ପୃଷ୍ଠଭୂମି -

ଆୟୁଷ୍ମାନ ଭାରତ -

ଭାରତ ହେଉଛି ଏକ ବହୁ ଦଳୀୟ ରାଷ୍ଟ୍ର । ଏଠାରେ ଅନେକ ଜାତୀୟ ଦଳ , ଆଞ୍ଚଳିକ ଦଳ ର ଉପସ୍ଥିତି ଦେଖିବାକୁ ମିଳିଥାଏ। ଏହି ଦଳ ମାନଙ୍କ ର ଏକ ସାଧାରଣ ଲକ୍ଷ୍ୟ ଥାଏ ,ଯାହା ହେଉଛି ସରକାର ଗଠନ କରିବା। ସରକାର ଗଠନ କରିବା କିମ୍ବା ସରକାର କୁ ଦୃଢ କରିବା ନିମନ୍ତେ ବିଭିନ୍ନ ଜନ ହିତକର ଯୋଜନା ମାନ ପ୍ରଣୟନ କରାଯାଇଥାଏ। ଏହି ଯୋଜନା ମାଧ୍ୟମରେ ଅନେକ ଜନସାଧାରଣ ଉପକୃତ ହୋଇଥାନ୍ତି। ଆମ ଦେଶ ଭାରତ ଏକ ବିକାଶୋନ୍ମୁଖୀ ଦେଶ । ଏଠାରେ ପ୍ରଗତିର ଧାରା ଅନବରତ ପ୍ରଭାହିତ ହେଉଥାଏ ଏବଂ ଏହି ଧାରା ର ଲକ୍ଷ୍ୟ ଥାଏ ବିକାଶ ର ସାଗର କୁ ସ୍ପର୍ଶ କରିବା। ବେକାରୀ ସମସ୍ୟା , ଦାରିଦ୍ର୍ୟ ସମସ୍ୟା , ଅନୁନ୍ନତ ଶିକ୍ଷା ବ୍ୟବସ୍ଥା , ଅନୁନ୍ନତ ସ୍ବାସ୍ଥ୍ୟ ବ୍ୟବସ୍ଥା, ଅନୁନ୍ନତ କୃଷି ବ୍ୟବସ୍ଥା କୁ ସନ୍ଧାନ କଲେ ଆମେ ଜାଣି ପାରିବା କି ଆମ ଦେଶ କୁ ଏହି ସବୁ ରୋଗ ଆକ୍ରାନ୍ତ କରିଛି। ଏବଂ ଏଗୁଡିକ ମହାମାରୀ ପରି ବ୍ୟାପି ଚାଲିଛି। ଏବଂ ନିଜର ସଂଖ୍ୟା ବଢେଇ ଚାଲିଛି । ଏସବୁ କୁ ନିୟନ୍ତ୍ରଣ କରିବାରେ ମୁଖ୍ୟ ଭୂମିକା ଗ୍ରହଣ କରିଥାଏ ସରକାର ଙ୍କ ଯୋଜନା।

