କଦାଚିତ୍-କାଲିଂଦୀ ତଟଵିପିନ ସଂଗୀତକରଵୋ

ମୁଦାଭୀରୀ ନାରୀଵଦନ କମଲାସ୍ଵାଦମଧୁପଃ ।

ରମା ଶଂଭୁ ବ୍ରହ୍ମାମରପତି ଗଣେଶାର୍ଚିତ ପଦୋ

ଜଗନ୍ନାଥଃ ସ୍ଵାମୀ ନୟନପଥଗାମୀ ଭଵତୁ ମେ ॥

ଆସିବାକୁ ଯାଉଛି କାଳିଆ ରାଜା ର ବାହୁଡ଼ା ଯାତ୍ରା। ଏକ ବର୍ଷ ପ୍ରତୀକ୍ଷା ର ନୀରବତା ପରେ କେଇଦିନ ପାଇଁ ଚଳଚଞ୍ଚଳ ହୋଇ ଉଠିଥିଲା ଜନ୍ମସ୍ଥଳୀ ଗୁଣ୍ଡିଚା ମନ୍ଦିର ହେଲେ ସେ ପୁଣି ବାହୁନିବ ସେହି ଚତୁର୍ଦ୍ଧାମୂରତୀ ଙ୍କୁ , ସେହି ଦାରୁବ୍ରହ୍ମ ଙ୍କୁ ଆଉଥରେ କୋଳ ରେ ଧାରଣ କରିବାକୁ ଆଉ ଥରେ ମାତୃ ସୁଖ ଲଭିବାକୁ କିନ୍ତୁ ସେ ତ ବାହୁଡ଼ାବ୍ରହ୍ମ ସେ କାହୁଁ ରହିବ । ତାକୁ ତ ଯଶୋଦା ମା ବି ନିଜ ପଣତ ରେ ଅଟକେଇ ପାରିନଥିଲେ । ଗୁଣ୍ଡିଚାମନ୍ଦିର ତ ଭାଗ୍ୟବତୀ ଯିଏ ସେହି ଭରଷା ରେ ଅପେକ୍ଷା କରି ରୁହେକି କାଳିଆ ସୁନା ପୁଣି ଆରବର୍ଷ କୁ ଆସିବ ପୁଣି ତାଙ୍କ କୋଳ ପୁରି ଉଠିବ ହେଲେ ସେହି ପ୍ରତିଶ୍ରୁତି ବି ଅଭାଗିନୀ ଯଶୋଦା ମା ପାଖରେ ନଥିଲା। ତାଙ୍କ ଆଖିର ଲୁହରେ ଯମୁନା ରେ ଲହରୀ ଆସିଗଲା ସତ ହେଲେ କଳା କାହ୍ନୁ ବାହୁଡ଼ିଲା ନାହିଁ।

ଜନ୍ମବେଦୀ ରେ ନବଦିନ ର ଆନନ୍ଦ , ମାଉସୀ ମା ଦର୍ଶନ , ଭାଇ ଭଉଣୀ ସାଙ୍ଗରେ ଭ୍ରମଣ ଲୀଳାଖେଳା ପରେ ଦଶମୀ ରେ କାଳିଆ ଝୁଲିଝୁଲି ଆସିଯିବ ରଥ କୁ ଫେରିବାକୁ ତାର ସେହି ଶ୍ରୀମନ୍ଦିର । ଅପରପକ୍ଷରେ ଶ୍ରୀମନ୍ଦିର ସେପଟେ ଭକ୍ତି ଭାବ ରେ ଅସ୍ଥିର ପୁଣି ଥରେ କେମିତି ରତ୍ନବେଦୀ ର ଗର୍ଭ ରେ ବିଶ୍ୱନିଅନ୍ତା ଙ୍କୁ ଧାରଣ କରିବ । ଜୟ ବିଜୟ ଙ୍କ ମୁଖମଣ୍ଡଳ ରେ ଏକ ଆଶାର ଚମକ ପ୍ରଭୁଙ୍କୁ ଦର୍ଶନ କରିବାକୁ ଓ ପ୍ରଭୁଙ୍କୁ ପାଛୋଟି ନେବାକୁ। ଶ୍ରୀମନ୍ଦିର ରେ ପୁଣି ଖୁସି ର ଲହରୀ। କିନ୍ତୁ ଜଗଜ୍ଜନନୀ ମା ଲକ୍ଷ୍ମୀ ଅଭିମାନ ରେ ଅଛନ୍ତି। ହେରା ପଞ୍ଚମୀ ରେ ରଥ କୁ ଭାଙ୍ଗିସାରିଲା ପରେ ବି ମା ସାଗରନନ୍ଦିନୀ ଙ୍କର କ୍ରୋଧ ଓ ଅଭିମାନ ଶାନ୍ତ ହେଇନି। ଶାନ୍ତ ହେବ ବା କେମିତି ଯଦି ପ୍ରଭୁ ମାଙ୍କୁ ସାଙ୍ଗରେ ନେଇ ଯାଇଥାନ୍ତେ ତେବେ ମା କଣ ରାଗି ଥାଆନ୍ତେ।

