ବିଶ୍ଵ ପୋଥିର ଦୁଇ ପୃଷ୍ଠା,

ଖୁବ୍ ମନୋଯୋଗ ସହକାରେ

ବର୍ଷ ବର୍ଷ ଧରି ଅନୁଧ୍ୟାନ କରି,

ଏତିକି ମାଗୁଣି ମୋର

ହେ ବିଶ୍ୱନିୟନ୍ତା!

ମତେ ବରମଞ୍ଜି କରିଦିଅ

ବରପୁତ୍ର ନ କଲେ ନ କର ପଛକେ

ବରମଞ୍ଜି ହେବାର ଆଶୀର୍ବାଦ ଚାହେଁ

ସମାଜର କାଉମାନେ ମତେ ଗିଳିଲେ ବି

ତାଙ୍କର ଜଠରାନଳ ମତେ ଜାଳି ପାରିବେନି ।

ମାଟି ମତେ ଦୂରେଇ ଦେଲେ ଦେଉ

ଆକାଶ ବି ନ ଦେଉ ଆଶ୍ରୟ

ସିମେଣ୍ଟ ତିଆରି କେଉଁ କୋଠାଘରର

କଂକ୍ରିଟ୍ ଢଳା ଖୋଲା ଛାତ

ଟିକିଏ ମିଳିଲେ

କାଉର ପେଟରୁ ବାହାରି ସେମିତି

ଉଦୁଉଦିଆ ସୂର୍ଯ୍ୟକିରଣରେ

ମୁଁ ଶୁଖିଯିବିନି,

ବରଂ ଟାଣ ହେବି

ଆଉ ଟିକେ , ଶକ୍ତ ହେବ

ମୋ ଅନ୍ତର୍ଚେତନା ।

କେଉଁ ଦିନ କେଉଁଠୁ ଟୋପେ ପାଣି

ପାଇଗଲେ ମେଲେଇ ବି ଡାଳପତ୍ର

ଚେର ମୋର ମାଡ଼ିଯିବ ଚାରିଆଡ଼େ

ଦୁର୍ନୀତିର ସେ ହତାକୁ

ମୁଁ ନିଶ୍ଚୟ ଛାରଖାର କରିଦେବି

ଦୃଢ଼ ମୋର ଏ ନିଷ୍ପତ୍ତି

ପ୍ରତିଶ୍ରୁତି ଭାଙ୍ଗିବାର ନୁହେଁ

ଖାଲି ଟିକିଏ ଗଜୁରିବାର

ବରଦାନ ଦିଅ !

ବରମଞ୍ଜି ହେବାର ବରଦାନ ଦିଅ !

ମତେ ବରମଞ୍ଜି କରିଦିଅ,

ମତେ ବରମଞ୍ଜି କରିଦିଅ ।

ଓଡ଼଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ ମୁଖ୍ୟ କାର୍ଯ୍ୟାଳୟ ,ସମ୍ବଲପୁର (ବିଭାଗୀୟ ମୁଖ୍ୟା(ଓଡ଼ଆ))

ଯୋଗାଯୋଗ - ୭୯୭୮୮୬୪୬୧୨

ବର ଭିକ୍ଷା vara Bhikhya