ଆୟୂଷ୍ମାନ୍ ଭାରତ ଯୋଜନା ର ଇତିହାସ-

୨୦୧୭ ରେ ଗ୍ଲୋବାଲ୍ ବର୍ଡନ୍ ଅଫ୍ ଡିଜିଜ୍ ଷ୍ଟଡି ର ଏକ ଭାରତୀୟ ସଂସ୍କରଣ ୧୯୯୦ ରୁ ୨୦୧୬ ପର୍ଯ୍ୟନ୍ତ ଭାରତର ପ୍ରତ୍ୟେକ ରାଜ୍ୟ ଗୁଡିକ ପାଇଁ ପ୍ରମୁଖ ରୋଗ ଏବଂ ବିପଦ ର କାରଣଗୁଡିକ ରିପୋର୍ଟ କରିଥିଲା।ଏହି ଅଧ୍ୟୟନ ସରକାରୀ ସ୍ୱାସ୍ଥ୍ୟ ନୀତିକୁ ବହୁ ପ୍ରଭାବିତ କରିଥିଲା । ଏହା ପ୍ରତି ବିଚାର ବିମର୍ଶ କରିବାକୁ ସରକାରୀ ସ୍ତରରେ ନିଷ୍ପତ୍ତି ନେବାକୁ ବହୁ ଆଗ୍ରହ ସୃଷ୍ଟି କରିଥିଲା ।ଯାହା ଦ୍ବାରା ଚିହ୍ନଟ ବିପଦ ବା ରୋଗ କୁ ସରକାର ଦ୍ବାରା ସମାଧାନ କରାଯାଇପାରିବ।ଭାରତ ଭଳି ଜନବହୁଳ ରାଷ୍ଟ୍ର ରେ ସ୍ବାସ୍ଥ୍ୟ ବ୍ୟବସ୍ଥା ର ସମସ୍ତ ସୁବିଧା ଥିଲେ ସୁଦ୍ଧା ଏହା ର‌ ଖର୍ଚ୍ଚ ବାବଦକୁ ନିଜ ପକେଟ୍ ରୁ ଦେବାକୁ ପଡୁଥାଏ। ଏହି ଦେୟ ଅନେକ ରୋଗୀଙ୍କୁ ସ୍ୱାସ୍ଥ୍ୟ ସେବା ପାଇବାରେ ବାଧା ସୃଷ୍ଟି କରିଥାଏ | ସ୍ବାସ୍ଥ୍ୟ କ୍ଷେତ୍ରର ଉନ୍ନତି ଦେଶର ବିକାଶ ରେ‌ ବହୁ ସୁଫଳତା ଆଣିପାରିଥାଏ।୨୦୧୮ ରେ ଭାରତ ସରକାର ଙ୍କ ଦ୍ବାରା ସୂଚିତ କରାଯାଇଅଛି ଯେ ସାଧାରଣ ଜନତା ନିଜ ପକେଟ ଚିକିତ୍ସା ଖର୍ଚ୍ଚ ବହନ କରି ୬୦ କୋଟିରୁ ଅଧିକ ଭାରତୀୟ ଦାରିଦ୍ର୍ୟ ର ସୀମା ରେଖାର ତଳକୁ ଖସି ଯାଇଛନ୍ତି। ଭାରତରେ ସ୍ୱାସ୍ଥ୍ୟସେବା ପାଇଁ ଉପଲବ୍ଧ ଥିବା ବିଭିନ୍ନ ଆଞ୍ଚଳିକ ଏବଂ ଜାତୀୟ କାର୍ଯ୍ୟକ୍ରମ ସତ୍ତ୍ୱେ ଆହୁରି ଅନେକ କିଛି କରିବାକୁ ପଡିବ ବୋଲି ସରକାର ଙ୍କର ହୃଦୟଙ୍ଗମ କରିଥିଲେ| ଭାରତ ସରକାର ପ୍ରଥମେ ୨୦୧୮ ମସିହା ୟୁନିୟନ ବଜେଟରେ ଆୟୁଷ୍ମାନ ଭାରତ ଯୋଜନାକୁ ସର୍ବଭାରତୀୟ ସ୍ୱାସ୍ଥ୍ୟସେବା ଯୋଜନା ଭାବରେ ଘୋଷଣା କରିଥିଲେ।ସେହି ବର୍ଷ ମାର୍ଚ୍ଚରେ କେନ୍ଦ୍ର ମନ୍ତ୍ରୀପରିଷଦ ଦ୍ବାରା ଏହାକୁ ଅନୁମୋଦନ କରାଯାଇଥିଲା। ଭାରତର ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦୀ ୨୦୧୮ ଅଗଷ୍ଟ ୧୫ ରେ ଦେଶରେ ପାଳିତ ହେଉଥିବା ସ୍ୱାଧୀନତା ଦିବସ‌ରେ ପ୍ରଦାନ କରୁଥିବା ନିଜ ଭାଷଣରେ ଘୋଷଣା କଲେ ଯେ ପଣ୍ଡିତ ଦିନ୍ ଦୟାଲ୍ ଉପାଧ୍ୟାୟଙ୍କ ଜନ୍ମଦିବସ ରେ ତଥା ସେପ୍ଟେମ୍ବର ୨୫ ତାରିଖ ଠୁ ଦେଶରେ ଏକ ପ୍ରମୁଖ ସ୍ବାସ୍ଥ୍ୟ କାର୍ଯ୍ୟକ୍ରମ ଆରମ୍ଭ ହେବ। ଯାହାର ନାମ ଆୟୁଷ୍ମାନ ଭାରତ ରଖାଯାଇଥିଲା।

