ଝିଅଟେ କେବେ ପ୍ରେମ ବିବାହ କରିବ, ସେକଥା ଅନ୍ୟ କେହି ତ ଛାଡ ମୁଁ ନିଜେ ହିଁ ବିଶ୍ଵାସ କରିପାରୁନଥିଲି । ତେବେ କେମିତି କେଜାଣି ବିକ୍ରମଙ୍କ ପ୍ରସ୍ତାବକୁ ମନା କରିପାରିଲିନି, ବାପା ମତେ ସେ ସ୍ୱାଧୀନତା ଦେଇଥିଲେ କିନ୍ତୁ ମୋ ମାଆ ଟିକେ ଅମଙ୍ଗ ହେଉଥିଲେ । ତା'ର ବି କାରଣ ଅଛି ମୁଁ ଓଡିଆ ସାରସ୍ଵତ ବ୍ରାହ୍ମଣ ଘରର ଝିଅ ଆଉ ବିକ୍ରମ ଜଣେ ଅଣଓଡିଆ । ମୁମ୍ବାଇରେ ଗୋଟିଏ ସରକାରୀ କାର୍ଯ୍ୟାଳୟରେ କାର୍ଯ୍ୟରତ ଆମେ ଦୁହେଁ ।

ସେ ଯାହା ହେଉ ଆମର ବିବାହ ହେଲା । ବିବାହ ସମାରୋହ ଏଇଠି ମୁମ୍ବାଇରେ ହେଲା । ଘରେ ପ୍ରାୟ ସମସ୍ତେ ହିନ୍ଦୀ, ଇଂରାଜୀରେ ବିକ୍ରମର ପରିବାର ଲୋକଙ୍କ ସହ କଥା ହେଉଥିଲେ । ହେଲେ ମୋ ମାଆ ର ମୁହଁ ଟିକେ ଫିକା ଫିକା ଦିଶୁଥିଲା । ନା ହିନ୍ଦୀ ନା ଇଂରାଜୀ କୋଉ ଭାଷା ବି ସେ କହିପାରେନି, ତେଣୁ ସେ ଏକବାରେ ଚୁପ୍ ଥିଲା । ଯେନତେନ ବିବାହ କାର୍ଯ୍ୟ ସରିଲା । ସମସ୍ତେ ଯିଏ ଯାହା ବାଟରେ ଫେରିଗଲେ । ଅଫିସ୍ ଥିବାରୁ ଆମେ କାହାରି ଘରକୁ ଯାଇପାରି ନଥିଲୁ ।

କିଛି ଦିନ ପରେ ଛୁଟି ନେଇ ଆମେ ପ୍ରଥମେ ପଞ୍ଜାବ ଗଲୁ, ଆଉ ତା'ପରେ ମୋ ଘରକୁ । ଯୋଉଠି ବିକ୍ରମର ଘରେ ଏକଦମ୍ ଆଜାଦ ର ପରିବେଶ ସେଠି ମୋ ମାଆ ତ ଜ୍ଵାଇଁ କୁ ଦେଖି ଓଢ଼ଣା ଟାଣି ଦିଏ । ମୁଁ ଜାଣିଥିଲି ମାଆ ବିକ୍ରମ ସହ ଖୋଲି କି କଥା ହୋଇପାରୁନି । ତେଣୁ ଯିବା ପୁର୍ବରୁ ମୁଁ ବିକ୍ରମକୁ ଓଡିଆ କିଛି ଶିଖେଇଥିଲି । ଆଉ ସେ ଇଣ୍ଟରନେଟରୁ ବି କିଛି ଶିଖିଥିଲେ, ହେଲେ ଭାବି ନଥିଲି ଏମିତି ପରିସ୍ଥିତି ହେବ । ଘରେ ପହଞ୍ଚୁ ପହଞ୍ଚୁ ମାଆ ବନ୍ଦାଣ ଥାଳୀ ଧରି ଠିଆ ହୋଇ ଥିଲେ ଆଉ ବିକ୍ରମ କୁ ଓଡିଆ କହିବାର ଏତେ ଜଲଦି ଥିଲା ଯେ, ସେ ମାଆ କୁ ଦେଖୁ ଦେଖୁ କହିଉଠିଲେ "ହଇଲୋ ମାଁ ତୁ କେମିତି , ବଞ୍ଚିଛୁ ।" ଆମ ଓଡିଆ ଘରେ ପୁଣି ଶାଶୁ କୁ "ତୁ", ମାଆ ତ ଛାନିଆ ହୋଇ ଥାଳୀ ଛାଡି ଦୌଡି କି ପଳେଇଛି ଘରକୁ, ଆଉ ଆମେ ସମସ୍ତେ ଛାନିଆ ହୋଇ ଚାହିଁ ରହିଗଲୁ କେବଳ ।

ଆଜି ବି କଥା ଟି ମନେ ପଡିଲେ ହସି ହସି ପେଟ ଫାଟେ । କୋଉ ଅଭିଧାନରୁ ସେ ଓଡ଼ିଆ ଶିଖିଲେ କେଜାଣି । ସେ କହିଥିବା କଥାର ଅର୍ଥ ଜାଣି ସେ ନିଜେ ବି ଲଜ୍ଜିତ ହେଲେ । କୁହନ୍ତି ମୁଁ ତ ଭଲ ଅଛନ୍ତି କି ବୋଲି ପଚାରୁଥିଲି !!

ଅବଶ୍ୟ ଏବେ କିଛି କିଛି ଓଡ଼ିଆ କହୁଛନ୍ତି ସେ ।rm

Paramita Mishra

ଅଣଓଡ଼ିଆ

ଯୋଉଠି ବିକ୍ରମର ଘରେ ଏକଦମ୍ ଆଜାଦ ର ପରିବେଶ ସେଠି ମୋ ମାଆ ତ ଜ୍ଵାଇଁ କୁ ଦେଖି ଓଢ଼ଣା ଟାଣି ଦିଏ।।