁଛି ପ୍ରତ୍ୟେକ ବିଷୟରେ ସୂଚନା। ଯାହା ମଧ୍ୟରୁ କେତେକ ସୂଚନାରେ ରହୁଛି ଅଧା ସତ୍ୟ। ହେଲେ ଇଣ୍ଟରନେଟ୍‌ର ତଥ୍ୟକୁ ଅନ୍ଧଭାବେ ବିଶ୍ୱାସ କରୁଥିବା ଜନସାଧାରଣ ଏହି ସୂଚନାକୁ ହିଁ ସତ

ବୋଲି ମାନି ନେଉଛନ୍ତି। ଫଳରେ ସମାଜରେ ଅନେକ

ଭୁଲ୍‌ ତଥ୍ୟ ପ୍ରଚାରିତ ହେଉଛି।

ବର୍ତ୍ତମାନ ସମସ୍ତଙ୍କ ପାଖରେ ସମୟର ଅଭାବ। ଧୈର୍ଯ୍ୟର ସହିତ କୌଣସି କଥା ଶୁଣିବା, ପଢ଼ିବା ପାଇଁ ଯେମିତି କେହି ବି ପ୍ରସ୍ତୁତ ନାହାନ୍ତି। ସମସ୍ତଙ୍କୁ ଦରକାର ତତ୍‌କ୍ଷଣାତ୍‌ ସୂଚନା, ଆଉ ଯାହା ଘରେ ବସି ଖୁବ୍‌ ସହଜରେ ମିଳିଯାଉଛି ଇଣ୍ଟରନେଟ୍‌ରୁ। ହେଲେ ଏଥିରେ ମିଳୁଥିବା ପ୍ରତ୍ୟେକଟି ତଥ୍ୟ ଯେ ସମ୍ପୂର୍ଣ୍ଣ ଠିକ୍‌ ତା’ କହିବା କଷ୍ଟ। କାରଣ ଇଣ୍ଟରନେଟ୍‌ରେ ବର୍ତ୍ତମାନ ବହୁ ସଂଖ୍ୟାରେ ଏଭଳି ଓ୍ବେବ୍‌ସାଇଟ୍‌, ଚ୍ୟାନେଲ୍‌ ରହିଛି; ଯେଉଁମାନେ ବିନା ଯାଞ୍ଚରେ ଖବର ପରିବେଷଣ କରୁଛନ୍ତି। ସେମାନଙ୍କ ଦ୍ୱାରା ମିଳୁଥିବା ଖବରରେ ଅନେକ ସମୟରେ ଅଧା ସତ୍ୟ ରହୁଥିବା ବେଳେ କେତେକ ଭୁଲ୍‌ ବି ରହୁଛି। ଫଳରେ ସମାଜରେ ନା କେବଳ ଅନେକ ଭୁଲ୍‌ କଥା ପ୍ରଚାରିତ ହେଉଛି ବରଂ ଏଥିପାଇଁ ଅନେକ ସମସ୍ୟା ମଧ୍ୟ ଉପୁଜୁଛି। ତେବେ ଏଭଳି ପରିସ୍ଥିତି କେତେକ ଦିଗ ପ୍ରତି ଧ୍ୟାନ ଦେବା ନିହାତି ଅବଶ୍ୟକ…