୨୦୧୮ ଜୁନ୍ ରେ ରେ ଏକ "ଏମ୍ପାନେଲମେଣ୍ଟ ପ୍ରକ୍ରିୟା" ମାଧ୍ୟମରେ ଡାକ୍ତରଖାନା ମାନଙ୍କରେ ଆବେଦନଗୁଡିକ ଖୋଲାଯାଇଥିଲା‌। ୨୬ ଡିସେମ୍ବର ୨୦୨୦ ସୁଦ୍ଧା ଏହି ଯୋଜନା ଜାମ୍ମୁ କାଶ୍ମୀର ଏବଂ ଲଦାଖରେ ପ୍ରୟୋଗ କରାଯାଇଥିଲା । ଏବଂ ପରେ ପରେ ଏହାକୁ ଅନ୍ୟ ରାଜ୍ୟ ଗୁଡିକରେ ମଧ୍ୟ ଲାଗୁ କରା ଯାଇଥିଲା । ସ୍ବାସ୍ଥ୍ୟ କ୍ଷେତ୍ରରେ ଏହା ଏକ କ୍ରାନ୍ତିକାରୀ ଓ ଯୁଗାନ୍ତକାରୀ କାର୍ଯ୍ୟକ୍ରମ ସାବ୍ୟସ୍ତ ହେବ ବୋଲି ବିଶ୍ଵାସ ରଖାଯାଇଥିଲା।

ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡିକର ଅଂଶଗ୍ରହଣ -

ଭାରତର ୨୮ ଟି ରାଜ୍ୟ ଏବଂ ୮ ଟି କେନ୍ଦ୍ର ଶାସିତ ଅଞ୍ଚଳ ଆୟୁଷ୍ମାନ ଭାରତ ଯୋଜନାରେ ଅଂଶଗ୍ରହଣ କରିବେ କି ନାହିଁ ତାହା ସେମାନଙ୍କୁ ସ୍ବାଧୀନତା ଦିଆଯାଇଥିଲା। ମହାରାଷ୍ଟ୍ର ଏବଂ ତାମିଲନାଡୁ ପ୍ରଥମେ ଏହି ଯୋଜନା କୁ ନିଜ ରାଜ୍ୟ ରେ କାର୍ଯ୍ୟକାରୀ ନ‌ କରିବାକୁ ମନା କରିଦେଇଥିଲେ କାରଣ ସେମାନଙ୍କର ପ୍ରତ୍ୟେକଙ୍କର ନିଜସ୍ୱ ରାଜ୍ୟ ସ୍ୱାସ୍ଥ୍ୟସେବା କାର୍ଯ୍ୟକ୍ରମ ଥିଲା। ଯାହା ସଫଳତା ର ସହିତ ଉକ୍ତ ରାଜ୍ୟ ଗୁଡିକରେ କାର୍ଯ୍ୟ କରୁଥିଲା। କେରଳ ରାଜ୍ୟ ନିଜର ସ୍ୱାସ୍ଥ୍ୟ କାର୍ଯ୍ୟକ୍ରମ ଯୋଜନା କାର୍ଯ୍ୟରତ ଥିବା ସତ୍ତ୍ବେ ୨୦୧୯ ନଭେମ୍ବର ରୁ ଆୟୁଷ୍ମାନ ଭାରତ ଯୋଜନା ବ୍ୟବହାର ଆରମ୍ଭ କରିବାକୁ ରାଜି ହୋଇଥିଲା। ପଶ୍ଚିମବଙ୍ଗ ପ୍ରଥମେ ଏହି କାର୍ଯ୍ୟକ୍ରମରେ ଯୋଗ ଦେଇଥିଲା କିନ୍ତୁ ପରେ ନିଜସ୍ୱ ଆଞ୍ଚଳିକ ସ୍ୱାସ୍ଥ୍ୟ କାର୍ଯ୍ୟକ୍ରମ ଲାଗୁ କରିବା ଉପରେ ଅଧିକ ଗୁରୁତ୍ବ ପ୍ରଦାନ କରିଥିଲା। ତେଲେଙ୍ଗାନା ରାଜ୍ୟ ମଧ୍ୟ ପଶ୍ଚିମ ବଙ୍ଗ କୁ ଅନୁସରଣ କରିଥିଲା। ୨୦୨୦ ଜାନୁୟାରୀ ମାସ ସୁଦ୍ଧା ଓଡିଶା ଏହି ଯୋଜନାରେ ଯୋଗ ଦେଇନଥିଲା। ୨୦୨୦ ମାର୍ଚ୍ଚ ମାସରେ‌ ଦିଲ୍ଲୀ ଏହି କାର୍ଯ୍ୟକ୍ରମ କୁ ଗ୍ରହଣ କରିବାକୁ ଘୋଷଣା କରିଥିଲା।