ସବୁଠାରୁ ଖୁସି କିନ୍ତୁ ସେହି ବଡ଼ ଦାଣ୍ଡ। ବଡ଼ଦାଣ୍ଡ ଭାବବିହୋଳ ହୋଇ ଅଧିର ହୋଇଯାଉଛି । ଏମିତି ସୁଯୋଗ କୋଉ ପ୍ରତିଦିନ ଆସେ ଯେବେ ମହାପ୍ରଭୁ ଯାଆନ୍ତି ବଡ଼ଦାଣ୍ଡ ଦେଇ , ହଲି ହଲି ଝୁଲି ଝୁଲି ଭକ୍ତଙ୍କ ମେଳରେ। ଲକ୍ଷଲକ୍ଷ ଭକ୍ତଙ୍କ ଗହଣରେ ବଡ଼ଦାଣ୍ଡ ଆଜି ଉତ୍ସବମୁଖର । କେତେ ଦେଵଦାସୀ ଙ୍କର ନୃତ୍ୟ ରେ ରଥପଥ ଝଲସି ଉଠିବ, ହରିବୋଲ ଘଣ୍ଟ କୀର୍ତ୍ତନ ରେ ଚତୁର୍ଦିଗ ପ୍ରକମ୍ପିତ ହେବ। ଜୟ ଜଗନ୍ନାଥ ଜୟ ଜଗନ୍ନାଥ ଧ୍ୱନି ରେ ପ୍ରତିଟି ଜଗନ୍ନାଥ ପ୍ରେମୀଙ୍କ ସ୍ପନ୍ଦନ କୁ ତୁମେ ଶୁଣି ପାରିବ।

ବଡ଼ଭାଇ ବଳଭଦ୍ର , ସାନଭଉଣୀ ସୁଭଦ୍ରା ଙ୍କ ପରେ ପ୍ରଭୁ ଜଗନ୍ନାଥ ବିରାଜମାନ ହେବେ ନିଜ ରଥ ନନ୍ଦିଘୋଷ ରେ। ରଥ କହିବ ମୁଁ ଜଗନ୍ନାଥ ଆଉ ପଥ କହିବ ମୁଁ ଜଗନ୍ନାଥ। ସେଠାରେ ଉପସ୍ଥିତ କାଷ୍ଠ ଠୁ ପାଷାଣ , ଦେବ ମାନବ ଗନ୍ଧର୍ବ ସମସ୍ତେ ନିଜକୁ ଜଗନ୍ନାଥ ମନେ କରିବେ। ଓଡ଼ିଶାର ଗଜପତି ସ୍ଵୟଂ ଆସି ଚତୁର୍ଦ୍ଧା ମୂରତି ଙ୍କ ଆଗରେ ଛେରା ପହଁରା କରି ବାଟ କଡାଇ ନିଅନ୍ତି ମହାଦାରୁ ଙ୍କୁ। ଆଗେ ଆଗେ ବଡ଼ ଭାଇ ଓ ସୁଭଦ୍ରା ଦେବୀ ପହଞ୍ଚନ୍ତି ସିଂହ ଦ୍ୱାର ଆଗରେ। କାଳିଆ ସାଆନ୍ତ ନଅର ପାଖରେ ମହାଲକ୍ଷ୍ମୀ ଙ୍କୁ ଭେଟ କରି ପହଞ୍ଚିବେ ଭାଇ ଭଉଣୀ ଙ୍କ ପାଖରେ।