ହଠାତ୍‌ କରନ୍ତୁନି ବିଶ୍ୱାସ: ସମୟ ଅଭାବରୁ ହେଉ ଅବା ଧୈର୍ଯ୍ୟ କମ୍‌ ହୋଇଥିବାରୁ ଅନେକେ ଅଧା କଥା ଶୁଣିଥାଆନ୍ତି। ଆଉ କେବେକେବେ ସାଙ୍ଗସାଥୀ, ପରିବାର କିମ୍ବା ପଡ଼ୋଶୀଙ୍କ ସହ କଥା ହେବା ବେଳେ ଏହି ଅଧା ସୂଚନା ଦେଇଥାଆନ୍ତି। ଫଳରେ ଅଧା ସତ୍ୟ କିମ୍ବା ଭୁଲ୍‌ ତଥ୍ୟ ପ୍ରଚାରିତ ହୁଏ। ହେଲେ ଇଣ୍ଟରନେଟ୍‌ର ବ୍ୟବହୃତଙ୍କ ସଂଖ୍ୟା ଖୁବ୍‌ ଅଧିକ ହୋଇଥିବାରୁ ଏଥିରେ ଏଭଳି କୌଣସି ଭୁଲ୍‌ ତଥ୍ୟ ବି ଅଧିକଙ୍କ ପାଖରେ ସହଜରେ ପହଞ୍ଚତ୍ୟାଏ। ତା’ଛଡ଼ା ନିଜ ଚ୍ୟାନେଲ୍‌ରୁ ଭ୍ୟୁ ବଢ଼ାଇ ଟଙ୍କା ରୋଜଗାର କରିବା ଆଳରେ ବି କେତେଜଣ ଏଭଳି କରୁଥିବାର ଦେଖିବାକୁ ମିଳୁଛି। ତେଣୁ ହଠାତ୍‌ କୌଣସି ତଥ୍ୟକୁ ବିଶ୍ୱାସ କରନ୍ତୁ ନାହିଁ। ସତ ଜାଣିବା ପାଇଁ ଏକାଧିକ ରେଜିଷ୍ଟର୍ଡ ନ୍ୟୁଜ୍‌ ସାଇଟ୍‌ କିମ୍ବା ଚ୍ୟାନେଲ୍‌ରୁ ତଥ୍ୟ ସଂଗ୍ରହ କରନ୍ତୁ।

ସ୍ବାସ୍ଥ୍ୟ ସୂଚନା ପ୍ରତି ସତର୍କ ରୁହନ୍ତୁ: ବର୍ତ୍ତମାନ ଇଣ୍ଟରନେଟ୍‌ରେ ବିଭିନ୍ନ ସ୍ବାସ୍ଥ୍ୟ ସମସ୍ୟା ଏବଂ ସୌନ୍ଦର୍ଯ୍ୟଜନିତ ସମସ୍ୟାର ଘରୋଇ ଉପଚାର ଉପଲବ୍ଧ। ଏହାକୁ ବିଶ୍ୱାସ କରି ଅନେକେ ତତ୍‌କ୍ଷଣାତ୍‌ ନିଜ ଉପଚାର ଆରମ୍ଭ କରିଦିଅନ୍ତି। କେବେକେବେ ଏହାର ସାଇଡ୍‌ ଇଫେକ୍ଟ ବା ପାର୍ଶ୍ୱ ପ୍ରତିକ୍ରିୟା ଜଟିଳ ରୂପ ନେଇଥାଏ। ଏହାର ଅର୍ଥ ନୁହେଁ ଯେ, ଇଣ୍ଟରନେଟ୍‌ରେ ସମସ୍ତ ତଥ୍ୟ ଭୁଲ୍‌, ହେଲେ କେତେକ ସାଇଟ୍‌ରେ ଏପରି ତଥ୍ୟ ଆସିଥାଏ। ତେଣୁ କୌଣସି ଅଜଣା ସାଇଟ୍‌ରୁ ଏଭଳି ତଥ୍ୟ ଦେଖିଲେ ତୁରନ୍ତ ବିଶ୍ୱାସ ନ କରି ଡାକ୍ତର କିମ୍ବା କୌଣସି ଏକ୍ସପର୍ଟଙ୍କ ପରାମର୍ଶ ନେଲେ ଭଲ।

ବଢ଼ୁଛି ଅପପ୍ରଚାର: ବର୍ତ୍ତମାନ ଇଣ୍ଟରନେଟ୍‌ରେ ବିଶେଷକରି ସୋସିଆଲ୍‌ ମିଡିଆରେ ଭାଇରାଲ୍‌ ଭିଡିଓର ଟ୍ରେଣ୍ଡ ଚାଲିଛି। ଯେଉଁଥିରେ ଅଧିକାଂଶ ଭିଡିଓ ଭୁଲ୍‌ ଅବା ପ୍ରାୟୋଜିତ। ତେଣୁ ଏଭଳି ଭିଡିଓ ବିଶେଷକରି କୌଣସି ବ୍ୟକ୍ତି ବିଶେଷ କିମ୍ବା ସମ୍ବେଦନଶୀଳ ଘଟଣାକୁ ନେଇ ଭିଡିଓ ଆପଣଙ୍କ ପାଖକୁ ଆସିଲେ ତୁରନ୍ତ ଅନ୍ୟମାନଙ୍କୁ ଫରଓ୍ବାର୍ଡ କରନ୍ତୁ ନାହିଁ। କାରଣ ଏହାଦ୍ୱାରା ସମାଜରେ ଭୁଲ୍‌ ତଥ୍ୟର ଅପପ୍ରଚାର ହୋଇଥାଏ। ଆବଶ୍ୟକ ସ୍ଥଳେ ଜଣେ ସଚେତନ ନାଗରୀକ ଭାବେ ଏଭଳି ଆଇଡିକୁ ବ୍ଲକ୍‌ କରିଦିଅନ୍ତୁ, ଯେପରି ପୁନର୍ବାର ଏଭଳି ଭୁଲ୍‌ ଭିଡିଓ ନ ଆସେ ଏବଂ ଅନ୍ୟମାନଙ୍କୁ ଏଭଳି ପୋଷ୍ଟ ସେୟାର ନ କରିବାକୁ ପରାମର୍ଶ ଦିଅନ୍ତୁ।

