"ଆୟୁର୍ବେଦ" ଶବ୍ଦଟି ଶୁଣିଲେ ମନେ ପଡେ ହଳଦୀ, ନିମ୍ବ, ଅଦା ଭଳି ଗଛ ଗଛାଳିର ସୁଗନ୍ଧ। ମନେ ପଡେ ଆମ ବୁଢ଼ୀମା'ଙ୍କ ଘରୋଇ ଔଷଧ। ଆୟୁର୍ବେଦ କେବଳ ଚିକିତ୍ସା ପଦ୍ଧତି ନୁହେଁ, ଏହା ଏକ ଜୀବନଧାରା। ଆୟୁର୍ବେଦ ଦିବସ ପ୍ରତିବର୍ଷ ଧନ୍ୱନ୍ତରି ଜୟନ୍ତୀ ଦିନ ପାଳନ କରାଯାଏ, ଯାହା ଆମକୁ ଏହି ପ୍ରାଚୀନ ଜ୍ଞାନକୁ ସ୍ମରଣ କରାଇ ଦେଇଥାଏ।

ଆୟୁର୍ବେଦ କ’ଣ?

ଆୟୁର୍ବେଦ ଦୁଇଟି ଶବ୍ଦରେ ମିଳିତ: "ଆୟୁସ୍" (ଜୀବନ) ଓ "ବେଦ" (ଜ୍ଞାନ)। ଅର୍ଥାତ୍, ଜୀବନର ଜ୍ଞାନ। ଏହା ହଜାର ହଜାର ବର୍ଷ ଧରି ଭାରତୀୟ ମୁନିଋଷି ମାନଙ୍କ ଦ୍ୱାରା ଗଢ଼ା ଯାଇଥିବା ଏକ ବିଜ୍ଞାନ। ଏହାର ମୂଳ ଭାବନା ହେଉଛି – ମନୁଷ୍ୟ ଶରୀର ପ୍ରକୃତିର ଏକ ଅଂଶ। ପ୍ରକୃତିରେ ଯେଉଁ ପଞ୍ଚଭୂତ (ମାଟି, ପାଣି, ଅଗ୍ନି, ବାୟୁ ଓ ଆକାଶ) ରହିଛି, ସେହି ପଞ୍ଚଭୂତ ଦ୍ୱାରା ଆମ ଶରୀର ଗଠିତ। ଆୟୁର୍ବେଦ ମତରେ, ଶରୀରରେ ତିନୋଟି ମୂଳସୂତ୍ର ବା "ଦୋଷ" ରହିଛି: ବାତ, ପିତ୍ତ ଓ କଫ। ଏହି ତିନିଟିର ସନ୍ତୁଳନ ହିଁ ସୁସ୍ଥ ଜୀବନର ମୂଳଚାପ।

ପ୍ରକୃତି ସହିତ ସମ୍ପର୍କ

ଆୟୁର୍ବେଦର ସବୁଠାରୁ ସୁନ୍ଦର ଦିଗ ହେଉଛି ଏହାର ପ୍ରକୃତି ସହିତ ସମ୍ପର୍କ। ଆୟୁର୍ବେଦିକ ଚିକିତ୍ସାରେ ବ୍ୟବହୃତ ହେଉଥିବା ସମସ୍ତ ଔଷଧ ପ୍ରକୃତିରୁ ମିଳେ – ଗଛର ମୂଳ, ବକଳ, ପତ୍ର, ଫଳ, ଫୁଲ। ହିଙ୍ଗ, ଅଦା, ଜିରା ଭଳି ମସଲା ଯାହା ଆମେ ରାନ୍ଧାରେ ବ୍ୟବହାର କରୁ, ତାହା ମଧ୍ୟ ଆୟୁର୍ବେଦର ଅଂଶ। ଏହି ଔଷଧଗୁଡିକ ଶରୀରକୁ କୌଣସି କ୍ଷତି କରେ ନାହିଁ, ବରଂ ଧୀରେ ଧୀରେ ରୋଗକୁ ମୂଳରୁ ଭଲ କରିଥାଏ।