ସ୍ଥାନୀୟ ଲୋକଙ୍କ ଦ୍ୱାରା ଅଂଶଗ୍ରହଣ -

୨୦୨୦ ମେ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ରେଡିଓ କାର୍ଯ୍ୟକ୍ରମ 'ମନ କି ବାତ୍' ରେ ଘୋଷଣା କରିଲେ ଯେ ଆୟୁଷ୍ମାନ ଭାରତ ଯୋଜନା ଦ୍ବାରା ଏକ କୋଟିରୁ ଅଧିକ ଲୋକ ଉପକୃତ ହୋଇ ପାରିଛନ୍ତି। ଏହା ଯୋଜନା ମାଧ୍ୟମରେ ସରକାରୀ ଡାକ୍ତରଖାନା ଗୁଡିକର ସଂଖ୍ୟା ବୃଦ୍ଧି ହେବା ସହ ଅଧିକ ରୁ ଅଧିକ ସଂଖ୍ୟକ ଲୋକ ଉପକୃତ ହୋଇ ପାରିଛନ୍ତି।

ଯୋଜନା ର ବୈଶିଷ୍ଟ୍ୟ -

ଦଶ କୋଟି ପରିବାର କିମ୍ବା ପଚାଶ କୋଟି ଭାରତୀୟଙ୍କୁ ସ୍ୱାସ୍ଥ୍ୟ ସେବା ଯୋଗାଇବା ଏହାର ପ୍ରମୁଖ ବୈଶିଷ୍ଟ୍ୟ। ଉଭୟ ସରକାରୀ ଏବଂ ବେସରକାରୀ ସ୍ତରରେ ଏହାକୁ ଲାଗୁ କରିବା ସହ ଡାକ୍ତରଖାନା କିମ୍ବା ଡାକ୍ତରଙ୍କ କାର୍ଯ୍ୟାଳୟ ଜରିଆରେ ନଗଦବିହୀନ ଦେୟ ଏବଂ କାଗଜବିହୀନ ରେକର୍ଡ ସଂରକ୍ଷଣ ପ୍ରଦାନ କରିବା ।ସମସ୍ତ ପ୍ରକାର ର ସରକାରୀ ସେବା ଓ ଔଷଧ ଖର୍ଚ୍ଚ ଏହି ଯୋଜନା ମାଧ୍ୟମରେ ଭରଣା କରାଯାଇ ପାରିବ। ଜଣେ ହିତାଧିକାରୀ ନିଜ ରାଜ୍ୟ ବାହାରେ ତଥା ଦେଶର ଯେ କୌଣସି ସ୍ଥାନରେ ପ୍ରଧାନମନ୍ତ୍ରୀ ଜନ ଆରୋଗ୍ଯ ଯୋଜନା ଅନ୍ତଭୁକ୍ତ ଚିକିତ୍ସାଳୟ ରେ ଚିକିତ୍ସା ପାଇପାରିବେ। ଏହି ଯୋଜନା ମାଧ୍ୟମରେ କୋଭିଡ୍-୧୯ ର ପରୀକ୍ଷଣ ବିନା ଦେୟ ରେ କରାଯାଇ ପାରିବ।