ଗପ:-

ଖରା ଛୁଟି ରେ ସିମୁଲ୍‌ ସହରରୁ ଅଜା ଘର ଗାଁ କୁ ବୁଲିବାକୁ ଯାଏ। ପ୍ରତି ବର୍ଷ ଭଳି ଏ ବର୍ଷ ମଧ୍ୟ ଗଲା। ଅଜା ଘର ପାଖରେ ଛୋଟ ନଦୀଟିଏ ଅଛି। ସାଙ୍ଗମାନଙ୍କ ସହିତ ସିମୁଲ୍‌ ସେଇଠି ଗାଧୁଆ ପାଧୁଆ କରେ। ଅନ୍ୟ ସାଙ୍ଗମାନେ ପହଁରିବାରେ ଓସ୍ତାଦ , କାରଣ ସେମାନେ ବର୍ଷ ସାରା ସେଇଠି ଗାଧୁଆ ପାଧୁଆ କରନ୍ତି। ହେଲେ ସିମୁଲ୍‌ ଅଳ୍ପ ଦିନ ପାଇଁ ଆସେ , ସହରରେ ତ ନଦୀ ପୋଖରୀ ରେ ଗାଧେଇବାର ବ୍ୟବସ୍ଥା ନାହିଁ, ତେଣୁ ତାକୁ ଏ ଯାଏ ପହଁରା ଆସି ନାହିଁ। ଏଥର ମନେ ମନେ ସ୍ଥିର କରିଥିଲା ଯେମିତି ହଉ ପହଁରା ଶିଖିବ। ନିଜ ସାଙ୍ଗମାନଙ୍କୁ ମନ କଥା ଖୋଲି କହିଲା। ସେମାନେ ରାଜି ହେଇଗଲେ।

ପ୍ରଥମ ଦିନ ନଦୀ ତୁଠ ପାଖା ପାଖି ଅଳ୍ପ ପାଣି ରେ ପହଁରା ଆରମ୍ଭ ହେଲା। ସିମୁଲ୍‌ କୁ ପ୍ରଥମେ ପ୍ରଥମେ ଭାରି ମଜା ଲାଗିଲା। ଆଉ ଧୀରେ ଧୀରେ ଅଳ୍ପ ବହୁତ ପହଁରା ଶିଖି ଗଲା। ଖରା ଛୁଟି ଭିତରେ ହୋଲି ପଡ଼ିଲା। ସାଙ୍ଗ ମାନଙ୍କ ସହିତ ସିମୁଲ୍‌ ଖୁବ ରଙ୍ଗ ଖେଳିଲା। ଗାଧେଇବା ପାଇଁ ପିଲେ ନଦୀ କୁ ଗଲେ। ଗାଧୁଆ ସାଙ୍ଗରେ ପହଁରା ବି ଚାଲିଲା। ଅଜାଣତ ରେ ସିମୁଲ୍‌ କେତେବେଳେ ଗହୀର ପାଣି କୁ ଚାଲି ଯାଇଥିଲା ଜାଣି ପାରିଲାନି। ଖଣ୍ଡି-ପହଁରା କାମ ଦେଲାନି, ତେଣୁ ଚିତ୍କାର କଲା – ବଞ୍ଚାଅ, ବଞ୍ଚାଅ। ପାଖରେ ଗାଧୋଉଥିବା ସାଙ୍ଗ ମାନେ ତା ପାଖକୁ ଯାଇ କୂଳକୁ ଟାଣି ଆଣିଲେ। ସିମୁଲ୍‌ ର ଅଜା ବି ପାଟି ତୁଣ୍ଡ ଶୁଣି ଦୌଡ଼ି ଆସିଲେ। ସିମୁଲ୍‌ ସେତେ ବେଳକୁ ପେଟେ ନଦୀ ପାଣି ପିଇ ସାରିଥାଏ। ତା’ ପେଟ କୁ ଜାକି ସାଙ୍ଗ ମାନେ ପାଣି ବାହାର କଲା ପରେ ସିମୁଲ୍‌ କୁ ଧୀରେ ଧୀରେ ସୁସ୍ଥ ଲାଗିଲା।

