ସ୍ନାନ ପୂର୍ଣ୍ଣିମା ଠାରୁ ଅଣସର ଘରେ ଅସୁସ୍ଥ ଥିବା ଚତୁର୍ଦ୍ଧାମୂର୍ତ୍ତୀ ଦଶମୀ ତିଥିରେ ଶଯ୍ୟା ଛାଡିଛନ୍ତି । ଅଣସର ଘରେ ଚକାରେ ବିଜେ ହୋଇଛନ୍ତି ଶ୍ରୀବିଗ୍ରହ । ଏକାଦଶୀ ତିଥିରେ ଦଶମୂଳ ସେବନ ପରେ ମହାପ୍ରଭୁ ସଂପୂର୍ଣ୍ଣ ସୁସ୍ଥ ହେବେ । ମହାପ୍ରଭୁଙ୍କ ଶ୍ରୀଅଙ୍ଗରେ ଓଷ ଲାଗି ପରେ ଧିରେ ଧିରେ ଜ୍ୱରରୁ ଉପଶମ ହୋଇଛନ୍ତି । ଦୀର୍ଘ ନଅ ଦିନ ଜ୍ୱରରେ ପୀଡିତ ହୋଇ ଅଣସର ପିଣ୍ଡିରେ ବିଶ୍ରାମ ନେଉଥିବା ଶ୍ରୀଜୀଉ ଉଠି ବସିଛନ୍ତି ।

ଆଜି ଖଳିଲାଗି ଏକାଦଶୀ ହୋଇଥାଏ ଯେଉଁଠି ଠାକୁରମାନଙ୍କୁ ଖଳି ଲାଗି କରାଯିବ । ଦଇତା ଓ ପତିମହାପାତ୍ର ତିନି ବାଡରେ ଶ୍ରୀଅଙ୍ଗରେ ଚନ୍ଦନ ଲେପନ କରିବେ । ଚନ୍ଦନରେ କର୍ପୂର , କେଶର ଓ ଆବଶ୍ୟକ ପରିମାଣର କସ୍ତୁରୀ ମିଶାଯାଇ ଶ୍ରୀବିଗ୍ରହ ମାନଙ୍କୁ ଲାଗି କରାଯିବାର ବିଧି ରହିଥାଏ । ମହାପ୍ରଭୁ ବାରଲାଗି ପାଟ ପରିଧାନ କରିବେ । ତୁଳସୀ ଲାଗି କରିବା ପରେ ମହାପ୍ରଭୁଙ୍କୁ ଦଶମୂଳ ଲାଗି କରାଯିବ । ଏହାପରେ ମହାପ୍ରଭୁ ସମ୍ପୂର୍ଣ୍ଣ ସୁସ୍ଥ ହେବେ । ତେବେ ମହାପ୍ରଭୁ ଜ୍ୱରରେ କମ୍ପୁ ଥିବାରୁ ଭୋଗଲାଗି ସମୟରେ ଘଂଟ ବାଜିବା ବନ୍ଦ ରହିଥାଏ । ଖଳି ଲାଗି ସମୟରେ ଘଂଟ ଓ କାହାଳୀ ବଜାଇ ଶ୍ରୀଜୀଉମାନେ ସୁସ୍ଥ ହେଉଥିବା ବାର୍ତ୍ତା ଭକ୍ତଙ୍କୁ ଜଣାଇବାର ପରମ୍ପରା ରହିଅଛି ।

ଦକ୍ଷିଣି ଘରେ କର୍ପୂର, କେଶର ବଟାଯାଇ ଚନ୍ଦନରେ ମିଶାଯାଏ । ଆଜି ରାତ୍ରରୁ ମହାପ୍ରଭୁ ମାନେ ଅଣସର ଘରେ ବାରଲାଗି ଖଣ୍ଡୁଆ ପିନ୍ଧିବେ ଦଇତା ଓ ପତି ମହାପାତ୍ର ତିନି ବାଡରେ ଉକ୍ତ ଚନ୍ଦନକୁ ଅଣସର ଗୃହରେ ଠାକୁରମାନଙ୍କ ଶ୍ରୀଅଙ୍ଗରେ ଲାଗି କରିଥାନ୍ତି ଏହି ସମୟରେ ବାହାରେ ପାଳିଆ ଖୁଣ୍ଟିଆ ମଣିମା ଡାକ ଦେଇଥାନ୍ତି ଏବଂ ହଡପ ନାଏକ ବିଡିଆ ମଣୋହି କରାଉଥାନ୍ତି ରାଘବ ଦାସ ମଠ ପ୍ରଦତ୍ତ ବାଇଶି ହାଣ୍ଡି ଖଇ, କୋରା, କଦଳୀ, ପଣସ, ଆମ୍ବ ଇତ୍ୟାଦି ଭୋଗ କରାଯାଇଥାଏ । ଏହି ଦିନଠାରୁ ଶ୍ରୀବିଗ୍ରହମାନେ ତୁଳସୀ ଓ ବିଭିନ୍ନ ସୁବାସିତ ପୁଷ୍ପ ଲାଗି ହୋଇଥାନ୍ତି ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଅଣସର ଏକାଦଶୀ ଦିବସରେ ଖଳିଲାଗି

ଅଣସର ଏକାଦଶୀ ଦିବସରେ ଖଳିଲାଗି