ଭକ୍ତ ମାନେ ଅପଲକ ନୟନ ରେ ଚାହିଁ ରହିଛନ୍ତି କେବେ ବାହୁଡ଼ା ଯାତ୍ରା ର ନିତିକାନ୍ତି ସରିବା ପରେ ରଥାରୁଢ଼ ଚତୁର୍ଦ୍ଧା ମୂରତି ସୁନା ବେଶ ରେ ଦର୍ଶନ ଦେବେ। ସୁନା ବେଶ ଦେଖି ସମସ୍ତେ ଧନ୍ୟ ଧନ୍ୟ ହୋଇଯିବେ। ଏତେ ଦିନର ମୋହତ୍ସବ ପରେ କାଳିଆ ଠାକୁର କୁ ପୁଣି ଫେରିଯାଇ ସିଂହାସନ ରେ ବସିବାର ଯେଉଁ ଉତ୍କଣ୍ଠା ଅଛି ତା ଠାରୁ ଡର ଅଛି ଲକ୍ଷ୍ମୀ ସାଆନ୍ତାଣୀ ଙ୍କ କ୍ରୋଧ କଥା ଭାବି। ସେପଟେ ମା ବି ଅନାଇ ରହିଛନ୍ତି ଏଥର ମନ୍ଦିର ରେ ପ୍ରବେଶ କରାଇଦେବେ ନାହିଁ ତାପରେ ଯାଇ ପ୍ରଭୁ ବୁଝି ପାରିବେ। ଦେଢ଼ଶୁର ବଳଭଦ୍ର ଓ ନଣଦ ସୁଭଦ୍ରା ଦେବୀ ଙ୍କୁ କଣ ବା ରୋକିବେ ରହିବେ ତ କେବଳ ଚକା ଆଖି। ହେଲେ ଲୀଳା ମୟ ତ ସ୍ଵୟଂ ମାୟାପତି ନିଜର ଅଭିମାନିନି ଘରଣୀ ଜଗଜ୍ଜନନୀ ଙ୍କୁ ଶାନ୍ତ କରିବାକୁ ଆଣିଛନ୍ତି ତାଙ୍କର ମନ ପସନ୍ଦ ର ରସଗୋଲା। ଆଉ କଣ ମା ରାଗି ପାରିବେ ? ନା ମ ଇଏ ତ ସବୁ ଓଡ଼ିଆ ଘରର କାହାଣୀ ସ୍ଵାମୀ ସ୍ତ୍ରୀ ଙ୍କ ଭିତରେ ମନାନ୍ତର ହୁଏ ସିନା ତାକୁ ପ୍ରଶମିତ କରିବା ପାଇଁ ଟିକେ ଭଲ ପାଇବା ଖାଲି ଦରକାର। ଆଉ ଓଡ଼ିଆ ଘରର ସାଆନ୍ତ ସାଆନ୍ତାଣୀ କେମିତି ବାଦ୍ ପଡ଼ିବେ। ମାଆ ରାଗ ଭାଙ୍ଗି ଦେଇ ମୁରୁକି ହସି ପ୍ରଭୁଙ୍କୁ ଛାଡ଼ି ଦିଅନ୍ତି ଦେଉଳ ଭିତର କୁ। ପ୍ରଭୁ ବି ଆର ଥର କୁ ସାଙ୍ଗରେ ନେବେ କହି ଦୀର୍ଘ ନିଶ୍ଵାସ ପକାଇ ଭିତରକୁ ଚାଲି ଯାଆନ୍ତି ତଥା ନୀଳାଦ୍ରି ବିଜେ କରନ୍ତି। କେଡ଼େ ସୁନ୍ଦର ଏହି ମାନବୀୟ ଲୀଳା ଖେଳା ପତିତଜନ କୁ ଉଦ୍ଧାରିବା ପାଇଁ କି କି ବାହାନା ନକରିବାକୁ ପଡୁଛି।

ରତ୍ନ ସିଂହାସନ ପ୍ରଭୁ ଙ୍କୁ ଫେରି ପାଇ ନିଜକୁ ଧନ୍ୟ ମନେ କରୁଛି। ବିଭୋର ହୋଇ ଯାଉଛି ପୁନର୍ବାର ଚତୁର୍ଦ୍ଧା ମୂରତି ଙ୍କୁ ସ୍ଥାନ ଦେଇ ନିଜ କୋଳ ରେ। ଆଉ ସେପଟେ ଭକ୍ତ ଅପେକ୍ଷା ପୁଣି ଆର ବର୍ଷ କାଳିଆ ଠାକୁର ଆସିବ ତାଙ୍କ ଗହଣରେ ହସି ଖେଳି ଦେହରେ ନେଶି ହୋଇ ସମସ୍ତଙ୍କ ଜୀବନ କୁ ଚରିଥାର୍ଥ କରିଦେବ। ଆପଣ ସମସ୍ତଙ୍କୁ ଆଗୁଆ ବାହୁଡା଼ ଯାତ୍ରା ର ହାର୍ଦିକ ଅଭିନନ୍ଦନ।

"ଜଗନ୍ନାଥ ସ୍ଵାମୀ ନୟନ ପଥଗାମୀ ଭବ ତୁମେ"

ଜୟ ଜଗନ୍ନାଥ

ଧନ୍ୟବାଦ

କୈବଲ୍ୟ ନାୟକ

ବାହୁଡ଼ାବ୍ରହ୍ମ ଙ୍କ ବାହୁଡ଼ା ଯାତ୍ରା| Bahudajatra of Bahudabrahma

ବାହୁଡ଼ା ଯାତ୍ରା ୨୦୨୪ Bahudajatra 2024