ଘରକୁ ଆସିଲା ପରେ ଆଈଙ୍କ ସେବା ଯତ୍ନ ପରେ ପୂରା ଠିକ ହେଇ ଗଲା। ସଞ୍ଜ ବେଳକୁ ଅଜା ପାଖକୁ ଡାକି କହିଲେ – ତୁ ଜାଣିନୁ କି , ଅଳ୍ପ ବିଦ୍ୟା ଭୟଙ୍କର ବୋଲି। ତୁ ଏଯାଏ ଭଲକି ପହଁରା ଶିଖିନୁ, ଗହୀର ପାଣି କୁ କାହିଁକି ଯାଉଥିଲୁ? ସିମୁଲ୍‌ କହିଲା – ମୁଁ ଭାବିଲି ବୋଧେ ପହଁରା ଶିଖି ଗଲିଣି, ତେଣୁ ଯେତେ ପାଣି କୁ ଗଲେ ବି ପହଁରି ପାରିବି। ସେଥି ପାଇଁ ବେଶି ପାଣି କୁ ଚାଲି ଗଲି। ହେଲେ ଏବେ ମୋ ଭୁଲ ବୁଝି ପାରିଲି। କୌଣସି ବିଷୟରେ ଭଲ କି ନ ଜାଣି, ନ ଶିଖି ସେ ବିଷୟରେ ବେଶି ଦୂର ଆଗେଇଯିବା ଭୁଲ। ଗଲେ, ଅସୁବିଧା ରେ ପଡିବା ନିଶ୍ଚିତ।

ଅଜା ଖୁସି ହେଲେ କି ନାତିଆ ନିଜ ଭୁଲ ବୁଝି ପାରିଛି।

ଅଳ୍ପ ବିଦ୍ୟା ଭୟଙ୍କରୀ

ପ୍ରଭୁଙ୍କର ଏହି ମଧୁମୟ ସୃଷ୍ଟି

ମଧୁମୟ ଲୀଳା ମାନ,

ଭାବିଲେ ସେ ସବୁ ଲାଗଇ ଆଶ୍ଚର୍ଯ୍ୟ

ଭାବୁଥାଏ ନିତିଦିନ।।

ନିକିତି ତଉଲ ସାନ ବଡ କୁ ଲୋ

ଭାରି ଥାଏ ତଳେ ରହି,

ହାଲୁକା ଜିନିଷ ଉଚ୍ଚେ ହଲୁଥାଏ

ବିଧିର ବିଧାନ ଏହି ।।

ଫମ୍ପା ମାଠିଆ ଟି ଶବ୍ଦ କରେ ବେଶୀ

ଶବ୍ଦ ହୀନ ଜଳ ଭରି,

ରୋହୀ ମାଛ ସଦା ଗଭୀର ଜଳରେ

ଡେଉଁ ଥାଏ ଦଣ୍ଡିକିରି ।।

ଓଜନିଆ ବସ୍ତୁ ବୁଡ଼ଇ ଜଳରେ

ହାଲୁକା ଭାସଇ ଜଳେ,

ଜ୍ଞାନୀ ଜନ ସଦା ରହନ୍ତି ବିନମ୍ର

ମୁର୍ଖ ଭାଷେ ସଦା ବେଳେ ।।

ଅଳପ ବିଦ୍ୟା ଟି ଅଟେ ଭୟଙ୍କର

ନମ୍ରଭାବ ଗୁଣୀ ଜନ,

ଫଳ ଭରା ଡାଳ ସର୍ବଦା ତଳ କୁ

ସିଧା ରହେ ଫଳ ହୀନ ।।

ଅଳ୍ପ ବିଦ୍ୟା ସଦା ବିପଦ କାରଣ

ବ୍ୟର୍ଥ ଯାଏ ଶ୍ରମମାନ,

ଅଳପ ବିଦ୍ୟାରେ ବୋଲାଇ ପଣ୍ଡିତ

ଲୋକ ହସା ସବୁଦିନ ।।

ଅନଭିଜ୍ଞ ରାଜା ବସିଲେ ଗାଦିରେ

ରାଜ୍ୟ ହୁଏ ଛାରଖାର,

ଅନ୍ୟର ବୁଦ୍ଧି ରେ ଚଳାଏ ରାଇଜ

ଯଶ କି ରହେ ତାହାର ??