ଆୟୂଷ୍ମାନ୍ ଭାରତ ଯୋଜନା ଆବଶ୍ୟକତା -

ଭାରତ ଏକ ଜନ ବହୁଳ ରାଷ୍ଟ୍ର ।ବିଶ୍ବ ବ୍ୟାଙ୍କ ଅନୁଯାୟୀ ୨୦୨୧ ମସିହିରେ ଭାରତର ଜନସଂଖ୍ୟା ୧୩୫ କୋଟି ରୁ ଉର୍ଦ୍ଧ୍ବ। ଏହି ସଂଖ୍ୟା କ୍ରମଶଃ ବୃଦ୍ଧି ପାଇବାରେ ଲାଗିଛି। ଜନ ବିସ୍ଫୋରଣ ର ସମ୍ଭାବନା ସୃଷ୍ଟି ହୋଇଛି। ପୃଥିବୀର ସର୍ବବୃହତ ଜନବହୁଳ ରାଷ୍ଟ୍ର ଭାବରେ ଭାରତ ଚୀନ୍ ର ସମସ୍କନ୍ଧ ହୋଇ ପାରିଛି। ଏଭଳି ଜନ ବହୁଳ ଦେଶରେ ସ୍ବାସ୍ଥ୍ୟ ଏକ ଗୁରୁତ୍ତ୍ୱପୂର୍ଣ ଏବଂ ସମ୍ବେଦନଶୀଳ ବିଷୟବସ୍ତୁ ଅଟେ। ଫାର୍ମାସ୍ୟୁଟିକାଲ୍ ଏବଂ ବାୟୋଟେକ୍ନୋଲୋଜି ଶିଳ୍ପ ପାଇଁ ଭାରତ ଏକ ହବ୍ ଭାବେ କାର୍ଯ୍ୟରତ । ବିଶ୍ବ ସ୍ତରୀୟ ବୈଜ୍ଞାନିକ, କ୍ଲିନିକାଲ୍ ପରୀକ୍ଷା କେନ୍ଦ୍ର ଏବଂ ଉନ୍ନତ ମାନର ଡାକ୍ତରଖାନା ନିର୍ମାଣ ସତ୍ତ୍ୱେ ଶିଶୁଙ୍କ ପୁଷ୍ଟିହୀନତା, ନବଜାତକ ଏବଂ ମାତୃ ମୃତ୍ୟୁହାର, ଅଣ ସଂକ୍ରାମକ ରୋଗର ବୃଦ୍ଧି, ସଡ଼କ ଟ୍ରାଫିକ୍ ଦୁର୍ଘଟଣାର ହାର ବୃଦ୍ଧି ପାଉଛି। ଏହା ଦ୍ବାରା ଭାରତ ଜନସ୍ବାସ୍ଥ୍ୟ ସମ୍ବନ୍ଧୀୟ ସମସ୍ୟା ର ସମ୍ମୁଖୀନ ହେଉଛି।