ଦିନଚର୍ଯ୍ୟା ଓ ଋତୁଚର୍ଯ୍ୟା

ଆୟୁର୍ବେଦ କେବଳ ରୋଗ ହେଲେ ଔଷଧ ଖାଇବା ନୁହେଁ, ବରଂ ରୋଗ ନ ହେବା ପାଇଁ ଜୀବନଯାପନ କରିବାର ପଦ୍ଧତି। ଏଥିପାଇଁ ଆୟୁର୍ବେଦରେ "ଦିନଚର୍ଯ୍ୟା" (ଦିନେ ଦିନେ କାର୍ଯ୍ୟ) ଓ "ଋତୁଚର୍ଯ୍ୟା" (ଋତୁ ଅନୁସାରେ କାର୍ଯ୍ୟ) ବିଷୟରେ କୁହାଯାଇଛି। ଯେପରିକି:

· ସକାଳେ ଖାଲି ପେଟେ ପାଣି ପିଇବା ଭଲ।

· ଭୋକ ଲାଗିଲେ ଖାଇବା, ନଚେତ୍ ଜୋର କରି ନ ଖାଇବା।

· ଋତୁ ଅନୁସାରେ ଖାଦ୍ୟ ଓ ବ୍ୟାୟାମ କରିବା।

ଆୟୁର୍ବେଦ ଦିବସର ମୁଖ୍ୟ ଉଦ୍ଦେଶ୍ୟ

ଆୟୁର୍ବେଦ ଦିବସ ପାଳନର ମୁଖ୍ୟ ଲକ୍ଷ୍ୟ ହେଉଛି:

· ଯୁବପିଢ଼ିଙ୍କୁ ଏହି ପ୍ରାଚୀନ ଜ୍ଞାନ ବିଷୟରେ ଜାଣିବାର ସୁଯୋଗ ଦେବା।

· ପ୍ରକୃତି ସହ ସାମଞ୍ଜସ୍ୟ ରକ୍ଷା କରି ଜୀବନଯାପନ କରିବା ପାଇଁ ପ୍ରେରିତ କରିବା।

· ରାସାୟନିକ ଔଷଧ ଓ ଦୁଷିତ ଖାଦ୍ୟରୁ ଦୂରେଇ ପ୍ରାକୃତିକ ଜୀବନଶୈଳୀକୁ ପୁନରୁଦ୍ଧାର କରିବା।

ତେଣୁ, ଆୟୁର୍ବେଦ ଦିବସ ହେଉଛି ଆମକୁ ଆମର ମୂଳ ଓ ପ୍ରକୃତିକୁ ଫେରିଯିବାର ସୁଯୋଗ। ଏହା ଆମକୁ ଶିଖାଏ ଯେ, ପ୍ରକୃତିର ସହଜ ଓ ସରଳ ନିୟମ ଅନୁସରଣ କରି ଆମେ ସୁସ୍ଥ ଓ ସୁଖୀ ଜୀବନ କଟାଇପାରିବା। ଆସନ୍ତୁ, ଆମେ ଆୟୁର୍ବେଦର ଏହି ମହତ୍ତ୍ୱପୂର୍ଣ୍ଣ ସୂଚନାକୁ ଜୀବନରେ ଗ୍ରହଣ କରିବାକୁ ଚେଷ୍ଟା କରିବା।

ଶୁଭ ଆୟୁର୍ବେଦ ଦିବସ

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଆୟୁର୍ବେଦ ଦିବସ — ପ୍ରକୃତି ସହ ଅନନ୍ୟ ସମ୍ପର୍କ

ଆୟୁର୍ବେଦ ଦିବସ — ପ୍ରକୃତି ସହ ଅନନ୍ୟ ସମ୍ପର୍କ