ମୁର୍ଖ ବୈଦ୍ୟରାଜ ଚିକିତ୍ସକ ହେଲେ

ପ୍ରାଣକୁ ଭାରି ବିପଦ,

ଅଯୋଗ୍ୟ ଲୋକ କୁ କୁବେର ଭଣ୍ଡାର

ନ ହୁଏ କେବେ ପର୍ଯ୍ୟାପ୍ତ ।।

ବିଛା ମନ୍ତ୍ର ଟିକୁ ନ ଜାଣି ତାନ୍ତ୍ରିକ

ସର୍ପ ଲାଙ୍ଗୁଡ଼ ରେ ହାତ,

ବିପଦ ତା ପାଇଁ ଅଟେ ଅନିବାର୍ଯ୍ୟ

ଅକାଳେ ମୃତ୍ୟୁ ନିଶ୍ଚିତ ।।

ଅଳ୍ପ ତନ୍ତ୍ର ବିଦ୍ୟା ଖାଏ ଗୁଣିଆ କୁ

ପ୍ରେତ ହୋଇ ଅସନ୍ତୁଷ୍ଟ,

ଅଳ୍ପ ବିଦ୍ୟା ସଦା ଅଟେ ଭୟଙ୍କରୀ

ଶାସ୍ତ୍ର ରେ ଉଲ୍ଲେଖ ସ୍ପଷ୍ଟ ।।

ଅଳ୍ପ ବିଦ୍ୟା ଶିଖି ହତ ଅଭିମନ୍ୟୁ

ଅପୂର୍ଣ୍ଣତା ସଦାବେଳେ

ଘୋର ବିପଦ କୁ ଡାକି ଆଣିଥାଏ

ଶୁଭ ନୁହେଁ କେବେ ହେଲେ ।।

ଅଳ୍ପ ବିଦ୍ୟାଧାରୀ ପଣ୍ଡିତ ବୋଲାଇ

ସଭାକୁ ଯାଏ ଯେ ଜନ,

ସଭା ମଧ୍ୟେ ନିଶ୍ଚେ ହୁଏ ଲୋକ ହସା

ପାଏ ବହୁ ଅପମାନ ।।

ଅଳ୍ପ ବିଦ୍ୟାଧାରୀ ଦେଲେ ବିଦ୍ୟାଦାନ

ଛାତ୍ର ର କି ହେବ ଦଶା,

ସଂସାର ମଧ୍ୟରେ ଅପଯଶ ଲଭି

ହୁଏ ଭାରି ଲୋକ ହସା ।।

ଜଳ ହୀନ ମେଘ ଭାସଇ ଆକାଶେ

ନ ପାରେ ବରଷି ଜଳ,

ଜଳ ପୂର୍ଣ୍ଣ ହେଲେ ହୁଏ ମେଘ ଭାରି

ବର୍ଷୁଥାଏ ଅନର୍ଗଳ ।।

ପାଚିଲା ଫଳ ଟି ଓଜନିଆ ହେତୁ

ବୃକ୍ଷ ତଳେ ପଡେ ଆସି,

ଶୁଖିଲା ପତ୍ର ଟି ଉଡ଼େ ଫିରିଫିରି

ଜଳ ସ୍ରୋତେ ଯାଏ ଭାସି ।।

ତେଣୁ କରି କେବେ ନିଜ ଜ୍ଞାନ ନେଇ

କରିବାନି ବଡପଣ,

ଅଳ୍ପ ବିଦ୍ୟା କେବେ ନୁହେଁ ଶୁଭଙ୍କର

ସଦା ଦୁଃଖ ର କାରଣ ।।

ଅଳ୍ପ ବିଦ୍ୟା ଭୟଙ୍କରୀ ( A little learning is dangerous thing)

..