ଏହି ସମସ୍ୟା ସେତେବେଳେ ଜଟିଳ ହେଇ ଯାଉଛି ଯେତେବେଳେ ଏହା ଏକ ଦାରିଦ୍ର୍ୟ ସୀମାରେଖା ତଳେ ଥିବା ପରିବାର କିମ୍ବା ମଧ୍ୟ ବର୍ଗୀୟ ପରିବାର କୁ ଆକ୍ରାନ୍ତ କରୁଛି। ନା ସେମାନେ ଶାରୀରିକ ନା ମାନସିକ , କୌଣସି ସ୍ତରରେ ସେମାନେ ପ୍ରସ୍ତୁତ ନଥାନ୍ତି ଏଭଳି ସମସ୍ୟା କୁ ସମ୍ମୁଖୀନ କରିବା ପାଇଁ। ଏହି ମାନଙ୍କ ପାଇଁ ସରକାର ବା ନେତୃବୃନ୍ଦ ପ୍ରଣୟନ କରିଥାନ୍ତି ନା ନା ଯୋଜନା ମାନ।ଏହା ଦ୍ବାରା ସାଧାରଣ ଜନତା ଉପକୃତ ହୋଇପାରିଥାନ୍ତି। ସ୍ବାସ୍ଥ୍ୟ କ୍ଷେତ୍ରରେ ସୁଧାରିକରଣ , ସ୍ବାସ୍ଥ୍ୟ ସମ୍ବନ୍ଧିତ ସମସ୍ୟାର ଆର୍ଥୀକ ସହାୟତା ନିମନ୍ତେ ଭାରତର କେନ୍ଦ୍ର ସରକାର ଏକ ଜନହିତକର ଯୋଜନା ପ୍ରଣୟନ କରିଛନ୍ତି ଯାହା ହେଉଛି ଆୟୁଷ୍ମାନ ଯୋଜନା।

ଏହି ଯୋଜନା ବ୍ୟୟବହୁଳ ସମାଜ ରେ ଭିନ୍ନ ଭିନ୍ନ ଭୟଙ୍କର ରୋଗର ନିରାକରଣ ପାଇଁ ପଛଘୁଞ୍ଚା ଦେଉଥିବା ସାଧାରଣ ଜନତା ଙ୍କୁ ରୋଗ କୁ ସମ୍ମୁଖୀନ କରିବା ପାଇଁ ଶକ୍ତି ଯୋଗାଉଛି । ନିର୍ଦ୍ଦିଷ୍ଟ ମୂଲ୍ୟ ର ଆର୍ଥୀକ ସହୟତା ପ୍ରଦାନ କରି ସ୍ବାସ୍ଥ୍ୟ କ୍ଷେତ୍ରରେ ବିପ୍ଲବ ସୃଷ୍ଟି କରିପାରିଛି। ଆୟୁଷ୍ମାନ ଯୋଜନା ଟି ଅକାଳ ରେ ମୃତ୍ୟୁ ବରଣ କରୁଥିବା ଲୋକଙ୍କୁ ଜୀବନ ଆୟୁ ପ୍ରଦାନ କରି ପାରୁଛି। ଯେଉଁ ସାଧାରଣ ଗରିବ ଟିଏ ଡାକ୍ତରଖାନାରେ ପାଦ ପକାଇବାକୁ ଭୟଭୀତ ହେଉଥିଲା ,ସେ ଏବେ ନିଶ୍ଚିନ୍ତ ରେ ନିର୍ଭୟରେ ନିଜ ର ଡାକ୍ତର ଖାନା ରଜ ନିଜର ସମସ୍ଯା ସମାଧାନ କରି ପାରୁଛି।

