ପେନ୍ଥି ପେନ୍ଥି କଞ୍ଚା ଆମ୍ବର ସୁବାସ
ବସନ୍ତ ଡହକୁ ନିନ୍ଦେ
କେଣେ ଗଲା ତୁମ ଚନ୍ଦନ ମଳୟ
ପିକ ରହି ପୁଛେ କୁଞ୍ଜେ ।
ଆହେ ଋତୁ ରାଜ,
ଉତ୍ତରିବ କି ହେ ନିଜେ.....୧

ମଧୁପ ଗୁଞ୍ଜନ ଶୁଭେନା ଶୋଭେନା
କୁସୁମିତ ତରୁ ଡାଳେ,
ରୌଦ୍ର ପ୍ରଖରେ ଧରଣୀ ଯେ ଜରେ
ରହିଲହେ କେଉଁ ଛଳେ ।
ଆହେ ଋତୁ ରାଜ,
କିମ୍ପା ଅସହ୍ୟ-ଏ-ତୁମ୍ଭ କାଳେ.....୨

ଜଡ଼ ପ୍ରାୟ ତୁମ୍ଭ ଶୀତଳ ସମୀର
ଅସ୍ତ ବ୍ୟସ୍ତ ଜୀବଧନ
ଜଳି ଯାଏ ବନ ଜଳି ଯାଏ ଧନ
ଜଳି ଯାଏ ଚଷା ମନ ।
ଆହେ ଋତୁ ରାଜ,
କୁହ ଏ'କି ତୁମ୍ଭ ରାଜ ପଣ ?.....୩

ଯେହ୍ନେ ପୁଷ୍ପକାଳ ଲାଗଇ କରାଳ
ରବି ସମ ଶଶି ପ୍ରାୟ,
ଲୁଚାଇଲ କେଣେ ଶୀତଳ ଯୋଛନା
ଜୀବନ ହୁଏ ଅଥୟ ।
ଆହେ ଋତୁ ରାଜ,
କୁହ କୁହ କିବା ତୁମ୍ଭ ଲୟ.....୪

ଗୋରୁ ହମାଳନ୍ତି ଗୋଠ ଛାଡ଼ିଦେଇ
ନ ପାଆନ୍ତି କ୍ଷଣେ ଛାୟା
ଜଳ ବିହୁନରେ ତଣ୍ଟି ଶୁଖି ଯାଏ
କରେ ବାୟା ଗ୍ରୀଷ୍ମ ବାଆ ।
ଆହେ ଋତୁ ରାଜ,
ଜୀବେ ହୁଅରେ ଟିକିଏ ସାହା....୫

ନଦ ନଦୀ ସମ ମରୀଚିକା ଦୃଶ୍ୟ
ପକ୍ଷୀ ହୁଡ଼ି ଯାଏ ପଥ
ସବୁଜ ବନାନୀ ହେଲା ମରୁଭୂମି
ନଗଡ଼େ ସଂସାର ରଥ ।
ଆହେ ଋତୁ ରାଜ,
ହେଲକି ଉଷ୍ମକ ମିତ......୬

ସିନ୍ଦୁରା ବିହୁନେ ଚମକେ ଗଗନେ
କୁକୁଟ ହଜାଏ ବୋଧ
ରାତି ଗଡ଼ି ଯାଏ ନିମିଷ ମଧ୍ୟରେ
ନବ ବଧୂ ଖୋଜେ ନିଦ ।
ଆହେ ଋତୁ ରାଜ,
କର କି କପଟ ଛନ୍ଦ......୭

କି କରିବ ଭଲା ଆହା ପଲ୍ଲୀ ବାଳା
କେଡ଼େ ନିରିଦୟ ନୀର
ଫୋଟକା ହେଲାଣି କଅଁଳ ପାଦ ତା'
କାଖେ ଧରି କୁମ୍ଭ ଭାର ।
ଆହେ ଋତୁ ରାଜ,
ଜୀବନ ଲାଗଇ ଛାର......୮

ହଳଦୀ ବସନ୍ତ ରଙ୍ଗ ଲାଗେ ଫିକା
ଦାରୁଣ ନିଦାଘ ପାଇଁ
ପଳାଶ କୁସୁମ ବେଳସୁଁ ଝଡ଼ଇ
ଅପୂର୍ଣ୍ଣ ଜୀବନ ନେଇ ।
ଆହେ ଋତୁ ରାଜ,
ଧାନ ଛାଁକୁ ହୁଅଇ ଖଇ.....୯

ନବ ଦଳ,ଦଳ,କୋମଳ କମଳ
ନ ପାଆନ୍ତି ଜଳ ବଳ
ନଳ,ନୀଳ ପାସ ନଯାଏ ମରାଳ
କୂଳରେ ଶୁଭେନା କଳ ।
ଆହେ ଋତୁ ରାଜ,
ଶୁଣ କ୍ରନ୍ଦନ ତାଙ୍କ ଆକୁଳ.....୧୦

ବୈଶାଖୀ ପବନ କରେ ଛିନ୍ନଭିନ୍ନ
ଗାଁ ବାରି ଘର ଚାଳ
ଗରିବ କାନ୍ଦଇ ନଷ୍ଟ ହେଇଗଲେ
ବିଲରେ ତିଅଣ ଫଳ
ଆହେ ଋତୁ ରାଜ,
ଅଦିନ ତୁଷାର କାଳ......୧୧

କବି କୁଳ ଆହା କରଇ କ୍ରନ୍ଦନ
ନପାଇ ରୂପ ସୁଷମା
ମଉଳି ଯାଇଛି ବସନ୍ତ ଚମକ
କି କରିବ ସେ ବର୍ଣ୍ଣନା ।
ଆହେ ଋତୁ ରାଜ,
ପାଏନା କବି ଉପମା.....୧୨
-------------------------------------
ସାରଦା ପ୍ରସନ୍ନ ନାୟକ
କଟକ
୦୫- ମଇ -୨୦୨୩

ବସନ୍ତ କଷ୍ଟ