ସମାଜ ରେ କ୍ରମଶଃ ପରିବର୍ତ୍ତନ ଘଟୁଛି। ଅତୀତ ରେ ଔଷଧ ର ଅଭାବ ହେତୁ ଲୋକ ମାନେ ମୃତ୍ୟୁ ବରଣ କରୁଥିଲେ । ପ୍ରଚଳିତ ଥିବା କୁ ପ୍ରଥା ଅନ୍ଧ ବିଶ୍ବାସ ଯୋଗୁଁ ଅନେକ ଙ୍କର ମୃତ୍ୟୁ ଘଟୁଥିଲା।ମାତ୍ର ଏବେ ଔଷଧ ର ପର୍ଯ୍ୟାପ୍ତ ସୁବିଧା ହୋଇ ପାରିଛି। ଏପରି କି ବଡ ବଡ ରୋଗ ,ଯାହା କୁ ଠିକ୍ କରିବା ଅସମ୍ଭବ ମନେ ହେଉଥିଲା ,ତାହା ମଧ୍ୟ ଠିକ୍ କରାଯାଇ ପାରୁଛି। ଏସବୁ ପରେ ବି ସ୍ବାସ୍ଥ୍ୟ ବ୍ୟବସ୍ଥା ଏକ ଚିନ୍ତା ଜନକ ବିଷୟବସ୍ତୁରେ ପରିଣତ ହୋଇଛି। ଏହାର ଏକମାତ୍ର କାରଣ ହେଉଛି ଦର ବୃଦ୍ଧି। ସମାଜ ର ପରିବର୍ତ୍ତନ ହେବା ସହ ଦରରେ ମଧ୍ୟ ପରିବର୍ତ୍ତନ ଘଟିଛି। ଏହା ଦ୍ବାରା ସୁବିଧା ଥିବା ପରେ ବି ଡାକ୍ତରି ସେବା ରୁ ସାଧାରତ ଲୋକ ବଞ୍ଚିତ ହେଉଛନ୍ତି। ଏହି ଯୋଜନା ସେମାନଙ୍କୁ ଉପକୃତ କରିବା ସହ ଜୀବନ ଆୟୁକୁ ବୃଦ୍ଧି କରିବାରେ ସହାୟକ ହେଉଛି। ଏହି ଯୋଜନା ସେମାନଙ୍କୁ ଆର୍ଥୀକ ସହୟତା ପ୍ରଦାନ ସହ ସ୍ବାସ୍ଥ୍ୟ କ୍ଷେତ୍ରରେ ଏକ ବଡ ଧରଣର କ୍ରାନ୍ତି ସୃଷ୍ଟି କରି ପାରିଛି।

ଶେଷକଥା-

ଅନେକ ବ୍ୟକ୍ତି ଏହାକୁ ନିଜ ନିଜ ରାଜ୍ୟ ରେ କାର୍ଯ୍ୟକାରୀ ହେଉଥିବା ସ୍ବାସ୍ଥ୍ୟ ଯୋଜନା ସହିତ ତୁଳନା କରିଥାନ୍ତି। କେତେକ ଏହାକୁ ଗ୍ରହଣ କରୁଥିବା କେତେକ ଏହାକୁ ଦୃଢ ବିରୋଧ ମଧ୍ୟ କରିଥାନ୍ତି। ଏହି ଯୋଜନା ଅନେକ ସମାଲୋଚନା ର ମଧ୍ୟ ଶିକାର ହୋଇଛି।

ଏପରି ଚିନ୍ତାଧାରା ଆସିବା ସ୍ବାଭାବିକ। ମୁଦ୍ରାର ଦୁଇଟି ପାର୍ଶ୍ବ ଥିବା ଭଳି ଏହି ଯୋଜନା ଗୁଡିକର କିଛି ସୁଫଳ ଥିବା ବେଳେ କିଛି ଦୁର୍ଗୁଣ ମଧ୍ୟ ରହିଥାଏ। ତେଣୁ ଏହି ଯୋଜନା ଗୁଡିକର ସୁଧାରିବା ନିମନ୍ତେ ସରକାର ବିଶେଷ ଧ୍ୟାନ ଦେବା ଆବଶ୍ୟକ। ଜନସାଧାରଣ ଯଦି ଦଳୀୟ ସ୍ବାର୍ଥ କୁ ପରିତ୍ୟାଗ କରି ଜାତୀୟ ସ୍ବାର୍ଥ କୁ ଗୁରୁତ୍ବ ଦେବେ , ଯଦି ସରକାର ଙ୍କୁ ସମର୍ଥନ ଓ ସହଯୋଗ କରିବେ ତେବେ ନିଶ୍ଚିତ ଭାବରେ କୌଣସି ବି ଯୋଜନା ଫଳପ୍ରଦ ହୋଇପାରିବ।

ପ୍ରସ୍ତୁତି - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଆୟୁଷ୍ମାନ ଭାରତ ଯୋଜନା ର ଆବଶ୍ୟକତା||Necessity of Ayushman Bharat Scheme

ସ୍ବାସ୍ଥ୍ୟ କ୍ଷେତ୍ରରେ କ୍ରାନ୍ତିକାରୀ ଯୋଜନା ଭାବରେ ପରିଗଣିତ ହେଉଥିବା ଆୟୁଷ୍ମାନ ଯୋଜନା ସମ୍ବନ୍ଧରେ.......